प्रेरित 7

स्तिफनुसा रौ भाषण

1तैबै परधान याजकै पुछ़ौ, “का इऐ आरोप सौच़्च़ै ई?” 2स्तिफनुसै बोलौ, “ओ भाईओ, और स्याणेउओ शुणौ। आमारौ पुरखा अब्राहम हारान गांवा दी बौसणै कु पैहलै ज़ेबी मेसोपोटामिया नावां री ज़ागाह दी थौ। ता बौड़ाई वाल़ै परमेश्‍वरै तेसकै दर्शण दैऔ, 3और तेसकै बोलौ, ‘तू आपणौ देश और आपणै रिश्तैदार छ़ाड़ियौ सेज़ै देशा लै डेऊ ज़ो हाऊं ताउंकै देखाल़ा ऊ।’ ” 4तैबै सेऊ कसदिऊ नावां रै देशा कु निकल़ियौ हारान गांवा दी बौसौ। तेसरै बाबा मौरणै बासिऐ परमेश्‍वरै सेऊ तिदरु आणियौ एज़ै देशा दी बौसाऔ ज़ेथदी आबै तुमै रौआ ई! 5सेज़े बौगतै परमेश्‍वरै तेसकै तिऐ कुछ़ हिस्सौ बल्कि बांगणै छ़ाड़ना लै भी ज़ागाह नाईं देई। तेबी ता तेसरै कोई सन्तान भी नाईं थी, पर परमेश्‍वरै तेसकु वायदौ किऔ कि हाऊं एस देश ताउंकै और ताऊं बासिऐ तैरै वंशा कै सौंभाल़ा ऊ। 6और परमेश्‍वरै इणौ भी बोलौ, तैरै वंशा रै लोग बिगानै देशा दी परदेशी औआ ई और सै तिऊं गुलाम चाणा ई, और च़ार शौ साला झ़ांऊ तिउंलै दु:ख दिआई। 7तैबै परमेश्‍वरै बोलौ, “ज़ेज़ी ज़ाती रै सै नुकुर-गुलाम औआ लै, तिउंलै हाऊं सौज़ा दिआऊ, तेथ बासिऐ सै तेस देशा कु निकल़ियौ एज़ी ज़ागाह दी मेरी आराधना कौरा ई।” 8और परमेश्‍वरै अब्राहमा आइलै खतनै रौ वायदौ किऔ। और इणै बौगता दी इसहाक पैदौ हुऔ ज़नमा रै आठवै दिनै इसहाका रौ खतनौ कियौ। इसहाका कु याकूब याकुबा कु बारह ज़ाती रै लोग पैदै हुऐ।

9“युसुफ रै भाई युसुफा आइलै नफरत छ़ाड़ा थै तिंउऐ युसुफ मिस्र देशा लै डेउणै वाल़ै लोगु कै बेच़ौ, पर परमेश्‍वर तेस आइलै थौ। 10परमेश्‍वरै युसुफ सारै कौष्टा कु बौच़ाऔ और तिदलै राज़ै फिरौना काऐ तेसलै दया और औकल देई, एथीलै तिणीऐ मिस्र देश और आपणौ घौर सौम्भाल़णै रौ सारौ हक्क युसुफा कै दैऔ। 11तैबै सारै मिस्र देशा दी और कनान देशा दी काल़ पौड़ौ और लोगु माथै भौरी मुसीबत आशी आमारै स्याणेऊ कै खाणा लै नाज़ नाईं मिलौ। 12तैबै आमारै स्याणै याकुबा कै पौतौ लागौ कि मिस्र देशा दी नाज़ आ, तैबै तिणीऐ आपणै छ़ोहरु पैहली बारै नाज़ा खरीदणा लै तिऐ भेज़ै। 13दुजी बारै युसुफ तिऊं आपणै भाईऊ मांझ़िऐ पौगड़ौ हुऔ, तैबै फिरौना कै पौतौ लागौ कि सै आशै औन्दै लोग युसुफा रै भाई और इब्रानी ज़ाती रै आ। 14तैबै युसुफै आपणौ बाब याकूब और आपणै सारै खानदानी रै लोग ज़ो पचहतर लोग थै, आपु काऐ मिस्र देशा दी औटाऐ। 15तैबै याकूब मिस्र देशा दी डैऔ, कुछ़ बौगता बासिऐ तिऐ याकूब और आमारै स्याणै मौरै। 16तिउंरी लाशै शेकेमा दी आणी और सेज़ी कब्रा दी दाबी, ज़ो अब्राहमै हमोरा रै छ़ोहरु कु च़ांदी देइऔ खरीदी थी।”

