Ciîko 7

Mîario ya Stefano

1Mûthînjîri-Ngai ûrîa mûnene nîwaûririe Stefano atîrî, “Maûndû mama nî ma ma?” 2#Kîam 12.1 Nake Stefano nîwamûcokerie atîrî, “Ariû a Îthe wetû na aa vava, tanthikîrîriani! Vîndî îrîa Iburahimu, îthe wa methe metû ma tene, ataarî mûthiîu gûtûûra Harani, Ngai mwene riiri nîwamumîrîre arî Mesopotamia, 3na akîmwîra atîrî, ‘Nthama ûtige vûrûri wenyu, andû enyu na ûthiî vûrûrirî ûrîa ngaakwonia.’ 4#Kîam 11.31; 12.4 Kwoguo Iburahimu nîwaumire vûrûrirî wa Kalidei, na akîthiî gûtûûra Harani. Rîrîa îthe aakwire, Ngai nîwamûrutire kuo akîmûrete vûrûrirî ûyû mûtûûraga rîu. 5Ngai ndaagaîra Iburahimu wa naarî îkinyo rîmwe rîa vûrûri ûcio. Nwatî Ngai nîwamwîrîre nîakûmûva vûrûri ûcio nîguo ûtuîke wake na wa njiarwa ciake, wana ethîrwa vîndî îo Iburahimu ndaarî na ciana. 6#Kîam 15.13-14 Nake Ngai nîwerire Iburahimu atîrî, ‘Njiarwa ciaku nîigaatûûra vûrûrirî mûgeni. Andû akuo nîmakaamatua ngombo na mameke maûndû macûku kwa îvinda rîa mîaka magana mana. 7#Ntha 3.12 Nwatî nie nîngaatuîra andû a vûrûri ûrîa njiarwa icio ûgaatungatîra. Na vuva wa ûguo njiarwa ciaku nîikaauma vûrûrirî ûcio na ingoocage irî gûkû.’ 8#Kîam 17.10-14; 21.2-4; 25.26; 29.31—35.18 Ngai nîwarûthire kîrîkanîro na Iburahimu, na ruo rûûri rwa kîrîkanîro kîu rwarî îrua. Kwoguo Iburahimu nîwaciarire Isaka, na akîmûrwithia akinyia ûkûrû wa mîthenya înana. Isaka nake nîwarwithirie mûvîcî Jakovu, na Jakovu akîrwithia avîcî ake îkûmi na aîrî arîa maarî methe ma tene ma andû etû.

9 # Kîam 37.11,28; 39.2,21 “Avîcî a Jakovu nîmeguîrîre Josefu wîru na makîmwendia atuîke ngombo vûrûrirî wa Misiri. Nwatî Ngai aarî vamwe nake 10#Kîam 41.39-41 na nîwamûtethûrire mathînarî mau make monthe. Josefu aarî mûve ûûgî mwîngî mûno nî Ngai arî mbere ya mûthamaki. Kwoguo mûthamaki wa Misiri nîwamûtuire mûnene wa vûrûri wa Misiri na akîmûva wîra wa kûrûngamîrîra andû onthe a mûciî wake. 11#Kîam 42.1-2 Nîgwacokire gûkîgîa na yûra na andû makîthînîka mûno vûrûrirî wonthe wa Misiri na Kanaani namo methe metû ma tene magîtura irio. 12Nwatî vîndî îrîa Jakovu eegwire atî Misiri kwarî na irio, nîwatûmire avîcî ake, na nîo methe metû ma tene kuo riita rîa mbere. 13#Kîam 45.1,16 Na rîrîa maathiîre kuo riita rîa kaîrî, Josefu nîwemenyithanirie kûrî aa mûrwang'ina, na andû a mûciî wa aa Josefu makîmenyekana nî mûthamaki wa Misiri. 14#Kîam 45.9-10; 17.18; Kîam 46.27 Nake Josefu nîwacokire agîtûmana akiuga îthe wake Jakovu, na andû onthe a mûciî wao, magîrwe mathiî Misiri. Nao andû onthe a mûciî wa Josefu maarî andû mîrongo mûgwanja na atano. 15#Kîam 46.1-7; 49.33 Nake Jakovu nîwathiîre Misiri kûrîa ke na avîcî ake maakuîrîre. 16#Kîam 23.3-16; 33.19; 50.7-13; Josh 24.32 Nayo mîîrî yao nîyakuirwe îkîvirwa Shekemu na îkîthikwa mbîrîrarî îrîa Iburahimu aagûrire. Mbîrîra îo yagûrîtwe kuuma kûrî mbarî ya Hamori.

