लुका 5

पैहलै च़ेलेऊ औटाउणै

(मत्ती 4:18-22; मरकुस 1:16-20)

1एकी दिनै यीशु गलील नावां रै समुन्दरा रै डिका काऐ खौड़ौ थौ। तिऐ परमेश्‍वरा रै वच़ना शुणदै एतरी भीड़ कौठै हुई कि यीशु माथै थी पौड़दै लागी ऐन्दी, तैबै इणौ हुऔ, 2यीशुऐ समुन्दरा रै डिका दी दुई किश्ती देखी, और झ़ींवर थै किश्ती कु उतरी औ ज़ाल़ा धोउंदै लागै औन्दै। 3यीशु तिऊं किश्ती मांझ़िया कु एकी किश्ती दी च़ौड़ौ, ज़ो शिमौन नावां रै आदमी री थी। तैबै यीशुऐ शिमौना लै बोलौ इऐं किश्ती डिका काऐ कु थोड़ौ पौल़डै निऊं, तैबै यीशु किश्ती दी बोशियौ लोगु लै शिक्षा दैंदै लागौ। 4ज़ैबै यीशु शिक्षा देइयौ फारीक हुऔ तैबै शिमौना लै बोलौ इऐं किश्ती समुन्दरा बिच़ा दी निऊं, और माच़्छ़ीऊ पाकुड़ना लै आपणौ ज़ाल़ समुन्दरा दी पा। 5शिमौनै यीशु लै बोलौ, “ओ गुरु आमुऐ पुरी राचीऐ माच़्छ़ी पाकुड़ना लै भौरी मैहनत की आ पर कुछ़ ना पौड़ौ, तैबै भी हाऊं तुमारै बोलणै माथै ज़ाल़ पा ऊ।” 6ज़ैबै तिंउऐ ज़ाल़ पाऔ तैबै तिंउरै ज़ाल़ा दी भौरी माच़्छ़ी फौसी इदरा झ़ांऊ कि तिंउरै ज़ाल़ भी च़ीरीन्दै लागै। 7तैबै तिंउऐ आपणै साथीऊ लै ज़ो दुजी किश्ती दी थै, साना कौरी बोलौ ओरु आशौ आमारी मज़द कौरौ, तैबै सै तिऊं काऐ आशै और तिंउऐ दुइया किश्ती दी एतरी माच़्छ़ी भौरी कि तिउंरी किश्ती भी डुबदै लागी। 8इणै देखीयौ शिमौन पतरसै यीशु रै बांगणै माथै पौड़ीयौ यीशु लै बोलौ, “ओ प्रभु, मुकाऐ कु पोरु डैऔ कैलैकि हाऊं पापी लोगु।” 9कैलैकि एतरी माच़्छ़ीऊ पाकड़ियौ शिमौन और तेसरै साथीऊ के भौरी हैरानी हुई। 10तिणी ई जबदी रै छ़ोहरु याकूब और यहुन्ना कै भी हैरानी हुई ज़ो शिमौना रै साथी थै। तैबै यीशुऐ शिमौना लै बोलौ, “नाईं डौर आज़ा कु तू लोगु मुकाऐ आणाई” 11तिंउऐ आपणी-आपणी किश्ती डिका काऐ आणी और सब कुछ़ छ़ाड़ियौ यीशु पिछ़ु डेवै।

कोढ़ा वाल़ौ आदमी ठीक कौरणौ

(मत्ती 8:1-4; मरकुस 1:40-45)

