लुका 2

यीशु रौ ज़नम

(मत्ती 1:18-25)

1सेज़ै दीनु दी औगस्तुस नावां रै रोमी राज़ै हुकम दैऔ कि रोमी राज़ा रै सारै लोग आपणै-आपणै नाऊं दर्ज़ कौरौ। 2इऐ पैहली नाऊं लिखाई थी, और इऐ तेबी हुई ज़ेबी क्विरिनियुस नावां रौ आदमी सीरिया देशा रौ आफसर थौ। 3तैबै सारै लोग आपणै नाऊं लिखाउंदै आपणै-आपणै इलाकै दी डेवै। 4युसुफ भी ज़ुण गलील परदेशा रै नासरत गांवा रौ थौ, आपणै नावां लिखाउंदै यहुदा परदेशा दी दाऊदा राज़ै रै गाऊं बैतलैहमा दी डैऔ। कैलैकि सेऊ दाऊदा री खानदानी रौ थौ। 5सेऊ आपणी मंगेतर मरियमा आइलै ज़ुण गौरकड़ी थी तिऐ नाऊं लिखाउंदै डैऔ। 6तिंउरै तिऐ रौइणा रै बौगता दी मरियमा रै, औल़खिणा रै दीन पुरै हुऐ। 7मरियमा रै तिऐ पैहलौ ज़ाऔ हुऔ और तिंआऐ सेऊ जुड़कै दी मेटाइयौ खोरली दी छ़ाड़ौ, कैलैकि तिउंकै सरायं दी रौइणा लै ज़ागाह नाईं थी।

सौरगदूतु रै ज़ौरिऐ भेराल़डु लै खुशी री खौबर

8सेज़ै इलाकै दी कुछ़ भेराल़डु थै ज़ुण राची, थाचा दी रौइयौ आपणै शाल़ा री च़ोकीदारी कौरा थै। भेराल़डु आपणी भेरीऊ ज़ागदै 9सेज़ी राची परमेश्‍वरा रौ एक दूत तिऊं काऐ आशौ और तिऊं भेराल़डु रै च़ारौ तौरफा दी प्याशौ च़ौमकौ। तैबै तेस देखीयौ सै भौरी डौरी गौऐ 10तिणी दूतै तिउंलै बोलौ, “डौरौ नाईं” कैलैकि हाऊं तुमुकै आज़ बौड़ी खुशी री खौबर शुणाउवाऊ ज़ो सारै लोगु लै आ। 11आज़ दाऊदा रै इलाकै बैतलैहम गांवा दी तुमारौ छ़ुटकारौ कौरणै वाल़ौ पैदौ हुई गौ आ ज़ो प्रभु मसीह आ। 12और तेसरी निशाणी तुमुलै इणी सा, कि तुमुकै एक मांऊ खोरली भितै जुड़कै दी मेटाऔ औन्दौ मिला सा।

13तैबै तिऐ सौरगदूता आइलै सौरगा रै भौरी दूत परमेश्‍वरा री बौड़ाई कौरदै और इणै बोलदै दिशै, 14“सौरगा दी परमेश्‍वरा री बौड़ाई च़ांई हुई। और धौतरी माथै तिऊं लोगु लै शान्ति च़ांई मिली ज़ासकु परमेश्‍वर खुश हुआ आ।”

भेराल़डु रौ बैतलैहमा लै डेउणौ

15ज़ेबी सौरगदूत तिऊं काऐ कु सौरगा लै डेवै तैबै भेराल़डु आपु मांझ़िऐ बोलदै लागै कि, आशौ आमै बेतलैहमा लै डेई ई ज़ो बूश प्रभुऐ आमुकै शुणाई आ तिऐं आमै देखी ई। 16तैबै सै तिदरु फेटी डेवै, तिंउऐ तिऐ मरियम, युसुफ और खोरली भितै सेऊ मांऊ देखौ। 17इणै देखीयौ तिऊं भेराल़डुऐ सै बूश ज़ो एस मांऊ रै बारै दी पैहलै शुणी थी सै सारेऊ कै बोली। 18भेराल़डु री इऊं बुशै शुणियौ सारै लोग हैरान हुऐ ज़ो तिऐ थै। 19पर मरियमै इऐ सारी बुशै शुणियौ आपणै ज़िवा दी छ़ाड़ी और सुंच़दै लागी। 20भेराल़डु लै, ज़िणौ सौरगदूतै बोलौ औन्दौ थौ तिणौ सारौ शुणियौ और देखीयौ परमेश्‍वरा री बौड़ाई और स्तुति कौरी-कौरीयौ तिदरु वापिस डेवै।

