Luka 8

Aka arîa maathiîcanirie na Jesû

1Vuva wa ûguo, Jesû nîwavîtûkîrîre matûûrarî na icagirî, akîvunjagia Ûvoro Mwaro wîgiî Ûthamaki wa Ngai. Nao arutwa ake îkûmi na aîrî 2#Mat 27.55-56; Mar 15.40-41; Luka 23.49 vamwe na aka amwe arîa Jesû aarutûrûrîte maroho macûku kuuma kûrî o na akamavonia mîrimû, nîmaathiîcanirie nake. Aka arîa maarî vo nî; Mariamu (ûrîa wetagwa Mûmagidali) ûrîa warutûrûrîtwe ngoma mûgwanja, 3na Joana mûka wa Kuza, mûthuuri ûrîa wamenyagîrîra indo cia Herode, na Susana wa vamwe na aka eengî arîa maatûmagîra indo ciao magîtethereria Jesû na arutwa ake.

Ngerekano ya mûvandi wa mbeû

(Mat 13.1-9; Mar 4.1-9)

4Vîndî îrîa andû eengî arîa maaumîte matûûrarî ngûrani ngûrani maathiîre na makîgomana varîa Jesû aarî, Jesû nîwamerire na ngerekano atîrî,

5“Vîndî îmwe kwarî na mûrîmi wathiîre kûvanda mbeû. Na rîrîa aaminjaga mbeû icio mûgûndarî, imwe nîciagwîre gacîrarî, igîkinyangwa nî andû, na iconi igîcoka ikîirîa. 6Ciîngî nacio nîciagwîre rûciararî, na vîndî îrîa ciamerire nîciaûmire nîûndû mûthetu ûrîa warî varîa ciagwîre warî mûng'aru. 7Nacio ciîngî nîciagwîre mûtheturî ûrîa warî na mbîtîkîra ya mvîndî cia mîgua. Nayo mîgua îo nîyameranîrie na mbeû icio na îkîithararia. 8Nacio mbeû ciîngî nîciagwîre mûtheturî ûrîa warî mûnoru; na mîmera yakûra nîyaciarire, wa mûmera ûgîciara maita îgana.”

Nake Jesû akîrîkîrîria nîwaugire na mûgambo mûnene atîrî, “Mûndû ûrîa wîna matû ma kwîgua, nîegue!”

Mworoto wa ngerekano

(Mat 13.10-17; Mar 4.10-12)

9Jesû nîwaûrirue nî arutwa ake ûrîa ngerekano îo yendaga kwonania. 10#Isa 6.9-10 Nake nîwamacokerie atîrî, “Mue mûrî ave ûûgî wa kûmenya nthitho cia Ûthamaki wa Ngai, nwatî andû arîa engî mamenyithagua ûvoro na ngerekano, nîguo maroragie na matione wanarî kîndû, na megucage na matitaûkîrwe.”

Jesû nîwataarîrie ngerekano ya mûvandi wa mbeû.

(Mat 13.18-23; Mar 4.13-20)

11“Ngerekano îo yendaga kwonania atî: mbeû icio nî ndûmîrîri ya Ngai. 12Mbeû irîa ciagwîre gacîrarî nî andû arîa megucaga ndûmîrîri ya Ngai, nwatî Ngoma akathiî kûrî o na akathengutia ndûmîrîri îo kuuma ngororî ciao nîguo matigetîkie na matikavonokue. 13Nacio mbeû irîa ciagwîre rûciararî, nî andû arîa megucaga ndûmîrîri ya Ngai na makamîamûkîra makenete, nwatî makaremwa kûmîkindîria ngororî ciao, nîûndû metîkagia wa kavinda kanini na vîndî îrîa maumîrîrwa nî magerio makagwa. 14Nacio mbeû irîa ciagwîre mbîtîkîrarî ya mvîndî cia mîgua, nî andû arîa mathikagîrîria ndûmîrîri ya Ngai, nwatî waganu, ûtonga, na ikeno cia gûkû nthî ikathararia ndûmîrîri îo, na maciaro mayo makarega gûkûra. 15Nacio mbeû irîa ciagwîre mûtheturî ûrîa warî mûnoru, nî andû arîa megucaga ndûmîrîri ya Ngai na makamiga marî na ngoro mbaro na mbathîki, na magakirîrîria nginyagia rîrîa makaagîa maciaro.”

