लुका 4
4
यीशु रौ इम्तहान
(मत्ती 4:1-11; मरकुस 1:12-13)
1तैबै यीशु पवित्र आत्मा कौरीऐ भौरुइऔ यरदन नौईं काऐ कु वापिस डैऔ और चालिस दिना झ़ांऊ पवित्र आत्मा रै ज़ौरिऐ शुनशान ज़ागाह दी हांडदै लागौ, 2तिऐ शैतान यीशु पौरखदै लागौ। तिऊं चालिस दिना दी यीशुऐ कुछ़ा ना खाऔ पिऔ, ज़ैबै सै दीन पुरै हुऐ तैबै यीशु कै भूख लागी। 3तैबै शैतानै यीशु लै बोलौ, “अगर तू परमेश्वरा रौ छ़ोहरु ई ता एस पात्थरा लै बोल कि रोटी बण।” 4यीशुऐ शैताना लै ज़वाब दैऔ, “पवित्रशास्त्रा दी इणौ लिखौ औन्दौ कि आदमी सिरफ रोटी ई कौरीऐ ज़िउंदौ नाईं रौउंदौ, ” 5तैबै शैतानै यीशु उंच़ी ज़ागाह दी निऔं और तिणीऐ यीशु कै एकी घौड़ीऐ धौतरी रै सारै मुलुख देखाल़ै। 6और शैतानै यीशु लै बोलौ, “हाऊं धौतरी रै सारै हक्क और महिमा ताऊं कै दिआऊ, कैलैकि इयौ सारौ मुकै आ सौंभाल़ौ औन्दौ, हाऊं ज़ासकै च़ाहा ऊ तेसकै दिआऊ, 7अगर तू मुकै झुकियौ ढाल कौरालौ ता एऊ सब कुछ़ तैरौ हुआ सा।” 8यीशुऐ तेसलै ज़वाब दैऔ, “कि पवित्रशास्त्रा दी इणौ आ लिखौ औन्दौ कि, ‘तू आपणै प्रभु परमेश्वरा काऐ झुकियौ ढाल कर और सिरफ तेसी री भौक्ती कर।’ ” 9तैबै शैतानै यीशु यरुशलेम दी निऔं और तिऐ परमेश्वरा रै घौरा रै छ़ापरा माथै खौड़ौ कियौ और तेसलै बोलौ, “अगर तू परमेश्वरा रौ छ़ोहरु ई ता इदरु तौल़ै फाल़ दै। 10कैलैकि पवित्रशास्त्रा दी इणौ आ लिखौ औन्दौ तैरै बारै दी, ‘कि परमेश्वर आपणै सौरगदूता लै हुकम दिया कि सै ताऊं बौच़ावा। 11सै ताऊं हाथा-हाथा दी च़ुंगा ई ताकी तैरै बांगणै दी पात्थरा कु ठोकर ना लागा।’ ” 12यीशुऐ तेसलै ज़वाब दैऔ। “पवित्रशास्त्रा दी इणौ भी आ लिखौ औन्दौ कि, ‘तू आपणौ प्रभु परमेश्वर ना पौरखै।’ ” 13ज़ैबै शैताना कै यीशु पौरखियौ कुछ़ ना फौरौ तैबै सेऊ कुछ़ बौगता लै यीशु काऐ कु पोरु डैऔ।
यीशु री सेवा रै कामा री शुरुआत
(मत्ती 4:12-17; मरकुस 1:14-15)
14तैबै पवित्र आत्मा री शक्ति कौरी भौरुईयौ यीशु गलील परदेशा लै वापिस डैऔ। और यीशु रै बारै दी बुशै आस-पड़ोसा रै देशा दी फौइली गोई। 15और यीशु यहुदिऊ रै आराधनालय दी शिक्षा दैंदै लागौ। और सारै लोग यीशु री बौड़ाई कौरा थै।
नासरता दी यीशु री बेइज़्ज़ती
(मत्ती 13:53-58; मरकुस 6:1-6)