यीशु रौ नाऊं छ़ाड़णौ

21आठा दिना बासिऐ ज़ैबै तेस मांऊ रौ खतना हुऔ। तैबै तेसरौ नाऊं यीशु छ़ाड़ौ ज़ो सौरगदूतै तेसरै गर्भा दी आशणै कु पैहलै बोलौ थौ।

परमेश्‍वरा रै घौरा दी यीशु परमेश्‍वरा री सेवा लै दैणै

22कुछ़ बौगता बासिऐ मुसा भविष्यवक्ता रै नियमा कौरीऐ तिंआरै शुद्ध हुणै रै दीन पुरै हुऐ, तिंउऐ यीशु परमेश्‍वरा रै घौर यरुशलेमा दी निऔं। 23ज़िणौ प्रभु रै नियमा दी थौ लिखौ औन्दौ कि केज़ौ भी पैहलौ छ़ोहरु प्रभु कालै पवित्र हुआ सा। 24और प्रभु रै नियमा दी ज़िणौ ठीक थौ, कबुतरा रै ज़ोड़ै या पंडुका रै ज़ो कबुतरा ज़िणै हुआई देखणा लै, तिंउऐ सै आणियौ बौल़ी किऐ।

शमौना रौ गीत

25सेज़ै बौगता दी यरुशलेमा दी शमौन नावां रौ एक आदमी थौ ज़ुण धौर्मी और परमेश्‍वरा रौ भौगत थौ, सेऊ पवित्र आत्मा कौरीऐ भरपूर थौ, और सेऊ आपणै लोगु इस्राइला लै सुख शान्ति पौखदै थौ लागौ औन्दौ। 26पवित्र आत्मै तेसरै ज़िवा दी बूश थी पाई ऐन्दी कि, ज़ेबी झ़ांऊ तू परमेश्‍वरा री तौरफा कु भेज़ौ औन्दौ मसीहा ना देखा लौ तेबी झ़ांऊ तू नाईं मौरदौ। 27और पवित्र आत्मा रै बोलणै माथै शिमौन परमेश्‍वरा रै घौरा दी डैऔ और सेज़ै दिना दी मरियम और युसुफा रै भी मांऊ यीशु परमेश्‍वरा रै घौरा दी थौ आणौ औन्दौ ज़िणौ तिंउरै नियमा दी थौ। 28और शिमौन भी तिऐ थौ, तिणीऐ सेऊ मांऊ आपणी उंगाल़ी दी पाकड़ौ और परमेश्‍वरा री बौड़ाई कौरदै लागौ। 29ओ प्रभु, ऐबै तू आपणौ दास शान्ति कौरीऐ आपु काऐ औटाऊ। ज़िणौ तैरै वच़ना दी आ। 30कैलैकि मेरी आखी ऐ छ़ुटकारौ दैणै वाल़ौ देखी गौ आ। 31ज़ुण ताऐं सौभी लोगु लै भेज़ौ आ। 32और सेऊ एक इणौ प्याशौ आ ज़ुण सारै देशा और दुजी ज़ाती रै लोगु रै सामनै परमेश्‍वर पौगड़ौ कौरा आ, और तैरै आपणै लोग इस्राइला लै बड़ाई आ। 33यीशु रै बारै दी ज़ो कुछ़ शमौन थौ बोलदै लागौ औन्दौ, तेसरी बुशै शुणियौ तेसरै मां बाब हैरान हुऐ। 34तैबै शमौन तिउंलै आशीष देई और बोलौ, “मरियम! एऊ मांऊ ता परमेश्‍वरा री तौरफा कु च़ुनौ औन्दौ निशाण आ, भौरी सारै इस्राइली लोग एस नाईं मानदै और एज़ी बूश तिऊं इस्राइला लोगु नाश कौरा ई पर भौरी सारै इस्राइली लोग बौच़णै ई, ज़ासरै विरोधा ई बुशै ला ई। 35भौरी लोगु रै विच़ार पौगड़ौ हुणै ई और तुमुकै भौरी दु:ख हुणौ आ ज़िणौ तलवारी कौरी वार-पार छ़ेद हुआ आ।”