17“ज़ैबै सेज़ै वायदै रै पुरै हुणै रौ बौगत आशौ ज़ो परमेश्‍वरै अब्राहमा आइलै कियौ थौ, ता मिस्र देशा दी सै लोग गिनती दी भौरी बौड़ी गौऐ, और सै भौरी हुई गौऐ। 18मिस्र देशा दी दुजौ राज़ौ बौणौ ज़ो युसुफ नाईं ज़ाणा थौ। 19तिणीऐ आमारी ज़ाती रै लोगु आइलै भौरी बुरौ बर्ताव किऔ एती बुरौ कियौ कि तिंउऐ आपणै लोल़डै छ़ोहरु शोटणै पा पौड़ै ताकी सै पोरु मौरा। 20सेज़ै बौगता दी मुसा पैदौ हुऔ। सेऊ परमेश्‍वरा री नौज़रीऐ भौरी बांठणौ थौ, सेऊ तेसरै मां-बाबै चिया मिहनै झ़ांऊ च़ोरिऐ धाचौ। 21ज़ेबी सै मां-बाब तेस मांऊ ज़ादौ नाईं च़ोराई बौल़ै ता तिऊंऐ सेऊ मांऊ घौरा कु बाइरै छ़ाड़ौ ता फिरौना री छ़ोटुड़ीऐ सेऊ च़ुंगौ और आपणै लोल़डेऊ ज़िणौ धाचौ-पाल़ौ। 22मुसा कै मिस्र ज़ाती री सारेऊ कु आच़्छ़ी विधया पौढ़ाई और सेऊ बुशु-धाशेऊ और कामा दी शक्तिशाल़ी थौ।”

23ज़ेबी मुसा चालिस साला रौ हुऔ तैबै तेसरै ज़िवा दी आशी कि हाऊं आपणै इस्राइली भाईऊ कु मिलु। 24मुसै एक आपणी ज़ाती भाई माथै ज़ुलम हुंदै देखौ ता सेऊ बौच़ाऔ और मिस्र ज़ाती रौ आदमी झ़ांगीयौ तेसरौ बौदल़ौ निऔं। 25तिणीऐ सुंच़ौ कि तेसरै भाई इस्राइली सौमझ़ा लै कि परमेश्‍वर तेस कौरी तिउंरी गुलामी कु छ़ुटकारौ कौरा आ, पर तिंउऐ तिणौ नाईं सौमझ़ौ। 26दुजै दिनै ज़ेबी सै आपु मांझ़िऐ लौड़दै थै लागै औन्दै, ता मुसै तिऐ आशीयौ तिउंलै मेल कौरना लै सौमझ़ाइयौ बोलौ, कि तुमै ता आपु मांझ़िऐ भाई-भाई ई तैबै कैलै लौड़ाई? 27पर ज़ुण सेऊ आपणै पड़ोसी आइलै थौ लागौ औन्दौ लौड़दै तिणीऐ तेसदी धाकै देइऔ बोलौ, “तू कुणी चाणौ आमु माथलौ आफसर, और कुणी दैणै ताउंकै फैसलै कौरणै रौ हक्क? 28का ज़िणौ ताऐं ईज़ मिस्र ज़ाती रौ आदमी झ़ांगौ आ तिणी मुं भी झ़ांगणौ च़ाहा ई?” 29इणै शुणियौ मुसा तिदरु भागौ और मिधान देशा दी परदेशी हुइयौ रौउंदै लागौ, तिऐ तेसरै दुई छ़ोहरु भी पैदै हुऐ।

30“ज़ैबै चालिस साल बिती गौऐ, तैबै सौरगदूतै मुसा कै सीन्नै नावां री पहाड़ी री शुनशान ज़ागाह दी झ़ाढ़ी री आगी दी दर्शण दैऔ। 31मुसा एस दर्शण देखीयौ हैरान हुऔ, ज़ैबै सेऊ देखणा लै नज़दीक डैऔ ता परमेश्‍वरा री हाक शुणुई, 32‘हाऊं तैरै पुरखा, अब्राहम, इसहाक, और याकुबा रौ परमेश्‍वर ऊ,’ इणै शुणियौ मुसा डौरीयौ कांबदै लागौ इदरा झ़ांऊ कि तेसकै देखणै री हिम्मत भी नाईं पौड़ी। 33तैबै परमेश्‍वरै तेसलै बोलौ, ‘आपणै बांगणै कु बूट गाड़ पोरु, कैलैकि ज़ेज़ी ज़ागाह दी तू ई सै पवित्र ज़ागाह सा।’ 34मुंइऐ आपणै लोगु री ज़ो मिस्र देशा दी ई, हालत देखी आ। और तिउंरी लेरने री हाकै शुणी आ। एथीलै हाऊं तिऊं छ़ुड़ाउंदै आशो ऊ। आबै आश हाऊं ताऊं मिस्र देशा लै भेज़ाऊ।”