16ज़ैबै यीशु नासरत गांवा दी आशौ ज़िऐ सेऊ धाचौ-पाल़ौ थौ। सेऊ रोज़कै ज़िणौ आरामा रै दिना दी आराधनालय दी डैऔ तिऐ पवित्रशास्त्र पौड़ना लै खौड़ी हुऔ। 17और यीशु कै पौड़ना लै यशायाह भविष्यवक्ता री किताब देई, और यीशुऐ सै किताब खोली और तिदरु पौड़दै लागौ ज़िऐ इणौ थौ लिखौ औन्दौ, 18“प्रभु री आत्मा मुं माथै आ, कैलैकि तिणीऐ हाऊं गरीबु लै खुशी री खौबरी शुणाउणा लै च़ुनौ ऊ। और हाऊं एथीलै भेज़ौ ऊ कि, गुलामु लै छ़ुटकारै रौ और शेड़ेऊ लै देखणे री खुशी री खौबरी शुणाऊ, और दुखी लाच़ार लोगु तिऊंकु बौच़ाऊ ज़ुण तिऊं माथै ज़ुलम कौरा आ। 19कैलैकि परमेश्वरा री तौरफा कु आमु माथै दया कौरणै रौ बौगत आशी गौ आ।” 20तैबै यीशुऐ सै किताब बन्द कौरीयौ तिदलै नुकरा कै देई, और आपु बोशौ धौनी। तैबै ज़ो लोग आराधनालय दी शुणदै थै लागै औन्दै सै लोग यीशु भिलै बौड़ै च़ाहा कौरीऐ देखदै लागै। 21तैबै यीशु तिउंलै बोलदै लागौ, आज़ ई तुमारै सामनै एऊ लिखौ औन्दौ (वच़न) पुरौ हुऔ। 22ज़ो भी लोग तिऐ मौज़ूद थै सै सारै खुश हुऐ और यीशु रै मुआं कु दया वाल़ी बुशै शुणियौ हैरान हुऐ, कि एऊ सब किणौ हुई सौका? सै आपु मांझ़िऐ चौपड़िंदै लागै “का एऊ युसुफा रौ छ़ोहरु नाईं?” 23यीशुऐ तिउंलै बोलौ, “शायद तुमै मुं माथै इणी कहावत ज़ुरुरी बोलाई कि, ‘लै डाकटरा आपणौ इलाज़ ता कर और ज़िणै ताऐं कफरनहूमा गांवा दी च़मतकार किऐ ई तिणै च़मतकार इदै आपणै गांवा दी भी कर? 24पर सौच़्च़ाई इऐ आ कि केज़ै भी भविष्यवक्ता लै आपणै गांवा या इलाकै दी इज़्ज़तमान नाईं मिलदी।’ 25यीशुऐ औज़ौ बोलौ, हाऊं ताउंलै सौच़्च़ौ बोलाऊ कि, एलियाह भविष्यवक्ता रै बौगता दी ज़ेबी साड़ै चिया साला झ़ांऊ शुकौ पौड़ौ और सारै देशा दी बौड़ौ काल़ पौड़ौ, तेबी इस्राइल देशा दी भौरी इणी विधवा छ़ेउड़ी थी।” 26पर परमेश्वरै एलियाह भविष्यवक्ता तिऊं कासी काऐ ना भेज़ौ, पर सेऊ सैदा शहरा रै सारपत गांवा दी एकी विधवा काऐ भेज़ौ ज़ो यहुदी नाईं थी। 27या एलिशा भविष्यवक्ता रै बारै दी विच़ार कौरौ ज़ुणिऐ नामान कोढ़ी ठीक कियौ आ ज़ो सीरिया देशा रौ थौ। ज़ैबै कि सेज़ै बौगता दी इस्राइला दी भौरी कोढ़ी थै, ज़ासकै तेबी च़ांगै हुणै री भौरी ज़ुरत थी। 28आराधनालय दी ज़ो लोग इऊं बुशु शुणदै थै लागै औन्दै सै भौरी रोशुऐ। 29और तिंउऐ खौड़ी उठीयौ यीशु घेरौ और शहरा कु बाइरै गाड़ौ, ज़ेज़ी पहाड़ी माथै तिऊंरौ शहर थौ बौसौ औन्दौ, और सेऊ तिऐ पहाड़ी रै टिरा माथै निऔं ताकी तेस तिदरु तौल़ै पा। 30पर यीशु तिऊं मांझ़िया कु निकल़ियौ पोरु डैऔ।
बुरी आत्मा वाल़ौ आदमी च़ांगौ कौरणौ
(मरकुस 1:21-28)
