Luka 6

Kîûria kîgiî mûthenya wa thavatû

(Mat 12.1-8; Mar 2.23-28)

1 # Gûco 23.25 Mûthenya ûmwe wa thavatû rîrîa Jesû na arutwa ake mathiîrîrîte mîgûndarî ya ngano. Arutwa ake nîmaatuire igira cia ngano, makîirikitha na makîambîrîria kûrîa ngano. 2Nao Afarisai amwe nîmaamûririe atîrî, “Nîndûî kîratûma mue mwîke ûrîa Watho wetû ûgirîtie gwîkwe mûthenya wa thavatû?” 3#1Sam 21.1-6 Nake Jesû nîwamacokerie atîrî, “Anga mûtianathoma ûrîa Daudi eekire vîndî îrîa ke na arîa maarî nake maavûtire? 4#Ala 24.9 Daudi aatonyire nyombarî ya Ngai, agîoca mîgate îrîa yategeretwe Ngai, akîrîa na agîcoka akînengera andû arîa maarî nake. Ûguo nîguo ke eekire wana ethîrwa Watho wetû ndwîtîkîrîtie mûndû wîngî kûrîa mîgate îo tiga athînjîri-Ngai onga.”

5Nake Jesû akîrîkîrîria nîwamerire atîrî, “Mûrû wa Mûndû nî Mwathani nginya wa mûthenya wa thavatû.”

Jesû nîwavonirie mûndû wonjete njara

(Mat 12.9-14; Mar 3.1-6)

6Mûthenya wîngî wa thavatû, Jesû nîwatonyire îvoerorî na akîthomithîria andû kuo. Nakuo kûu îvoerorî kwarî na mûndû warî na njara yake ya ûrîo yonjete. 7Nao arimû a Watho na Afarisai nîmaacaragia ûndû ûrîa mangîthitanga Jesû naguo na kwoguo nîmaamûtuîririe mûno nîguo moone kana nîakûvonania, mûthenya wa thavatû. 8Nwatî Jesû nîwamenyaga meciria mao, na kwoguo nîwerire mûndû ûcio wonjete njara yake atîrî, “Ûka na ûrûngame ava.” Mûndû ûcio nîwarûngamire na akiumîra vau mbere. 9Nake Jesû nîwamerire atîrî, “Nie nîrenda kûmûria watho wetû ûtwîtîkîrîtie twîkage atîa mûthenya wa thavatû? Ûtwîtîkîrîtie tûtethanagie kana tûnûvanage! Kûvonokia mwoyo wa mûndû kana gûûcûkangia?” 10Nake Jesû nîwacokire akîroria andû acio onthe na akîîra mûndû ûcio atîrî, “Kûnjûra njara yaku.” Nake mûndû ûcio nîwekire ûguo na njara yake îkîvona.

11Nao andû acio nîmaatûmbirwe nî marakara na makîambîrîria kûrania ûrîa magwîka Jesû.

Jesû nîwathuurire Atûmwa îkûmi na aîrî

(Mat 10.1-4; Mar 3.13-19)

12Na mîthenyarî îo, Jesû nîwathiîre kîrîmarî îgûrû kûvoya na agîkara kuo ûtukû mûgima akîvoyaga Ngai. 13Na kîraûko gwakîa, Jesû nîwetire arutwa ake na gatagatîrî kao akîîthuurîra îkûmi na aîrî, arîa eetire atûmwa. 14Nao maarî; Simoni (ûrîa aatuîrîre rîîtwa akîmwîta Petero), na mûrwang'ina Enderea; Jakuvu na mûrwang'ina Johana, Filipu, Batholomayo, 15Mathaayo, Toma, Jakuvu mûrû wa Alufayo, Simoni (ûrîa wetagwa Zeloti), 16Judasi mûrû wa Jakuvu, na Judasi Mûsikariota ûrîa wacukanîrîre Jesû.

