Ciîko 6

Andû mûgwanja a Gûtethereria Atûmwa

1Vuvarî arutwa nîmaathiîre na mbere kwongerereka. Nwatî vîndî wa îo, nîkwagîre na ngucanio gatagatîrî ka Ayahudi arîa maaragia Kîngiriki na Ayahudi arîa maaragia Kîhibirania. Ayahudi arîa maaragia Kîngiriki maaugaga atî aka ao a ndigwa nîmaatigagîrîrwa vîndî ya kûgaîrwa mbeca wa mûthenya wa mûthenya. 2Nao atûmwa arîa îkûmi na aîrî nîmeetire etîkia onthe vamwe na makîmeera atîrî, “Tî waro tûtiganîrie wîra wetû wa kûvunjia ndûmîrîri ya Ngai atî nîguo tûmenyagîrîre kîgîna. 3Kwoguo, ariû na aarî a Îthe wetû gatagatîrî kenyu thuurani arûme mûgwanja marî na ngumo mbaro, mecûrîtwe nî Roho Mûtheru na marî na ûûgî mwîngî. Tue nîtûkûmava wîra ûcio marute. 4Nwatî tue nîtûthiî na mbere kwîvecana ûvororî wîgiî mavoya na wîra wa kûvunjia ndûmîrîri ya Ngai.”

5Nao etîkia onthe nîmaakenerere woni ûcio. Kwoguo nîmaathuurire Stefano, mûndû warî na wîtîkio mwîngî na wecûrîtwe nî Roho Mûtheru, na Filipu, na Prokoru, Nikanoru, Timoni, Paraminasi na Nikola, mûûrûrîrî ûrîa waumîte Antiokia na wagarûrûkîte agatuîka Mûyahudi. 6Nao etîkia nîmaanenganîre andû aya kûrî atûmwa, nao atûmwa makîmavoera na makîmaigîrîra njara.

7Kwoguo ndûmîrîri ya Ngai nîyathiîre na mbere gûtamba. Nao arutwa nîmoongererekire mûno kûu Jerusalemu, na athînjîri-Ngai eengî magîtuîka etîkia.

Stefano nîwanyitirwe

8Stefano ecûrîtwe nî vinya na wega wa Ngai, nîwaringire ciama nene na agîka maûndû meengî ma magegania gatagatîrî ka andû. 9Nwatî andû amwe arîa maarî a îvoero rîrîa rîtagwa (rîa andû oovore) nîmaambîrîrie gûkararania nake. Amwe maaumîte Kurene na Alekisandiria. Nao engî maaumîte Kilikia na Asia. 10Nwatî Roho nîwavere Stefano ûûgî mwîngî wa kwaria ûndû matangîavotire kûmûkararia. 11Kwoguo nîmaavakire andû na nthitho nîguo mauge atîrî, “Tue nîtwîguîte Stefano akîmenereria Musa na akîmenereria Ngai!” 12Naguo ûndû ûcio nîwaunjugire andû, athuuri na arimû a Watho. Nao andû nîmaanyitire Stefano wa rîmwe na makîmûvira Kîammarî. 13Nîmaacokire makîrete aira a maveeni arîa maaugire atîrî, “Mûndû ûyû ndatigaga kwaria ciugo cia kûmenereria hekarû yetû ntheru wana Watho wa Musa. 14Tue nîtwegwire mûndû ûyû akiuga atî Jesû wa Nazarethi nîakaatharia hekarû na agarûre mîtugo îrîa twareteerwe nî Musa.” 15Nao andû onthe arîa maarî Kîammarî nîmaaroririe Stefano na vinya na makîona ûthiû wa Stefano wîkariî ta wa mûraika.

Currently Selected:

Ciîko 6: KKB

Highlight

Copy