प्रेरित 1

ज़ानकारी

1ओ थियुफिलुस, मुंइऐ पैहली किताब तिऊं सारी बुशु रै बारै दी लिखी ज़ो यीशु शुरु कु कौरा और शिखावा थौ, 2ज़ेबी झ़ांऊ यीशु सौरगा लै ना डैऔ। डेउणै कु पैहलै यीशु तिऊं च़ुनै औन्दै प्रेरितु लै पवित्र आत्मा रै ज़ौरिऐ हुकम दैन्दै थाकौ लागी। 3यीशुऐ दु:ख उठाउणै, मौउता बासिऐ भौरी पाकै सबूता कौरी देखाल़ौ कि हाऊं ज़िउंदौ हुऔ ऊ, और चालिस दिना झ़ांऊ तिउंकै दिशदै थाकौ लागी, और परमेश्‍वरा रै राज़ा री बुशै थाकौ तिउंकै शुणाउंदै लागी। 4ज़ेबी सै कौट्ठै थै तिऊंकु मिलियौ तिउंलै हुकम दैऔ, “यरुशलेम नाईं छ़ाड़ेऊ, पर मैरै बाबा रै तेस वायदै पुरै हुणै रौ इन्तज़ार कौरेऊ, ज़ेथरै बारै दी तुमुऐ मुकु पैहलै शुणी गौ आ। 5कैलैकि यहुन्नै ता तुमुलै पाणी रौ बपतिस्मौ दैऔ पर कुछ़ दिना बासिऐ परमेश्‍वर पवित्र आत्मा भेज़ा आ ताकी सेऊ तुमु भितै साथा दी रौआ।”

यीशु रौ सौरगा लै डेउणौ

6बासिऐ ज़ेबी प्रेरित यीशु कु मिलै ता तिंउऐ तेसकु पुछ़ौ, “का सेज़ौ बौगत आशी गौ कि तू इस्राइला रौ राज़्य आज़ाद कौरीयौ वापिस आणाई?” 7यीशुऐ तिउंलै बोलौ, “सेज़ै बौगता और काल़ा रै बारै दी ज़ाणनौ तुमारौ काम नाईं आ, कैलैकि सै बाबै आपणै हक्‍का दी छ़ाड़ी औन्दी। 8पर ज़ेबी पवित्र आत्मा तुमु माथै आशा लौ तेबी तुमै शक्ति पा आ ई। यरुशलेम शहर, सारै यहुदिया परदेश और सामरीया गांवा और सण्सारा रै हर ज़ागाहा दी तुमै मैरै शाजत हुणै ई।” 9इणै बोलीयौ सेऊ तिऊं रै देखदै-देखदै सौरगा लै डैऔ, और बादल़ा री वज़ाह कु सै तेस नाईं देखी बौल़ै। 10तेसरै डेउंदी बारै ज़ेबी सै सौरगा भिलै थै लागै औन्दै देखदै, ता देखौ तेबी ई दुई आदमी शेते जुड़कै भिड़ीयौ तिऊं काऐ आशीयौ खौड़ै हुऐ, 11और तिउंलै बोलौ, “ओ गलीली लोगुओ, तुमै कैलै ई खौड़ै हुइयौ सौरगा भिलै देखदै लागै औन्दै? एऊ यीशु, ज़ो तुमारै सामनै परमेश्‍वरै सौरगा लै निऔं आ, ज़िणौ तुमुऐ सेऊ सौरगा भिलै डेउंदै देखौ आ, तिणी सेऊ तौंइऐ आशा आ।”