हन्ना री गवाही

36एक, भविष्यवाणी कौरणै वाल़ी छ़ेउड़ी थी ज़ासरौ नाऊं हन्ना थौ। सै भी सेज़ै बौगतै तिऐ थी। और सै अशेर खानदानी मांझ़िऐ कु फनुऐल नावां रै आदमी री छ़ोटूड़ थी। ज़ेबी तिंआरी शादी हुई तेथकु साता साला बासिऐ तिंआरौ बोउटौ मौरौ पोरु और सै विधवा हुई। और सै भौरी बुढ़ी थी। 37ऐबै तिंआरी उमर 84 साल थी और सै परमेश्‍वरा रै घौरा छ़ाड़ियौ केशी ना डिआ थी। सै ब्रौत और प्राथना कौरी कौरीयौ राची दिनै परमेश्‍वरा री आराधना कौरा थी। 38और सेज़ै बौगतै तिऐ आशीयौ परमेश्‍वरा रौ धन्यबाद कौरदी थी लागी औन्दी, और तिऊं सभी कै ज़ुण यरुशलेम रै छ़ुटकारै पौखदै थै लागै औन्दै, यीशु रै बारै दी बुशै लाइंदै लागी। 39ज़ैबै युसुफ और मरियमै प्रभु रै नियमा कौरीऐ सारौ काम पुरौ कियौ, तैबै सै गलील परदेशा दी आपणै गांव नासरता लै डेई गौऐ। 40यीशु बौड़दै लागौ, आत्मा दी मज़बूत और औकल बुद्धी कौरीऐ भी भौरिदौ लागौ, और परमेश्‍वरा री दया तेस माथै थी।

छ़ोहरु यीशु परमेश्‍वरा रै घौरा दी

41हर सालै यीशु और यीशु रै मां-बाब फसह रै साज़ै मनाउणा लै यरुशलेमा लै डिआ थै इणौ कौरणौ सारै यहुदी लोगु लै ज़रूरी थौ। 42ज़ेबी यीशु बारह साला रौ थौ। तैबै सै सारै साज़े लै यरुशलेमा लै डेवे, ज़िणै सै हर सालै डिआ थै। 43ज़ैबै सै साज़ै रै दीन पुरै हुऐ तैबै सै आपणै घौरै वापिस डेवै और मांऊ यीशु रौऔ यरुशलेम दी, और तेसरै मां-बाबा कै ना लागौ पौतौ। 44तैबै तिंउऐ सौमझ़ौ कि सेऊ ओरी लोगु आइलै औलौ। एकी दीन हांडियौ बितणै बासिऐ सै यीशु आपणै पड़ौसी और ज़िऐ तिंउरै ज़ाणनै वाल़ै थै तिऐ लोड़दै लागै। 45पर ज़ैबै तिऊं कै यीशु नाईं मिलौ तैबै सै लोड़दै-लोड़दै यरुशलेमा दी वापिस पौउंच़ै। 46और चीज़ै दिना बासिऐ तिंउऐ यीशु परमेश्‍वरा रै घौरा रै खौल़ै दी तिऊं मांझ़िऐ बोशौ औन्दौ देखौ ज़ुण तिऐ शिक्षा दिया थै। और सेऊ तिउंरी शुणदै और सवाला पुछदै तेसरै मां-बाबै देखौ। 47ज़ेती भी तिऐ शुणदै थै लागै औन्दै सै सब यीशु री औकल और ज़वाबा शुणियौ हैरान थै। 48तैबै यीशु रै मां-बाब आपणै छ़ोहरु देखीयौ हैरान हुऐ और तेसरी आमै मरियमै तेसलै बोलौ ओ मैरौ छ़ोहरु ताइंऐ आमु आइलै इणौ बरताव कैलै कियौ। देख तैरौ बाब और हाऊं केती परेशानी कौरीऐ थै ताऊं लोड़दै लागै औन्दै। 49यीशुऐ तिऊं लै बोलौ तुमै मुं लोड़दै कैलै ई लागै औन्दै का तुमु के ठेऊ नाईं कि मुं परमेश्‍वरा रै घौरा दी रौइणौ ज़रूरी आ। 50पर ज़ो बूश यीशुऐ तिऊं आइलै बोली, सै तेसरै मां-बाबा के नाईं सौमझ़ुई, 51तैबै सेऊ तिऊं आइलै नासरत गांवा दी आशौ और तिऊं आइलै रौ और तेसरी मांऐ मरियमै इऐ सारी बुशै आपणी ज़िवा दी छ़ाड़ी। 52यीशु औकली दी और शरीरा दी परमेश्‍वर और आदमी री कृपा कौरी बौड़दै लागौ।

Currently Selected:

लुका 2: BFZ-NT

Highlight

Copy