लुका 3

यहुन्ना बपतिस्मौ देणै वाल़ै री खुशी री खौबर

(मत्ती 3:1-12; लुका 1:1-8; यहुन्ना 1:19-28)

1ज़ेबी तिबिरियुस नावां रै बौड़ै राज़ै रौ राज़ थौ तेसरै पौन्दरवी साले ज़ेबी पुन्तियुस पिलातुस यहुदा परदेशा रौ आफसर थौ, गलील इलाकै दी हेरोदेस, इतुरिया और त्रखोनीतिस इलाकै दी थौ तेसरौ भाई फिलिप्पुस, और अविलेने इलाकै दी थौ लिसानियास इऐ सारै च़ोथै हिस्सै रै आफसर थै। 2ज़ेबी हन्ना और कैफा एज़ै इलाकै रै बौड़ै याजक थै, सेज़ै वक्ता दी परमेश्‍वरै आपणौ वच़न शुनशान ज़ागाह दी जकरयाह रै छ़ोहरु यहुन्ना कै दैऔ। 3यहुन्ना यरदन नौईं रै नज़दीका रै इलाकेउ दी डेइयौ परचार कौरदै लागौ कि, “सारै लोग आपणै-आपणै पापा कु माफी पाइणा लै बुरै कामा कु मन बौदल़ौ और बपतिस्मौ निऔं।” 4ज़िणौ यशायाह भविष्यवक्तै भौरी साल पैहलै थौ लिखौ औन्दौ कि, “शुनशान ज़ागाह दी एक हाकै मारीयौ बोलदै लागौ औन्दौ, प्रभु री बाट तैयार और सिधी कौरौ, 5और सारी घाटी भौरीया सारै उंच़ै डांडै धौनी झुकाई, और ज़ो दारखै-बांगै, उंच़ै-निउठै ई सै बराबर बौणा ई। 6और सारै लोग परमेश्‍वरा रौ छ़ुटकारौ देखा ई।” 7ज़ेती भी लोगु री भीड़ यहुन्ना काऐ बपतिस्मौ निंदै आशा थी। सेऊ तिउलै बोला थौ, “ओ लोगुओ तुमै दुष्ट ई ज़ैहरिलै सापा ज़िणै, तुमै कुणिऐ च़ितलाऐ कि तुमै परमेश्‍वरा रै आशणै वाल़ै रोशा कु भागौ। 8आबै तुमै मन बौदुल़णै लाईक काम कौरौ। और आपणै-आपणै मौना दी इणौ नाईं सुंच़ौ की आमारौ पुरखा इब्राहिम आ। हाऊं तुमुलै बोलाऊ की परमेश्‍वर इऊं पात्थरु कु भी इब्राहिमा कालै सन्तान पैदौ कौरी बौल़ा सा। 9आबै परमेश्‍वर तिऊं सौभी लोगु लै सौज़ा दैणा लै त्यार आ ज़ुणिऐ इबी झ़ाऊं आपणौ मन पापा कु नाईं बौदुलदौ, ज़िणौ कुराड़ पैडु री ज़ौड़ी काऐ छ़ाड़ी ऐन्दी ज़ो पेड़ आच़्छ़ौ फल़ नाईं आणालौ तेस काटियौ आगी दी पा ई।” 10लोगुऐ यहुन्ना कु पुछ़ौ, “तैबै आमुऐ परमेश्‍वरा री सौज़ा कु बौच़णा लै का च़ांई कौरणौ?” 11यहुन्नै तिउंलै ज़वाब दैऔ, “ज़ासकै दुई कुरतै ई तिणीऐ एक कुरतौ तेसकै च़ांई दैणौ ज़ासकै नाईं आ और ज़ासकै रोटी ई तिणीऐ भी च़ांई बांटीऔ खाणी।” 12तैबै मामलै निणै वाल़ै भी बपतिस्मौ निंदै आशै, तिंउऐ यहुन्ना कु पुछ़ौ कि, ओ गुरु, “आमै का कौरुलै?” 13तिणीऐ तिऊं लै बोलौ ज़ेती तुमुलै मामलै निणा लै आ बोलौ औन्दौ, तेथकु ज़ादौ मामलौ नाईं निऔं 14तैबै सिपाइउऐ भी तेसकु पुछ़ौ आमै का कौरुलै? यहुन्नै तिऊं लै बोलौ तुमै कासी भी लोगु पैसेऊ लै नाईं सौताऔ, और ना कासी माथै झ़ुठै आरोप लाएऊ, ज़ेती तुमुलै मज़दुरी मिला सा तेती दी खुश रौऔ। 15लोगुऐ पैहलै कु थी मसीह आशणै री आश लाई औन्दी, तिंउऐ आपणै ज़िवा दी यहुन्ना रै बारै दी सुंच़ौ, का एऊ ता नाईं सेऊ मसीह? 16तैबै यहुन्नै तिउंलै बोलौ, “हाऊं ता तुमुलै पाणी कौरी बपतिस्मौ दिआऊ। पर ज़ो सेऊ आशणै वाल़ौ मसीहा सा सेऊ मुकु ज़ादौ शक्ति वाल़ौ आ। हाऊं ता तेसरै बुटा रै तौसमै खोलणै रै लायक भी नाईं, सेऊ तुमुलै पवित्र आत्मा और आगी कौरीऐ बपतिस्मौ दिआ आ। 17तेसरौ शुपौ तेसरै हाथा दी आ सेऊ आपणौ खौल़ौ आच़्छ़ै कौरीऐ साफ कौरा। तैबै गीऊं छ़ाड़ा आपणी खौन्दीआल़ी दी भूस ज़ाल़ा आगी दी ज़ो आग केबी ना इशदी।” 18यहुन्ना भौरी शिक्षा देई-देइयौ लोगु कै खुशी री खौबर शुणाउवा थौ। 19और यहुन्नै हेरोदेस ज़ुण इस्राइल देशा रै च़ोथै हिस्सै रौ आफसर थौ सेऊ भी डांटौ कैलैकि हेरोदेसै आपणै भाई फिलीपुसा री छ़ेउड़ी हेरोदियास आपुलै छ़ाड़ी थी, और भौरी बुरै काम किऐ थै। 20पर हेरोदेसै तिऊं सौभी बुरै कामा कु भी एज़ौ बुरौ काम कियौ कि तिणीऐ यहुन्ना ज़ेला दी पाऔ।

