यहुन्ना 20

खाली ओडाच़ी

(मत्ती 28:1-8; लुका 24:1-12; मरकुस 16:1-8)

1सप्ताह रै पैहलै दिनै मरियम मगदलीनी और औज़ौ ओर छ़ेउड़ी दोउत राची उठीयौ न्यारै दी ओडाच़ी काऐ आशी, और पात्थर ओडाच़ी कु घिसरौ औन्दौ देखौ। 2तैबै तिंउऐ फेट मारी और शमौन पतरस और तेस दुजै च़ेलै काऐ ज़ास आइलै यीशु प्यार कौरा थौ, आशीयौ बोलौ, “तिंउऐ ओडाच़ी भितै कु प्रभु रौ मौड़ौ गाड़िऔ नींई गौ आ, और आमै नाईं ज़ाणदै कि सेऊ किऐ छ़ाड़ी गौ आ।” 3तैबै पतरस और सेऊ दुजौ च़ेलौ निकल़ियौ ओडाच़ी भिलै च़ाल पौड़ै। 4सै दुइआ साथा-साथाई फेटै दैंदै थै लागै औन्दै, पर दुजौ च़ेलौ पतरसा कु औगाड़िऐ डेइऔ ओडाच़ी काऐ पैहलै पौउंच़ौ। 5और उटौ पौड़ीयौ जुड़कै धौनी पौड़ै औन्दै देखै, पर सेऊ भितरै नाईं डैऔ। 6तैबै शमौन पतरस ज़ो तेस पिछ़ु थौ आशदै लागौ औन्दौ पौउंच़ौ, और ओडाच़ी दी भितरै डैऔ और जुड़कै पौड़ै औन्दै देखै। 7और सेऊ कापड़ौ ज़ो तेसरै मुंडा दी थौ बानौ औन्दौ, जुड़कै आइलै पौड़ौ औन्दौ नाईं, पर अलग एकी ज़ागाह दी मेटियौ छ़ाड़ौ औन्दौ देखौ 8तैबै दुजौ च़ेलौ भी ज़ो ओडाच़ी काऐ पैहलै पौउंच़ौ थौ भितरै डैऔ और देखीयौ विश्वास किऔ। 9सै ता इबी झ़ांऊ पवित्रशास्त्रा री तिऐं बूश नाईं सौमझ़ै थै कि सेऊ मौरै औन्दै मांझ़िआ कु ज़िउंदौ हुआ आ। 10तैबै सै च़ेलै आपणै घौरै डेई गौऐ।

मरियम मगदलीनी कै यीशु दिशणौ

(मत्ती 28:9-10; मरकुस 16:9-11)

11पर मरियम लेरीयौ ओडाच़ी काऐ बाइरै खौड़ी रौई, और लेरदै-लेरदै ओडाच़ी भिलै उटै पौड़ीयौ। 12दुई सौरगदूत च़ौमकिलौ जुड़कै भिड़ीयौ एक शिराणै काऐ और दुजौ बांगणै काऐ बोशै औन्दै देखै, ज़िऐ यीशु रौ मौड़ौ थौ छ़ाड़ौ औन्दौ। 13तिंउऐ तियांलै बोलौ, “ओ मरियम, तू कैलै लेराई?” मरियमै तिउंलै बोलौ, “तिंउऐ मैरै प्रभु चुंगिऔ नीं गौ आ और हाऊं नाईं ज़ाणदी कि सेऊ किऐ छ़ाड़ौ औन्दौ।” 14इणौ बोलीयौ सै पिछ़ाऊं फिरी और यीशु खौड़ौ हुऔ औन्दौ देखौ, पर नाईं रवाउऔ कि एऊ यीशु आ। 15यीशुऐ तियांलै बोलौ, “ओ छ़ेउड़ी ज़ात, तू कैलै लेराई? कास लौड़ाई?” तिंआऐ सेऊ बौगिच़ा रौ माली सौमझ़िऔ तेसलै बोलौ, “ओ मैरौ भाई, अगर ताइंऐ सेऊ नींई गौ आ ता मुकै बोल कि सेऊ किऐ छ़ाड़ौ आ, और हाऊं तेस निआंऊ।” 16यीशुऐ तियांलै बोलौ, “मरियम!” तियांऐ पिछ़ाऊं फिरीऔ तेसलै इब्रानी बोली दी बोलौ, “रब्बूनी!” मतलब कि “ओ गुरु”। 17यीशुऐ तियांलै बोलौ, “मुं नाईं छ़ूं, कैलैकि हाऊं इबी झ़ांऊ बाबा काऐ उपरै नाईं डैऔ, पर मैरै भाईऊ काऐ डेइऔ तिउंलै बोल, कि हाऊं आपणौ बाब और तुमारौ बाब, और आपणै परमेश्‍वर और तुमारै परमेश्‍वरा काऐ उपरै डिआऊ।” 18मरियम मगदलीनी ऐ डेइऔ च़ेलेऊ कै बोलौ, “मुंइऐ प्रभु देखौ, और तिणीऐ मुलै एज़ी बुशै बोली।”

