प्रेरित 4

बौड़ी खुंबल़ी काऐ पतरस और यहुन्ना

1ज़ेबी सै लोगु आइलै इणौ बोलदै थै लागै औन्दै, ता याजक और परमेश्‍वरा रै घौरा रै मुख्यै, और सदुकी तिऊं काऐ आशै। 2और तिउंलै भौरी रोशुऐ कि सै लोगु कै शिखावा थै और यीशु रै बारै दी औनैणौ देई-देइयौ मौरै हौन्देउ रै ज़िउंदै हुणै रै बारै दी परचार कौरा थै। 3तिंउऐ सै च़ेलै पाकड़ियौ दुजै दिना झ़ांऊ ज़ेला दी बन्द किऐ कैलैकि ब्याल़ हुई गोई थी। 4पर वचन शुणनै वाल़ेऊ मांझ़िया कु भौरी लोगुऐ यीशु माथै विश्वास कियौ, और तिऊं री गिनती पांज़ हज़ार लोगु रै लगभग हुई गोई। 5दुजै दिनै इणौ हुऔ कि यहुदिऊ रै मुख्यै, स्याणै और शास्त्री, 6परधान याजक, हन्ना और कैफा, यहुन्ना और सिकन्दर, ज़ेती भी बौड़ै याजका रै घौरा रै थै, सारै यरुशलेमा दी कौट्ठै हुऐ। 7तैबै तिंउऐ सै च़ेलै मांझ़ा दी खौड़ै किऐ और तिऊंकु पुछ़दै लागै कि, “तुमुऐ इऐ काम कासरी शक्ति और कासरै हक्‍का कौरी कियौ आ?” 8तैबै पतरसै पवित्र आत्मा कु भौरुइऔ तिउंलै बोलौ, 9“ओ लोगु रै स्याणै और मुख्यै लोगुओ, एस कमज़ोर आदमी आइलै ज़ो भौलाई हुई आ, अगर एथरै बारै दी आज़ हामु कु पुछ़ा ई कि एऊ च़ांगौ किणै कौरी हुऔ आ। 10ता तुमु सारै इस्राइली लोगु कै आज़ पौतौ च़ांई लागौ कि यीशु मसीह नासरी रै नावां कौरी, ज़ो तुमुऐ क्रुसा माथै च़ड़ाऔ, और ज़ो परमेश्‍वरै मौरै औन्दै मांझ़िया कु ज़िउंदौ कियौ, तेसी रै नावां कौरी एऊ आदमी तुमु मांझ़िऐ भौलौ-च़ांगौ खौड़ौ आ। 11मसीह यीशु ई सेज़ौ पात्थर आ ज़ो तुमु मिस्त्रीउऐ बेकार सौमझ़ौ पर सेऊ कुणै रौ बड़ीया पात्थर बौणौ। 12यीशु रै अलावा कास दुजै रै नावां कौरी छ़ुटकारौ नाईं आसती। कैलैकि सौरगा थाल पुरी दुनिया दी लोगु मांझ़िऐ कोई दुजौ नाऊं नाईं आ दैऔ औन्दौ, ज़ासरै नावां कौरी आमै छ़ुटकारौ पाई सौका।”

13ज़ेबी तिंउऐ पतरस और यहुन्ना री हिम्मत देखी, और इणौ ज़ाणौ कि इऐ अनपड़ और सिधै-साधै आदमी ई, ता सै हैरान हुऐ। और सै रवाई गौऐ कि इऐ यीशु आइलै रौऐ ई। 14तेस आदमी, ज़ुण च़ांगौ हुऔ थौ, पतरस और यहुन्ना आइलै खौड़ै देखीयौ यहुदिऊ रै खुंबल़ी रै लोग तिंउरै विरोधा दी कुछ़ ना बोली बौल़ै। 15पर तिउंलै खुंबल़ी कु बाइरै डेउणै रौ हुकम देइयौ सै आपु मांझ़िऐ चौपड़िंदै लागै, 16“आमै इऊं लोगु आइलै का कौरुलै? कैलैकि यरुशलेमा दी रौइणै वाल़ै भौरी लोग ज़ाणाई, कि इउंरै ज़ौरिऐ एक बौड़ौ हैरानी वाल़ौ काम हुऔ आ। और आमै तिऐं सौच़्च़ाई रौ इनकार भी नाईं कौरी सौकदै। 17पर आमै इऊं धमकाई की इऐ यीशु नावां री बुशै तौंइऐ कास ओरी आइलै नाईं ला, ज़ेथ कौरी इऐ खौबर लोगु मांझ़िऐ ज़ादी ना फौइला।” 18तैबै तिंउऐ पतरस और यहुन्ना औटाऐ और तिउंलै हुकम देइयौ बोलौ, “यीशु रै नावां कौरी कुछ़ ना बोलेऊ और ना कुछ़ शिखाऐ ऊ।” 19पर पतरस और यहुन्नै तिउंलै ज़वाब दैऔ, “तुमै फैसलौ कौरौ। का एऊ परमेश्‍वरा री नौज़रीऐ भौलौ आ कि आमै परमेश्‍वरा री बुशा कु बौड़ियौ तुमारी बुशै मानु लै। 20कैलैकि कि इणौ ता आमुकै हुणौ नाईं कि ज़ो आमुऐ देखौ और शुणौ आ, तेस नाईं बोलु लै।” 21तैबै तिंउऐ सै औज़ौ धौमकाइयौ पोरु छ़ाड़ै, कैलैकि लोगु री वज़ाह कु तिउंलै सौज़ा दैणै रौ तिउंकै कोई मौकौ ना मिलौ, कैलैकि ज़ो हैरानी वाल़ौ काम हुऔ थौ तेथरी वज़ाह कु लोग परमेश्‍वरा री बौड़ाई कौरदै थै लागै औन्दै। 22ज़ास माथै एऊ च़ंगाई रौ हैरानी वाल़ौ काम हुऔ थौ तेसरी उमर चालिसा कु ज़ादी थी।

