यहुन्ना 18

यीशु रौ पकड़ाइणौ

(मत्ती 26:47-56; मरकुस 14:43-50; लुका 22:47-53)

1यीशु प्राथना कौरणै बासिऐ आपणै च़ेलेऊ आइलै किद्रोन नावां रै नाल़ा पारभिलै डैऔ। तिऐ एक डोखरौ थौ, ज़ेथदी सेऊ और तेसरै च़ेलै डेवै। 2तेस पकड़ाउणै वाल़ौ यहुदा भी सेज़ी ज़ागाह ज़ाणा थौ, कैलैकि यीशु आपणै च़ेलेऊ आइलै तिऐ डेउंदै थाका थौ लागी। 3तैबै यहुदा, फौज़ी री एक टोली और बौड़ै याजकु और फरीसीउ री तौरफा कु कारदार आणियौ, दिवै और ज़ोकटी और हथियार आणियौ तिऐ आशौ। 4तैबै यीशु, तिऊं सारी बुशै ज़ो तेस आइलै हुणै वाल़ी थी ज़ाणियौ, निकल़ौ और तिउंलै बोलौ, “कास लोड़ाई?” 5तिंउऐ तेसलै ज़वाब दैऔ, “यीशु नासरी।” यीशुऐ तिउंलै बोलौ, हाऊं ऊ, तेस पकड़ाउणै वाल़ौ यहुदा भी तिऊं आइलै खौड़ौ थौ। 6यीशु रै इणौ बोलदै ई, “हाऊं ऊ,” सै पिछ़ुड़ै हुइयौ माटै माथै लोटी गौऐ। 7तैबै तिणीऐ तौंइऐ तिऊंकु पुछ़ौ, “तुमै कास लोड़ाई।” तिंउऐ बोलौ, “यीशु नासरी।” 8यीशुऐ ज़वाब दैऔ, “मुंइऐ ता तुमुलै बोली गौ आ कि हाऊं ऊ, अगर मुं लोड़ाई ता इऊं ओरी डेउणै दैऔ।” 9एऊ एथलै हुऔ कि सेऊ वचन पुरौ हुआ ज़ो तिणीऐ बोलौ थौ, “ज़ो ताइंऐ मुकै देई तिऊं मांझ़िआ कु मुंइऐ एक भी ना औच़ाऐ।” 10तैबै शमौन पतरसै तलवार, ज़ो तेसकै थी, गाड़ी और परधान याजका रै दासा दी लाइऔ तेसरौ सुल़टौ कौन्थु काटी गौ। तेस दासा रौ नाऊं मलखुस थौ। 11तैबै यीशुऐ पतरसा लै बोलौ, “आपणी तल़वार म्याणा दी छ़ाड़। ज़ो खोरु बाबै मुलै दैऔ आ, का हाऊं तेस नाईं पिऊ?”

हन्ना रै सामनै यीशु

12तैबै फौज़ीउऐ और तिऊं रै सुबेदारै और यहुदिऊ रै कारदारुऐ यीशु पाकड़ियौ बानौ, 13पैहलै सेऊ हन्ना काऐ निऔं, कैलैकि सेऊ सेज़ी बौरशा रै परधान याजक काइफा रौ शेऊरौ थौ। 14एऊ सेज़ौ काइफा थौ, ज़ुणिऐ यहुदिऊ लै एज़ी सलाह देई थी कि आमारै लोगु लै एकी आदमी रौ मौरणौ आच़्छ़ौ आ।

पतरसा रौ इनकार

(मत्ती 26:69-70; मरकुस 14:66-68; लुका 22:7)

