Ciîko 5

Anania na Safira

1Kwarî na mûndû ûmwe wetagwa Anania. Anania aarî na mûka wetagwa Safira. Nao nîmeendirie mûgûnda wao. 2Vuva wa kûrîkanîra na mûka, Anania nîwetigarîrie mbeca imwe nacio icio ciîngî akîinenganîra kûrî atûmwa. 3Nake Petero nîwamûûririe atîrî, “Anania, ûretîkîrie Caitani atonye ngororî yaku nîkî, agîtûma ûveenie Roho Mûtheru na wîtigarîrie mbeca imwe kuuma kûrî irîa ûronire wendia mûgûnda? 4Mbere ya kwendia mûgûnda, ûrarî wa waku. Na wana warîkia kûwendia, nîûngîravûthîre mbeca icio na njîra wa yonthe îrîa ûngîrendire. Ûravangire gwîka ûndû ta ûcio nîkî? Tî andû ûraveenirie, we ûraveenirie Ngai!” 5Na rîrîa Anania eegwire ciugo icio, nîwagwîre nthî na agîkua. Na andû onthe arîa meegwire ûvoro ûcio nîmegwire guoya mûno. 6Nao anake nîmaathiîre makîova mwîrî wake, magîûkuua na makîthiî kûûthika.

7Ta mathaa mathatû ûguo marîkia kûthira, mûka nîwakinyire nwatî ke ndaamenyaga ûrîa gwekîkîte. 8Nake Petero nîwamûûririe atîrî, “Ta mbîra atîrî, mbeca ino nîcio we na mûthuuri waku mûronire mwendia mûgûnda?”

Nake nîwamûcokerie atîrî, “Ii, icio nwacio tûronire.”

9Kwoguo Petero nîwamwîrire atîrî, “We na mûthuuri waku mûrarîkanîre mûgerie Roho wa Mwathani nîkî? Tathikîrîria! Arîa marathiîte kûthika mûthuuriguo rîu marî ava mûrangorî maûkîte na wa nawe nîmagûkûruta nja magûkuuîte.” 10Wa rîmwe Safira nîwagwîre nthî magûrûrî ma Petero na agîkua. Rîrîa anake acio maatonyire kuo na makîmwîthîra arî mûkuû, nîmaamûrutire nja mamûkuuîte na makîthiî makîmûthika rwarurî rwa mûthuuriwe. 11Nayo kanitha yonthe na andû arîa engî onthe meegwire ûvoro wîgiî maûndû mau, nîmegwire guoya.

Ciama na morirû

12Atûmwa nîmaaringire ciama nyîngî na morirû gatagatîrî ka andû. Nao etîkia nîmaacemanagia kîthakurî gîa Solomoni. 13Gûtirî mûndû wana ûmwe warî nja ya gîkundi Kîam etîkia wetîkagîra kûgwatanîra nao, wana ethîrwa andû nîmaamakumagia mûno. 14Arûme na aka eengî nîmeetîkirie Mwathani na makîongereka gîkundirî Kîam etîkia. 15Andû nîmaakuuaga arwaru ao na makamaumîria njîrarî mamamîrîte morîrî na ivarî. Maamaigaga kuo marî na mwîvoko atî arwaru amwe nîmakûvutua nî kîruru Kîam Petero vîndî îrîa aavîtûkaga kuo. 16Nao andû eengî nîmaaûkire maumîte matûûrarî marîa maarigicîrîtie Jerusalemu. Maakinyire makuuîte andû ao arîa maarî arwaru na arîa maarî na ngoma, na onthe makîvonua.

Atûmwa nîmaanyaririrwe

17Mûthînjîri-Ngai ûrîa mûnene na andû arîa maagendanagia nake a Kîamma Kîam Asadukai nîmaagîrwe nî wîru mwîngî mûno na magîtîkania nwa nginya mamenye ûrîa magwîka. 18Nîmaanyitire atûmwa na makîmavingîra njeera îrîa yavingagîrwa andû onthe. 19Nwatî ûtukû wa mûthenya ûcio, mûraika wa Mwathani nîwavingûrire mîrango ya njeera, akîmaruta kuo, na akîmeera atîrî, 20“Thiîni mûrûngame hekarûrî na mwîre andû maûndû monthe megiî mûtûûrîre ûyû mûcerû.” 21Nao atûmwa nîmaathîkire. Nîmaatonyire hekarûrî kîraûko macangîa na makîambîrîria kûthomithania.