17 # Ntha 1.7-8 “Rîrîa kavinda gaakuvîvîrie ka Ngai kûvingia kîîranîro kîrîa eerîrîte Iburahimu, andû arîa maarî Misiri nîmoongererekete mûno. 18Nake mûthamaki wîngî ûtaamenyete Josefu, nîwambîrîrie kwathana kûu Misiri. 19#Ntha 1.10-11,22 Mûthamaki ûcio nîwatungîre andû etû gîkuru na akîatha methe metû ma tene matiganîrie twana twao twa tûkenge nja nîguo tûkue. 20#Ntha 2.2 Vîndî îo nîrîo Musa aaciarirwe. Nake aarî mûthaka mûno. Nîwarererwe mûciî kwa îthe îvindarî rîa mîeri îthatû. 21#Ntha 2.3-10 Na rîrîa Musa aarutirwe mûciî kwao, mwarî wa mûthamaki nîwamwocire na akîmûrera ta mwana wake. 22Nake Musa nîwarerirwe na ûûgî wonthe wa andû a Misiri na agîtuîka mûndû warî na ûvoti mwîngî wa kwaria na wa gwîka maûndû.

23 # Ntha 2.11-15 “Vîndî îrîa akinyirie ûkûrû wa mîaka mîrongo îna, nîwatuire atî ke nîakûthiî gûcerera andû a rûrîrî rwao rwa Isiraeli. 24Nîwonire Mûisiraeli ûmwe agîkwa naaî nî Mûmisiri. Kwoguo nîwatethererie Mûisiraeli ûcio na akîmûrîvîrîria na kûûraga Mûmisiri ûcio. 25(Musa eeciragia atî andû a rûrîrî rwao nîmagûtaûkîrwa atî Ngai eendaga kûmûtûmîra nîguo amakûûre, nwatî matiataûkîrwa.) 26Mûthenya ûcio warûmîrîrîte, Musa nîwonire Aisiraeli aîrî magîtetania. Nake akîgeria kûmeguithania nîwamerire atîrî, ‘Andû etû mûravîtania nîkî na mue mûrî a ng'ina ûmwe?’ 27Nwatî mûndû ûrîa wekaga ûcio wîngî naaî nîwatugutanirie Musa na akîmûria atîrî, ‘Nû ûgûtuire mûnene wetû na mûtûtuîri ciira? 28Ûrenda kûmbûraga ta ûrîa ûraûragire Mûmisiri îgoro?’ 29#Ntha 18.3-4 Rîrîa Musa eegwire ûguo, nîwathaamire Misiri na akîthiî gûtûûra arî mûgeni vûrûrirî wa Midiani. Arî kûu nîwagîre na twana twîrî twa tûvîcî.

