प्रेरित 5

हनन्याह और सफीरा

1हनन्याह नावां रै एक आदमी और तेसरी छ़ेउड़ी सफीरै कुछ़ ज़बीन बेच़ी, 2तेथरी कौमाई कु कुछ़ पैसै छ़ाड़ै आपुकै। बाकी पैसै आणियौ दै प्रेरितु कै, और एज़ी बूश तेसरी छ़ेउड़ी सफीरा भी ज़ाणा थी। 3तैबै पतरसै बोलौ, “ओ हनन्याह! शैतानै तैरै ज़िवा दी इणी बूश कैलै टाली कि तू पवित्र आत्मा कु झ़ूठ बोला, ज़मीना री कौमाई कु कुछ़ आपुकै छ़ाड़ा? 4ज़ेबी सै ज़बीन ताउंकै थी तेबी का तेरी नाईं थी? और ज़ेबी ताऐं बेच़ी आ तेबी का तैरै वशा दी नाईं थी? ताऐं इऐ बूश आपणै ज़िवा दी कैलै सुंच़ी आ? ताऐं आदमी कु नाईं, पर परमेश्‍वरा कु झ़ूठ बोलौ आ।” 5इणी बुशै शुणियौ हनन्याह धौनी लोटौ और मौरी गो, और सारै शुणनै वाल़ै भौरी डौरी गौऐ। 6तैबै ज़वान आदमीउऐ भितरै आशीयौ तेस कालै खाट चाणी और सेऊ बाइरै नींइयौ तेसरौ किरया करम कियौ। 7तेथरै चीन घंटै बासिऐ तेसरी छ़ेउड़ी सफीरा भी, ज़ासकै पौतौ नाईं थौ कि इदै का हुऔ थौ, भितरै आशी। 8तैबै पतरसै तिंआलै बोलौ, “मुकै बोल का तुमुऐ ज़बीन एती पैसेऊ लै बेच़ी थी? तिंआऐ बोलौ, ‘ओ एती लै बेच़ी आ।’ ” 9तैबै पतरसै तिंआलै बोलौ, “इऐ का बूश आ की तुमु दुइयै प्रभु री आत्मा कु झ़ूठ बोलणै री ठाणी ऐन्दी? देख, तैरै बोउटै दाबणै वाल़ै दारा काऐ ई, और ताऊं भी बाइरै निआं ई।” 10तैबै सै फेटी पतरसा रै बांगणै माथै पौड़ी, और मौरी गोई। और ज़वान आदमीउऐ भितरै आशीयौ सै मौरी ऐन्दी देखी, और बाइरै नींई औ तिंआरै बोउटै काऐ तियांरौ किरया-करम कियौ। 11सारी कलिसिया ज़ो यरुशलेमा शहरा दी थी और इऊं बुशै शुणनै वाल़ै सारै लोग भौरी डौरै।

निशाण और नोखै काम

12प्रेरितु रै हाथा कु लोगु मांझ़िऐ भौरी नोखै-नोखै काम थै लागै औन्दै हुंदै। और सै सारै विश्वासी एक मन हुइयौ परमेश्‍वरा रै घौरा दी सुलेमाना रै खौल़ै दी कौट्ठै हुआ थै। 13पर ओरीऊ मांझ़िआ कु ज़ुणिऐ इबी झ़ाऊं यीशु माथै विश्वास नाईं कियौ थौ कासी कै भी तिऊं आइलै कौट्ठै हुणै, मिलणै री हिम्मत नाईं हुई तैबै भी लोग तिउंरी बौड़ाई कौरा थै। 14प्रभु माथै विश्वास कौरणै वाल़ै भौरी आदमी और छ़ेउड़ी री भीड़ रोज़ प्रभु री कलिसिया दी मिला थी। 15इदरा झ़ांऊ कि लोग, बिमार लोगु सौड़की दी आणियौ च़ारपाई और बिस्तरै माथै छ़ाड़ा थै ताकी ज़ेबी पतरस आशा, ता तेसरी छ़ांई तिऊं माथै पौड़ा। 16यरुशलेमा रै नज़दीका रै इलाकै कु भी भौरी लोग बिमारु और बुरी आत्मा रै सताऐ औन्दै लोगु प्रेरितु काऐ आणा थै, और सै सारै बिमार च़ांगै हुआ थै।

प्रेरित कैदा लै निणै

17तैबै परधान याजक और तेसरै साथी ज़ुण सदुकिऊ रै गुटा रै थै, सै रोशुइयौ, नफरता कौरी भौरुऐ, 18तिंउऐ च़ेलै पाकड़ियौ ज़ेला दी पाऐ। 19पर राची प्रभु रै एकी दूतै ज़ेला रै दार खोलिऔ सै बाइरै गाड़ै और तिउंलै बोलौ, 20“डैऔ, परमेश्‍वरा रै घौरा दी खौड़ै हुइयौ इऐं सौदा री ज़िन्दगी री सारी बुशै लोगु कै शुणाऔ” 21सै इणै शुणियौ दोअती परमेश्‍वरा रै घौरा दी डेइयौ परचार कौरदै लागै। तैबै परधान याजक और तिंउरै साथीऊ ऐ खुंबल़ी और इस्राइला रै सारै स्याणै कौट्ठै किऐ, और हुकम दैऔ, कि तिऊं च़ेलै ज़ेला कु बाइरै आणौ। 22ज़ेबी परमेश्‍वरा रै घौरा रै च़ोउकीदार प्रेरितु आणदै डेवै ता सै तिऐ ज़ेला दी नाईं मिलै, तैबै वापिस आशीयौ तिंउऐ इऐ खौबर शुणाई, 23“आमुऐ ता ज़ेला रै दार आच़्छ़ा कौरी बन्द, और च़ोअकीदार बाइरै दारा काऐ खौड़ै देखै ई। पर ज़ेबी दार खोलौ, ता भितै कोई ना मिलौ।” 24ज़ेबी च़ोउकीदारु रै आफसरै और बौड़ै याजकुऐ इऐ खौबर शुणी, ता भौरी सुंच़दै लागै कि आबै का हुआ लौ! 25तेबीयालै एकीऐ आशीयौ तिउंलै बोलौ, “देखौ, ज़ेज़ै तुमुऐ ज़ेला दी थै बन्द किऐ औन्दै, सै परमेश्‍वरा रै घौरा दी खौड़ै हुईऔ लोगु लै शिक्षा दैंदै ई लागै औन्दै।” 26तैबै च़ोउकीदारु आइलै तिऊंरौ आफसर भी डैऔ और सै शान्ति कौरीऐ आणै, कैलैकि सै भीड़ा रै लोगु कु डौरा थै कि तिंउऐ पथरीआऐ ना च़ांई।

