Luka 7
7
Jesû nîwavonirie ndungata ya mûnene wa athigari îgana
(Mat 8.5-13)
1Rîrîa Jesû aarîkirie kwîra andû maûndû marîa monthe eendaga kûmeera, nîwacokire akîthiî îtûûrarî rîa Kaperinaumu. 2Vîndî îo mûnene ûmwe wa athigari îgana wa Kîîroma aarî na ndungata îmwe yake eendeete mûno. Na kavinda kau ndungata îo nîyarwarîte mûno îgakuvîvîria gûkua. 3Vîndî îrîa mûnene ûcio wa athigari îgana eegwire ngumo ya Jesû, nîwatûmire athuuri amwe a Ayahudi mathiî mete Jesû nîguo akavonie ndungata îo. 4Rîrîa athuuri acio maakinyire varîa Jesû aarî, nîmaamûthaithire mûno makîmwîraga atîrî, “Nama mûndû ûyû nîmwagîrîru wa gûtethua nîwe, 5nîûndû ke nîwendete andû etû na nîwatûtumîre îvoero.”
6Kwoguo Jesû nîwathiîre vamwe na athuuri acio. Na vîndî îrîa aakinyire vakuvî na mûciî, mûnene ûcio nîwatûmire arata ake mathiî kûrî Jesû makamwîre atîrî, “Mwathani tiga kwîthînia nîûndû nie ndirî mwagîrîru wa gûkûnyita ûgeni gwakwa mûciî. 7Na kîu nîkîo gîtûmi kîrîa kîngiririe mbûke kûrî we. Nwatî we uga kiugo kîmwe tu, na ndungata yakwa nî îkûvona. 8Nîûndû wa nanie nî mbathagwa, na ngacoka kwatha athigari akwa. Nî mbîîraga mûthigari ûmwe, ‘Thiî,’ nake akathiî, ngacoka ngera wîngî, ‘Ûka,’ nake agaûka. Na nginya ndungata yakwa nîmîraga, ‘Îka ûndû ûyû,’ nayo îgeka.”
9Vîndî îrîa Jesû eegwire ûguo, nîwamakire akîvûgûkîra kîrîndî kîrîa Kîammuumîte vuva na agîkîîra atîrî, “Nie nîramwîra atî wana nginya gûkû Isiraeli ndianona mûndû wana ûmwe wî na wîtîkio ta ûyû!”
10Na vîndî îrîa anjaama acio maacokire mûciî kwa mûnene nîmeethîrîrie ndungata îo îrî mvonu.
Jesû nîwariûkirie kamwana ka mûndûmûka wa ndigwa
11Vuva wa ûguo#7.11 Vuva wa ûguo: Mandîko mamwe maugaga, ‘Mûthenya ûcio wîngî.’, Jesû nîwathiîre îtûûrarî rîetagwa Naini arî vamwe na arutwa ake na kîrîndî. Na vîndî îrîa aakuvîvîrie kîvingo Kîam îtûûra rîu, nîwatûnganire na andû makuuîte mwîrî wa mûndû mûkuû mathiîte kûûthika. 12Nake mûndû ûcio wakuîte aarî mwana wa mûmwe wa mûndûmûka wa ndigwa. Na andû eengî a kuuma îtûûrarî rîu nîmaathiîte na mûndûmûka ûcio mathikorî mau. 13Vîndî îrîa Mwathani oonire mûndûmûka ûcio, nîwamwîguîrîre ntha na akîmwîra atîrî, “Tiga kûrîra.” 14Jesû nîwacokire akîthiî na akîvutia îthandûkû rîa mûndû ûcio wakuîte na andû arîa maarîkuuîte makîrûngama. Nake Jesû akiuga atîrî, “Kamwana gaka nie nakwîra ûramûke.” 15Nako kamwana kau nîkaaramûkire, gagîkara nthî na gakîambîrîria kwaria. Nake Jesû nîwacokire agîkanenganîra kûrî ng'ina.
16Nao andû onthe arîa maarî vo nîmecûrirwe nî guoya na magîkumia Ngai makiugaga atîrî, “Tue tûrî aumîrîre nî Mûrathi mûnene, na Ngai nîaûkîte kûvonokia andû ake.”
17Naguo ûvoro ûyû wîgiî Jesû nîwatambire Judea kuonthe na matûûrarî marîa maakûthiûrûrûkîrîtie.
