Ciîko 8

1Saûlo nîwetîkîre atî kûûragwa kwa Stefano nîkwagîrîrîte.

Saûlo nîwanyaririre kanitha

Mûthenya wa ûcio kanitha nîyambîrîrie kûnyarirwa mûno kûu Jerusalemu. Nao etîkia onthe, tiga atûmwa, nîmaanyagarûkire mavûrûrirî ma Judea na Samaria kuonthe. 2Nao etîkia amwe meetîkîtie Ngai mûno nîmaathikire Stefano makîmûrîragîra mûno.

3 # Ciîko 22.4-5; 26.9-11 Nwatî Saûlo nîwageririe kûthiria kanitha. Nake nîwathiîcaga agîtonyaga nyomba wa nyomba akîrutûrûraga etîkia, arûme na aka na agatûmaga mavingîrwe njeera.

Ûvoro Mwaro nîwavunjirue Samaria

4Nao etîkia onthe arîa maanyagarûkire nîmaathiîre kûndû kuonthe makîvunjagia ûvoro mwaro. 5Filipu nîwathiîre îtûûrarî rîrîa rîarî rînene viû vûrûrirî wa Samaria na akîvunjîria andû arîa maarî kuo ûvoro wîgiî Mesaya. 6Nao andû eengî marî na ngoro îmwe, nîmaathikagîrîria waro mûno vîndî îrîa Filipu aaragia na nîmoonaga ciama irîa ke aaringaga. 7Andû eengî kûu maarî na ngoma, nacio nîciaumire kûrî o igîkaaga na mûgambo mûnene. Wana andû eengî arîa maarî cionje na ithua nîmaavonirue. 8Kwoguo nîkwagîre na gîkeno kîngî îtûûrarî rîu.

9Nwatî îtûûrarî rîu nîkwarî na mûndû wetagwa Simoni watûûraga aragûraga. Nake nîwamakagia andû mûno akîmeera atî ke nî mûndû wa vata mûno. 10Nao andû onthe, anini na anene, nîmaamûthikagîrîria waro na makaugaga atîrî, “Mûndû ûyû nîke vinya wa Ngai ûrîa wîtagwa ‘Vinya Nyîngî.’ ” 11Nao maamûthikagîrîria ûguo nîûndû ke nîwamamakîtie kwa îvinda îraca na ûragûri ûcio wake. 12Nwatî rîrîa Filipu aamavunjîrie Ûvoro Mwaro wîgiî Ûthamaki wa Ngai na wîgiî Jesû Kristû, arûme wana aka nîmeetîkirie ndûmîrîri îo na makîvatithua. 13Simoni wanake nîwetîkirie. Nake arîkia kûvatithua nîwaumire Filipu vuva na akîmaka mûno vîndî îrîa oonire maûndû ma magegania na ciama irîa Filipu aaringaga.

14Nao atûmwa arîa maarî Jerusalemu nîmegwire atî andû a Samaria nîmaamûkîrîte kiugo Kîam Ngai. Kwoguo atûmwa acio nîmaatûmire Petero na Johana kûrî o. 15Rîrîa Petero na Johana maakinyire, nîmaavoere etîkia acio a Samaria nîguo mamûkîre Roho Mûtheru. 16Etîkia acio nîmaavatithîtue na rîîtwa rîa Mwathani Jesû, nwatî Roho Mûtheru ndaarî mûnyûrûrûkîru wa naarî ûmwe wa ciao. 17Nao Petero na Johana nîmaamaigîrîre njara na etîkia acio makîamûkîra Roho Mûtheru.

18Nake Simoni nîwonire atî etîkia nîmaaveerwe Roho vîndî îrîa maaigîrîrûe njara nî atûmwa. Kwoguo Simoni nîwendire kûva atûmwa acio mbeca, 19na akîmeera atîrî, “Wa nanie mvani ûvoti ûcio nîguo mûndû wa wonthe ûrîa ngaaigagîrîra njara amûkagîre Roho Mûtheru.”

20Nwatî Petero nîwamwîrire atîrî, “We wana mbeca icio ciaku mûroûra nîûndû we nîwîciragia atî nwa ûvote kûgûra kîveo Kîam Ngai na mbeca! 21Na ma ûyû tîguo wîra waku, nîûndû ngoro yaku tî nûngarû methorî ma Ngai. 22Kwoguo îrire nîûndû wa waganu ûcio waku na ûvoe Mwathani akwovere nîûndû wa kûgîa na rîciria ta rîu. 23Nie nînîrona atî we nîwîcûrîtwe nî wîru na nîwovetwe nî wîvia.”

