यहुन्ना 19

डिंगै कौरी पिटणौ और मज़ाक उड़ाउणी

1एथ माथै पिलातुसै सिपाईउ लै हुकम दैऔ कि यीशु दी कोड़ै लाऔ। 2सिपाइउऐ कांडेउ रौ ताज़ बेलियौ तेसरै मुंडा माथै छ़ाड़ौ, और तेसकै बैंगनी रौंगा रै जुड़कै भिड़ाऐ, 3और तेस काऐ आशी-आशीयौ बोलदै लागै, “ओ यहुदिऊ रै राज़ै आ, ढाल!” और तेसदी थापै भी लाई। 4तैबै पिलातुसै तौंइऐ बाइरै निकल़ियौ लोगु लै बोलौ, “ देखौ, हाऊं एस तुमु काऐ तौंइऐ बाइरै आणाऊ। ताकी तुमै ज़ाणालै कि मुकै एसदी कुछ़ भी गौलती नाईं दिशदी।” 5तैबै यीशु कांडै रौ ताज़ और बैंगनी जुड़कै भिड़ाइयौ बाइरै गाड़ौ। और पिलातुसै तिउंलै बोलौ, “देखौ, एस आदमी!” 6ज़ेबी बौड़ै याजकु और च़ोउकीदारुऐ सेऊ देखौ, ता हाका देइयौ बोलौ, “एस क्रुसा माथै च़ौड़ाऊ, क्रुसा माथै!” पिलातुसै तिउंलै बोलौ, “तुमै ई एस निऔं और क्रुसा माथै च़ड़ाऔ, कैलैकि मुकै एसदी कोई भी गौलती नाईं दिशदी।” 7यहुदी मुख्येउऐ तेसलै ज़वाब दैऔ, “आमारौ भी कानून आ और तेस नियमा कौरी एऊ झ़ांगणै रै लायक आ, कैलैकि एऊ आपुलै परमेश्‍वरा रौ छ़ोहरु आ बौणौ औन्दौ।” 8ज़ेबी पिलातुसै एज़ी बूश शुणी ता औज़ौ भी भौरी डौरी गौ, 9और तैबै मैहला दी भितै डैऔ और यीशु लै बोलौ, “तू किदलौ ई?” पर यीशुऐ तेसलै कुछ़ भी ज़वाब नाईं दैऔ। 10एथ माथै पिलातुसै तेसलै बोलौ, “मुं आइलै कैलै ना बोलदौ? का तू नाईं ज़ाणदौ की ताऊं आज़ाद कौरणै रौ हक्क मुकै आ, और ताऊं क्रुसा माथै च़ड़ाउणा रौ हक्क भी मुकै आ।” 11यीशुऐ ज़वाब दैऔ, “अगर ताउंलै परमेश्‍वरा री तौरफा कु नाईं औआ थौ दैऔ औन्दौ, ता तैरौ मुं माथै कुछ़ हक्क नाईं औआ थौ। एथीलै ज़ुणिऐ हाऊं तेरै हाथा दी पकड़ाऔ ऊ तेसरौ पाप ज़ादौ आ।”

12एस ज़वाब शुणियौ पिलातुसै सेऊ छ़ाड़णौ च़ाऔ, पर यहुदिऊ लोगु री भीड़ हाका देइयौ बोलौ, “अगर तू एस छ़ाड़ाई ता तेरी दोस्ती कैसरा राज़ै आइलै नाईं आ। ज़ुण भी आपुलै राज़ौ बौणा सा सेऊ कैसर राज़ै रौ दुश्मन बौणा सा।” 13एज़ी बुशै शुणियौ पिलातुसै यीशु बाइरै आणौ और तिऐं ज़ागाह दी एक फैसलै री गादी थी ज़ेथलै इब्रानी बोली दी “गब्बता” बोला थै, और फैसलै शुणाउणै वाल़ी गादी माथै बोशौ। 14एऊ फसह रै साज़ै री त्यारी रौ दीन थौ, और छ़ौउऐ घंटै रै तकरीबन थौ। तैबै तिणीऐ यहुदी लोगु लै बोलौ, “देखौ तुमारौ राज़ौ!” 15पर तिंउऐ हाकै देई, “झ़ांगौ! झ़ांगौ! एस क्रुसा माथै च़ौड़ाऊ!” पिलातुसै तिउंलै बोलौ, “का हाऊं तुमारौ राज़ौ क्रुसा माथै च़ौड़ाऊ?” बौड़ै याजकुऐ ज़वाब दैऔ, “कैसर राज़ै छ़ाड़ियौ आमारौ कोई भी राज़ौ नाईं।” 16तैबै पिलातुसै यीशु तिंउरै हवालै कौरी गौ ताकी तेस क्रुसा माथै च़ौड़ावा लै।

