लुका 1
1
ज़ानकारी
1ओ थियुफिलुस साहब, यीशु मसिऐ ज़ो कुछ़ काम आमु मांझ़िऐ पुरौ कियौ आ, तिऊं बुशु रै बारै दी भौरी लोगुऐ लिखणे री कोशिश की आ। 2इऐ खुशी री खौबर लोगु झ़ांऊ यीशु रै तिऊं पैहलै च़ेलेऊ रै ज़ौरिऐ पौउंच़ौ आ ज़ुणिऐ इऐ बुशै आपणी आखी कौरीऐ पुरी औन्दै देखी थी और इऐ खुशी री खौबर आमुकै तिऊंकु मिली आ ज़ुण तेबी तिऐ ज़िउंदै मान थै। 3तैबै मुंइऐ यीशु रै बारै दी ज़नमा कु सारी बुशै पौरखियौ इणौ फैसलौ कियौ कि इऐ एक-एक बूश सुंच़ी सौमझ़िऔ तांउलै लिखु, 4ताकी ताउंकै पौतौ लागा की ज़ेज़ी शिक्षा ताउंलै मिली ऐन्दी और ज़ेज़ी तू सौच़्च़ी माना ई सै बूश ठीक और पाकी आ।
यहुन्ना पैदा हुणै री खुशी री खौबर
5सारी बुशु री शुरुआत यहुदी याजक जकरयाह नावां रै आदमी कु हुई आ ज़ुण यहुदिया रौ राज़ौ हेरोदेसा रै बौगता दी ज़िउंदौ थौ, जकरयाह याजक अबिय्याह नावां रै याजकीयै गुटा रौ आदमी थौ और जकरयाह री छ़ेउड़ी इलिशीबा थी हारुन नावां रै याजकु री खानदानी री। 6जकरयाह और इलिशीबा परमेश्वरा री नौज़रीऐ धौर्मी थै, और सै दुइया परमेश्वरा रै हुकम और विधी आच़्छ़ा कौरी माना थै। 7पर इलिशीबा रै कोई भी औलाद नाईं थी कैलैकि तिंआरी कूख बन्द थी और सै दुइया बुड़ै थै।
सौरगदूतु रै ज़ौरिऐ यहुन्ना रै ज़नमा री भविष्यवाणी
8एकी दिनै ज़ेबी जकरयाह रै गुटा रै लोग ज़ो याजक थै सै परमेश्वरा रै घौरा दी याजका रौ काम कौरा थै कैलैकि तेबी तिउंरी बारी थी। 9याजकु री रीती रिवाज़ा कौरी जकरयाह नावां री चिट्ठी निकल़ी कि सेऊ परमेश्वरा रै घौरा भितै डेइयौ धूप ज़ाल़ा 10धूपा ज़ाल़ना रै बौगतै लोगु री भीड़ बाइरै प्राथना कौरदै थी लागी ऐन्दी। 11सेज़ै बौगतै जकरयाह कै परमेश्वरा रौ एक दूत बेदी री सुल़टी भिलै पौगड़ौ हुइयौ दिशौ। 12जकरयाह तेस दूता देखीयौ डौरौ और कांबदै लागौ। 13पर तिणी दूतै तेसलै बोलौ, “ओ जकरयाह, नाईं डौर कैलैकि ज़ो प्राथना तांऐ सन्तान पाइणा लै की आ, सै प्राथना परमेश्वरै शुणी गोई आ, ‘तेरी छ़ेउड़ी इलिशीबा रौ एक मांऊ हुआ, तू तेसरौ नाऊं यहुन्ना छ़ाड़ै,’ 14तेस पैदौ हुइयौ ताऊं लै और भौरी लोगु लै बौड़ी खुशी हुआ आ, 15कैलैकि सेऊ प्रभु री नौज़री दी बौड़ौ हुआ। सेऊ केबी भी अंगुरा रौ रस और सूर नाईं पिंदौ। आपणी मां रै गर्भा कु ई सेऊ परमेश्वरा री पवित्र आत्मा कौरी भरपूर हुआ सा। 