Anjaama arîa maatûmîtwe nî Johana Mûvatithania
(Mat 11.2-19)
18Vîndî îrîa Johana eerirwe ûvoro wa maûndû mau monthe nî arutwa ake, nîwetire arutwa aîrî gatagatîrî kao 19na akîmatûma mathiî kûrî Mwathani makamûûrie atîrî, “We nîwe ûrîa Johana aaugire nîûgûka kana nîkwa tûgweterera wîngî?”
20Nao arutwa acio makinya kûrî Jesû nîmaamûririe atîrî, “Johana Mûvatithania atûtûma kûrî we tûke tûkûrie kana we nîwe ûrîa aatwîrire nîûgûka, kana nîkwa tûgweterera wîngî?”
21Îvinda wa rîu Jesû nîwavonirie andû eengî arîa maarî na mîrimû, akîrutûrûra maroho macûku kuuma kûrî andû arîa maarî namo, na akîvotithia atumumu eengî kwona. 22#Isa 35.5-6; 61.1 Nake Jesû nîwacokire akîîra anjaama acio atîrî, “Cokani mûkeere Johana maûndû marîa mweyonera na mweîguîra: atî atumumu nîmarona, ithua nîirathiî, andû arîa arwaru mûrimû wa mangû nîmaratherua, itegua nîiregua, akuû nîmarariûkua, na athîni nîmaravunjîrua Ûvoro Mwaro. 23Mûndû ûrîa mûrathime nî ûrîa ûtethagîrwa arî na nganja maûndûrî monthe marîa mambîgiî!”
24Vîndî îrîa anjaama a Johana maathiîre, Jesû nîwambîrîrie kwîra kîrîndî ûvoro wîgiî Johana na akiuga atîrî, “Vîndî îrîa mwathiîre werûrî kûrî Johana-î, mweciragia nîndûî mwathiîte kwona? Mwathiîte kwona îthanje rîkinainua nî rûkûngi? 25Nîndûî vi mwathiîte kwona? Mwathiîte kwona mûndû wekîrîte nguo îrî na riiri? Nie nîramwîra atî, andû arîa mekîraga nguo irî na riiri na matûûraga waro, monekanaga mîciîrî ya athamaki. 26Kwoguo nîndûî vi mwathiîte kwona? Mwathiîte kwona mûrathi? Îni nîguo, mue mwathiîte kwona mûrathi, nwatî nîmwonire mûndû mûnene gûkîra mûrathi. 27#Mal 3.1 Nîûndû Johana nîke mandîko maugaga ûvoro wake atî, ‘Nie nîngûtûma mûnjaama wakwa athiî mbere yaku, nîguo agakûthondekere njîra.’ 28Nie nîramwîra atîrî, ‘Gatagatîrî ka andû arîa onthe maanaciarwa nî aka, gûtirî wa na ûmwe wao mûnene gûkîra Johana. Nwatî mûndû ûrîa mûnini viû ûthamakirî wa Ngai, nî mûnene gûkîra Johana.’ ”
29 #
Mat 21.32; Luka 3.12 Andû onthe arîa meegwire ciugo cia Jesû na mûno makîria etia a mbeca cia gooti, nîmeetîkirie atî njîra cia Ngai nî nûngarû vîndî îrîa meetîkîrire kûvatithua nî Johana. 30Nwatî Afarisai na arimû a Watho nîmaaregire gwîtîkia atî njîra cia Ngai nî nûngarû vîndî îrîa o maaregire kûvatithua nî Johana.
31Jesû nîwathiîre na mbere na kûmeera atîrî, “Nîndûî rîu nîngîgerekania andû a rûciaro rûrû nakîo? Rîu andû aya-î mekariî ta ndûî? 32Mekariî ta ciana ciîkarîte thokorî. Na gîkundi kîmwe gîa ciana icio gîkeraga kîrîa kîngî atîrî, ‘Tue twamwinîre nyîmbo cia ûviki, nwatî mûtieinia, tûgîcoka tûkîmwinîra nyîmbo cia kîeva, nwatî mûtiarîra!’ 33Nie namwîra ûguo nîûndû vîndî îrîa Johana Mûvatithania aaûkire na akîînyerekia kûrîa mîgate wana nginya kûnyua ndivei mwaugire atî, ‘Ke arî na ngoma!’ 34Nake Mûrû wa Mûndû aûka akîrîcaga na akînyunyaga mûkiuga atî, ‘Taroriani mûndû ûyû! Ke nîmûkoroku na nî mûrîu! Nî mûrata wa etia a mbeca cia gooti na wa evia arîa engî.’ 35Nwatî ûûgî wa Ngai nîwonanagua nî wa ma nî andû onthe arîa metîkagîra ndûmîrîri ya Johana na ya Jesû.”
