प्रेरित 6
6
सात सेवक छ़ांटणै
1सेज़ै बौगता दी च़ेलेऊ री गिनती भौरी बौड़दै लागी, तैबै युनानी बोली बोलणै वाल़ै च़ेलै इब्रानी बोली बोलणै वाल़ै च़ेलेऊ लै लौड़दै लागै, कि हर दिना री सेवा दी आमारी विधवा छ़ेउड़ीऊ री पूछ़-ताछ़ नाईं हुंदी। 2तैबै तिऊं बारह च़ेलेउऐ, विश्वासिऊ री खुंबल़ी कौट्ठै की और बोलौ, “इणौ ठीक नाईं कि आमै परमेश्वरा रै वचन छ़ाड़ियौ खाणै-पिणै री सेवा कौरदै लागी। 3एथीलै, ओ भाईओ आपु मांझ़िया कु सात आदमी ज़ासरौ च़ाल-च़लण आच़्छ़ौ आ, पवित्र आत्मा कौरी भरपूर ई, और औकली वाल़ै ई, तिऊं छ़ांटौ, कि आमै तिउंकै एज़ौ काम सौम्भाल़ु। 4पर आमै ता प्राथना, वचना रौ परचार और शिक्षा दैंदै थाकी लागी।” 5इऐ बूश सारी खुंबल़ी कै आच़्छ़ी लागी, और तिंउऐ स्तिफनुस नावां रौ एक आदमी ज़ुण विश्वास और पवित्र आत्मा कु भौरुऔ थौ, और फिलिप्पुस, प्रुफुरुस, नीकानोर, तिमोन, और परमिनास, और अन्ताकिया रौ नीकुलाउस ज़ुण यहुदी गुटा दी आशी गौ थौ, छ़ांटै। 6और च़ेलेऊ काऐ नीईंयौ खौड़ै किऐ, च़ेलेऊ ऐ तिऊं माथै प्राथना कौरीऔ हाथ छ़ाड़ै और सेवा कौरना लै छ़ांटै। 7परमेश्वरा रौ वचन फैलदै थौ लागौ औन्दौ और यरुशलेमा दी च़ेलेऊ री गिनती भौरी बौड़ी गोई। और भौरी यहुदी याजकुऐ भी एज़ौ गुट अपणाई गौ।
स्तिफनुस कैदा लै निणौ
8स्तिफनुस दया और शक्ति कौरी भौरुइऔ लोगु मांझ़िऐ बौड़ै-बौड़ै नोखै काम और निशाण देखावा थौ। 9तैबै तेस आराधनालय दी ज़ो आज़ाद हुऐ औन्दै गुलाम लोगु री थी, तिऊं मांझ़िऐ कुछ़ लोग कुरेनी, सिकन्दरिया, किलकिया, और आसिया कु थै आशै औन्दै, सै उठीयौ स्तिफनुसा कु वाद-विवाद कौरदै लागै। 10तैबै भी सेऊ इणै औकली और आत्मा कौरी बोला थौ कि सै तेसरौ विरोध नाईं कौरी बौल़ै। 11तैबै तिंउऐ कुछ़ लोग खौड़ै किऐ कि सै तेसरौ इणौ बोलीयौ विरोध कौरा कि, “आमुऐ एऊ मुसा और परमेश्वरा रै विरोधा ई बुराई री बुशै बोलदै शुणौ आ।” 12तैबै तिंउऐ स्तिफानुसा रै खिलाफा दी लोग और यहुदी स्याणै, और यहुदी शास्त्री भड़काइयौ, सेऊ पाकड़ियौ बौड़ी खुंबल़ी दी आणौ। 13और झ़ुठै शाजत खौड़ै किऐ, ज़ुणिऐ इणौ बोलौ, “कि एऊ आदमी इऐं पवित्र ज़ागाह और मुसा रै नियमा रै विरोधा ई बार-बार बोला आ। 14कैलैकि आमुऐ एऊ इणौ बोलदै शुणौ आ कि सेऊ ऊ यीशु नासरी एस परमेश्वरा रौ घौर पोरु ढाल़ा आ, और तिऊं नियम पोरु मिटावा ज़ो मुसा रै ई आमुकै दैऔ औन्दै।” 15तैबै बौड़ी खुंबल़ी दी बोशै औन्दै लोगुऐ, तेस भिलै बौड़ै ध्याना कौरी देखौ ता तिंउऐ तेसरौ मुं सौरगदूता बाशीऐ च़ौमकौ औन्दौ देखौ।
Currently Selected:
प्रेरित 6: BFZ-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.