Ciîko 14

Paûlo na Baranaba nîmaavunjirie Ûvoro Mwaro îtûûrarî rîa Ikonia

1Na rîrîa Paûlo na Baranaba maarî Ikoniumu, nîmaathiîre Îvoerorî rîa Ayahudi. Nao nîmaavecanire ûvoro waro mûno na andû eengî, Ayahudi na Angiriki magîtuîka etîkia. 2Nwatî Ayahudi amwe arîa maaregete gwîtîkia nîmaaunjugire andû a ndûrîrî na makîmaringîrîra mamene etîkia. 3Nao Paûlo na Baranaba nîmeekarire kûu Ikonia îvinda îraca na makîvecana ûira wa Mwathani maûmîrîrîtie. Nake Mwathani nîwonanirie atî ndûmîrîri yao îgiî wega wake yarî ya ma. Ke eekire ûguo na njîra ya kûmava ûvoti wa kûringa ciama na kwonania morirû. 4Nao andû a îtûûra rîu nîmaagaûkanire. Amwe nîmeetîkanirie na Ayahudi, na acio engî magîtîkania na atûmwa.

5Nao andû a ndûrîrî amwe na Ayahudi, vamwe na atongoria ao, nîmaavangire mathînie Paûlo na Baranaba na mamaûrage na njîra ya kûmariva na mathiga. 6Na rîrîa Paûlo na Baranaba maamenyire ûvoro ûcio, nîmaaûrire makîthiî Listra na Deribe, matûûra marîa maarî vûrûrirî wa Likaonia, na makîthiî mavûrûrirî marîa maarî gûkuvî nakuo. 7Wana kûu nîmaavunjirie Ûvoro Mwaro.

Paûlo na Baranaba nîmaavunjirie Ûvoro Mwaro matûûrarî ma Listra na Deribe

8Nakuo Listra nîkwarî na mûndû ûmwe waciarîtwe arî kîonje na ûtaarî anavota kûthiî na magûrû. 9Nake mûndû ûcio nîwathikîrîrîtie Paûlo akîaria. Paûlo nîwamûroririe na vinya na akîona atî nîwetîkîtie Ngai arî na ûvoti wa kûmûvonia. 10Kwoguo Paûlo nîwaugire na mûgambo mûnene atîrî, “Rûngama na magûrû maku!” Nake mûndû ûcio nîwarûgire îgûrû na akîambîrîria kûthiî na magûrû. 11Na rîrîa kîrîndî kîonire ûrîa Paûlo eekire, nîkîaugîrîrie na rûthiomi rwao rwa andû a Likaonia gîkiuga atîrî, “Ngai nîituîkîte ta andû na ikanyûrûrûka kûrî tue!” 12Nao andû acio nîmaaveere Baranaba rîîtwa makîmwîta Zeu nake Paûlo makîmwîta Herime, nîûndû nîke warî mwaria wa vata mûno. 13Nake mûthînjîri-ngai wa kûu hekarûrî ya Zeu; îrîa yarî vau nja ya îtûûra, nîwaretire ndegwa vau mwîrîgarî wa îtûûra rîu îgemetue na nthûmbî ya maûa. Ke arî vamwe na kîrîndî, eendaga kûruta kîgongoona kûrî Paûlo na Baranaba.

14Na rîrîa, Paûlo na Baranaba meegwire ûrîa andû meendaga gwîka, nîmaatembûrangire nguo ciao na makîvinyûra gatagatîrî ga kîrîndî makiugagîrîria atîrî, 15#Ntha 20.11; Tha 146.6 “Mue andû aya, mûreka ûguo nîkî? Tue wa natue tûrî andû tu mekariî wa tamue. Tue twaûka kûmûretere Ûvoro Mwaro na kûmwîra atî mue nîmwagîrîrwe nî gûtigana na maûndû mama matarî na vata na mûgarûrûkîre Ngai mûtûûra mwoyo. Ke nîke waûmbire îgûrû, nthî, îria, na indo cionthe irîa irî ndaarî yacio. 16Vingo ya tene Ngai nîwetîkagîria andû onthe meke wa ûrîa meendaga. 17Nwatî vîndî cionthe ke nîwîthîrîtwe akîonania na ma atî arî kuo na njîra ya maûndû maro marîa ekaga kûrî andû. Ke nîke urithagia mbura kuuma îgûrû na akamûva imera mavinda marîa magîrîru. Ke nîke ûmûvecaga irio na agecûria ngoro cienyu na gîkeno.” 18Wana ethîrwa atûmwa nîmaarîrie ciugo icio, o matiavota wana vanini kûgiria kîrîndî gîtikaarute kîgongoona kûrî o.

19Nao Ayahudi amwe nîmaakinyire maumîte matûûrarî ma Antiokia ya Pisidia na Ikonia, na makîonithia andû ûrîa makûregana na Paûlo. Kwoguo nîmaamûrivire na mathiga na makîmûkururia makîmûruta nja ya îtûûra rîu magîîciragia atî ke aarî mûkuû. 20Nwatî vîndî îrîa etîkia maagomanire mamûrigicîrîtie, nîwaûkîrire na agîcoka agîtonya kûu îtûûrarî rîu. Na mûthenya ûcio warûmîrîrîte nîmaaumire kûu marî na Baranaba na makîthiî îtûûrarî rîa Deribe.

Paûlo na Baranaba nîmaacokire Antiokia vûrûrirî wa Sîria

21Paûlo na Baranaba nîmaavunjirie Ûvoro Mwaro îtûûrarî rîa Deribe na makîgîa na arutwa eengî mûno. Nao Paûlo na Baranaba nîmaacokire Listra, Ikonia na Antiokia ya Pisidia. 22Nao nîmeekîrire etîkia vinya, makîmaûmîrîria mekarage mekindîrîtie wîtîkiorî na makîmeera atîrî, “Nwa nginya twone mathîna meengî mûno mbere ya tûtonye Ûthamakirî wa Ngai.” 23Na wa kanitha wa kanitha nîmaamîthuurîre athuuri na njîra ya kûvoya na kwînyerekia. Athuuri acio nîmeevokete Mwathani, na kwoguo Paûlo na Baranaba nîmaamaigire njararî cia Mwathani.

24Nao nîmaacokire makîvîtûkîrîra vûrûrirî wa Pisidia, na magîkinya Pamufilia. 25Na rîrîa maarîkirie kûvunjia kiugo Kîam Ngai kûu Periga nîmaanyûrûrûkire makîthiî Atalia. 26Na kuuma kûu nîmaatwîre meri magîcoka Antiokia kûrîa etîkia mamaigîte wegarî wa Ngai nîûndû wa wîra ûcio maarîkîtie kûruta.

27Na rîrîa Paûlo na Baranaba maakinyire Antiokia, nîmaacokanîrîrie andû a kanitha vamwe, na makîmeera maûndû monthe marîa Ngai eekîte na njîra yao. Nîmaamerire wana ûrîa Ngai aavete andû a ndûrîrî kanya ga gwîtîkia. 28Nao nîmeekarire kûu îvinda îraca marî na etîkia.

Currently Selected:

Ciîko 14: KKB

Highlight

Copy