Mk 1

Ũtavany'a wa Yoana Mũvatisi

(Mat 3.1-12; Lk 3.1-18; Yoa 1.19-28)

1Ũũ nĩ wambĩlĩĩlyo wa Ũvoo Mũseo ĩũlũ wa Yesũ Klĩsto, Mwana wa Ngai. 2#Mal 3.1 Wambĩlĩĩlye o tondũ Ngai ũneenete ĩvukunĩ ya mwathani Ĩsaia akasya atĩĩ,

“Nĩngũtũma mũtũmwa wakwa athi mbee waku

akaũseũvĩsye nzĩa.

3 # Ĩsa 40.3 Ve mũndũ ũkũneena weũnĩ na wasya mũnene ayasya atĩĩ,

‘Seũvĩsyai Mwĩai nzĩa, na mũilũngalya kũla eĩsĩla.’ ”

4Nĩvo ĩndĩ Yoana Mũvatisi waumĩlile weũnĩ aivatisa na kũtavany'a ayasya atĩĩ, “Ĩlilei kwondũ wa naĩ syenyu na mũivatiswa, na Ngai nũkũmũekea naĩ syenyu.” 5Andũ aingĩ kuma nthĩ ya Yutia na mũsyĩ wa Yelũsalemu nĩmaendie kwĩthukĩĩsya Yoana. Nĩmaumbũlile naĩ syoo, nake amavatisĩa Ũsĩnĩ wa Yolotani.

6 # 2Asu 1.8 Yoana eekĩĩte ngũa yaseũvĩtw'e na w'ĩa wa ngamĩle, na akeyova mũsivi wa kĩthuma kĩnyunyunĩ. Lĩu wake waĩ ngie na ũkĩ wa nzũkĩ wa kĩthekanĩ. 7Nthĩnĩ wa ũtavany'a wake nĩwameie andũ atĩĩ, “Mũndũ ũla wũkĩte ĩtina wakwa nĩ mũnene mũno kwĩ nyie, o na ndyaĩlĩtwe nĩ kũkumana nĩthasye mĩkwa ya iatũ syake.#1.7 Athũkũmi nĩmo mathaasya iatũ sya anene moo, ĩndĩ Yoana eenda kwĩyonany'a kana nĩ mũnini kũte mũthũkũmi 8Nyie nĩmũvatisa na kĩw'ũ, ĩndĩ we akamũvatisa na Veva Mũtheu.”

Kũvatiswa na Kũtatwa kwa Yesũ

(Mat 3.13—4.11; Lk 3.21-22; 4.1-13)

9Ĩvindanĩ yĩu Yesũ nĩwaumie ndũanĩ yĩtawa Nasaleti yĩ Kalilii, athi avatiswa nĩ Yoana Ũsĩnĩ wa Yolotani. 10Yesũ amina kuma kĩw'ũnĩ oou, nĩwoonie ĩtu yavingũka na Veva wa Ngai atheete ĩũlũ wake e na mũvw'ano wa ĩvũĩ, 11#Mwa 22.2; Sav 2.7; Ĩsa 42.1; Mat 3.17; 12.18; Mk 9.7; Lk 3.22 na wasya weew'ĩka kuma ĩtunĩ ũkwasya atĩĩ, “We nue Mwana wakwa mwendwa na nĩnendeeaw'a mũno nue.”

12Vau kwa vau Veva nĩwamũtongoeisye amũtwaa weũnĩ, 13vala wekalile mĩthenya mĩongo ĩna, akĩtatwa nĩ Satani. Kũu weũnĩ Yesũ wekalaa kwaĩ nyamũ sya kĩthekanĩ na alaĩka nĩmamũtetheeasya mavatanĩ make.