Jesû nîwathomithirie na akîvonania

(Mat 4.23-25)

17Vîndî îrîa Jesû aanyûrûrûkire aumîte kîrîmarî arî vamwe na atûmwa ake, nîwarûngamire vandû varaganu arî vamwe na gîkundi kînene mûno Kîam arutwa ake. Nao andû eengî mûno arîa maaumîte matûûrarî ma Judea, Jerusalemu na nginya matûûrarî ma Turo na Sidoni marîa maarî ndeererî cia îria, nîmaathiîre kûrî Jesû nîguo mamûthikîrîrie na mavonue mîrimû yao. 18Wana nginya andû arîa maathînagua nî ngoma nîmaavonirue. 19Nao arwaru onthe nîmaageragia kûmûvutia nîûndû vinya nîyaumaga kûrî ke na îkamavonia onthe.

Kîrathimo na kîeva

(Mat 5.1-12)

20Jesû nîwaroririe arutwa ake na akîmeera atîrî, “Kûrathimwa nîmue athîni, nîûndû Ûthamaki wa Ngai nî wenyu! 21Kûrathimwa nîmue arîa avûtu rîu, nîûndû nîmûkaavaithua! Kûrathimwa nîmue arîa mûrarîra rîu, nîûndû nîmûkaatheka! 22#1Pet 4.14 Kûrathimwa nîmue vîndî îrîa andû mamûmena, mamûrega, mamûruma, na mamûcambia nîûndû wa Mûrû wa Mûndû. 23#2Maû 36.16; Ciîko 7.52 Vîndî îrîa gwekîka ûguo, kenagani na mûgacanjamûka nîûndû nîmwigîrîtwe kîveo kînene mûno îgûrû nîûndû ûguo nwaguo methe ma andû acio meekire arathi.

24“Na kaî mue andû arîa atongu rîu mûrî na thîna-î! Nîûndû mue mûrî anyitu kîrîa kîmwîganaga ûtûûrorî wenyu. 25Na kaî mue andû arîa avau rîu mûrî na thîna-î! Nîûndû mue nîmûkaavûta. Na kaî mue mûratheka rîu mûrî na thîna-î! Nîûndû mue nîmûkegua kîeva na mûrîre! 26Na kaî mue andû arîa mûkumagua nî andû onthe mûrî na thîna-î! Nîûndû ûguo nwaguo methe ma andû acio meekire arathi a maveeni.”

Endagani nthû cienyu

(Mat 5.38-48; 7.12)

27“Namue andû arîa mûnthikîrîrîtie nîramwîra atîrî: Endagani nthû cienyu. Nao andû arîa mamûmenete mekageni waro. 28Arîa mamwimagîra irî, metagîrieni kîrathimo kuuma kûrî Ngai, na mûvoyagîre arîa mamwîkaga naaî. 29Mûndû angîgûcamûra rûvî rûthîa rwa mwena ûmwe, mûvûgûrîre wana rûu rwîngî arûcamûre. Na mûndû angîgûcuna îgooti rîaku, mwîtîkîrie oce nginya cati yaku. 30Mûndû wa wonthe angîkûvoya kîndû mûve, na mûndû wa wonthe angîgûcuna kîndû gîaku, ndûkamwîtie. 31#Mat 7.12 Îkaga andû arîa engî wata ûrîa ûngîenda o magwîke.”

32“Mûngîrathimwa atîa, angîthîrwa mûkendaga tu wa andû arîa mamwendete? Wana nginya evia nîmendaga andû arîa mamendete! 33Kûngîtuîka atî andû arîa mamwîkaga waro nwao mûgeekaga waro, mûngîrathimwa atîa? Wana nginya evia nîmekaga wa guo! 34Na kûngîtuîka atî andû arîa mamûrîvaga nwao mûgaakombithagia, mûngîrathimwa atîa? Wana nginya evia nîmakombithagia evia arîa engî nîguo makaarîva na kîthimi wata kîu! 35Vandû va ûguo, endagani nthû cienyu na mûciîkage waro na mûkombithanagie mûtakûgîa na mwîvoko wa gûkaarîvwa. Namue nîmûkaagîa na îgai rînene na mûtuîke ciana cia Ngai ûrîa ûrî Îgûrû Mûno. Nîûndû Ngai arî ntha kûrî andû arîa matarî ngatho na arîa methagîrwa marî na mîtugo mîcûku. 36Kwoguo îgucanagîrani ntha wata ûrîa îthe wenyu amwîgucagîra ntha.