यीशु क्रुसा माथी च़ौड़ाउणौ

(मत्ती 27:32-44; मरकुस 15:21-32; लुका 23:26-43)

17तैबै सिपाइउऐ यीशु नीं ऐरौ, और यीशु आपणौ क्रूस चुंगिऔ तिऐं ज़ागाह कु बाइरै डैऔ, “ज़ेथलै खोपड़ी री ज़ागाह” बोलाई और इब्रानी बोली दी “गुलगुता”। 18तिऐ तिंउऐ सेऊ और तेस आइलै तौंइऐ दुई आदमी क्रुसा माथै च़ौड़ाऐ, एक ओर भिलै और एक पौर भिलै, और मांझ़ा दी यीशु। 19पिलातुसै एक तौखती लिखीयौ क्रुसा दी लाई गोई, तौखती दी इणौ थौ लिखौ औन्दौ, “यीशु नासरी, यहुदिऊ रौ राज़ौ।” 20इऐ तौखती भौरी यहुदिउऐ पौड़ी, कैलैकि सेज़ी ज़ागाह ज़िऐ यीशु क्रुसा माथै च़ौड़ाऔ थौ यरुशलेम इलाकै काऐ थी। और तौखती दी इब्रानी और लतिनी और युनानी दी थौ लिखौ औन्दौ। 21तैबै यहुदिऊ रै बौड़ै याजकुऐ पिलातुसा लै बोलौ, “यहुदिऊ रौ राज़ौ नाईं लिखौ पर इणौ कि ‘तिणीऐ बोलौ, हाऊं यहुदिऊ रौ राज़ौ ऊ।’ ” 22पिलातुसै ज़वाब दैऔ, “मुंइऐ ज़ो लिखी गौ, सेऊ लिखी गौ।”

23ज़ेबी सिपाइउऐ यीशु क्रुसा माथै च़ौड़ाई गौ थौ, ता तेसरै जुड़कै नीईंयौ च़ारा भिलै किऐ, हर सिपाईउ लै एक हिस्सौ, और कुरतौ भी निऔं, पर कुरतौ बिण सिंऔ माथा कु तौल़ झ़ांऊ बुणौ औन्दौ थौ। 24एस कुरता लै तिंउऐ आपु मांझ़िऐ बोलौ, “आमै एस नाईं च़िरदै, पर एथ माथै पौर्च़ी पाई की एऊ कासरौ औलौ।” एऊ एथीलै हुऔ कि पवित्रशास्त्रा दी ज़ो लिखौ औन्दौ थौ सेऊ पुरौ हुआ, “तिंउऐ मैरै जुड़कै आपु मांझ़िऐ बांटी ऐरै और मैरै जुड़कै माथै पौर्च़ी पाई।” 25तैबै सिपाइउऐ इणी ई कियौ। यीशु रै क्रुसा काऐ तेसरी आमा और तेसरी आमारी बौइण, क्लोपासा री छ़ेउड़ी मरियम, और मगदल गांवा री मरियम खौड़ी थी। 26ज़ेबी यीशुऐ आपणी आमा, और सेऊ च़ेलौ ज़ास आइलै सेऊ प्यार कौरा थौ आपु काऐ खौड़ै देखै ता आपणी आमा लै बोलौ, “ओ आमा, देख, एऊ तैरौ छ़ोहरु आ।” 27तैबै तिणीऐ च़ेलै लै बोलौ, “इऐ तेरी आमा आ।” और सेज़ै बौगता कु तिणी च़ेलै ऐ सै यीशु री आमा आपणै घौरै नींई गोई।

यीशु री मौत

(मत्ती 27:45-56; मरकुस 15:33-41; लुका 23:44-49)