24Nake Simoni nîwerire Petero na Johana atîrî, “Mwenda mvoerani kûrî Mwathani nîguo ndikone ûndû wana ûmwe wa mau mwagweta.”

25Rîrîa Petero na Johana marîkirie kûvecana ûira na kwanîrîra ndûmîrîri ya Mwathani, nîmaacokire Jerusalemu. Nao marî njîrarî nîmaavîtûkîrîre icagirî nyîngî cia Samaria, makîvunjagîria andû Ûvoro Mwaro.

Filipu na karani ûmwe wa kuuma Ethiopia

26Mûraika wa Mwathani nîwerire Filipu atîrî, “Ûkîra na ûthiî werekerete îveti njîrarî îrîa yumîte Jerusalemu îthiîte Gaza.” (Njîra îo îvîtûkîrîrîte werûrî). 27-28Kwoguo Filipu nîwaûkîrire na akîthiî. Na arî njîrarî nîwonire mûndû ûmwe wa kuuma Ethiopia warî ngaramba. Mûndû ûcio aarî wa vata mûno na waigaga mbeca cia mûndûmûka wathamakaga Ethiopia wetagwa Kandake. Mûndû ûcio aarî njîrarî enûkîte aumîte Jerusalemu kûgooca Ngai. Nake aathiîte ekarîrîte gîkaari gîake kîgucîtue nî mbarathi, akîthomaga mandîko kuuma îvukuurî rîa mûrathi Isaia. 29Nake Roho Mûtheru nîwerire Filipu atîrî, “Thiî vakuvî na ûgendanie na gîkaari kîu kîgucîtue nî mbarathi.” 30Kwoguo vîndî îrîa Filipu aakinyîrîre mûndû ûcio, nîwamwîgwire akîthoma mandîko kuuma îvukuurî rîa mûrathi Isaia. Nake Filipu nîwamûririe atîrî, “We! Nîûrataûkîrwa nî ûrîa ûrathoma?”

31Nake mûndû ûcio nîwacokerie Filipu atîrî, “Nîngîvota gûtaûkîrwa atîa ndatarîrîtue nî mûndû? Nake nîwathaithire Filipu atwe ndaarî mekaranîre nake. 32#Isa 53.7-8 Nakîo gîcunjî Kîam mandîko matheru kîrîa mûndû ûcio aathomaga Kîamrî gîkî:

Ke eekariî ta ng'ondu îthiîte kûthînjwa;

na aakirire wata ûrîa ng'ondu îkiraga vîndî îrîa guoya wayo ûrenjwa.

Ke ndaatumûra kanyua gake.

33Ke nîwaconorithirue na ndaatuîrwa na kîvooto.

Gûtirî mûndû ûngîvota kwaria ûvoro wîgiî njiarwa ciake,

nîûndû ûtûûro wake gûkû nthî nîûkinyîte mûthiia.”

34Nake mûndû ûcio warî ngaramba nîwaûririe Filipu atîrî, “We wenda tu ta mbîra atîrî, mûrathi araria ûvoro ûmwîgiî ke mwene kana araria ûvoro wîgiî mûndû wîngî?” 35Nake Filipu nîwatumûrire kanyua na akîmûva Ûvoro Mwaro wîgiî Jesû Kristû, ambîrîrîtie na gîcunjî kîu Kîam mandîko matheru. 36Na vîndî îrîa maanyûrûrûkîte na njîra îo, nîmaakinyire vandû vaarî na manjî, na mûndû ûcio akîîra Filipu atîrî, “Taroria! Manjî marî ava. Nîndûî kîngîgiria mvatithue?” [ 37Nake Filipu nîwamwîrire atîrî, “Ethîrwa we nîwîtîkîtie na ngoro yaku yonthe, nwa ûvatithue.” Nake mûndû ûcio nîwerire Filipu atîrî, “Nie nîmbîtîkîtie atî Jesû Kristû nîke Mûriû wa Ngai.”]

38Nake mûndû ûcio nîwathanire akiuga gîkaari kîu kîrûngame. Na wa oîrî, Filipu na mûndû ûcio, nîmaatonyire manjîrî na Filipu akîmûvatithia. 39Na rîrîa maaumîrire manjîrî, Filipu nîwecukirue nî Roho wa Mwathani, na mûndû ûcio ngaramba ndaamwona rîngî, nwatî nîwathiîre na mbere na rûgendo rwake ecûrîtwe nî gîkeno. 40Nake Filipu nîweîthîre arî îtûûrarî rîetagwa Azotu. Nake nîwaumire Azotu na akîthiî akîvunjagia Ûvoro Mwaro matûûrarî monthe nginya agîkinya Kaisarea.

Currently Selected:

Ciîko 8: KKB

Highlight

Copy