27तिंउऐ सै आणियौ बौड़ी खुंबल़ी दी खौड़ै किऐ। तैबै परधान याजकै तिऊंकु पुछ़ौ, 28“का आमुऐ तुमै खौबरदार कौरीऔ हुकम नाईं दैऔ कि, एस नावां री शिक्षा नाईं देवेऊ? तैबै भी तुमुऐ सारै यरुशलेमा दी आपणी शिक्षा फैलाई गोई, और तुमै तेस आदमी री मौउता रौ आरोप आमु माथै लाइणौ च़ाहा ई।” 29तैबै पतरस और ओरी प्रेरितुऐ ज़वाब दैऔ, “आदमी रै हुकम मानणै कु परमेश्‍वरा रौ हुकम मानणौ ज़ादौ ज़ुरुरी आ आमुलै। 30आमारै नाना-बुड़ु रै परमेश्‍वरै यीशु मौरै औन्देऊ मांझ़िया कु ज़िउंदौ कियौ आ, ज़ो तुमुऐ क्रुसा माथै लटकाई औ झ़ांगौ थौ। 31परमेश्‍वरै यीशु, प्रभु और छ़ुटकारै दैणै वाल़ौ चाणौ, और आपणी सुल़टी भिलै बौड़ौ महान कियौ, कि सेऊ इस्राइलिऊ लोगु कै मन बौदुल़णै री शक्ति और पापु री माफी दिया। 32आमै एज़ी बुशु रै शाजत ई, तिणी ई पवित्र आत्मा भी, ज़ो परमेश्‍वरै तिउंकै देई ऐन्दी ज़ुण तेसरै हुकम माना ई।”

33इणै शुणियौ सै बौड़ी खुम्बल़ी रै लोग मिशींदै लागै, और तिऊं झ़ांगणै च़ाहा थै। 34पर गमलीएल नावां रै एकी फरीसीऐ ज़ुण नियमा रौ ज्ञानी और सारै लोगु मांझ़िया कु मुख्यै थौ, बौड़ी खुंबल़ी दी खौड़ी हुईऔ हुकम दैऔ कि इऊं च़ेलेऊ थोड़ै बौगता लै बाइरै गाड़ौ। 35तैबै तिणीऐ बोलौ, “ओ इस्राइलिऊ ओ, तुमै ज़ो कुछ़ भी इऊं लोगु आइलै कौरणौ च़ाहा ई सुंच़ी-सौमझ़िऔ कौरेऊ। 36कैलैकि कुछ़ बौगत पैहलै थीऊदास नावां रै आदमीऐ दावै कौरीऐ बोला थौ कि हाऊं भी कुछ़ आसती ऊ। लगभग च़ार शौ लोग तेस पिछ़ु हाण्डा थै पर सेऊ झ़ांगौ पोरु ता तेस पिछ़ु हांडणै वाल़ै वारै-पारै बिखरै, और खातम हुऐ। 37तेत बासिऐ नाऊं लिखाई रै बौगतै यहुदा गलीली उठौ, और कुछ़ लोग आपु भिलै किऐ। पर सेऊ भी हुऔ खातम और ज़ेती लोग तेस माना थै, सै सारै वारै-पारै हुऐ। 38एथीलै आबै हाऊं तुमुलै बोलाऊ, कि इऊं लोगु कु दूर ई रौऔ, और इऊं कु कुछ़ मतलब ना छ़ाड़ौ। कैलैकि अगर एऊ काम आदमी री तौरफा कु औलौ ता खातम हुआ। 39पर अगर औलौ परमेश्‍वरा री तौरफा कु, ता तुमै इऊं नाईं मिटाई सौकदै। केशी इणौ नां च़ांई हुऔ कि तुमै परमेश्‍वरा कु भी लौड़णै वाल़ै बौणा।”

40तैबै तिंउऐ तेसरी बूश मानी। और प्रेरित औटाइयौ पिटवाऐ। और तिउंलै हुकम दैऔ कि यीशु रै नावां कौरी कोई बुशै ना लाएऊ। 41तैबै प्रेरित एज़ी बुशा कु खुश हुइयौ बौड़ी खुंबल़ी कु डेई गौऐ कि आमै यीशु रै नावां लै बेइज़्ज़त हुणै रै लायक ता बौणै। 42सै हर दीन परमेश्‍वरा रै घौरा दी और घौरा-घौरा दी डेइऔ शिक्षा दैंदै लागै और एज़ी बुशा री खुश-खौबरी शुणाउंदै लागै कि “यीशु ई मसीहा आ”।

Currently Selected:

प्रेरित 5: BFZ-NT

Highlight

Copy