12एकी इलाकै दी यीशु कै एक कोढ़ी आदमी मिलौ और सेऊ धौनी झुकियौ यीशु कै औरज़ कौरदै लागौ कि, “ओ प्रभु अगर तू च़ाहा लौ ता मुं च़ांगौ कौरी बौल़ा ई।” 13यीशुऐ तेस कोढ़ी भिलै आपणै हाथा बड़ाइयौ सेऊ छ़ुंऔ और तेसलै बोलौ, “हाऊं च़ाहा ऊ कि तू च़ांगौ च़ांई हुऔ।” और तेबी ई तेसरौ कोढ़ ठीक हुऔ। 14तैबै यीशुऐ सेऊ च़ितलाऔ, “कि ज़ो कुछ़ ताऊं आइलै हुऔ आ तेस कासी आइलै ना बोलै पर डेऊ याजका काऐ देखाल़िऊ और परमेश्‍वरा रै आपणै सेवक मुसा रै ज़ौरिऐ ज़ेज़ै नियम ई दैऔ औन्दै तिऊं अपणाइयौ बौल़ी च़ौड़ाऊ ताकी सै तैरै बारै दी लोगु काऐ बोला कि च़ांगौ और शुद्ध हुई गौ आ।” 15पर यीशु रै कामा री खौबर सारै मुलखा दी फैअली गोई, भौरी लोग तेसरी शिक्षा शुणदै और आपणी बिमारी कु च़ांगै हुणा लै यीशु काऐ कौठै हुंदै लागै। 16पर यीशु एखुली शुनशान ज़ागाह दी डेइयौ प्राथना कौरा थौ।

अधरौंगा वाल़ौ आदमी च़ांगौ कौरणौ

(मत्ती 9:1-8; मरकुस 2:1-12)

17एक दिनै इणौ हुऔ कि यीशु एकी घौरा दी शिक्षा दैंदै थौ लागौ औन्दौ तिऐ फरीसी और तिंउरै नियमा रै ज्ञानी थै बोशै औन्दै, ज़ो गलील और यहुदिया परदेशा रै हरेक गाऊं और यरुशलेम शहरा कु थै आशै औन्दै, और च़ांगै कौरना लै प्रभु री शक्ति यीशु आइलै थी। 18सेज़ै बौगतै तिऐ कुछ़ लोगुऐ एक इणौ आदमी बिस्तरै दी आणौ ज़ासकै आपणै ज़िसमा रौ केज़ौ भी आंग नाईं हिलाइया थौ, यीशु काऐ पऊंच़ाऊणा लै तिंउऐ भीड़ा मांझ़िऐ काफी कोशिश की ताकी यीशु तेस बिमार आदमी ठीक कौरा। 19पर भीड़ा री वज़ाह कु सै यीशु काऐ नाईं पौउंच़ी बौल़ै तैबै सै तेस घौरा रै छ़ापरा माथै डेवे और छ़ापरा कु कुछ़ ज़ाण्टै गाड़ीयौ च़ारपाई रै च़ारा कुणे दी लोऊल़ी बानियौ सेऊ बिमार आदमी यीशु काऐ धौनी उतारौ। बिमार आदमी धौनी यीशु काऐ उतारौ छ़ापरा बाटीऐ 20इणै कौरी यीशुऐ तिंउरै विश्वासा देखीयौ तेस बिमार आदमी लै बोलौ, “ओ गोश्टण तैरै पाप माफ हुई गौऐ ई” 21तैबै शास्त्री और फरीसी आपणै-आपणै मौना दी सुंच़दै लागै, “एऊ कुण आ इणौ पा ज़ुण परमेश्‍वरा री बुराई कौरा सा? पाप ता सिरफ परमेश्‍वर ई माफ कौरा।” 22यीशुऐ तिउंरै मौना री बुशै ज़ाणीऔ बोलौ, “तुमै इणौ कैलै सुचांई कि हाऊं परमेश्‍वरा री बुराई कौरदेउ लागौ औन्दौ। 23आसान का सा? बिमार आदमी लै इणौ बोलणौ कि ‘तैरै पाप माफ हुई गौऐ’ या इणौ बोलणौ कि ‘खौड़ी उठ आपणौ बिस्तरौ च़ुंग और हांडदै लाग?’ 24पाप माफ सिरफ परमेश्‍वर ई कौरी बौल़ा आ। तुमुकै देखाउणा लै कि पाप माफ कौरणै रौ हक्क मुकै आ, ज़ुण परमेश्‍वरा री तौरफा कु भेज़ौ औन्दौ।” तैबै यीशुऐ तेस बिमार आदमी देखीयौ बोलौ, “हाऊं ताउंलै बोलाऊ, खौड़ौ उठ, आपणौ बिस्तरौ च़ुंग और घौरै डेऊ।” 25सेऊ आदमी खरकच़ार तिऊं काऐ कु उठीयौ खौडौ हुऔ, और ज़ेथ माथै सेऊ आणौ थौ तेस बिस्तरौ च़ुंगियौ परमेश्‍वरा री बौड़ाई कौरी-कौरीयौ तिदरु आपणै घौरै डैऔ। 26इणै देखीयौ सारै लोग हैरान हुऐ और परमेश्‍वरा री बौड़ाई कौरदै लागै, और डौरीयौ बोलदै लागै आज़ आमुऐ नोखी बूश देखी आ।