यीशु रौ बपतिस्मौ

(मत्ती 3:13; 1:17; मरकुस 1:9-11)

21ज़ेला दी डेउणै कु पैहलै, एकी दिनै ज़ेबी यहुन्ना बपतिस्मौ दैंदै थौ लागौ औन्दौ। तेबी यीशुऐ भी बपतिस्मौ निऔं। बपतिस्मौ नींई औ, ज़ेबी यीशु प्राथना कौरदै थौ लागौ औन्दौ तेबी सौरग खुलौ। 22और पवित्र आत्मा कबुतरा ज़िणी उतरियौ यीशु माथै आशी, और सौरगा कु परमेश्‍वरा री हाक शुणुई कि, “तू मैरौ गौरतौ छ़ोहरु ई हाऊं ताऊं कु भौरी खुश ऊ।”

यीशु रौ वंश

(मत्ती 1:1-17)

23ज़ेबी यीशुऐ शिक्षा देणी शुरु की, तेबी यीशु री उमर तकरीबन तीस साल थी। ज़िणौ लोग ज़ाणा थै कि यीशु ता युसुफा रौ छ़ोहरु आ और युसुफ थौ एली रौ छ़ोहरु, 24और एली थौ मत्ताता रौ, और मत्तात थौ लेवी रौ, लेवी थौ मलकी रौ, मलकी थौ यन्ना रौ, यन्ना थौ युसुफा रौ, 25युसुफ थौ, मतित्याह रौ, मतित्याह थौ आमोसा रौ, आमोस नहुमा रौ, नहुम थौ असल्याहा रौ, और सेऊ थौ नोगहा रौ। 26नोगहा थौ माता रौ, मात थौ मतित्याह रौ, सेऊ थौ शिमी रौ, शिमी थौ योसेखा रौ, योसेख थौ योदाहा रौ, 27योदाह थौ यहुन्ना रौ, यहुन्ना थौ रेसा रौ, रेसा थौ जरुब्बाबिला रौ, सेऊ थौ शलतिएला रौ, शालतिएल थौ नेरी रौ, 28नेरी थौ मलकी रौ, मलकी थौ अद्दी रौ, अद्दी थौ कोसामा रौ, कोसाम थौ इलमोदामा रौ, इलमोदाम थौ एरा रौ। 29और एर थौ यहोशुआ रौ, यहोशुआ थौ इलज़ारा रौ इलज़ार थौ योरीमा रौ, योरीम थौ मत्तता रौ, मत्तात थौ लेवी रौ, 30लेवी थौ शमौना रौ, शमौन थौ यहुदा रौ, यहुदा थौ युसुफा रौ, युसुफ थौ योनाना रौ, योनान थौ इलियाकीमा रौ, 31इलियाकीम थौ मेलिया रौ, मेलिया थौ मिन्नाह रौ, मिन्नाह थौ मत्ताता रौ, मत्तात थौ नाताना रौ, नातान थौ दाऊदा रौ। 32और दाऊद थौ यिशै रौ, यिशै थौ ओबेदा रौ, ओबेद थौ बोअज़ा रौ, बोअज़ थौ सलमोना रौ, सलमोन थौ नहशोना रौ, 33नहशोन थौ अम्मीनादाबा रौ, सेऊ थौ अरनी रौ, अरनी थौ हिस्रोना रौ, हिस्रोन थौ फिरिसा रौ, फिरिस थौ यहुदा रौ, 34और यहुदाह थौ याकुबा रौ, याकूब थौ इसहाका रौ, इसहाक थौ अब्राहमा रौ, अब्राहम थौ तिरहा रौ, तिरह थौ नाहोरा रौ। 35सेऊ थौ सरुगा रौ, सरुग थौ रऊ रौ, रऊ थौ फिलिगा रौ, फिलिग थौ एबीरा रौ, एबीर थौ शिलहा रौ, 36शिलह थौ केनाना रौ केनान थौ अरफक्षदा रौ, सेऊ थौ शेमा रौ, शेम थौ नूह रौ नूह थौ लिमिका रौ। 37लिमिक थौ मथूशिलह रौ, सेऊ थौ हनोका रौ, हनोक थौ यिरिदा रौ यिरिद थौ महललेला रौ महललेल थौ केनाना रौ, 38और केनान थौ यनोशा रौ, यनोश थौ शेता रौ, शेत थौ आदमा रौ, और आदम थौ परमेश्‍वरा रौ छ़ोहरु।

Currently Selected:

लुका 3: BFZ-NT

Highlight

Copy