Ngerekano ya taa

(Mar 4.21-25)

16 # Mat 5.15; Luka 11.33 Gûtirî mûndû wakagia taa na akînamîkunîkîra na ndeve, wana kana akînamiga rungu rwa gîtanda. Nwatî mûndû wa wonthe arakia taa nîamigagîrîra vandû îgûrû nîguo andû arîa maratonya nyomba mamûrîkîrwe nîyo.

17 # Mat 10.26; Luka 12.2 “Gûtirî ûndû wana ûmwe mûthithe ûtakoonanua ûtherirî, wana kana mûkunîkîre, ûtakaamenyeka na umîrue ûtherirî.

18 # Mat 25.29; Luka 19.26 “Kwoguo menyererani maûndû marîa mûregua, nîûndû mûndû ûrîa ûrî na indo nyîngî nîke ûkoongererwa. Nwatî mûndû ûrîa ûtarî, nîagaacunwa wa na kîrîa kînini arecirîria atî arî nakîo.”

Ng'ina wa Jesû na arîa maaciaranîrîtue na Jesû

(Mat 12.46-50; Mar 3.31-35)

19Ng'ina wa Jesû na arîa maaciaranîrîtue na Jesû nîmaathiîre kûrî Jesû nwatî makîremwa nî gûkinya varîa aarî nîûndû andû nîmaavatîkanîte mûno. 20Nake mûndû ûmwe nîwerire Jesû atîrî, “Nyûkwe na arîa mûciaranîrîtue nao marûngamîte vaarîa nja makîenda gûkwona.”

21Nake Jesû nîwerire andû acio onthe atîrî, “Nyanya na aa mûrwaiya nî andû arîa megucaga na makathîkîra ndûmîrîri ya Ngai.”

Jesû nîwavorerie îria

(Mat 8.23-27; Mar 4.35-41)

22Mûthenya ûmwe, Jesû na arutwa ake nîmaatwîre îtarû na Jesû akîmeera atîrî, “Nîtûringeni mûrîmo ûrîa wîngî wa îria.” Kwoguo nî maambîrîrie rûgendo rwao. 23Na vîndî îrîa maaringaga îria, Jesû nî wagwatirwe nî toro. Naruo rûkûngi rûnene mûno nî rwambîrîrie kûvurutana na manjî makîambîrîria kûgîa îtarûrî, nginya magîtigaria vanini mûno kûvorokera manjîrî. 24Nao arutwa a Jesû nî maathiîre varîa aarî, makîmûramûkia na makîmwîra atîrî, “Mwarimû! Tûrî vakuvî gûkua!”

Nake Jesû nî waramûkire na agîkaania rûkûngi na ndivû cia manjî, naruo rûkûngi rûgîtiga kûvurutana na îria rîkîvoorera. 25Jesû nî wacokire akîûria arutwa ake atîrî, “Mûregete kûgîa na wîtîkio nîkî?”

Nao nî maamakire, makîgua guoya na makîambîrîria kûrania atîrî, “We! Kaî mûndû ûyû arî ke û? Ke aratha rûkûngi wana manjî, nacio ikamwathîkîra?”