मत्तियाह लै यहुदा री ज़ागाह मिलणी

12तेथ बासिऐ प्रेरित जैतून नावां री पहाड़ी कु यरुशलेम शहरा दी आशै, ज़ो यरुशलेमा रै नज़दीक तकरीबन एक किलोमिटर दूर आ। 13ज़ेबी सै तिऐ पौउंच़ै ता तिऐ माथलै कौमरै दी डै, ज़िऐ पतरस, यहुन्ना, याकूब, आन्द्रियास और फिलिप्पुस, थोमा, बरतुल्मै, मत्ती, हलफई रौ छ़ोहरु याकूब, शमौन, जेलोतेस और याकुबा रौ छ़ोहरु यहुदा रौआ थै। 14इऐ सारै और कई छ़ेउड़ी और यीशु री मां मरियम तेसरै भाईऊ आइलै एक मन हुइयौ प्राथना कौरदै थै लागै औन्दै। 15सेज़ै बौगता दी पतरस भाईऊ मांझ़िऐ ज़ो करीब एक शौ बीश आदमी थै, खौड़ै हुइयौ बोलदै लागौ, 16“ओ भाईओ, ज़ुरुरी थौ कि पवित्रशास्त्रा दी लिखौ औन्दौ वचन पुरौ हुआ ज़ो पवित्र आत्मै दाऊदा रै मुआं कु यहुदा रै बारै दी पैहलै कु थौ बोलौ औन्दौ, ज़ुण यीशु पाकुड़नै वाल़ेऊ रौ परधान थौ। 17यहुदा ता आमु मांझ़िया कु एक, और एज़ी सेवा रै कामा दी भी थौ साथा दी।”

18“ज़िणौ तुमै ज़ाणाई कि तेसरी बुरी कौमाई कौरी एक डोखरौ खरीदौ, और तेसरौ मूंड धौनी लागौ तेसरौ पेट भाज़ौ और तेसरै सारै आंज निकल़ै। 19एज़ी बूश यरुशलेमा दी रौइणै वाल़ै सारै लोगु कै पौतौ लागी, इदरा झ़ांऊ कि तेस डोखरै रौ नाऊं तिउंरी बोली दी ‘हक्कलदमा’ ज़ेथरौ मतलब ‘लोऊ रौ डोखरौ’ पौड़ी गौ।”

20पतरसै इणौ भी बोलौ कि, “भजन संहिता री किताबी दी दाऊदै यहुदा रै बारै दी इणौ लिखौ औन्दौ, ‘तेसरौ घौर उझ़ड़ौ च़ांई, और तेथदी कोई ना बौसा और तेसरी राज़गादी दी कोई ओर च़ांई बोशौ।’

21“एथीलै ज़ेती दिना झ़ांऊ प्रभु यीशु आमु आइलै आशा आण्डा थौ मतलब यहुन्ना रै बपतिस्मौ कु आमारै सामनै सौरगा लै डेउणै झ़ांऊ-ज़ो लोग इबी झ़ांऊ आमु आइलै रौऐ ई, 22एथीलै इणौ ज़ुरुरी आ कि तिऊं मांझिया कु एक आदमी आमु आइलै यीशु रै ज़िउंदै हुणै रौ शाजत बौणा।” 23तैबै तिंउऐ दुई लोग खौड़ै किऐ, एक युसुफ ज़ासलै बर-सबा भी बोला थै ज़ासरौ खानदानी नाऊं यूसतुस आ, और दुजौ मत्तियाह, 24और इणी प्राथना की, “ओ प्रभु तू ज़ो सारेऊ रै ज़िवा री ज़ाणाई, इणौ पौगड़ौ कर कि इऊं दुई मांझ़िया कु ताऐं कुण आ च़ुनौ औन्दौ, 25कि सेऊ इऐं सेवा रै काम और प्रेरिता री ज़ागाह सौंभाल़ा, ज़ास छ़ाड़ियौ यहुदा आपणी ज़ागाह लै डैऔ ज़िऐ तेस डेउणौ च़ांई।” 26तैबै प्रेरितुऐ तिऊं दुई रै नावां री चिट्ठी टाली, और चिट्ठी मत्तियाह रै नावां री निकल़ी। और सेऊ तिऊं ग्यारह च़ेलेऊ आइलै गिणुऔ।

Currently Selected:

प्रेरित 1: BFZ-NT

Highlight

Copy