15शमौन पतरस और एक दुजौ च़ेलौ यीशु पिछ़ाड़ी च़ाल पौड़ै। एऊ च़ेलौ परधान याजका रौ ज़ाणौ-पहच़ाणौ थौ, सेऊ यीशु रै साथाई बौड़ै याजकु रै तौंगा दी डैऔ। 16पर पतरस बाइरी भिलै दारा काऐ खौड़ौ रौ। तैबै सेऊ दुजौ च़ेलौ ज़ो परधान याजका रै ज़ाण-पैहच़ाणा रौ थौ, बाइरै निकल़ौ और ज़ो नुकराण दारा काऐ औआ थी छ़ाड़ी ऐन्दी तिंआलै बोलीयौ पतरस भितरै आणौ। 17तिऐं नुकराणिऐ ज़ो दारा काऐ थी, पतरसा लै बोलौ, “किऐ तू भी एस आदमी रै च़ेलै मांझ़िया कु ता नाईं?” तिणीऐ बोलौ, “हाऊं नाईं ऊ।” 18नुकुर और च़ोउकीदार शेल़ै री वज़ाह कु गाठै फुकरिऔ आगी तापदै थै लागै औन्दै, और पतरस भी तिऊं आइलै खौड़ौ हुइयौ आगी तापदै थौ लागौ औन्दौ।

माहायाजकु रै ज़ौरिऐ यीशु कु पूछ़ताछ़

(मत्ती 26:59-66; मरकुस 14:55-64; लुका 22:66-71)

19तैबै परधान याजक यीशु कु तेसरै च़ेलेऊ रै बारै दी और तेसरी शिक्षा रै बारै दी पुछ़दै लागौ। 20यीशुऐ तेसलै ज़वाब दैऔ, “मुंइऐ सारेऊ आइलै खोलियौ बुशै लाई ई। मुंइऐ आराधनालय और परमेश्‍वरा रै घौरा दी, ज़िऐ भौरी सारै यहुदी कौठै हुआ थै, सौदा शिक्षा देई और च़ोरिऐ कुछ़ भी नाईं बोलौ। 21तू मुकु एस सवाल कैलै पुछ़ा ई? शुणनै वाल़ेऊ कु पूछ़ कि मुंइऐ तिउंकै का बोलौ। देख, सै ज़ाणाई की मुंइऐ का-का बोलौ।” 22ज़ेबी तिणीऐ इणौ बोलौ, तैबै च़ोउकीदारा मांझ़िआ कु एकीऐ ज़ो तिऐ खौड़ौ थौ, यीशु दी थापै लाइयौ बोलौ, “का तू परधान याजका लै इणै कौरीऐ ज़वाब दिआई?” 23यीशुऐ तेसलै ज़वाब दैऔ, “अगर मुंइऐ बुरौ बोलौ, ता तिंया बुराई सारेऊ काऐ बोल। पर अगर भौलौ बोलौ आ, ता मुं कैलै पिटाई?” 24हन्नै यीशु ज़ो बानौ औन्दौ थौ काइफा नाआं रै परधान याजका काऐ भेज़ी गौ।

पतरसा रौ दुजी बारै इनकार कौरणौ

(मत्ती 26:71-75; मरकुस 14:69-72; लुका 22:58-62)

25शमौन पतरस खौड़ी हुइयौ आगी तापदै थौ लागौ औन्दौ। तैबै तिंउऐ तेसलै बोलौ, “किऐ तू भी एसरै च़ेलै मांझ़िआ कु ता नाईं?” तिणीऐ मुकरियौ बोलौ, “हाऊं नाईं ऊ।” 26परधान याजका रै नुकरा मांझ़िया कु एक, ज़ो तेसरै टौबरा मांझ़िऊ कु थौ ज़ासरौ कौन्थु पतरसै काटौ थौ, बोलौ, “का मुंइऐ तू यीशु आइलै बौगिच़ै दी नाईं देखौ थौ?” 27पतरस तौंइऐ मुकरौ, और खरकच़ार कुखड़ौ बाशौ।

पिलातुसा रै सामनै यीशु

(मत्ती 27:1-2,11-14; 15:1-5; लुका 23:1-5)