Jesû nîwanyitirwe ûgeni mûciî kwa Mûfarisai wetagwa Simioni
36Mûfarisai ûmwe nîwetîre Jesû irio. Rîrîa Jesû aathiîre mûciî kwa Mûfarisai ûcio, nîwekarire nthî na akîambîrîria kûrîa irio. 37#Mat 26.7; Mar 14.3; Joh 12.3 Nakuo kwarî na mûndûmûka warî mwîvia îtûûrarî rîu. Rîrîa mûndûmûka ûcio eegwire atî Jesû aarî mûciî kwa Mûfarisai akîrîa irio, nîwathiîre kuo akuuîte mûcuva wîcûrîte maguta maanungaga waro ma kwîvaka. 38Nake mûndûmûka ûcio nîwaturirie maru vakuvî na magûrû ma Jesû akîambîrîria kûrîra, na methori marîa maaumaga akîrîra nîmeetîkîre na magîconja magûrû ma Jesû. Nake mûndûmûka ûcio nîwagiririe methori mau na njuîrî ciake, agîcoka akîmumunya magûrû na akîmavaka maguta. 39Vîndî îrîa Mûfarisai ûcio wetîrîte Jesû irio oonire ûguo, nîweîrire na ngoro atîrî, “Mûndû ûyû angîrî mûrathi, nîangîramenya mûndûmûka ûyû ûramûvutia nî wa mûthemba ûrîkû, wana rîngî nîangîramenya mûndûmûka ûyû nî mwîvia.”
40Nake Jesû nîwerire Simoni atîrî, “Simoni! Nie nîrî na ûndû nîrenda gûkwîra.”
Nake Simoni nîwacokerie Jesû atîrî, “Nî ûndû ûrîkû? Tambûria Mwarimû!”
41Nake Jesû nîwerire Simoni atîrî, “Vîndî îmwe kwarî na andû aîrî maakovithîtue mbeca nî mûndû ûmwe. Mûndû ûmwe aakovithîtue dinarii#7.41 dinarii: Roria Mathaayo 20:2. magana matano na ûcio wîngî agakovithua dinarii mîrongo îtano. 42Nake mûndû ûcio wamakovithîtie mbeca icio nîwamacamîre cio nîûndû nîmaaremirwe nî kûmûrîva. Rîu-î, gatagatîrî ka andû acio aîrî, nî ûrîkû wendire mûndû ûcio wamakovithîtie mûno makîria?”
43Nake Simoni nîwacokerie Jesû atîrî, “Nie nîreciria mûndû ûcio wacamîrwe mbeca irîa ciarî nyîngî nîke wendire mûndû ûcio wamakovithîtie mbeca makîria.”
44Nake Jesû nîwacokerie Simoni atîrî, “We nîwaria ma.” Nîwacokire akîvûgûkîra mûndûmûka ûcio na akîîra Simoni atîrî, “Simoni nî ûrona mûndûmûka ûyû? Nie mbûkire na natonya gûkû gwaku nyomba, na ndûnamva manjî ma kwîthambia magûrû. Nwatî ke aconja magûrû makwa na methori make na acoka angiria methori mau na njuîrî ciake. 45We ndûnamumunya, nwatî kuuma vîndî îrîa mbûkire gûkû gwaku, mûndûmûka ûyû tî mûtigu kûmumunya magûrû makwa. 46We ndûnamvaka maguta kîongo, nwatî mûndûmûka ûyû nî wamvaka maguta maranunga waro magûrûrî makwa. 47Kwoguo nie nîrakwîra atîrî, wendo mwîngî ûrîa mûndûmûka ûyû onania, nîûronania atî ke nîwoverwa mevia meengî. Nwatî mûndû wa wonthe woveretwe mevia manini, onanagia wendo mûnini.”
48Nake Jesû nîwacokire akîîra mûndûmûka ûcio atîrî, “We nîwoverwa mevia maku.”
49Nao andû arîa meekaranîrîte na Jesû makîria irio, nîmaambîrîrie kwîyûria na ngoro atîrî, “Mûndû ûyû ûrovanîra nginyagia mevia nîkwa arî û?”
50Nwatî Jesû nîwerire mûndûmûka ûcio atîrî, “Gwîtîkia gwaku nîkuo gwatûma ûvonoke; Thiî na thayû.”
Currently Selected:
Luka 7: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
