Ciîko 12
12
Kûnyariirwa makîria
1Vîndî wa îo Mûthamaki Herode nîwambîrîrie kûnyariira andû amwe arîa maarî a kanitha. 2Nake nîwathanire akiuga Jakuvu, mûrwang'ina na Johana aûragwe na rûviû. 3Na rîrîa Herode oonire atî ûndû ûcio nîwakenirie Ayahudi, nîwanyitithirie Petero wana ke. (Ûndû ûyû wekîkire vîndî ya Kîrugo Kîam Mîgate îrîa îtarî mîkîre ndawa ya kwimbia.) 4#Ntha 12.1-27 Nake Herode arîkia kûnyitithia Petero, nîwamûvingîrithirie njeera na akîmûnenganîra arangîrwe nî ikundi inya cia athigari ana ana. Herode aavangîte nîakûmûciirithia arî mbere ya andû vuva wa Kîrugo Kîam pasaka. 5Kwoguo Petero nîwaigirwe njeera, nwatî andû arîa maarî a kanitha nîmaamûvoere Ngai marî na kîîo.
Petero nîwarekererue kuuma njeera
6Naguo ûtukû mbere ya Herode avira Petero kûrî andû, Petero aarî njeera amamîte karîgatî ka athigari aîrî, na ovetwe na mînyororo îrî. Nao athigari acio engî maarangîrîte mwîrîga wa njeera. 7Nake mûraika wa Mwathani nîwaumîre wa rîmwe na ûtheri ûgîkenga kûu njeera. Mûraika ûcio nîwainainirie Petero amûgwete Kîamnde, akîmûramûkia na akîmwîra atîrî, “Ramûka narua!” Nayo mînyororo îrîa ovetwe njara nayo nîyagwîre nthî wa rîmwe. 8Mûraika ûcio nîwacokire akîmwîra atîrî, “Îîyove mûcivi na wîkîre iratû ciaku.” Na rîrîa Petero aarîkirie gwîka ûguo, mûraika nîwacokire akîmwîra atîrî, “Îkîra kanjû yaku na ûnûmîrîre.” 9Kwoguo Petero nîwamûrûmîrîre na makiuma nja ya njeera, nwatî ke ndaamenyaga kana maûndû mau mûraika eekaga maarî ma ma. Petero eeciragia nî kîoneki arona. 10Nao nîmaavîtûkire gîkundi Kîam mbere Kîam arangîri wana gîa kaîrî na mûthiiarî magîkinya mwîrîgarî wa cuuma wa gûtonya îtûûrarî. Naguo mwîrîga ûcio nîwevingûrire guo mwene na makîvîtûkîrîra vo makiuma. Na rîrîa maathiîrîrîte njîrarî îmwe, mûraika nîwatigire Petero wa rîmwe.
11Nake Petero nîwamenyire ûrîa gwekîkîte kûrî ke, na akiuga atîrî, “Rîu nînamenya atî Mwathani na ma nîatûmîte mûraika wake aûke andethûre kuuma kûrî Herode na kuuma kûrî maûndû monthe marîa Ayahudi mareciragia nîmagwîka.”
12Na rîrîa aamenyire ûguo, nîwathiîre mûciî kwa Mariamu ng'ina wa Johana ûrîa na rîîtwa rîngî wîtagwa Maariko. Nao andû eengî nîmaacemanîtie kuo makîvoyaga. 13Nake Petero nîwaringaringire mûrango wa nja na mwîrîtu watungataga kuo wetagwa Roda akîthiî kûmûvingûrîra. 14Na rîrîa mwîrîtu ûcio aamenyire kanyua ka Petero, nîwakenire mûno na ndaavingûra mûrango. Vandû va ûguo, nîwavinyûrire na kûu ndaarî na akîîra andû onthe atîrî, “Nî Petero ûrûngamîte mûrangorî!” 15Nao nîmaamwîrire atîrî, “We wîna ngoma!” Nwatî mwîrîtu ûcio nîwakîrîrîrie kuga atî ke aaragia ûma. Kwoguo nîmaamwîrire atîrî, “Nwanginya ûcio ethîrwe nî mûraika wa Petero!”
16Nake Petero nîwathiîre na mbere na kûringaringa. Rîrîa mavingûrire mûrango na makîmwona, nîmamakire mûno. 17Petero nîwamaveenerie na njara yake akîmeera makire. Nake nîwamataarîrie ûrîa Mwathani aamûrutire njeera na akîmeera atîrî, “Îrani Jakuvu na etîkia arîa engî ûrîa kûrekîkire.” Nîwacokire akiuma kûu na akîthiî kûndû kwîngî.
18Na kîraûko rîrîa gwakere, arangîri nîmaanegenanirie mûno makîrigwa nî ûrîa gwekîkîte kûrî Petero. 19Nake Herode nîwarutire watho akiuga Petero acarue kûndû kuonthe, nwatî matiamwona. Kwoguo nîwatuîririe arangîri waro na akîruta watho akiuga maûragwe.
Na vuva wa ûguo Herode nîwanyûrûrûkire akiuma Judea akîthiî Kaisarea agîkara kuo.
Gûkua kwa Herode
20Nake Herode nîwarakarirue mûno nî andû a Turo na Sidoni, na kwoguo nîmaathiîre kûmwona marî gîkundi. Nao nîmaambire makîgwithia Blasito ûrîa warûngamîrîrîte mûciî wa mûthamaki, atî nwa nginya amatethie. Nîmacokire makîthiî kûrî Herode na makîmwîra etîkîre mekaranie na thayû nîûndû vûrûri wao warutaga irio vûrûrirî ûcio wa mûthamaki.
21Na mûthenya ûmwe wathuurîtwe, Herode nîwekîrire nguo ciake cia ûthamaki, agîkarîra gîtî gîake Kîam ûthamaki na akîarîria andû. 22Nao andû nîmaaugîrîrie atîrî, “Ke araria ta ngai, ndararia ta mûndû.” 23Na nîûndû Herode ndaakumia Ngai, mûraika wa Mwathani nîwatûmire arware wa rîmwe. Herode nîwarîrwe nî igunyû na agîkua.
24Nayo ndûmîrîri ya Ngai nîyathiîre na mbere na gûtamba na îgîkinyîra andû eengî.
25Na rîrîa Baranaba na Saûlo maarîkirie wîra wao Jerusalemu, nîmaacokire Antiokia marî na Johana ûrîa na rîîtwa rîngî wetagwa Maariko.
Currently Selected:
Ciîko 12: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