च़ेलेऊ काऐ पौगड़ौ हुणौ

(मत्ती 28:16-20; मरकुस 16:14-18; लुका 24:36-39)

19सेज़ै दिनै ज़ो सप्ताह रौ पैहलौ दीन थौ, ब्याल़कै बौगतै ज़ेबी तिदलै दार ज़िऐ च़ेलै थै, यहुदी मुख्येऊ रै डौरा कु बन्द थै, तैबै यीशु आशौ और तिऊं मांझ़िऐ खौड़ौ हुइयौ तिउंलै बोलौ, “तुमुलै शान्ति मिला।” 20और इणै बोलीयौ तिणीऐ आपणौ हाथ और आपणी कूख तिउंकै देखाल़ै। तैबै च़ेलै प्रभु देखीयौ खुश हुऐ। 21यीशुऐ तौंइऐ तिउंलै बोलौ, “तुमुलै शान्ति मिला। ज़िणौ बाबै हाऊं इऐं दुनिया दी भेज़ौ ऊ, तिणी ई हाऊं भी तुमु भेज़ाऊ।” 22इणौ बोलीयौ तिणीऐ तिऊं माथै फुकरौ और तिउंलै बोलौ, “पवित्र आत्मा निऔं। 23ज़ासरै पाप तुमै माफ कौरा, सै तिउंलै माफ की ई गौऐ ई। ज़ासरै पाप तुमै माफ नाईं कौरदै, तिउंरै पापा री माफी नाईं हुणै”

थोमा काऐ पौगड़ौ हुणौ

24थोमा ज़ुण बाराह च़ेलेऊ मांझ़िआ कु एक थौ, ज़ासलै दिदुमुस बोलाई, ज़ेबी यीशु आशौ ता सेऊ तिऐ नाईं थौ। 25ज़ेबी ओर च़ेलै तेसलै बोलदै लागै, “आमुऐ प्रभु देखौ आ, ”तैबै तिणीऐ बोलौ, “ज़ेबी झ़ांऊ हाऊं तेसरै हाथा दी प्रेगा रै छ़ेद नाईं देखुलौ, और तेसरै छेदा दी आपणी हाथा री औंउठी नाईं पाऊलौ, और तेसरी कुखी रै ज़ख्मा दी आपणौ हाथ ना पाऊ, तेबी झ़ांऊ हाऊं विश्वास नाईं कौरदौ कि यीशु ज़िउंदौ हुई गौ।” 26आठा दिना बासिऐ तेसरै च़ेलै तौंइऐ घौरा भितै थै, और थोमा तिऊं आइलै थौ। और दार बन्द थै, तैबै यीशु आशौ और तिऊं मांझ़िऐ खौड़ौ हुईऔ बोलौ, “तुमुलै शान्ति मिला।” 27तैबै तिणीऐ थोमा लै बोलौ, “आपणी ओंउठी कौरीयौ मैरै हाथ छ़ुंइयौ देख और आपणै हाथा री औंउठी मैरै हाथा रै छेदा दी पा, और शक नाईं पर विश्वास कर।” 28इणै शुणियौ थोमै ज़वाब दैऔ, “ओ मैरै प्रभु, ओ मैरै परमेश्‍वर!” 29यीशुऐ तेसलै बोलौ, “ताइंऐ हाऊं देखौ ऊ, का एथीलै विश्वास कियौ आ? भौलै ई सै आदमी ज़ुणिऐ बिण देखै मुं माथै विश्वास कियौ।”

इऐं किताबी रौ मतलब

30यीशुऐ ओर भी भौरी निशाण च़ेलेऊ कै देखाल़ै ई, ज़ो इऐं किताबी दी नाईं लिखौ औन्दौ। 31पर इऐ एथीलै आ लिखी ऐन्दी, कि तुमै विश्वास कौरा कि यीशु ई परमेश्‍वरा रौ छ़ोहरु मसीह आ, और तेस माथै विश्वास कौरीयौ सौदा री ज़िन्दगी पाऔ।

Currently Selected:

यहुन्ना 20: BFZ-NT

Highlight

Copy