16ज़ैबै सेऊ बौड़ौ हुआ लौ तैबै सेऊ आपणै संदेशा कौरीऐ इस्राइलिऊ लोगु मांझ़िया कु भौरी लोगु आपणै प्रभु परमेश्वरा भिलै आणा आ। 17सेऊ परमेश्वरा रै दास, एलियाह भविष्यवक्ता ज़िणौ आत्मिक और शक्तिशाली हुणौ आ। सेऊ प्रभु रै ज़नमा कु पैहलै आशा, ताकी प्रभु कालै आदमी तैयार कौरा। ताकी सारेऊ रै मां-बाबा रौ मन आपणै लोल़डेऊ भिलै फेरा, और तिउंलै हुकम मानणै री शिक्षा दिआ आ।” 18जकरयाहा ऐ सौरगदूता कु पुछ़ौ, “ज़ो तांऐ बोलौ आ तेस हाऊं सौच़्च़ौ किणै कौरी मानु? कैलैकि हाऊं ता गो ऊ बुड़ौ हुई और मेरी छ़ेउड़ी भी गोई बुढ़ी हुई? 19तैबै सौरगदूतै तेसलै ज़वाब दैऔ, ‘मैरौ नाऊं ज़िब्राइल आ और हाऊं सौदा परमेश्वरा काऐ खौड़ौ रौआऊ। और तेसरी मिठी बुशै शुणाऊ। तिणीऐ ई हाऊं एज़ी खुशी री खौबरी कौरी ताऊं काऐ भेज़ौ ऊ। 20और ज़ो बूश मुंइऐ ताऊं आइलै बोली आ, ताऐं तेथ माथै विश्वास नाईं कियौ, आबै ज़ेबी झ़ांऊ तैरौ छ़ोहरु नाईं औआ लौ तेबी झ़ांऊ तू लाटौ रौआ ई और कुछ़ भी बोली नाईं बौल़दौ कैलैकि ज़ो बूश मुंइऐ ताऊं लै बोली आ, सै बूश आपणै ठीक बौगता दी पुरी हुआ आ।’ 21तैबै लोग दारा काऐ जकरयाह बाइरै पौखदै थै लागै औन्दै, सै परेशान थै हुऐ औन्दै कि जकरयाह कै परमेश्वरा रै घौरा भितै एती बौगत कैलै लागौ औलौ? 22ज़ेबी जकरयाह भितरा कु बाइरै आशौ ता तिऊं लोगु आइलै सेऊ कुछ़ भी ना बोली बौल़ौ। और सै सौमझ़ी गौऐ कि इणीऐ परमेश्वरा रै घौरा भितै कोई दर्शण देखौ। सेऊ तिऊं आइलै इशारै कौरी बुशै लाइंदै लागौ कैलैकि सेऊ लाटौ बौणी गौ थौ। 23ज़ैबै जकरयाह री सेवा कौरणै री बारी पुरी हुई तैबै सेऊ आपणै घौरै डैऔ। 24तेथकु कुछ़ बौगता बासिऐ तेसरी छ़ेउड़ी इलिशीबा गौरकड़ी हुई और पांज़ा मिहनै झ़ांऊ तिंउऐ इऐ बुशै कासी आइलै ना बोली, 25और सै आपणै ज़िवा दी सुंच़दै लागी कि परमेश्वर केती दयालु आ कि मुं आइलै केती बौड़ौ काम कियौ आ।”
यीशु पैदा हुणै री खुशी री खौबर