विश्वासिऊ री प्राथना

23सै तिदरु छ़ुटियौ आपणै साथीऊ काऐ डेवे, और ज़ो कुछ़ बौड़ै याजकुऐ और स्याणेउऐ तिउंलै बोलौ थौ, सेऊ तिऊं काऐ शुणाऔ। 24इणै शुणियौ तिंउऐ एक मन हुइयौ ज़ोरै-ज़ोरै परमेश्‍वरा कु प्राथना कौरी, “ओ मालिक (प्रभु) ताऐं सौरग, धौतरी, समुन्दर और ज़ो कुछ़ एथदी आ चाणौ आ।” 25ताऐं ई पवित्र आत्मा कौरीऐ आपणै सेवक आमारै पुरखा दाऊदा रै मुआं कौरी बोलौ, “दुजी ज़ातीऊ रै लोग कैलै रोशुऐ ई? और देशा-देशा रै लोग बुरी बुशै कैलै सुंच़ाई? 26प्रभु और तेसरै चुनै औन्दै मसीहा रै विरोधा ई, धौतरी रै राज़ै खौड़ै हुऐ, और हाकीम साथाई कौट्ठै हुई गौऐ।” 27कैलैकि सौच़्च़ी ई तैरै सेवक यीशु रै विरोधा ई, ज़ासरौ ताऐं अभिषेक कियौ, हेरोदेस और पुन्तियुस पिलातुस भी ओरी ज़ातीऊ और इस्राइली लोगु आइलै एस इलाकै दी कौट्ठै हुऐ, 28कि ज़ो कुछ़ पैहलै कु तेरी शक्ति और मौरज़ी कु थौ तेसी कौरा। 29“आबै ओ प्रभु, तिउंरी धमकी शुण। और आपणै च़ेलेऊ कै इणौ बौर दै कि तैरौ वचन बड़ी हिम्मत्ती कौरी शुणावा। 30च़ांगै कौरना लै तू आपणौ हाथ बौड़ाऊ, कि नोखै और हैरानी वाल़ै काम तैरै पवित्र सेवक यीशु रै नावां कौरी हुआ।” 31ज़ेबी तिंउऐ प्राथना कौरी एरी, ता सै ज़ागाह ज़िऐ सै कौट्ठै थै हिली गोई, और सै सारै पवित्र आत्मा कौरी भौरुई गौऐ, और परमेश्‍वरा रौ वचन हिम्मत्ती कौरी थाकै शुणाउंदै लागी।

विश्वासिऊ रौ मिली ज़ुलियौ रौइणौ

32विश्वास कौरणै वाल़ेऊ री खुंबल़ी एक ज़िऊ एक मौना री थी, इदरा झ़ांऊ कि कोई भी आपणी ज़यदादा लै आपणी नाईं बोला थौ, पर सब कुछ़ साज़ै रौ थौ। 33च़ेलै बौड़ी शक्ति कौरी प्रभु रै दुजी बारै ज़िउंदै हुणै री गवाही दैंदै थाकै लागी और तिऊं सारेऊ माथै बौड़ी दया थी। 34तिऊं मांझ़िया कु कोई भी गरीब नाईं थौ। कैलैकि ज़ासकै ज़बीन या घौर थै, सै तिऊं बेच़ीयौ तेथरै रुपाऐ पैसै आणा थै, और तिऊं च़ेलेऊ रै बांगणै माथै छ़ाड़ा थै। 35और ज़िणी प्रेरितु कै ज़ुरत हुआ थी, तिणी ई एकी दुजै कै बांडा थै। 36युसुफ नावां रौ एक आदमी ज़ो साइप्रसा रै एक लेवी ज़ाती रौ थौ, ज़ासरौ नाऊं च़ेलेऊ ऐ बरनबास छ़ाड़ौ ज़ेथरौ मतलब ओरीऊ लै हिम्मत दैणै वाल़ौ आ। 37तेसरी कुछ़ ज़बीन थी, ज़ो तिणीऐ बेच़ी, और तेथरै रुपाऐ आणियौ प्रेरितु कै दिया थै।

Currently Selected:

प्रेरित 4: BFZ-NT

Highlight

Copy