Mk 3

Yesũ Aivosya Mũndũ waĩ Mwonzu Kw'oko

(Mat 12.9-14; Lk 6.6-11)

1Ĩvinda yĩngĩ Yesũ nĩwaendie alika nyũmbanĩ ya Ayuti ya kũthaithĩa na kũmbanĩa, na vau vaĩ mũndũ waĩ na kw'oko kwonzu. 2Andũ amwe maĩ vau nĩmasyaĩĩsye Yesũ mũno mone kana nũkũvosya mũndũ ũsu mũthenyanĩ wa Savato nĩ kana mamũsikate. 3Yesũ nĩweeie mũndũ ũsu waĩ na kw'oko kwonzu atĩĩ, “Ũka vaa mbee.” 4Nĩwakũlilye andũ atĩĩ, “Kwĩanana na Mĩao, mũthenyanĩ wa Savato twĩtĩkĩlĩtw'e kwĩka ũndũ ũseo kana nĩ ũndũ ũthũku; nĩ kũtetheesya mũndũ ndakakw'e kana nĩ kũmũeka akw'e?” Ĩndĩ mayaasũngĩa ũndũ.

5Yesũ nĩwamasiangisye onthe e mũthatu, na e na woo nũndũ wa wũmũ wa ngoo syoo, na ĩndĩ amwĩa ũla mũndũ atĩĩ, “Tambũũkya kw'oko kwaku.” Nĩwakũtambũũkisye na kwavoa. 6Avalisi nĩmaumaalile na kwa mĩtũkĩ moombana na andũ ma nguthu ya Mũsumbĩ Elote, masame ũndũ matonya kũmũaa Yesũ.

Andũ Aingĩ Mayũka vala ve Yesũ e Ũtee wa Ĩia

7Yesũ nĩwaumie vau e na amanyĩw'a make mathi ũtee wa Ĩia ya Kalilii, na andũ aingĩ mamũatĩĩa. Andũ asu maumĩte Kalilii, Yutia, 8na Yelũsalemu, na angĩ kuma kĩsionĩ kya Ĩtumea na isionĩ ila syĩ mũinganĩsyo wa Ũsĩ wa Yolotani, na ala angĩ kuma ndũanĩ ya Tile na ya Sitoni. Andũ asu onthe mookie vala ve Yesũ nũndũ nĩmeew'ĩte syama ila weekaa. 9#Mk 4.1; Lk 5.1-3 Yesũ nĩweeie amanyĩw'a make nĩmamũthengeesye ĩsiwa alike, nĩ kana ndakavivinywe nĩ andũ nĩkwĩthĩwa maĩ aingĩ mũno. 10Aĩ anavosya andũ aingĩ, na onthe ala maĩ awau nĩmavivinyanĩaa vala ũĩ mayenda mamũkiite o vandũ. 11Andũ ala malikĩtwe nĩ maimũ namo mamwona Yesũ, nĩmavalũkangaa nthĩ mbee wake na kua mbu mayasya atĩĩ, “We wĩ Mwana wa Ngai.” 12Ĩndĩ Yesũ nĩwakanisye maimũ asu mũno maikatavye andũ we nĩwe ũũ.

Yesũ Ainyuva Atũmwa Ĩkũmi na Elĩ

(Mat 10.1-4; Lk 6.12-16)

13Yesũ nĩwambatie kĩĩmanĩ na eeta andũ ala wendaa. Nĩmaendie vala ũĩ, 14nake anyuva ĩkũmi na elĩ mamo#3.14 Maandĩko amwe ma tene ma Ndeto ya Ngai nĩmongelete ala wametie atũmwa mekalanasye nake na ĩtina e matũma makatavany'e, 15na mayĩthĩwa na ũkũmũ wa kũlũngya maimũ.