28तैबै तिंउऐ यीशु काइफा काऐ कु पिलातुसा रै मैहला दी नींई गौ, और दोतकौ बौगत थौ, पर सै आपु मैहला भितै नाईं डै ताकी बिटाल़िया नाईं पर फसह रै साज़ै री रोटी खाई बौल़ा। 29तैबै पिलातुस बाइरै निकल़ौ और तिऊं काऐ आशीयौ बोलौ, “तुमै एस आदमी माथै केज़ी बुशा रौ आरोप ला ई?” 30तिंउऐ तेसलै ज़वाब दैऔ, “अगर एऊ बुरै कामा कौरणै वाल़ौ नाईं औआ थौ ता आमै एस तैरै हाथा दी नाईं दिआ थै।” 31पिलातुसै तिउंलै बोलौ, “तुमै ई नियौं एस आपणै नियमा कौरी एसरौ फैसलौ कौरौ।” यहुदी मुख्येउऐ तेसलै बोलौ, “आमुकै हक्क नाईं की आमै कासरौ प्राण निऊं लै।” 32एऊ एथलै हुऔ की यीशु री सेज़ी बूश पुरी हुआ ज़ो तिणीऐ इणै, इशारै दैंदी बारै बोली थी की तेसरी मौत किणी हुआ। 33तैबै पिलातुस तौंइऐ मैहला दी भितरै डैऔ, और यीशु भितरै औटाइयौ तेसकु पुछ़ौ, “का तू यहुदिऊ रौ राज़ौ ई?” 34यीशुऐ तेसलै ज़वाब दैऔ, “का तू एज़ी बूश आपणी तौरफा कु बोलाई या दुजेउऐ मैरै बारै दी ताउंकै इणौ बोलौ आ?” 35पिलातुसै ज़वाब दैऔ, “तू ज़ाणाई कि हाऊं यहुदी नाईं ऊ। तेरी ई ज़ाती और बौड़ै याजकुऐ तू मैरै हाथा दी दैऔ ई। ताइंऐ का किऔ आ?” 36यीशुऐ ज़वाब दैऔ, “मैरौ राज़ इऐं धौतरी रौ नाईं। अगर मैरौ राज़ इऐं धौतरी रौ औआ थौ, ता मैरै सेवक पिटिआ थै कि मुं यहुदी मुख्यै रै हाथा दी नाईं दिआ थै, पर मैरौ राज़ इदलौ नाईं।” 37पिलातुसै तेसलै बोलौ, “तैबै का तू राज़ौ ई?” यीशुऐ ज़वाब दैऔ, “तू आपु बोलाई की हाऊं राज़ौ ऊ। मुंइऐ एज़ी ताइंऐ ज़नम निऔं और एथीलै धौतरी दी आशो ऊ कि सौच़्च़ाई री गवाही दैऔ। ज़ुण-कुण सौच़्च़ाई कु प्यार कौरा आ, सेऊ मेरी बाच़ शुणा आ।” 38पिलातुसै तेसलै बोलौ, “सौच़्च़ाई का सा?”

मौरणै री सौज़ा रौ हुकम

(मत्ती 27:15-31; मरकुस 15:6-20; लुका 23:13-25)

इणौ बोलीयौ सेऊ तैबै यहुदी मुख्यै काऐ डैऔ और तिउंलै बोलौ, “मुकै ता एसदी कुछ़ भी बुराई नाईं दिशदी।” 39“पर तुमारौ एज़ौ रिवाज़ा आ कि फसह रै साज़ै दी तुमुलै एक कैदी आज़ाद कौरु। तैबै का तुमै च़ाहा ई कि हाऊं तुमुलै यहुदिया रौ राज़ौ छ़ाड़ु?” 40तैबै तिंउऐ तौंइऐ हाकै देइयौ बोलौ, “एस नाईं, पर आमुलै बरअब्बा छ़ाड़।” और बरअब्बा एक डाकु थौ।

Currently Selected:

यहुन्ना 18: BFZ-NT

Highlight

Copy