यहुन्ना 21

तिबिरियास झ़िला रै डिका काऐ च़ेलेऊ काऐ पौगड़ौ हुणौ

1इऊं बुशु बासिऐ यीशु आपु गलीला झ़िला रै डिका दी च़ेलेऊ काऐ पौगड़ौ हुऔ, 2शमौन पतरस, और थोमा ज़ासलै दिदुमुस बोलाई, और गलीला रै काना गांवा रौ नतनएल, और जबदी रै छ़ोहरु, और तेसरै च़ेलेऊ मांझ़िआ कु दुई लोग औज़ौ कौट्ठै थै। 3शमौन पतरसै तिउंलै बोलौ, “हाऊं माच़्छ़ी पाकुड़दै डिआऊ।” तिंउऐ तेसलै बोलौ, “आमै भी ताऊं आइलै आशी ई।” तैबै सै निकल़ियौ किश्ती दी च़ौड़ै, पर सेज़ी राची तिउंकै कुछ़ ना पाकड़ुऔ।

4दोउत राची ई यीशु डिका काऐ आशीयौ खौड़ौ हुऔ। तैबै भी च़ेलेउऐ नाईं रवावौ की एऊ यीशु आ। 5तैबै यीशुऐ तिउंलै बोलौ, “ओ लोल़डेउओ, का तुमुकै कुछ़ माच़्छ़ी आसती आ?” तिंउऐ ज़वाब दैऔ, “नाईं।” 6तिणीऐ तिउंलै बोलौ, “किश्ती रै सुल़टी भिलै ज़ाल़ पा लै ता तुमुकै मिला ई।” तैबै तिंउऐ ज़ाल़ पाऔ, और सै भौरी माच़्छ़ी मिलणै री वज़ाह कु ज़ाल़ झिड़ी नाईं बौल़ै। 7तैबै तिणी च़ेलै ज़ास आइलै यीशु प्यार कौरा थौ, पतरसा लै बोलौ, “एऊ ता प्रभु आ!” शमौन पतरसै इणौ शुणियौ कि एऊ प्रभु आ, कमरा दी गाची बानियौ कौशी, कैलैकि सेऊ नांगौ थौ, और झ़िला दी डैऔ। 8पर दुजै च़ेलै किश्ती दी माच़्छ़ी कौरी भौरुऐ औन्दौ ज़ाल़ झिड़ी-झिड़ीऔ आशै, कैलैकि सै डिका कु ज़ादै दूर नाईं थै, बल्कि लगभग दुई शौ हाथ दूर थै। 9ज़ेबी सै डिका दी पौउंच़ै, ता तिंउऐ गाठै री आग और तेथदी माच़्छ़ी छ़ाड़ी, ऐन्दी और रोटी देखी। 10यीशुऐ तिउंलै बोलौ, “ज़ो माच़्छ़ी तुमुऐ इबी पाकड़ी ई, तिऊं मांझ़िऊ कु कुछ़ आणौ।” 11तैबै शमौन पतरसै किश्ती दी डेइऔ एक शौ तरेपन बौड़ी माच़्छ़ीऊ कौरी भौरुऔ औन्दौ ज़ाल़ डिका दी झिड़ौ, और एती माच़्छ़ीऊ कौरीऐ भी ज़ाल़ नाईं च़िरुऔ। 12यीशुऐ तिउंलै बोलौ, “आशौ, रोटी खाऔ।” च़ेलै मांझ़िआ कु कासी री हिम्मत नाईं पौड़ी की तेसकु पुछ़ा, कि “तू कुण ई?” कैलैकि सै ज़ाणा थै की एऊ प्रभु ई आ। 13यीशुऐ आगुड़ै डेइयौ रोटी च़ुंगी और तिउंलै देई, और तिणी ई माच़्छ़ी भी देई। 14इयौ चीजी बारै आ कि यीशु मौरै औन्दै मांझ़िआ कु ज़िउंदौ हुइयौ च़ेलेऊ कै दिशौ।