16Ala wanyuvie nĩmo aa: Simioni ũla Yesũ watw'ĩĩie ĩsyĩtwa yĩngĩ amwĩta Vetelo; 17Yakovo na Yoana mwana-a-inyia, ana ma Nzevetii, ala namo Yesũ wamatw'ĩĩie ĩsyĩtwa yĩngĩ ameta, “Mboanekisi,” ĩla ũalyũlo wayo nĩ, “Ana ma kĩtandalĩki;” 18Endelea na Vilivũ; Mbatholomiũ na Mathayo; Tomasi na Yakovo mwana wa Aveasi; Thateũsi na Simioni Mũkanaani,#3.18 Mũkanaani: Ũalyũlo wa ndeto ĩno nĩ Mũndũ ũla wendete nthĩ yake, na wateteaa na kwĩanĩsya mĩao ya Ayuti 19na Yutasi Ĩsikalioti ũla wesie kũmũthoosya Yesũ.

Yesũ Ayĩwa Anengetwe Vinya nĩ Mũnene wa Maimũ

(Mat 12.22-32; Lk 11.14-23; 12.10)

20Yesũ nĩwenũkie, na andũ aingĩ mũno moombanĩa ĩngĩ vala ũĩ kũvikĩa weethĩa we na amanyĩw'a make mayona mwanya o na wa kũya. 21Yĩla andũ ma mũsyĩ wa Yesũ meewie ũvoo ũsu, nĩmaendie kũmũlatya nũndũ andũ maasya kana e na ndũũka.

22 # Mat 9.34; 10.25 Amanyĩsya amwe ma Mĩao mookĩte kuma Yelũsalemu nĩmaisye atĩĩ, “Mũndũ ũũ alikĩtwe nĩ Mũnene wa maimũ ũla wĩtawa Mbeelisevuli, na elũngya maimũ na vinya wa mũnene ũsu.”

23Yesũ nĩwametie moke vala ũĩ, na aneena namo na ngelekany'o aimakũlya atĩĩ, “Satani atonya ata kwĩlũngya kuma mũndũnĩ? 24Ethĩwa ũsumbĩ nĩwĩyĩaanĩtye ikundi ikũkitana, ũsumbĩ ũsu ndũtonya kũũngama. 25Na ethĩwa mũsyĩ nĩwĩyĩaanĩtye ikundi ikũkitana, mũsyĩ ũsu ndũtonya kũũngama. 26O ta ũu, ethĩwa Satani nĩwambĩĩie kwĩyũkita mwene na nĩ mũaanĩku, ndatonya kũũngama, ĩndĩ nũkũthela.

27“Vai mũndũ ũtonya kũtũla nyũmba ya mũndũ wĩ vinya akakua mĩio yake. No nginya ambe kũmwova amũlumye ki, na ĩndĩ aikua mĩio ĩla yĩ nyũmbanĩ ĩsu.

28“Nĩmũtavya w'o, andũ makaekewa naĩ syoo syonthe, o na numano syoo syonthe ila mamũumaa Ngai; 29#Lk 12.10 ĩndĩ mũndũ ũla ũmũumaa Veva Mũtheu, ndakaekewa nũndũ ekĩte naĩ ĩtaekewa o na ĩndĩĩ.” 30Yesũ aneenie ũu nũndũ ve andũ maasya, “Alikĩtwe nĩ ĩimũ.”

Inyia na Ana-a-inyia ma Yesũ

(Mat 12.46-50; Lk 8.19-21)

31Inyia wa Yesũ na ana-a-inyia make nĩmookie, na maũngyĩ nza matũmana nthĩnĩ metĩwe Yesũ. 32Andũ ala mailyĩ nthĩ mamũthyũlũlũkĩte Yesũ mamwĩa atĩĩ, “Nũũtumũw'a vaya nza nĩ inyia waku na ana-a-inyia maku.”

33Nake Yesũ amakũlya atĩĩ, “Inyia wakwa nũũ na ana-a-ia makwa naaũ?” 34Nĩvo ĩndĩ asyaĩtye andũ ala mailyĩ nthĩ mamũthyũlũlũkĩte wameie atĩĩ, “Sisyai, aa me vaa nĩmo aa mwaitũ na ana-a-ia makwa. 35Mũndũ o na wĩva ũla wĩkaa kwenda kwa Ngai, nĩwe mwana-a-ia na mwĩĩtu-a-ia na mwaitũ.”

Currently Selected:

Mk 3: KAMBA

Highlight

Copy