35“ज़ेज़ौ मुसा तिंउऐ इणै बोलीयौ पोरु गाड़ौ थौ, कि ताउंकै आमु माथै आफसर बौणनै रौ और फैसलै कौरणै रौ हक्क कुणिऐ दैऔ आ?” सेऊ परमेश्‍वरै हक्क और छ़ुड़ाउणै वाल़ौ चाणीऔ तेस सौरगदूता रै ज़ौरिऐ भेज़ौ ज़ुणिऐ तेसकै झ़ाढ़ी दी दर्शण दैऔ थौ। 36तिणी आदमी मुसै, सै मिस्र देशा कु गाड़िऔ लाल समुन्दर और ज़ांगल़ा दी चालिस साला झ़ांऊ हैरानी वाल़ै कामा देखाल़ीऔ आणै। 37एऊ सेज़ौ मुसा आ ज़ुणिऐ इस्राइलिऊ लै बोलौ, “परमेश्‍वर तुमु कालै तुमारै भाईऊ मांझ़िया कु मुं ज़िणौ भविष्यवक्ता खौड़ौ कौरा आ।” 38एऊ सेऊ आ ज़ुण ज़ांगल़ा दी खुंबल़ी मांझ़िऐ तेस सौरगदूता आइलै थौ ज़ुणिऐ सीन्नै नावां री पहाड़ी री शुनशान ज़ागाह दी मुसा आइलै बुशै लाई आ, और आमारै नान-बुड़ु आइलै थौ, तेसी कै ज़िउंदै वचन मिलै ई ताकी आमु झ़ांऊ पौउंच़ावा। 39पर आमारै नान-बुड़ुऐ तेसरी नाईं मानी, बल्कि तेस छ़ाड़ियौ आपणै मन मिस्र देशा भिलै मोड़ै, 40और मुसा रै भाई हारुना लै बोलौ, “आमु कालै एक इणौ दैऔ चाण ज़ो आमु मिस्र देशा लै वापिस निंया, कैलैकि एऊ मुसा ज़ुणिऐ आमै मिस्रा कु छ़ुड़ाइयौ आणै ई, आमै नाईं ज़ाणदै कि तेसलै का हुऔ?” 41सेज़ै बौगता दी तिंउऐ एक बाशटु री मूर्ती चाणी और तेथ काऐ बौल़ी च़ड़ाई, और आपणै हाथा रै कामा दी मगन हुऐ। 42तैबै परमेश्‍वरै आपणौ मूंह तिऊंकु पोरु मोड़ौ और सै छ़ाड़ी गौऐ कि सै सौरगा रै ग्रह री आराधना कौरा, ज़िणौ भविष्यवक्ता री किताबी दी आ लिखौ औन्दौ, “ओ इस्राइला रै लोगुओ, का तुमै शुनशान ज़ागाह दी चालिस साला झ़ांऊ पशु री बौल़ी और नाज़ा री बौल़ी मुइलै च़ौड़ावा थै? 43तुमै मोलेका रै ताम्बु और रिफान देवा रै तारै आपुकै नींइयौ घुमाई, मतलब सै मूर्ती ज़ो तुमुऐ आराधना कौरना लै चाणी थी। एथीलै हाऊं तुमु बेबीलौन देशा पारभिलै नीईंयौ बसावा ऊ।”