26ज़ैबै इलिशीबा रै छ़ौउऔ मीहनौ हुऔ, तैबै परमेश्वरै ज़िब्राइल नावां रौ दूत गलील परदेशा रै नासरत इलाकै दी, 27मरियमा काऐ भेज़ौ ज़ुण बिण ब्याई थी। और तिंआरी मांगणी युसुफ नावां रै छ़ोहरु लै थी हुई ऐन्दी ज़ो दाऊद राज़ै री खानदानी रौ थौ। 28परमेश्वरा रौ दूत मरियमा काऐ पौगड़ौ हुऔ और बोलदै लागौ, तेरी ज़ै-ज़ै कार हो, ताऊं माथै परमेश्वरा री दया हुई आ, और परमेश्वर ताऊं आइलै आ। 29इऊं बुशै शुणियौ मरियम डौरी और हैरानी कौरीऐ सुंच़दै लागी कि एस ज़ै-ज़ैकारा री खुशी री खौबरी रौ का मतलब औलौ? 30परमेश्वरा रै दूतै मरियमा लै बोलौ, “ओ मरियम डौरै नाईं कैलैकि परमेश्वरा री बौड़ी दया ताऊं माथै हुई आ। 31शुण! तू गौरकड़ी हुआई, और ताऊं कु एक छ़ोहरु हुआ, तू तेसरौ नाऊं यीशु छ़ाड़ै। 32सेऊ सारेऊ कु बौड़ौ हुआ आ और तेसलै परमपरधान परमेश्वरा रौ छ़ोहरु बोलाई और प्रभु परमेश्वर तेसकै तेसरै पुरखा दाऊद राज़ै री राज़गादी दिआ सा। 33और सेऊ इस्राइली लोगु माथै सौदा राज़ कौरा आ। तेसरौ राज़ केबी भी खातम नाईं हुन्दौ। 34मरियमै परमेश्वरा रै दूता लै बोलौ, ‘इणौ किणै कौरी हुआ? हाऊं ता औज़ौ बिण ब्याई छ़ोटूड़ ऊ।’ 35परमेश्वरा रै दूतै तिंआलै ज़वाब दैऔ, ‘पवित्र आत्मा ताऊं दी आशा, और परमपरधान परमेश्वर ज़ुण सारेऊ कु बौड़ौ आ तेसरी शक्ति ताऊं माथै आशा। ज़ो छ़ोहरु ताऊं कु हुणौ आ सेऊ पवित्र हुणौ, और तेसलै परमेश्वरा रौ छ़ोहरु बोलाई।’ 36और शुण तेरी रिश्तैदार इलिशीबा भी बुड़ींदी बारै गौरकड़ी हुई आ। लोग तिंआलै बोला थै कि इआंरी आ कूख बन्द, पर तिंआरै आज़कालै छ़ौउऔ मीहनौ आ। 37कैलैकि परमेश्वरा लै केज़ौ भी काम कठिण नाईं आसतौ। 38एज़ी बुशा माथै मरियमै बोलौ, ‘देख, हाऊं ता परमेश्वरा री दासी ऊ, ज़िणौ ताऐं बोलौ आ, तिणी च़ांई हुऔ। तेथ बासिऐ सौरगदूत तिंया काऐ कु डेई गौ।’ ”
मरियमा रौ इलिशीबा कु मिलदै डेउणौ
39“कुछ़ दिना बासिऐ मरियम तैयार हुइयौ डांडैउ माथै यहुदा परदेशा रै एक इलाकै दी डेई। 40ज़िऐ जकरयाह रौआ थौ तेसरै काऐ डेइयौ मरियमै तेसरी छ़ेउड़ी इलिशीबा कै ढाल की। 41ज़िणी ई इलिशीबै मरियमा री ढाल शुणी, तिणी ई इलिशीबा रै पेटा दी मांऊ हिलदै लागौ, और इलिशीबा परमेश्वरा री पवित्र आत्मा कौरीऐ भौरुई। 42तैबै तिंआऐ ज़ोरै मरियमा लै बोलौ, ‘तू सारी छ़ेउड़ी मांझ़िया कु परमेश्वरा री नौज़री दी भौली ई, और तैरौ गर्भा रौ छ़ोहरु भी भौलौ आ।’ 43इऐ केती बौड़ी इज़्ज़ता री बूश आ, कि मैरै प्रभु री मां मुं ज़िणी छ़ेउड़ी कु मिलदै आशी आ। 44ज़िणी ई ताऐं मुकै ढाल की आ, तिणी ई मैरै पेटा दी मांऊ खुशी कौरीऐ हिलदै लागौ। 45भौली तू कैलैकि ताऐं विश्वास कियौ आ, कि ज़ो भी बूश परमेश्वरा री तौरफा कु बोली आ सै बूश पुरी हुआ आ! ”
