Ciîko 13

Baranaba na Saûlo nîmaathuurirwe na magîtûmwa

1Kanitharî wa Antiokia nîkwarî na arathi na arimû aya: Baranaba, Simioni (ûrîa wetagwa Mwirû), Lukio (wa kuuma Kurene), na Manaini (ûrîa wareranîrîtue vamwe na Herode ûrîa warî mûnene), na Saûlo. 2Na rîrîa maagoocaga Mwathani na makîînyerekagia, Roho Mûtheru nîwamerire atîrî, “Nthurîrani Baranaba na Saûlo, nîguo makarute wîra ûrîa nie nîmetîrîte.”

3Kwoguo rîrîa maarîkirie kwînyerekia na makûvoya, nîmaaigîrîre Baranaba na Saûlo njara, na makîmatûma.

Baranaba na Saûlo marî Kuporo

4Kwoguo, Baranaba na Saûlo, matûmîtwe nî Roho Mûtheru, nîmaanyûrûrûkire Seleucia na kuuma kûu makîthiî marî merirî magîkinya gîcîgîrîrarî gîa Kuporo. 5Na rîrîa maakinyire Salamisi nîmaavunjirie kiugo Kîam Ngai mavoerorî ma Ayahudi. Nake Johana Maariko aarî vamwe nao arî mûtethia wao.

6Na rîrîa maarîkirie kûvîtûkanîrîria gîcîgîrîrarî kîu, nîmaakinyire Pafosi kûrîa meethîrîrie Mûyahudi ûmwe mûringi ciama wetagwa Mûrû wa Joshua, na warî mûrathi wa maveeni. 7Nake mûragûri ûcio aarî mûrata wa Serigio Paûlo. Serigio aarî mûndû mûûgî na nîke warî mwarîrîria wa gîcîgîrîra Kîam Kuporo. Mûnene ûcio nîwetire Baranaba na Saûlo mathiî kûrî ke, nîûndû nîwendaga kwîgua kiugo Kîam Ngai. 8Nwatî mûringi wa ciama ûcio wetagwa Elimasi nîwareganire nao. (Elimasi nî rîîtwa rîa rûthiomi rwa Kîngiriki rîa Mûrû wa Joshua.) Elimasi nîwaringîrîre mûnene ûcio akîmwîra atige gwîtîkia. 9Nwatî Saûlo ûrîa na rîîtwa rîngî waicîkene ta Paûlo, nîwecûrirwe nî Roho Mûtheru. Saûlo nîwaroririe Elimasi na vinya 10na akiuga atîrî, “We mûrû wa Ngoma! We wî nthû ya maûndû monthe megiî ûthingu. Wîcûrîtwe nî mîthemba yonthe ya mawara ma waganu. Vîndî cionthe we ndûtigaga kûng'otaria njîra irîa nûngarû cia Mwathani! 11Rîu Mwathani nîagûkûverithia. We nîûgûtuîka mûtumumu na gwa kavinda we ndûkaavotaga kwona ûtheri wa riûa.”

Na vîndî wa îo Elimasi nîwatigire kwona na akîambîrîria kûrûra, akîgeragia gûcaria mûndû wa kûthiî amûtongoreretie amûnyitîte njara. 12Na rîrîa Mwarîrîria ûcio oonire ûguo, nîwetîkirie; nîûndû ke nîwamakîtue mûno nî kîthomo kîu kîgiî Mwathani.

Baranaba na Paûlo nîmaavunjirie Ûvoro Mwaro îtûûrarî rîa Antiokia vûrûrirî wa Pisidia

13Nake Paûlo na arîa maarî nake nîmaathiîre marî îtarûrî kuuma Pafosi nginya magîkinya Periga vûrûrirî wa Pamufilia, kûrîa Johana Maariko aamatigire na agîcoka Jerusalemu. 14Nao nîmaavîtûkire Periga na makîthiî magîkinya Antiokia vûrûrirî wa Pisidia. Na mûthenya wa thavatû nîmaathiîre îvoerorî na magîkara nthî kuo. 15Na rîrîa icunjî kuuma Wathorî wa Musa na mandîkorî ma arathi ciarîkirie kûthomwa, atongoria a îvoero nîmaatûmanire Paûlo na Baranaba meerwe atîrî, “Ariû a îthe wetû, ethîrwa mue mûrî na ciugo mûngîûmîrîria andû aya nacio, maarîrieni.” 16Nake Paûlo nîwarûngamire, akîmaveneria na njara yake na akiuga atîrî:

“Andû a Isiraeli wa namue muonthe andû a ndûrîrî arîa mûgoocaga Ngai na mûrî ava: mwenda tu tathikîrîriani! 17#Ntha 1.7; 12.51 Ngai wa andû a Isiraeli nîwathuurire methe metû ma tene na akîmatua rûrîrî rûnene vîndî îrîa maatûûraga vûrûrirî ûtaarî wao wa Misiri. Na nîûndû ke arî vinya nyîngî, nîwamarutire vûrûrirî ûcio, 18#Nda 14.34; Gûco 1.31 na kwa îvinda rîa mîaka mîrongo îna akîmamenyerera werûrî. 19#Gûco 7.1; Josh 14.1 Ngai nîwathiririe ndûrîrî mûgwanja irîa ciarî vûrûrirî wa Kanaani na akîvecana vûrûri ûcio kûrî andû ake. 20#Atir 2.16; 1Sam 3.20 Maûndû mau monthe meekîkire kwa îvinda rîa mîaka magana mana ma mîrongo îtano.

“Na vuva wa ûguo, Ngai nîwamavere atirîrîri a vûrûri nginya gûgîkinya vîndî ya mûrathi Samueli. 21#1Sam 8.5; 10.21 Nao andû nîmaacokire makiuga mathuurîrwe mûthamaki. Kwoguo Ngai nîwamathuurîre Saûlo mûrû wa Kishi nîguo atuîke mûthamaki wao. Saûlo aaumîte mûvîrîgarî wa Benjamini, na amaathire kwa îvinda rîa mîaka mîrongo îna. 22#1Sam 13.14; 16.12; Tha 89.20 Na rîrîa Ngai aamûrutire wathanirî, Ngai nîwathuurire Daudi nîguo atuîke mûthamaki wao. Nake Ngai nîwarutire ûira wîgiî Daudi na akiuga atîrî: ‘Nie nîmonete atî Daudi mûrû wa Jesse nîke mûndû ûrîa ngoro yakwa îthuurîte. Ke nîke ûgwîka maûndû monthe marîa nie ngwenda eke.’ 23Kwoguo Ngai nîatuîte Jesû ûrîa wa mbarî ya Daudi Mûvonokia wa andû wa Isiraeli wata ûrîa ke eeranîrîte. 24#Mar 1.4; Luka 3.3 Mbere ya Jesû ambîrîrie wîra wake, Johana nîwavunjirie kûrî andû onthe a Isiraeli na akîmeera atî nwa nginya merire mevia mao na mavatithue. 25#Mat 3.11; Mar 1.7; Luka 3.16; Joh 1.20,27 Na vîndî îrîa Johana aageerie kûrîkia ûtungatîri wake, nîwerire andû atîrî, Mue mûreciria nie nîrî û? Nie tî nie ûrîa mwetererete. Ke nîagûcoka gûka vuvarî. Na nie ndirî mwagîrîru wa kwovora iratû ciake.

26“Ariû na aarî a îthe wetû, mue a mbarî ya Iburahimu, wa namue muonthe andû a ndûrîrî arîa mûgoocaga Ngai na mûrî ava: tue tuonthe nîtue tûtûmîrîtwe ndûmîrîri îno ya ûvonokio! 27Andû arîa matûûraga Jerusalemu na atongoria ao matiamenya atî Jesû nîke Mûvonokia. O matiataûkîrwa nî ciugo irîa arathi maandîkire, irîa ithomagwa mîthenya yonthe ya thavatû. Nwatî o nîmaaivingirie vîndî îrîa maaugire atî Jesû aarî na ûcuke. 28#Mat 27.22-23; Mar 15.13-14; Luka 23.21-23; Joh 19.15 O matiarî na gîtûmi kîganu gîa gûtuîrîra Jesû aûragwe, nwatî nîmaaûririe Pilato amûûragithie. 29#Mat 27.57-61; Mar 15.42-47; Luka 23.50-56; Joh 19.38-42 Na vîndî îrîa maarîkirie gwîka maûndû monthe marîa maamwîgiî marîa maandîkîtwe Mandîkorî Matheru, nîmaamûcurûkirie kuuma mûtharavarî îgûrû na makîmûthika mbîrîrarî. 30Nwatî Ngai nîwamûriûkirie. 31#Ciîko 1.3 Na kwa îvinda rîa mîthenya mîîngî Jesû nîwaumîrîre arîa maambatanîtie nake kuuma Galili kûthiî Jerusalemu. O rîu nî aira ake kûrî andû a Isiraeli. 32Twaûka kûmûretere Ûvoro Mwaro wîgiî kîîranîro kîrîa Ngai eerîre methe metû ma tene. 33#Tha 2.7 Na rîu Ngai nîavingîtie kîîranîro gîkî nîûndû wetû, tue ciana ciao. Akîvingîtie na njîra ya kûriûkia Jesû. Wa ta ûrîa kwandîkîtwe Thaburirî ya kaîrî atîrî:

‘We ûrî Mûriû wakwa;

ûmûnthî nînatuîka Aguo.’

