Mk 2

Yesũ Aivosya Mũndũ waĩ na Mamutha Monzu

(Mat 9.1-8; Lk 5.17-26)

1Yesũ nĩwasyokie Kavelinaũmu, na ĩtina wa mĩthenya mĩvũthũ andũ mamanya kana e mũsyĩ. 2Nĩvo ĩndĩ andũ aingĩ moombanĩie nyũmbanĩ ĩla waĩ, nginya weethĩa vai vandũ ve kamwanya o na nza vakuvĩ na mũomo. Yesũ aendee kũmatavya ndeto ya Ngai, 3aũme ana nĩmookie makuĩte mũndũ waĩ na mamutha monzu mamũetee Yesũ. 4Nũndũ wa mũvivinyano wa andũ, mayaatonya kũmũvikĩa Yesũ, na kwoou malĩsa kĩalanĩ ĩũlũ na mavũthũĩla ĩima vo. Nĩvo ĩndĩ matheeleilye mũndũ ũsu vau akomete ũkomonĩ. 5Yesũ oona ũndũ me na mũĩkĩĩo ũnenevete, nĩweeie mũndũ ũsu waĩ na mamutha monzu atĩĩ, “Mwana wakwa, nĩwaekewa naĩ syaku.”

6Amanyĩsya amwe ma Mĩao mailyĩ vau nĩmeekũlasya na ngoo, 7“Yesũ aneena ũu nĩkĩ? Kũu nĩ kũmũuma Ngai! Ngai e weka nowe ũtonya kũekea andũ naĩ syoo.” 8O kwa mĩtũkĩ Yesũ nĩwamanyie ũndũ meũsũanĩa, na kwoou amakũlya atĩĩ, “Mwĩsũanĩa maũndũ ma mũthemba ũsu nĩkĩ? 9Nĩ ũndũ wĩva ũla wĩ laisi: Nĩ kwĩa mũndũ ũũ, ‘Nĩwaekewa naĩ syaku,’ kana nĩ kũmwĩa, ‘Ũkĩla wose ũkomo waku na ũyĩnũka?’ 10Yu nĩngũmwony'a kana Mwana wa Mũndũ e na ũtonyi wa kũekea andũ naĩ syoo kũũ ĩũlũ wa nthĩ!” Kwoou amwĩa mũndũ ũsu waĩ na mamutha monzu atĩĩ, 11“Ũkĩla! Osa ũkomo waku na ũyĩnũka.” 12Mũndũ ũsu nĩwookĩlile, oosa ũkomo wake na mĩtũkĩ na aumaala athi andũ onthe mene na maseng'ete mũno. Onthe nĩmamũkumisye Ngai mayasya atĩĩ, “Tũyaaona ũndũ wa mũthemba ũũ!”

Yesũ Aimwĩta Livai Amũatĩĩe

(Mat 9.9-13; Lk 5.27-32)

13Yesũ nĩwaendie ĩngĩ ũtee wa ĩia ya Kalilii. Andũ aingĩ nĩmoombanĩie vala ũĩ, nake ambĩĩa kũmamanyĩsya. 14Avĩtĩte nĩwoonie mumĩthya wa koti weetawa Livai, mwana wa Aveasi ailyĩ ovisinĩ wa kumĩthĩsya koti. Yesũ nĩwamwĩie atĩĩ, “Ngatĩĩa,” na Livai ookĩla na amũatĩĩa.

15Masaa angĩ, Yesũ nĩwaathĩaw'a e mũsyĩ kwa Livai, na aumĩthya aingĩ ma koti na andũ angĩ avĩtany'a mamũatĩĩte nĩmaathĩaw'a vamwe nake na amanyĩw'a make. 16Yĩla amanyĩsya ma Mĩao ala maĩ Avalisi moonie Yesũ akĩya na eki ma naĩ na aumĩthya ma koti, nĩmakũlilye amanyĩw'a make atĩĩ, “Yesũ eĩsanĩa na andũ ma mũthemba ũũ nĩkĩ?”