31तैबै यीशु गलील परदेशा रै कफरनहूम गांवा दी डैऔ और तिऐ हर आरामा वाल़ै दिना दी लोगु लै शिक्षा दिआ थौ। 32तिदै भी लोग यीशु री शिक्षा शुणियौ हैरान हुऐ कैलैकि यीशु वच़न हक्का कौरीऐ बोला थौ। 33एकी दिनै यीशु आराधनालय दी थौ, तिऐ एक इणौ आदमी थौ ज़ासदी बुरी आत्मा थी, तिऐं बुरी आत्मै हाकै मारीयौ बोलौ। 34“ओ नासरता रै यीशु आमुकै ताऊं कु का काम आ? का तू आमु नाश कौरदै ई आशौ औन्दौ? हाऊं ज़ाणाऊ कि तू कुण ई, तू परमेश्वरा री तौरफा कु भेज़ौ औन्दौ पवित्र ज़ौणौ ई।” 35यीशुऐ तिऐं बुरी आत्मा लै डांटियौ बोलौ, “च़ुटुक थाक, एस आदमी कु बाइरै निकुल़।” तैबै तिऐं बुरी आत्मै सेऊ आदमी मांझ़िऐ धौनी बिछ़ांडौ बिणा नुकसान कौरीयौ तेसकु बाइरै निकल़ी। 36तैबै सै हैरान हुऐ और आपु मांझ़िऐ चौपड़ुइयौ बोलदै लागै, एस आदमी रै हुक्मा दी का शक्ति और हक्क आ। “कि बुरी आत्माऐं भी एसरी शुणियौ पोरु भागा ई” 37यीशु री बुशै आगी बाशीऐ सारै मुलखा दी फैअली गोई।
पतरसा री शाशु और ओरी लोगु च़ांगै कौरणै
(मत्ती 8:14-17; मरकुस 1:29-34)
38सेज़ै दिना दी यीशु आराधनालय कु निकल़ियौ शिमौना रै घौरै डैऔ। तिऐ शिमौना री शाशु बुखारा कौरीऐ भौरी बिमार थी, सौभी यीशु कु औरज़ कौरदै लागै कि इऐं ठीक कौरौ। 39यीशुऐ तिंया काऐ खौड़ी हुइयौ तिंआरै बुखार डांटै और तिंआरै बुखार ठीक हुऐ। सै खरकच़ार खौड़ी हुई और तिउंरी सेवा कौरदै लागी। 40दूस ओड़दै-ओड़दै तेस गांवा दी ज़ासरै काऐ लोगु दी कई रौंगा री बिमारी थी लागी औन्दी तिऊं सब यीशु काऐ आणा थै। यीशुऐ सारै बिमार लोगु माथै हाथ छ़ाड़ै और सारै च़ांगै किऐ। 41भौरी लोगु दी बुरी आत्माऐं थी, सारी बुरी आत्माऐं यीशु रौ हुकम शुणियौ बाइरै निकल़ा थी और हाकै मारीयौ बोला थी कि तू परमेश्वरा रौ छ़ोहरु ई। पर यीशु बुरी आत्मा डांटा थौ और बोलणै नाईं दिआ थौ। कैलैकि सै बुरी आत्माऐं ज़ाणा थी कि यीशु ई मसीहा सा।
आराधनालय दी परचार कौरणौ
(मरकुस 1:35-39)
42दुजी दोअती यीशु शहरा कु निकल़ियौ शुनशान ज़ागाह दी डैऔ, और सारी भीड़ यीशु लोड़दै-लोड़दै यीशु काऐ आशीयौ तेस रोकदै लागी कि आमु छ़ाड़ियौ नाईं डेऊ, 43पर तिणीऐ तिउंलै बोलौ मुं ओरी लोगु मांझ़िऐ भी परमेश्वरा रै राज़्या रौ खुशी री खौबर शुणाउणौ ज़ुरुरी आ कैलैकि हाऊं एथीलै ऊ भेज़ौ औन्दौ। 44और यीशु गलील परदेशा दी आराधनालय दी परचार कौरदै लागौ।
Currently Selected:
लुका 4: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