28एथ बासिऐ यीशुऐ इणै ज़ाणीऔ कि आबै सब-कुछ़ पुरौ हुई गौ आ, एथीलै कि पवित्रशास्त्रा दी ज़ो लिखौ आ सेऊ पुरौ हुआ, और बोलौ, “हाऊं चिशौ ऊ।” 29तिऐ सिरकै कौरीऐ भौरौ औन्दौ एक ओखर थौ छ़ाड़ौ औन्दौ, और तिऊं मांझ़िया कु एकीऐ लाम्बै डिंगै दी स्याइचूश लाऔ और सिरकै दी भिज़ाऔ और यीशु रै मुंआ दी लाऔ। 30ज़ेबी यीशुऐ सेऊ सिरकौ च़ाखौ, और बोलौ, “पुरौ हुऔ”। और मूंड उटै पाइयौ प्राण छ़ाड़ै।

बौड़छ़ै कौरी छोपणौ

31एथीलै कि सेऊ फसह री त्यारी रौ दीन थौ, यहुदिउऐ पिलातुसा कु औरज़ कौरी कि इऊं री टांगै पोरु च़ांई चोड़नी और क्रुसा कु उतारणै च़ांई ताकी इऐ आरामा रै दिना दी क्रुसा माथै ना रौआ, कैलैकि आरामा रौ दीन सारेऊ कु बौड़ौ दीन थौ। 32और तिऊं सिपाइउऐ आशीयौ तिऊं आदमी मांझ़िया कु पैहलै री टांगै चोड़ी और तैबै दुजै री भी, ज़ो यीशु आइलै थै क्रुसा माथै च़ौड़ाऐ औन्दै। 33पर ज़ेबी यीशु काऐ आशीयौ देखौ की एऊ मौरी गौ आ, ता तेसरी टांगै नाईं चोड़ी। 34पर सिपाईउ मांझ़िआ कु एकीऐ बरछ़ै कौरीऐ तेसरी शाफड़ी छोपी, और तेसकु खरकच़ार लोऊ और पाणी निकल़ौ। 35ज़ुणिऐ इणौ देखौ, तिणीऐ गवाही देई, और तेसरी गवाही सौच़्च़ी आ। और सेऊ ज़ाणा आ कि सेऊ सौच़्च़ौ बोला आ कि तुमै भी विश्वास कौरौ। 36एज़ी बुशै एथीलै हुई की पवित्रशास्त्रा दी ज़ो लिखौ औन्दौ आ सेऊ पुरौ हुऔ आ, “तेसरै कोई हाड़कै नाईं चोड़ा लै।” 37तैबै एक ओरी ज़ागाह दी इणौ आ लिखौ औन्दौ, “ज़ुण तिंउऐ छोपौ आ, तेस माथै सै नौज़र छ़ाड़ा लै।”

यीशु रौ मौड़ौ ओडाच़ी दी छ़ाड़णौ

(मत्ती 27:57-61; मरकुस 15:42-47; लुका 23:44-49)

38एज़ी बुशु बासिऐ अरिमतिया गांवा रै युसुफै ज़ो यीशु रौ च़ेलौ थौ, पर यहुदी मुख्येऊ रै डौरा कु एज़ी बूश च़ोरी छ़ाड़ा थौ, पिलातुसा कु औरज़ कौरी की का हाऊं यीशु रौ मौड़ौ निऊं लै। पिलातुसै तेसरी औरज़ शुणी और युसुफै आशीयौ यीशु रौ मौड़ौ निऔं। 39नीकुदेमुस भी, ज़ो पैहलै यीशु काऐ राची डैऔ थौ, पचास सेरा रै लगभग मिलाऔ औन्दौ खुशबुदार च़िज़ै और मैंहगै वाल़ौ तेल आणौ। 40तैबै तिंउऐ यीशु रौ मौड़ौ निऔं, और यहुदिऊ रै दाबणा रै रिवाज़ा कौरीऐ सेऊ खुशबुदार च़िज़ै कौरीऐ टालै दी मेटौ। 41सेज़ी ज़ागाह काऐ ज़िऐ यीशु क्रुसा माथै च़ौड़ाऔ थौ, एक बगीच़ौ थौ, और तेस बौगिच़ै दी एक नौईं ओडाच़ी थी ज़ासदी केबी भी कोई नाईं छ़ाड़ौ थौ। 42एथीलै यहुदिऊ रै त्यारी रै दिना रै वज़ाह कु तिंउऐ यीशु तेथी दी छ़ाड़ौ, कैलैकि सै ओडाच़ी नज़दीक थी।

Currently Selected:

यहुन्ना 19: BFZ-NT

Highlight

Copy