34 # Isa 55.3 Naguo ûvoro wîgiî kûriûkia Jesû nîguo ndakoorere mbîrîrarî, Ngai nîwaugire atîrî:

‘Mue nîngaamûva irathimo ntheru na cia ma irîa nerîîre Daudi.’

35 # Tha 16.10 Kwoguo wana nîaugîte Thaburirî îngî atîrî:

‘We ndûgeetîkîria Ûrîa Mûtheru waku orere mbîrîrarî.’

36Vîndî îrîa Daudi aarî mwoyo, nîwavingirie wendi wa Ngai. Ke nîwacokire agîkua na akîthikwa, na mwîrî wake ûkîorera mbîrîrarî. 37Nwatî ke Ûrîa wariûkirue nî Ngai ndoorera mbîrîrarî. 38Ariû na aarî a îthe wetû, tue tûrenda mûmenye atî tûramûvunjîria ûvoro wîgiî kwoverwa mevia na njîra ya mûndû ûyû. 39Na njîra yake mûndû wa wonthe ûmwîtîkîtie nîovagîrwa mevia monthe marîa mûndû atangîoverwe nî watho wa Musa. 40Kwoguo îîmenyerereni nîguo mûtigaacokwe nî maûndû marîa maarirue nî arathi atî:

41 # Hab 1.5 ‘Tathikîrîriani anyûrûrania aya! Makani na Mûkue!

Nîûndû ûndû ûrîa nie ngwîka ûmûnthî ûyû mue tî mwîtîkia,

wana mwataarîrua guo, nî mûndû!’ ”

42Na rîrîa Paûlo na Baranaba maaumaga îvoerorî, andû nîmaamathaithire makîmeera magaacoka rîngî thavatû îo yarûmîrîrîte nîguo mamaarîrie makîria îgûrû rîgiî maûndû mau. 43Na rîrîa mûcemanio ûrîa warî îvoerorî warîkire, Ayahudi eengî na andû a ndûrîrî eengî agooci Ngai arîa maagarûrîtwe magatonya ndinirî ya Ayahudi nîmaarûmîrîre Paûlo na Baranaba. Nao Paûlo na Baranaba nîmamaarîrie na makîmaûmîrîria matûûre mevokete wega wa Ngai.

44Na thavatû îo yarûmîrîrîte, vakuvî andû onthe a îtûûra rîu nîmaagomanire kuo nîguo megue kiugo Kîam Mwathani. 45Na rîrîa Ayahudi moonire kîrîndî, nîmecûrirwe nî wîru, magîkararia maûndû marîa Paûlo aaragia, na makîmûruma. 46Nwatî Paûlo na Baranaba nîmaaririe maûmîrîrîtie mûno na makiuga atîrî: “Kûrarî na vata kiugo Kîam Ngai Kîammbe kîvunjue kûrî mue. Nwatî nîûndû nîmwakîrega na mwetuîra wa mue ene atî mûtirona mûrî agîrîru a kûvewa mwoyo wa tene na tene, tue rîu nîtûkûmûtiga na tûthiî kûrî andû a ndûrîrî. 47#Isa 42.6; 49.6 Nîûndû ûguo nîguo Mwathani aatwathire twîkage vîndî îrîa ke aaugire atîrî:

‘Nie nînagûtua ûtheri kûrî andû a ndûrîrî,

nîguo wonie andû onthe a gûkû nthî ûrîa makûvonoka.’ ”

48Na vîndî îrîa andû a ndûrîrî meegwire Paûlo akiuga ûguo, nîmaacanjamûkire na magîkumia ndûmîrîri ya Mwathani. Nao andû arîa maathuurîtwe nîguo magîe na mwoyo wa tene tene, nîmaatuîkire etîkia.

49Nakîo kiugo Kîam Mwathani nîgîatambire kûu vûrûrirî ûcio wonthe. 50Nwatî Ayahudi nîmaaunjugire anene a îtûûra wana aka a ndûrîrî a Kîrathi Kîam îgûrû arîa meetîkîtie Ngai. Nao nîmaatûmire Paûlo na Baranaba mambîrîrie kûnyariirwa na makîmengata kuuma vûrûrirî ûcio wa kwao. 51#Mat 10.14; Mar 6.11; Luka 9.5; 10.11 Kwoguo Paûlo na Baranaba nîmeerivaririvire rûkûngû kuuma magûrûrî mao rûrî ta rûûri rwa kûrega andû a îtûûra rîu na makîthiî Ikonia. 52Nwatî etîkia nîmecûrirwe nî gîkeno na Roho Mûtheru.

Currently Selected:

Ciîko 13: KKB

Highlight

Copy