मरियमा रै स्तुति-भजन गाइणै
46तैबै मरियमै बोलौ, “हाऊं प्रभु री बौड़ाई कौराऊ, 47आ… हा… मेरी आत्मा मैरै छ़ुटकारौ कौरणै वाल़ै परमेश्वरा री बौड़ाई कौरा आ। 48कैलैकि परमेश्वरै आपणी दासी री गरीबी देखी आ एथीलै, ‘ओ परमेश्वर आज़ा कु मुलै जुगा-जुगा झ़ांऊ भौलौ बोलाई’ 49तिणी परमेश्वरै ज़ुण सारेऊ कु शक्ति वाल़ौ आ मुलै बौड़ै-बौड़ै काम किएई। तेसरौ नाऊं पवित्र आ।” 50ज़ुण परमेश्वरा रौ डौर माना ई तिऊं माथै परमेश्वरा री दया तिंउरै सारी पीड़ी झ़ांऊ रौआ आ। 51परमेश्वरै आपणी बाई री एती शक्ति देखा ई, ज़ुण आपुलै बौड़ै बौणा थै सै किणै तित्तर-बित्तर किएई। 52तिणी परमेश्वरै राज़ै-महाराज़ै कु तिऊंरौ हक्क छ़ुड़ाऔ आ, और गरीबु री छ़ाड़ी इज़्ज़त। 53और भुखै लोगु लै खिलाई आच़्छ़ी-आच़्छ़ी रोटी, और सेठ गाड़ै खाली हाथै बाइरै। परमेश्वरै आपणै इस्राइली लोगु री मज़द की, और तिऊं आइलै कियौ औन्दौ आपणौ वायदौ नाईं बिसुरदौ। 54परमेश्वरै आपणै इस्राइली लोगु माथी बौड़ी दया की, और तिऊं आइलै कियौ औन्दौ आपणौ वायदौ नाईं बिसुरदौ। 55तिणीऐ आमारै पुरखा अब्राहम और तिंउरै वंशा आइलै वायदौ कियौ कि परमेश्वरा री दया तिऊं माथै सौदा बौणी रौआ। 56मरियम कम सै कम चिया मिहनै झ़ांऊ इलिशीबा आइलै रौई, और तेथ बासिऐ डेई वापिस आपणै घौरै।
यहुन्ना बपतिस्मौ देणै वाल़ौ पैदौ हुणौ
57तैबै इलिशीबा रै औल़खिणा रै दीन पुरै हुऐ और तिंआरौ एक मांऊ हुऔ। 58और इऐ खुशी री खौबर खरकच़ार तिंआरै आस-पड़ोसा दी और सारै रिश्तैदारु मांझ़िऐ फौइली गोई, कि प्रभुऐ तिंआ माथै बौड़ी दया की आ। तैबै सौभीऐ तिंआ आइलै खुशी मौनाई। 59ज़ैबै सेऊ मांऊ आठा दिना रौ हुऔ तेबी सारै रिश्तैदार और गोश्टण तेस मांऊ रौ खतना कौरना लै कौठै हुऐ, सै तेस मांऊ रौ नाऊं तेसरै बाब जकरयाह ज़िणौ छ़ाड़दै लागै, 60पर तेस मांऊ री आमै तेसरौ नाऊं छ़ाड़ना लै मौना की, और बोलौ, “एसरौ नाऊं यहुन्ना जा छ़ाड़णौ।” 61इणै शुणियौ सारै लोगुऐ हैरानी कौरीऐ पुछ़ौ, “कैलै”? तैरै टौबरा दी ता एज़ै नावां रौ कोई नाईं? 62तैबै रिश्तैदारुऐ तेस मांऊ रै बाबा कु साना कौरीयौ पुछ़ौ। 