Yesũ Ayĩta Atei Ana ma Makũyũ Matw'ĩke Amanyĩw'a Make

(Mat 4.12-22; Lk 4.14-15; 5.1-11)

14Ĩtina wa Yoana kũvingĩwa yela, Yesũ nĩwaendie Kalilii na atavany'a Ũvoo Mũseo wa Ngai. 15#Mat 3.2 Nĩweeie andũ atĩĩ, “Ĩvinda nĩ ĩviku na ũsumbĩ wa Ngai wĩ vakuvĩ! Ĩlilei kwondũ wa naĩ syenyu na mũyĩtĩkĩla Ũvoo Mũseo.”

16Yesũ aitembeangĩla ũtee wa Ĩia ya Kalilii, nĩwoonie atei elĩ ma makũyũ maitea makũyũ, namo nĩ Simioni na Endelea mwana-a-inyia. 17Nĩwameie atĩĩ, “Ngatĩĩai na ngamũtw'ĩkĩthya atei ma andũ.” 18Vau kwa vau nĩmatiie itei syoo na mamũatĩĩa.

19Maendanga vanini, Yesũ nĩwoonie atei angĩ elĩ ma inyia ũmwe, namo nĩ Yakovo na Yoana, ana ma Nzevetii. Maĩ ĩsiwanĩ maiseũvya itei syoo. 20Vau kwa vau nĩwametie mamũatĩĩe, namo matia ĩthe woo ĩsiwanĩ e na athũkũmi na mamũatĩĩa Yesũ.

Yesũ Aivosya Mũndũ Walikĩtwe nĩ Ĩimũ

(Lk 4.31-37)

21Yesũ na amanyĩw'a asu make nĩmaendie Kavelinaũmu, na yĩla mũthenya wa Savato#1.21 Savato: Mũthenya wa kũthũmũa na wa kũthaitha wa Ayuti wavikie, nĩwaendie nyũmbanĩ ya Ayuti ya kũthaithĩa na kũmbanĩa na ambĩĩa kũmanyĩsya. 22#Mat 7.28-29 Andũ ala mamwĩthukĩĩisye akĩmanyĩsya nĩmaseng'ie mũno nĩ momanyĩsyo make, nũndũ we ndamanyĩasya ta amanyĩsya ma Mĩao, ĩndĩ amanyĩasya na ũkũmũ.

23Kwa kĩthũlũmũko, mũndũ ũmwe walikĩtwe nĩ ĩimũ, nĩwalikile nyũmbanĩ ya Ayuti ya kũthaithĩa na kũmbanĩa na 24akaya na wasya mũnene ayasya atĩĩ, “We Yesũ kuma Nasaleti, wĩenda kyaũ vala tũĩ? Wooka vaa ũtwanange? Nĩnĩsĩ nue ũũ! Wĩ Ũla Mũtheu wumĩte kwa Ngai.”

25Nĩvo ĩndĩ Yesũ weeaĩie ĩimũ yĩu ayĩa atĩĩ, “Vindya na ũyuma mũndũnĩ ũũ!”

26Ĩimũ yĩu nĩyathingithisye mũndũ ũsu mũno yuĩte mbu nene, na yauma vala ũĩ.

27Andũ onthe nĩmaseng'ie mũno kũvikĩa makũlany'a atĩĩ, “Ũndũ ũũ nĩ mwaũ? Ũũ nĩ ũmanyĩsyo mweũ! Mũndũ ũũ e na ũkũmũ wa kwĩyĩaĩa o na maimũ makamwĩw'a!” 28Kwa mĩtũkĩ nguma ya Yesũ nĩyanyaĩĩkie kĩla vandũ kĩsionĩ kya Kalilii, na ndũanĩ ila ikĩthyũlũlũkĩte.

Yesũ Aivosya Andũ Aingĩ

(Mat 8.14-17; Lk 4.38-41)

29Yesũ e na ala amanyĩw'a make, namo nĩ vamwe na Yakovo na Yoana, nĩmaumie nyũmbanĩ ya Ayuti ya kũthaithĩa na kũmbanĩa, na mathi mũsyĩ kwa Simioni na Endelea. 30Mavika oou, Yesũ nĩwataviw'e kana inyia wa mũka wa Simioni nũkomete awaĩte ndetema. 31Nĩwaendie vala wakomete na amũkwata kw'oko amũtetheesya kũkĩla. O vau kwa vau nĩwavoie ndetema na ambĩĩa kũmathũkũma.