Jesû nîwavonirie mûndû warî na ngoma

(Mat 8.28-34; Mar 5.1-20)

26Jesû na arutwa ake nîmaakinyire vûrûrirî wa Gerasa#8.26 Gerasa: Mandîko mamwe maugaga ‘Gedara’ namo mengî makauga ‘Gerigesa’ (Roria Mat. 8.28)., ûrîa ûrî mûrîmo wa îria rîa Galili. 27Rîrîa Jesû aaumire îtarûrî na agîkinya nthî nyûmû, nîwatûngirwe nî mûndû warî na ngoma wa kuuma îtûûrarî rîu. Mûndû ûcio eekaraga arî njaga na ndaatûûraga mûciî, nwatî aatûûraga kûrîa mbîrîra ciarî. 28Na rîrîa mûndû ûcio oonire Jesû, nîwakaire, akîîgwîthia nthî mbere yake na akîanîrîra atîrî, “Jesû Mûriû wa Ngai ûrîa ûrî Îgûrû Mûno, ûrenda atîa nanie? Nie nakûthaitha ndûkamverithie!” 29Mûndû ûcio aaugire ûguo nîûndû Jesû nîwathîte ngoma îo yume kûrî ke. Na maita meengî mûndû ûcio ethîrîtwe arî mûnyite nî ngoma îo. Rîrîa ngoma îo yamûnyita, nîwavingagîrwa na agacoka akovwa na mînyororo, nwatî ke nîwatucangaga mînyororo îo na ngoma îgacoka îkamwerekeria nginyagia werûrî.

30Nake Jesû nîwaûririe mûndû ûcio atîrî, “Wîtagwa atîa?”

Nake mûndû ûcio nîwamûcokerie atîrî, “Nie mbîtagwa mbûtû.”

Mûndû ûcio aacokirie ûguo nîûndû aarî na ngoma nyîngî. 31Nacio ngoma icio nîciathaithire Jesû ndagaciathe ithiî itonye îrimarî rîrîa rîriku na rîtarî mûthiia.

32Nakuo kûu rûtererî rwa kîrîma kwarî na ngûrwe nyîngî ciarîcaga kuo. Kwoguo ngoma icio nîciathaithire Jesû aciîtîkîrie ithiî itonye ngûrwerî icio, nake nîwaciîtîkîrie. 33Nacio ngoma nîciaumire kûrî mûndû ûcio na igîtonya ngûrwerî. Nacio ngûrwe icio cionthe nîciatitimûkire kînyûrûrûkorî igîikia îriarî na ikîûrîra kuo.

34Rîrîa arîthi a ngûrwe icio moonire ûguo nîmaaûrire na makîthiî gûtambia ûvoro ûcio matûûrarî wana mîgûndarî. 35Nao andû nîmaaumire mîciî kwao na makîthiî kwîyonera maûndû marîa meekîkîte. Na rîrîa andû acio maakinyire kûrî Jesû nî meegwire guoya nîûndû nîmeethîrîrie mûndû ûcio warutîtwe ngoma ekarîte nthî magûrûrî ma Jesû, ekîrîte nguo na arî na kîongo Kîamro. 36Andû arîa meeyonerete mûndû ûcio akîvonua nî meerire andû acio engî ûvoro wa ûrîa mûndû ûcio warî na ngoma aavonirue. 37Nao andû onthe a vûrûri ûcio wa Agadarenesi nîmaathaithire Jesû aume kûu kwao nîûndû o nî meegwire guoya nyîngî. Kwoguo Jesû nîwatwîre gatarûrî na agîcoka kûrîa aaumîte. 38Nake mûndû ûcio warutîtwe ngoma nîwathaithire Jesû amwîtîkîrie mathiî nake. Nwatî Jesû nîwaregire mathiî nake na akîmwîra atîrî, 39“Coka kwenyu mûciî na ûkamenyithie andû ûrîa Ngai agwîkîte.”

Nake mûndû ûcio nîwathiîre kûndû kuonthe îtûûrarî rîu akîanagîrîra ûrîa Jesû aamwîkîte.

Mwarî wa Jairi na mûndûmûka ûrîa wavutirie nguo ya Jesû

(Mat 9.18-26; Mar 5.21-43)

40Rîrîa Jesû aacokire mûrîmo ûcio wîngî wa îria andû onthe nîmaamûgwatire ûgeni makenete nîûndû nîmaamwetererete athiî kuo. 41Vîndî wa îo mûnene ûmwe wa îvoero wetagwa Jairi, nîwakinyire. Nake Jairi nîwegwîthirie nthiî magûrûrî ma Jesû, na akîmûthaitha etîkîre kûthiî gwake mûciî, 42nîûndû mwîrîtu wake wa mûmwe warî na ûkûrû wa mîaka îkûmi na îrî, aarî vakuvî gûkua.