63तिणी जकरयाह ऐ लिखणा लै तौखती मांगी और तिदरा ई लिखौ कि एसरौ नाऊं यहुन्ना सा। इणै शुणियौ सारै हैरान हुऐ। 64तैबै जकरयाह बेज़ौ बौणौ और परमेश्वरा री बौड़ाई कौरदै लागौ। 65तेसरै आस-पड़ोसा दी रौइणै वाल़ै भौरी का लोग डौरी गौऐ, और इऐ बुशै यहुदा परदेशा रै सारै पहाड़ी इलाकै दी फौइली गोई। 66सारै शुणनै वाल़ै आपणै ज़िवा दी सुंच़दै लागै कि एऊ छ़ोहरु किणौ औलौ इणौ पा? कैलैकि प्रभु री शक्ति एस मांऊ आइलै थी।
जकरयाह रै स्तुति-भजन गाइणै
67तैबै मांऊ रै बाब जकरयाह माथै परमेश्वरा री पवित्र आत्मा आशी और सेऊ भविष्यवाणी कौरदै लागौ। 68इस्राइला रै प्रभु परमेश्वरा री बौड़ाई च़ांई हुई, कैलैकि परमेश्वरै लोगु माथै तौंइऐ दया कौरीयौ तिऊंरौ छ़ुटकारौ कियौ आ। 69और आपणै दास दाऊदा रै वंशा कु आमु कालै एक पापा कु छ़ुटकारौ देणै वाल़ौ भेज़ौ। 70ज़िणौ तिणीऐ पुराणै बौगता रै पवित्र भविष्यवक्ता रै ज़ौरिऐ बोलौ थौ, 71कि आबै आमै आपणै सारै दुश्मना रै हाथा कु बौच़ी ई। 72परमेश्वरै आपणौ पवित्र वायदौ ज़ो आमारै पुरखा आइलै कियौ थौ तेस वायदौ याद छ़ाड़ियौ आपणै लोगु माथै दया की। 73और सै कसम ज़ो परमेश्वरै अब्राहमा आइलै खाई थी 74कि परमेश्वर आमु आमारै दुश्मना रै हाथा कु छ़ुड़ावा ताकी आमै आपणै दुश्मना कु निडर हुइयौ परमेश्वरा री सेवा, 75तिंउरै सामनै पवित्र और नियम भौलाई कौरी सारी उमरीऐ कौरी सौका 76और ओ छ़ोहरु ताउंलै लोग परमपरधान परमेश्वरा री तौरफा कु भेज़ौ औन्दौ भविष्यवक्ता बोलाई, कैलैकि तू प्रभु कालै लोगु तैयार कौरा ई। 77तू तिऊं लोगु कै शिखावा ई कि पापा री माफी पाइयौ, छ़ुटकारौ किणौ मिला आ। 78इयौ सब परमेश्वरा री बौड़ी दया कौरीऐ हुआ, ज़िणौ सुरज आमुलै प्याशै दैणा लै च़ौमका आ, तिणी ई परमेश्वर नौऐ काम कौरा आ ज़ेबी मसीह आमु काऐ आशा लौ। 79न्यारै और मौरणै रै डौरा री छ़ांई दी रौइणै वाल़ेऊ लै पयाशौ दिआ, और आमारै कदम शान्ति कौरीयौ आच़्छ़ी बाटा दी सिधै हंडावा। 80तैबै सेऊ मांऊ यहुन्ना बौड़दै लागौ और आत्मा दी मज़बूत औन्दै लागौ, और इस्राइली लोगु मांझ़िऐ सेऊ पौगड़ौ हुंदै झ़ांऊ सेऊ शुनशान ज़ागाह दी रौ।
Currently Selected:
लुका 1: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