44गवाही रौ ताम्बु शुनशान ज़ागाह दी आमारै नान-बुड़ु मांझ़िऐ थौ, ज़िणौ कि मुसा आइलै परमेश्‍वरै थौ बोलौ औन्दौ, कि “तेस ताम्बु तिणी चाणै ज़िणौ ताऐं देखौ आ। 45भौरी साला बासिऐ सेज़ौ ताम्बु आमारै नान-बुड़ुऐ आणियौ यहोशु आइलै इदै आणौ आ। ज़ेज़ै बौगता दी तिंउऐ तिऊं ओरी ज़ातीऊ माथै कौबज़ौ कियौ ज़ो परमेश्‍वरै आमारै नान-बुड़ु काऐ कु पोरु गाड़ी गौऐ, और सेऊ ताम्बु दाऊदा राज़ै रै बौगता झ़ांऊ रौ आ। 46दाऊद राज़ै माथै परमेश्‍वरै बौड़ी दया कि आ। तैबै तिणीऐ औरज़ की कि सेऊ याकुबा रै परमेश्‍वरा आइलै रौइणा लै ज़ागाह चाणा। 47पर दाऊद राज़ै रै छ़ोहरु सुलेमानै तेस कालै घौर चाणौ ज़िऐ लोग आशीयौ परमेश्‍वरा री भौक्ती कौरी बौल़ा। 48पर परमेश्‍वर हाथा कौरी चाणै औन्दै घौरा दी नाईं रौइंदौ, ज़िणौ यशायाह भविष्यवक्ता री किताबी दी आ लिखौ औन्दौ, 49‘परमेश्‍वर बोला आ कि, सौरग मैरै बोशणै री ज़ागाह आ और धौतरी मैरै बांगणै छ़ाड़णै री पीड़ी मुं कालै तुमै किणौ घौर चाणा ई? और मैरै आराम कौरणै री किणी ज़ागाह औली? 50का इऐ सारी च़िज़ै मैरै हाथा री नाईं चाणी ऐन्दी?’ ”

51“ओ ढीठ लोगुओ, परमेश्‍वरा री बुशु नाईं शुणनै और मानणै वाल़ै लोगुओ। तुमै सौदा पवित्र आत्मा रौ विरोध कौरा ई। ज़िणौ तुमारै नान-बुड़ु कौरा थै, तिणी तुमै भी कौरा ई। 52तुमारै नान-बुड़ुऐ सारै भविष्यवक्ता सताऐ, तिंउऐ सै भी पोरु झ़ांगै ज़ुणिऐ तेस मसीहा रै आशणै रै बारै दी पैहले कु खुशी री खौबर देई थी, ज़ास पाकुड़नै वाल़ै और झ़ांगणै वाल़ै आबै तुमै बौणी गौऐ। 53तुमुऐ सौरगदूता री बोलै औन्दै नियम शुणै पर सै मानी नाईं।”

स्तिफनुस ढोल़ियाउणौ

54इऊं बुशु शुणियौ सै यहुदी मुख्यै रोशा कौरी भौरुऐ, और स्तिफनुसा लै दांदा चाकदै लागै। 55पर तिणीऐ पवित्र आत्मा कु भौरुइऔ सौरगा भिलै देखौ और परमेश्‍वरा री महिमा और यीशु परमेश्‍वरा री सुल़टी भिलै खौड़ौ हुऔ औन्दौ देखीयौ, 56बोलौ, “देखौ हाऊं सौरग खुलौ औन्दौ, और आदमी रौ छ़ोहरु परमेश्‍वरा री सुल़टी भिलै खौड़ौ हुऔ औन्दौ देखाऊ।” 57तैबै तिंउऐ ज़ोरै हाका देइऔ कौन्थु बन्द किऐ, और कौट्ठै तेस पिछ़ु पौड़ै। 58और सेऊ धाकै मारीयौ यरुशलेम शहरा कु बाइरै नीईंयौ सेऊ ढोल़ियाऔ। गवाही दैणै वाल़ेउऐ आपणै जुड़कै खोलिऔ शाऊला नावां रै नौज़वाना काऐ छ़ाड़ै। 59सै स्तिफनुसा दी पात्थरै लाइंदै थाकै लागी, और सेऊ इणै बोलीयौ प्राथना कौरदै थाकौ लागी कि, “ओ प्रभु यीशु, मेरी आत्मा अपणाऊ।” 60तैबै घुण्डै माथै टेकीऔ ज़ोरै बोलदै लागौ, “ओ प्रभु, ज़ो पाप इऐ कौरदै ई लागै औन्दै एज़ै पापा लै इऊं माफ कर।” और इणै बोलीयौ सेऊ मौरी गौ। शाऊल भी तेस झ़ांगणै दी शामिल थौ।

Currently Selected:

प्रेरित 7: BFZ-NT

Highlight

Copy