Vîndî îrîa Jesû aarî njîrarî athiîte kwa Jairû mûciî, andû nîmaamûvatîkîte mîenarî yonthe. 43Na gatagatîrî ka andû acio, vaarî na mûndûmûka watûûrîte mîaka îkûmi na îrî#8.43 Mûndûmûka watûûrîte mîaka îkûmi na îrî: Mandîko mamwe matirî ‘Mûndûmûka ûcio nî wavûthîrîte indo ciake cionthe na ndagîtarî arîa maamûthondekaga.’ auraga nthakame. Mûndûmûka ûcio nîwavûthîrîte indo cionthe ciake kûrîva ndagîtarî arîa maamûthondekaga, nwatî gûtiarî wana ûmwe wavotete kûmûthondeka. 44Nake mûndûmûka ûcio nîwaumire Jesû vuva. Na vîndî îrîa aavutirie mûthiia wa kanjû ya Jesû, nthakame îrîa aauraga nîyatigire kuura wa rîmwe. 45Nake Jesû nîwaûririe atîrî, “Nî ûrîkû ûcio wamvutia?”

Na vîndî îrîa andû onthe maakanire, Petero nîwamwîrire atîrî, “Mwarimû na kinthî we ndûrona andû nîmakûrigicîrîtie na magakûvatîka!”

46Nwatî Jesû nîwareganire nake na akiuga atîrî, “Maveeni! Kûrî na mûndû wamvutia, nîûndû nie nînegua vinya yauma kûrî nie.” 47Rîrîa mûndûmûka ûcio oonire atî nîwamenyeka, nîwaumîrire akinainaga na akîgwîthia vau nthî magûrûrî ma Jesû. Mûndûmûka ûcio arî vau mbere ya andû onthe, nîwaumbûrire gîtûmi Kîam amûvutie na ûrîa ke aavonirue wa rîmwe. 48Nake Jesû nîwamwîrire atîrî, “Mwarîwa, gwîtîkia gwaku nîkuo gwatûma ûvone. Thiî na thayû.”

49Kavinda wa kau Jesû akîaragia, mûndû ûmwe ûrîa watûmîtwe kuuma kwa Jairû nîwakinyire na akîra Jairû atîrî, “Wana ûtangîtinda ûthînîtie mwarimû makîria nîûndû mwarîguo nîwakua.”

50Nwatî rîrîa Jesû eegwire ûguo nîwerire Jairû atîrî, “Tiga kwîgua guoya, îtîkia tu, na mwarîguo nîakûvona.”

51Vîndî îrîa Jesû aakinyire kwa Jairû mûciî, ndeetîkîria mûndû wîngî atonyanie nake nyomba tiga Petero, Johana, Jakuvu, îthe wa mwîrîtu ûcio na ng'ina. 52Nao andû onthe arîa maarî kuo nîmaarîraga marî na kîeva nîûndû wa gûtigwa nî mwîrîtu ûcio. Nake Jesû nîwerire andû acio atîrî, “Tigani kûrîra nîûndû mwîrîtu ûyû tî mûkuû, nîkwa amamîte.”

53Nao andû onthe arîa maarî vo nîmaamûthekerere nîûndû nîmaamenyaga atî mwîrîtu ûcio aarî mûkuû. 54Nwatî Jesû nîwanyitire mwîrîtu ûcio njara na akîmwîra atîrî, “Mwarîwa, rûngama!” 55Nake mwîrîtu ûcio nî wacokererwe nî mwoyo wake, na agîûkîra wa rîmwe. Nake Jesû nîwaugire mwîrîtu ûcio avewe kîndû angîrîa. 56Nao aciari a mwîrîtu ûcio nîmaamakire mûno, na Jesû akîmakaania matikeere mûndû wana ûmwe ûrîa gwekîka.

Currently Selected:

Luka 8: KKB

Highlight

Copy