लेवी औटाउणौ

(मत्ती 9:9-13; मरकुस 2:13-17)

27तेथ बासिऐ ज़ैबै यीशु तेस इलाकै कु बाइरै डैऔ। तैबै यीशुऐ लेवी नावां रौ एक मामलै निणै वाल़ौ, आड्डै माथै बोशौ औन्दौ देखौ। और यीशुऐ तेसलै बोलौ, “मुं पिछु आश मैरौ च़ेलौ बण।” 28तैबै सेऊ तेबी आपणौ सब कुछ़ छ़ाड़ियौ यीशु पिछ़ु हांडदै लागौ। 29तैबै तिणी लेवीऐ यीशु आपणै घौरै निऔं और बौड़ी धाम देई, तिऐ मामलै निणै वाल़ै और भौरी लोग तिऊं आइलै रोटी खांदै बोशी गौऐ। 30इणै देखीयौ फरीसी और तिंउरै शास्त्री यीशु और तेसरै च़ेलेऊ लै बोलदै लागै कि, “तुमै मामलै निणै वाल़ै और पापी लोगु आइलै रोटी कैलै खा पिआ ई?” 31यीशुऐ तिउंलै ज़वाब दैऔ कि डाकटरा री ज़ुरत भौलै-च़ांगै आदमी लै नाईं पर बिमार आदमी लै औआ सा। 32हाऊं धौर्मी आदमी नाईं पर पापी लोगु रै मन बदुलना लै ऊ आशौ औन्दौ।

आशणै (उपवासा) रौ सवाल

(मत्ती 9:14-17; मरकुस 2:18-22)

33फरीसी और शास्त्रिउऐ यीशु लै बोलौ, “यहुन्ना रै च़ेलै ता नियमा कौरीऐ घौड़ी-घौड़ी ब्रौत छ़ाड़ा और प्राथना कौरा ई, और तिणी ई फरीसी रै च़ेलै भी कौरा ई, पर तैरै च़ेलै ता सौदा खा पिया ई।” 34यीशुऐ तिऊंकु पुछ़ौ, “ज़ेबी झ़ांऊ लाड़ौ तिऊं आइलै साथा दी हुआ का तेबी बराती ब्रौत छ़ाड़ाई? 35पर सेज़ै दीन भी आशा ई ज़ेबी लाड़ौ तिऊंकु अलग कौरालै सेज़ै बौगता दी सै ब्रौत कौरा ई।” 36यीशुऐ तिउंलै एक औनैणौ भी दैऔ, “केज़ौ भी आदमी नौऐं जुड़कै रौ टालकौ पुराणै जुड़कै दी नाईं लाइंदौ। नाईं ता धोइदीं बारै सेऊ नौऐं जुड़कै रौ टालकौ तेस पुराणौ जुड़कौ पोरु थोसियौ ज़ादड़ौ च़ीरा सा। और सेऊ टालकौ पुराणै जुड़कै आइलै मेल भी ना खान्दौ। 37कोई भी आदमी अंगुरा री सूर चाणना लै ताज़ै अंगुरा रौ रस पुराणै खाल़ढै दी नाईं छ़ाड़दौ। नाईं ता अंगुरा रौ रस दख बौगता बासिऐ फैलीयौ तेस पुराणै खाल़ढै रौ थोउलौ भी पोरु च़ीरा, ज़ेथ कौरीऐ अंगुरा रौ रस और खाल़ढौ दुइया बरबाद हुआई। 38एथीलै लोग ताज़ै अंगुरा रौ रस नौऐ खाल़ढै दी भौराई। 39केज़ौ भी आदमी पुराणौ अंगुरा रौ रस पीई औ आच़्छ़ौ दाखरस नाईं च़ाहांदौ कैलैकि सेऊ बोला, कि पुराणौ ई भौरी आच़्छ़ौ आ।”

Currently Selected:

लुका 5: BFZ-NT

Highlight

Copy