Na rîrîa Mûthînjîri-Ngai ûrîa mûnene na andû arîa maathiîcanagia nake maakinyire, nîmeetire aakîama na athuuri onthe a Isiraeli vamwe. Nîmaacokire magîtûmana njeera makiuga atûmwa mavirwe Kîammarî. 22Nwatî vîndî îrîa athigari maakinyire njeera, matiethîra atûmwa kuo. Kwoguo nîmaacokire makîmenyithia Kîama magîkîîra atîrî, 23“Vîndî îrîa tue tûkinyire njeera, twîthîre kûvingîtwe waro na arangîri marûngamîte mîrangorî. Nwatî rîrîa tûvingûrire mîrango, tûtinethîra mûndû wana ûmwe kuo!” 24Na rîrîa anene a athînjîri-Ngai na mûnene wa arangîri a hekarû meegwire ûvoro ûcio, nîmaamakire na makîrigwa nî ûrîa gwekîkîte kûrî atûmwa. 25Nake mûndû ûmwe nîwatonyire Kîammarî na akîmeera atîrî, “Tathikîrîriani! Andû arîa mûraikirie njeera marûngamîte hekarûrî ndaarî makîthomithia andû!” 26Kwoguo mûnene wa arangîri nîwathiîre marî na athigari na makîvira atûmwa Kîammarî. Nwatî mûnene ûcio na athigari acio matiatûmîra vinya nîûndû nîmeetigagîra matikarivwe na mathiga nî andû.

27Athigari acio nîmaavirire atûmwa kûu Kîammarî na makîmarûngamia mbere ya Kîamma. Nake Mûthînjîri-Ngai ûrîa mûnene nîwamacirithirie 28#Mat 27.25 na akîmeera atîrî, “Tue tûramûkaanirie na vinya tûkîmwîra mûtikathomithanie na rîîtwa rîa mûndû ûcio. Nwatî mue ta roriani ûrîa mwîkîte! Mue mûthomithanîtie Jerusalemu kuonthe, na mûrenda tûcokwe nî nthakame ya mûndû ûcio!”

29Nwatî Petero na atûmwa acio engî nîmaamacokerie atîrî, “Tue nwa nginya twathîkîre Ngai vandû va kwathîkîra andû. 30Mue nîmwaûragire Jesû na njîra ya kûmwamba mûtharavarî îgûrû. Nwatî Ngai wa methe metû ma tene nîwamûriûkirie. 31Ngai nîwamwigire mwena wake wa ûrîo arî Mûtongoria na Mûvonokia. Ngai eekire ûguo nîguo ave andû a Isiraeli kamweke ga kwîrira nîguo moverwa mevia mao. 32Tue tûrî aira a maûndû mama. Wana nginya Roho Mûtheru ûrîa Ngai avecanîte kûrî arîa mamwathîkagîra nî mûira.”

33Rîrîa akîama acio meegwire ûguo, nîmaarakarire mûno na makîenda kûûraga atûmwa. 34Nwatî nîkwarî na Mûfarisai ûmwe kûu Kîamarî Kîamo wetagwa Gamalieli. Ke aarî mwarimû wa Watho na nîwatîîtwe mûno nî andû onthe. Nîwarûngamire na akîathana atûmwa mambe marutwe nja vanini. 35Nîwacokire akîîra akîama acio atîrî, “Mue andû aya etû a Isiraeli, menyererani ûrîa mûgwîka na andû aya. 36Ta ririkanani vîndî îrîa Theudayo aaumîrire. Ke eeîraga atî aarî mûndû wa vata na nîwagîre na arûmîrîri maarî kîndû ta magana mana. Nwatî vîndî îrîa ke aaûragirwe arûmîrîri onthe ake nîmaanyaganirie na gîkundi kîu gîkîthira. 37Vuva wa ûguo, Judasi ûrîa Mûgalili nîweyumîrie vîndî ya kwîyandîkithia. Wa nake nîwagucîrîrie andû eengî mûno na magîtuîka arûmîrîri ake. Nwatî vîndî îrîa wa nake aaûragirwe, arûmîrîri acio onthe ake nîmaanyaganirie. 38Kwoguo rîu nie nîrona arî waro twererekere andû aya na tûtigane nao. Ethîrwa mûvango na wîra ûyû wao umanîte na wathani wa ûmûndû, nîûkûthira. 39Nwatî ethîrwa umanîte na Ngai, mue tîmûmûvoota. Mwavota kwîthîrwa mûrarûa na Ngai ke mwene!”

Nao aakîama acio nîmaarûmîrîre ûtaari wa Gamalieli. 40Nîmeerire atûmwa matonye, makîmarivithia, makîmakaania matigaacoke kwaria na rîîtwa rîa Jesû, na makîmarekereria. 41Atûmwa nîmaaumire kûu Kîammarî macanjamûkîte nîûndû Ngai nîwonete marî agîrîru a kûverithua na njîra îrî na nthoni nîûndû wa Jesû. 42Na wa mûthenya wa mûthenya Atûmwa nîmaathiîcaga hekarûrî na mîciîrî ya andû, kûthomithania na kûvunjia Ûvoro Mwaro wîgiî Jesû ûrîa Mesaya.

Currently Selected:

Ciîko 5: KKB

Highlight

Copy