17Yesũ nĩwamewie maikũlya na kwoou amasũngĩa amea atĩĩ, “Andũ mate awau mai na vata wa ndakĩtalĩ; ala me na vata wake no ala awau. Nyie ndyaaũka kwĩta andũ ala alũngalu, ĩndĩ nookie kwĩta avĩtany'a.”

Ĩkũlyo ĩũlũ wa Kũtĩĩa Kũya

(Mat 9.14-17; Lk 5.33-39)

18Amanyĩw'a ma Yoana Mũvatisi na ma Avalisi nĩmatĩĩaa kũya.#2.18 matĩĩaa kũya: Nĩ kana menengane mboyanĩ na maithaitha Ngai Kwoou andũ amwe nĩmookie vala ve Yesũ mamũkũlya atĩĩ, “Nĩkĩ mo amanyĩw'a ma Yoana na ala ma Avalisi matĩĩaa kũya, namo ala maku maitĩĩaa?” 19Yesũ nake amakũlya atĩĩ, “Anyanyae ma mũtwaani nĩmatonya kũtĩĩa kũya mũtwaani eo vamwe namo? Aiee! Mũtwaani e vamwe namo maitonya kũtĩĩa kũya. 20Ĩndĩ ĩvinda nĩyũkĩte yĩla mũtwaani wĩvetangwa vala maĩ; ĩvindanĩ yĩu makatĩĩa kũya.

21“Vai mũndũ ũtumĩĩaa kĩlaka kyeũ ngũanĩ ngũũ; akakĩtumĩĩa nokĩtembũe ngũa ĩsu, na vayĩthĩwa na ũtembũku mũnenange. 22O ta ũu, vai mũndũ wĩkĩaa ndivai nzaũ ikuunĩ ngũũ, nũndũ ndivai ĩsu ĩkasyatũa na ĩyĩtĩka, na ikuu isu iyanangĩka. Kwoou no nginya ndivai nzaũ yĩkĩwe ikuunĩ nzaũ.”

Ĩkũlyo Ĩũlũ wa Savato

(Mat 12.1-8; Lk 6.1-5)

23 # Kũt 23.25 Mũthenya ũmwe wa Savato, Yesũ nĩwaendanĩtye na amanyĩw'a make mesĩlĩte mũũndanĩ wa nganũ. Amanyĩw'a make nĩmambĩĩie kũtw'a iia imwe sya nganũ. 24Nĩvo ĩndĩ Avalisi mamũkũlilye Yesũ atĩĩ, “Nĩkĩ amanyĩw'a maku mekwĩka ũla ũtaĩlĩte kwĩkwa mũthenya wa Savato?”

25 # 1Sam 21.1-6 Yesũ nĩwamakũlilye atĩĩ, “Nũndũ inyw'ĩ mũtaasoma ũndũ Ndeviti weekie, ĩvindanĩ yĩla we na ala waĩ namo maĩ na nzaa na mamanthaa kĩndũ maye? 26#Ali 24.9 Nĩwalikile nyũmbanĩ ya Ngai na aya mĩkate ĩla yathembeetwe Ngai. Ũu eekie yĩla Aviathali waĩ Mũthembi Mũnene. Kwĩanana na Mĩao yaitũ, no athembi me oka metĩkĩlĩtw'e kũya mĩkate ĩsu; ĩndĩ Ndeviti nĩwamĩĩe o na amanenga andũ ala waĩ namo maya.”

27Yesũ akĩminũkĩlya amea atĩĩ, “Mũthenya wa Savato waseũviw'e kwondũ wa ũseo wa mũndũ, ĩndĩ mũndũ ndaaũmbwa nũndũ wa Savato. 28Kwoou Mwana wa Mũndũ e na ũkũmũ o na ĩũlũ Savato.”

Currently Selected:

Mk 2: KAMBA

Highlight

Copy