32Vaa wĩoo syũa yathũa, andũ nĩmamũeteie Yesũ andũ ala maĩ awau na ala malikĩtwe nĩ maimũ. 33Andũ aingĩ kuma Kavelinaũmu nĩmoombĩĩie mũomonĩ wa nyũmba ĩsu. 34Yesũ nĩwavoisye aingĩ ala maĩ na mowau me kĩvathũkany'o, na alũngya maimũ maingĩ. Ndaaĩtĩkĩlya maimũ asu maneene ũndũ o na vanini, nũndũ nĩmamwĩsĩ nĩwe ũũ.

Yesũ Aitavany'a Kalilii

(Lk 4.42-44)

35Ũnĩ ũsu kũtanamba kũtheatheana, Yesũ nĩwaamũkie auma mũsyĩ ũsu athi vandũ vate andũ na avoyea vo. 36Simioni na ala angĩ maĩ nake nĩmaumaalũkile mathi kũmũmantha. 37Yĩla mamwonie nĩmamwĩie atĩĩ, “Andũ onthe nĩmeũkũmantha.”

38Nake Yesũ amasũngĩa amea atĩĩ, “Kwa tũendei ndũanĩ ila ingĩ syĩ mbee ngatavany'e kũu o nakw'o, nũndũ kĩu nĩkyo kĩtumĩte nũka kũũ.” 39#Mat 4.23; 9.35 Kwoou Yesũ nĩwathyũlũlũkile kĩla vandũ kũu Kalilii, akĩtavany'a nyũmbanĩ sya Ayuti sya kũthaithĩa na kũmbanĩa na kũlũngya maimũ.

Yesũ Aivosya Mũndũ Mũwau Mangũ

(Mat 8.1-4; Lk 5.12-16)

40Mũndũ ũmwe waĩ mũwau mangũ#1.40 mangũ: Ũũ nĩ ũwau mũthũku mũno. Mũndũ e naw'o, syaa sya moko na maũũ nitonya kũtilĩkanga na kuma, o na manyiũũ na ũĩmĩ kwanangwa na nzw'ĩĩ kũunyũkanga nĩwookie atulya ndu mbee wa Yesũ na amwĩsũva aimwĩa atĩĩ, “Ethĩwa nũkwenda, nũtonya kũmbosya ngathea.” 41Yesũ nĩwamwĩw'ĩie ĩnee yingĩ, na atambũũkya kw'oko amũkwata na amwĩa atĩĩ, “Ĩĩ, nĩngwenda, ĩthĩwa mũtheu.” 42Vau kwa vau nĩwavoie ũwau ũsu eethĩwa e mũtheu. 43Nĩvo ĩndĩ Yesũ wamwĩie nĩ athi, 44#Ali 14.1-32 amina kũmũkany'a kwa kũmwĩa atĩĩ, “Ĩthukĩĩsye, ndũkatavye mũndũ o na ũmwe ũndũ ũũ. Ĩndĩ enda ũkeyonany'e kwa mũthembi aĩkĩĩthye kana wĩ mũvou, na ũyumya nthembo kwĩanana na Mĩao ya Mwose, nĩ kana kĩla mũndũ amanye wĩ mũvou.”

45Ĩndĩ mũndũ ũsu nĩwaendie na ambĩĩa kũtavany'a ũvoo ũsu kĩla vandũ. Aũnyaĩĩkisye nginya weethĩa Yesũ ndathi kũu ndũanĩ enekee nĩ andũ. Ekalaa kũndũ kũtatwĩe andũ, ĩndĩ ũu wĩ o vo, andũ nĩmaendie vala ũĩ maumĩte kĩla vandũ.

Currently Selected:

Mk 1: KAMBA

Highlight

Copy