30 # Ntha 3.1-10 “Rîrîa mîaka mîrongo îna yathirire, Musa arî werûrî wa kîrîma gîa Sinai nîwaumîrîrwe nî mûraika arî kîvîngarî kîrîa gîakanaga mwaki. 31Musa nîwamakire mûno rîrîa oonire ûguo. Na rîrîa aakuvîvîrie nîguo one waro, nîwegwire mûgambo wa Mwathani ûkiuga atîrî: 32‘Nie nînie Ngai wa methe menyu ma tene, Ngai wa Iburahimu, Isaka na Jakovu.’ Nake Musa nîwambîrîrie kwinaina na akîgua guoya wa kûroria. 33Nake Mwathani nîwerire Musa atîrî, ‘Ruta iratû nîûndû vau ûrûngamîte nî vandû vatheru. 34Nie nîmonete ûrîa andû akwa arîa marî Misiri marathînua na vinya. Nîmbîguîte kîrîro Kîamo na nie nînanyûrûrûka nîguo nîmavonokie. Kwoguo ûka rîu, nie nîngûgûtûma Misiri.’

35 # Ntha 2.14 “Musa ûcio nwake waregirwe nî andû a Isiraeli rîrîa maamûûririe atîrî, ‘Nû ûgûtuire mûnene wetû na mûtûtuîri ciira?’ Ke nwake watûmirwe nî Ngai arî mûnene na mûkûri wao na njîra ya mûraika ûrîa wamumîrîre kîvîngarî kîrîa gîaakanaga mwaki. 36#Ntha 7.3; 14.21; Nda 14.33 Musa nîwatongoririe andû a Isiraeli akîmaruta Misiri. Nake nîwaringaga ciama na ageeka maûndû ma magegania kûu Misiri, Îriarî Îtune wana werûrî kwa îvinda rîa mîaka mîrongo îna. 37#Gûco 8.15,18 Musa ûcio nwake werire andû a Isiraeli atîrî, ‘Ngai nîakaamûtûmîra mûrathi wata ûguo aandûmire, na ke akeethîrwa arî ûmwe wa andû enyu.’ 38#Ntha 19.1—20.17; Gûco 5.1-33 Musa ûcio nwake warî vamwe na andû a Isiraeli vîndî îrîa maagomanîte werûrî. Ke aarî kûu werûrî vamwe na methe metû ma tene na mûraika ûrîa wamwarîrie arî îgûrû Kîrîmarî gîa Sinai. Nake nîwamûkîre ndûmîrîri îrî mwoyo ya Ngai na agîtûkinyîria yo.

39“Nwatî Musa ûcio nwake methe metû ma tene maaregire kwathîkîra. Nîmaamûregire na makîîrirîria gûcoka Misiri. 40#Ntha 32.1 Nîmeerire Aroni atîrî, ‘Tûthondekere ngai irîa igûtûtongoria nîûndû tûtiîcî ûrîa Musa ûrîa watûrutire Misiri aroonire.’ 41#Ntha 32.2-6 Kwoguo andû acio nîmaathondekire mûvuanano wekariî ta njaû na makîûrutîra îgongoona. Nao nîmaagîre na îruga magîkenerera wîra wa njara ciao. 42#Amo 5.25-27 Nwatî Ngai nîwamatiganîrie na akîmarekereria magooce njata cia îgûrû wata ûrîa kwandîkîtwe îvukuurî rîa arathi atîrî, ‘Andû a Isiraeli! Nie tî nie mwathînjagîra na mûkarutîra magongoona vîndî îrîa mue mwaûrûraga werûrî kwa îvinda rîa mîaka mîrongo îna.

43Mue mwakuîte îgema rîa ngai îrîa yetagwa Moleku,

na mûgakuua mûvuanano wa ngai ya njata îrîa yetagwa Refani;

mîvuanano îo nîyo mwarûthîte nîguo mûmîgoocage.

Kwoguo, nîngaamûvira îthamîriorî kûraca mûno mbere ya Babuloni!’