Gûtucanîra ciira

(Mat 7.1-5)

37“Mûtigatucanîre ciira, na wanamue mûtigaatuîrwa. Mûtigekûûe andû arîa engî na wanamue mûtigeekûûîrwa. Ovanagîrani na wanamue nî mûkooverwa. 38Vecanagani namue nîmûkaavewa iveo nî Ngai, mwîcûrîrîtue, igakindîrwa, ikainainua na ikathûmbwa. Nîûndû kîthimi kîrîa mûthimanagîra nakîo nîkîo Ngai akaamûthimîra nakîo.”

39 # Mat 15.14 Nake Jesû nîwacokire akîva arutwa ake ngerekano akîmeera atîrî, “Angwa ngaûria! Mûtumumu nwa onie mûtumumu ûrîa wîngî njîra? Na kinthî wa oîrî tîkwa mangîvarûka îrimarî? 40#Mat 10.24-25; Joh 13.16; 15.20 Gûtirî mûrutwa ûngîneneva gûkîra mwarimû wake, nwatî mûrutwa wa wonthe angîthomithua viû atuîkaga ta mwarimû wake.

41“Nîndûî gîtûmaga wone kîvuti kîrîa kîrî riithorî rîa mûrûanyûkwe, nwatî ûkaremwa nî kwona gîting'û kîrîa kîrî riithorî rîaku? 42Ûngîvota kwîra mûrûanyûkwe atî nîûkûmûruta kîvuti kîrîa kîrî riithorî rîake atîa, wa rîrîa we ûtangîvota kwona gîting'û kîrîa kîrî riithorî rîaku? We mvinga îno! Amba ûrute gîting'û kîrîa kîrî riithorî rîaku, nîguo ûvote kwona waro ûkîruta kîvuti kîrîa kîrî riithorî rîa mûrûanyûkwe!

Mûtî na maciaro ma guo

(Mat 7.16-20; 12.33-35)

43“Gûtirî mûtî mwaro ûngîciara maciaro macûku kana mûtî mûcûku ûciare maciaro maro. 44#Mat 12.33 Wa mûtî ûmenyekaga na maciaro ma guo. Nîûndû ngûyû ititucagwa mîtîrî ya mîgua kana thavibu ituuwe kaiavarî. 45#Mat 12.34 Mûndû mwaro aragia maûndû maro marîa maumîte ngororî yake. Nake mûndû mûcûku aragia maûndû macûku marîa maumîte ngororî yake. Mûndû aragia maûndû marîa mecûrîte ngororî yake.

Atumi aîrî a nyomba

(Mat 7.24-27)

46“Nîndûî gîtûmaga mûmbîte, ‘Mwathani, Mwathani,’ na mûtiîkaga maûndû marîa nîmwîraga mwîke? 47Mûndû wa wonthe ûkaga kûrî nie, akegua ciugo ciakwa na agaciathîkîra, nîngûmwonia ûrîa ke ekariî. 48Ekariî ta mûtumi wa nyomba ûrîa wambire kwînja mûcingi mûrikîru na akîûthondeka rûciararî. Vîndî îrîa rûnjî rwaunire manjî maruo nîmaaringire nyomba îo na vinya, nwatî matiaminainia nîûndû yarî ndume waro. 49Nwatî mûndû wa wonthe ûrîa wîgucaga ciugo ciakwa na akarega gûciathîkîra ekariî ta mûndû ûrîa watumire nyomba atambîte kûthondeka mûcingi. Vîndî îrîa rûnjî rwaunire na manjî maruo makîringa nyomba îo na vinya, nyomba îo nîyomomokire wa rîmwe. Nyomba îo nîyomomokire na vinya îkîvaragana.”

Currently Selected:

Luka 6: KKB

Highlight

Copy