यीशु और पतरस

15रोटी खाइऔ यीशुऐ शमौन पतरसा लै बोलौ, “ओ शमौन, यहुन्ना रै छ़ोहरु, का तू इऊं कु बौड़ियौ मुकु प्यार कौरा ई?” तिणीऐ तेसलै बोलौ, “ओ, प्रभु। तू ता ज़ाणाई कि हाऊं ताऊं आइलै प्यार कौराऊ।” तिणीऐ तेसलै बोलौ, “मैरै लोगु रौ ध्यान छ़ाड़।” 16तिणीऐ तौंइऐ दुजी बारै तेसलै बोलौ, “ओ शमौन, यहुन्ना रै छ़ोहरु आ, का तू मुकु प्यार कौरा ई?” तिणीऐ तेसलै बोलौ, “ओ, प्रभु। तू ज़ाणाई कि हाऊं ताऊं आइलै प्यार कौराऊ।” तिणीऐ तेसलै बोलौ, “मेरी भेरी ज़ाग।” 17यीशुऐ चीजी बारै तेसलै बोलौ, “ओ शमौन, यहुन्ना रै छ़ोहरु, का तू मुकु प्यार कौरा ई?” पतरस नराज़ हुऔ कि तिणीऐ चीजी बारै तेसलै इणौ बोलौ, “का तू मुकु प्यार कौरा ई?” और तेसलै बोलौ, “ओ प्रभु, तू ता सब कुछ़ ज़ाणाई। तू इणौ भी ज़ाणाई कि हाऊं ताऊं कु प्यार कौराऊ।” यीशुऐ तेसलै बोलौ, “मेरी भेरी च़ार।” 18हाऊं ताउंलै सौच़्च़ौ-सौच़्च़ौ बोलाऊ, “ज़ेबी तू ज़वान थौ ता आपणी कौमर बानिऔ ज़िऐ च़ाहा थौ तिऐ डिआ थौ। पर ज़ेबी तू बुड़ौ औआ लौ ता आपणै हाथ फौइलावा ई, और दुजै तेरी कौमर बानियौ ज़िऐ तू नाईं च़ाहा लौ तिऐ ताऊं नियां ई।” 19तिणी यीशुऐ एज़ी बुशेऊ कौरीऐ इशारौ दैऔ कि पतरस किणी मौउता कौरीऐ परमेश्‍वरा री बौड़ाई कौरा और तैबै तिणीऐ तेसलै बोलौ, “मैरौ च़ेलौ बौणी रौऊ।”

यीशु और तेसरौ प्यारौ च़ेलौ

20पतरसै मुड़ियौ सेऊ च़ेलौ पिछ़ाड़िऐ आशदै देखौ, ज़ासकु यीशु प्यार कौरा थौ, और ज़ुणिऐ रोटी खाणै रै बगता दी यीशु री छ़ाती भिलै झुकियौ पुछ़ौ थौ, “ओ प्रभु, ताऊं पकड़ाउणै वाल़ौ कुण आ?” 21तेस देखीयौ पतरसै यीशु लै बोलौ, “ओ प्रभु, एसरौ का हाल औआ लौ?” 22यीशुऐ तेसलै बोलौ, “अगर हाऊं च़ाऊ लै कि सेऊ मैरै आशणै झ़ांऊ रुकी रौआ, ता ताउंलै एथकु का? मैरौ च़ेलौ बौणी रौऊ।” 23एथीलै भाईऊ मांझ़िऐ एज़ी बुशै फौइली गोई कि सेऊ च़ेलौ नाईं मौरदौ। पर यीशुऐ तेसकै इणौ नाईं बोलौ थौ कि सेऊ नाईं मौरदौ, पर इणौ बोलौ थौ कि, “अगर हाऊं च़ाऊ लै कि सेऊ मैरै आशणै झ़ांऊ रुकी रौआ, ता ताउंलै एथकु का?”

इऐं किताबी रै बारै दी

24एऊ सेज़ौ च़ेलौ आ ज़ो एज़ी बुशु री गवाही दिआ और ज़ुणिऐ एज़ी बुशै लिखी ऐन्दी ई, और आमै ज़ाणी ई कि तेसरी गवाही सौच़्च़ी आ।

25औज़ौ भी भौरी काम ई, ज़ो यीशुऐ किएई। अगर तिऊं बुशु एक एक कौरीऐ लिखा थै, ता मेरी सौमझ़िऐ ज़ो किताबै लिखीणी थी सै धौतरी दी नाईं औका थी।

Currently Selected:

यहुन्ना 21: BFZ-NT

Highlight

Copy