44 # Ntha 25.9,40 Methe metû ma tene maarî na îgema rîa kwonania atî Ngai aarî vamwe nao werûrî. Ngai nîwerire Musa ûrîa akûthondeka îgema rîu na Musa akîrîthondeka kûringana na ûrîa Ngai aamwonetie. 45#Josh 3.14-17 Vuvarî methe metû ma tene nîmaamûkîre îgema rîu kuuma kûrî methe mao. Nao nîmaarîkuuire vîndî îrîa maathiîre na Joshua na makîrîkinyia vûrûrirî ûrîa wacokire gûtuîka wao Ngai arîkia kûrutûrûra ndûrîrî irîa ciatûûraga kuo. Narîo nîrîekarire kuo nginya vîndî ya Daudi. 46#2Sam 7.1-16; 1Maû 17.1-14 Daudi nîwonirwe arî mwagîrîru nî Ngai. Ke nîwaûririe Ngai amwîtîkîrie atume gîîkaro Kîam Ngai wa Jakovu. 47#1Atha 6.1-38; 2Maû 3.1-17 Nwatî Solomoni nîke watumîre Ngai hekarû.

48“Nwatî Ngai Ûrîa Ûrî Îgûrû Makîria ndatûûraga nyombarî irîa itumîtwe nî andû. Mwathani arauga na njîra ya mûrathi atîrî:

49 # Isa 66.1-2 ‘Îgûrû nî rîo gîtî kîrîa mbîkaragîra rîrîa nîrathana,

nayo nthî nîyo njûng'wa îrîa mbigagîrîra magûrû makwa.

Kwoguo we ûngîndumîra nyomba îrîkû,

kana nie mvurûkaga kû?

50Na kinthî tî nie naathondekire indo ino cionthe?’ ”

51 # Isa 63.10 Nake Stefano nîwathiîre na mbere na kwaria akiuga atîrî: “Na kaî mue andû aya mûrî aûmû ngoro-î! Atî mue mûtirenda gwîtîkia Ngai wana kana kûthikîrîria ndûmîrîri yake! Atî vîndî cionthe mue nîkwa mûregaga kûthikîrîria Roho Mûtheru. Mue mûreka wata ûrîa methe menyu ma tene meekire. 52Nî mûrathi ûrîkû methe menyu ma tene mataanyarira? Arathi acio nîmaanîrîrîte makauga atî Ûrîa-Mûthingu nîagûka, nwatî methe menyu ma tene nîmaamûragire. Na rîu mue nîmwacukanîrîra na mwaûraga Ûrîa Mûthingu. 53Mue nwamue mwamûkîre watho wa Ngai ûrîa ke aamûveere na njîra ya araika ake, nwatî mue mûtiawathîkîra!”

Stefano nîwarivirwe na mathiga

54Rîrîa athuuri a Kîama meegwire Stefano akîaria maûndû mau, nîmaarûmithanirie magego nî kûrakara. 55Nwatî Stefano ecûrîtwe nî Roho Mûtheru, nîwaroririe îgûrû akîona riiri wa Ngai na Jesû arûngamîte mwena wa ûrîo wa Ngai. 56Nake nîwaugire atîrî, “Ta roriani! Nie nînîrona îgûrû rîvingûkîte na Mûrû wa Mûndû arûngamîte mwena wa ûrîo wa Ngai!”

57Nao athuuri onthe a Kîamma nîmaaugîrîrie na vinya, magîkunîka matû mao na magîtitimûkîra Stefano wa rîmwe. 58Nao nîmaamûrutûrûrire kûu îtûûrarî rîu înene na makîmûriva na mathiga. Nao aira nîmaatigire kanjû ciao imenyereretwe nî mwanake wetagwa Saûlo. 59Na rîrîa maarivaga Stefano na mathiga, Stefano nîwavoire akiuga atîrî, “Mwathani Jesû amûkîra roho wakwa!” 60Nake nîwaturirie maru na akîanîrîra na mûgambo mûnene akiuga atîrî, “Mwathani, ndûkamaverithie nîûndû wa wîvia ûyû wao!” Na rîrîa Stefano aarîkirie kuga ûguo, nîwakwire.

Currently Selected:

Ciîko 7: KKB

Highlight

Copy