Mk 4

Ngelekany'o ya Mũĩmi

(Mat 13.1-9; Lk 8.4-8)

1 # Lk 5.1-3 Yesũ nĩwambĩĩie kũmanyĩsya ĩngĩ e ũtee wa Ĩia ya Kalilii. Ĩkomano yĩla yamũthyũlũlũkĩte yaĩ ĩnene mũno na kwoou athi alika ĩsiwanĩ yaĩ vau ĩianĩ na ekala nthĩ vo, namo andũ onthe mekala ũtee wa ĩia. 2Nĩwamamanyĩisye maũndũ maingĩ aitũmĩa ngelekany'o. Momanyĩsyonĩ make nĩwameie atĩĩ, 3“Ĩthukĩĩsyei! Mũĩmi ũmwe nĩwaendie kũvuĩa mbeũ. 4Akĩvuĩa, mbeke imwe nĩsyavalũkile nzĩanĩ, na nyũnyi syooka na syaiya. 5Ingĩ nĩsyavalũkile mavianĩ, na o mĩtũkĩ nĩsyameie nũndũ iyavw'ĩkĩtwe nĩ mũthanga mwingĩ. 6Yĩla syũa yaaie, nĩsyavovie na syooma, nĩkwĩthĩwa mĩi yasyo ndyaĩ mĩliku. 7Mbeke ingĩ nĩsyavalũkile mĩw'anĩ na syamea, na yĩla mĩw'a yathongooie na yeana, yainyita. 8Ĩndĩ mbeke ingĩ nĩsyavalũkile mũthanganĩ mũseo na syamea, na syeana na syasyaa ũsyao mwingĩ: Imwe mbeke mĩongo ĩtatũ, ingĩ mĩongo thanthatũ, na ingĩ mbeke ĩana.”

9Yesũ aiminũkĩlya nĩwameie atĩĩ, “Ũla wĩ kũtũ, nĩew'e.”

Kĩtumi kya Yesũ Kũtũmĩa Ngelekany'o

(Mat 13.10-17; Lk 8.9-10)

10Yĩla Yesũ watiiwe e weka, andũ amwe ala mamwĩthukĩĩisye akĩmanyĩsya, nĩmookie vala ũĩ me na amanyĩw'a make ĩkũmi na elĩ, na mamũkũlya amaelesye ngelekany'o ĩsu ya mũĩmi. 11Yesũ nĩwamasũngĩie amea atĩĩ, “Inyw'ĩ nĩmũnengetwe kũmanya kĩmbithĩ kya ũsumbĩ wa Ngai, ĩndĩ andũ ala angĩ matavaw'a maũndũ onthe na ngelekany'o, 12#Ĩsa 6.9-10 nĩ kana o na matindĩa kũsisya, maikone; o na meethukĩĩsya ata maikaelewe, nũndũ makamanya nĩkwĩsa kũmwĩthyũũĩa Ngai nake aimaekea naĩ syoo.”

Yesũ Aielesya Amanyĩw'a Ngelekany'o ya Mũĩmi

(Mat 13.18-23; Lk 8.11-15)

13Yesũ nĩwakũlilye amanyĩw'a make atĩĩ, “Nũndũ inyw'ĩ mũte kũelewa nĩ ngelekany'o ĩno? Mũkatonya ata ĩndĩ kũelewa nĩ ngelekany'o o na yĩva? 14Mũndũ ũla wavuĩaa, avuĩie ndeto ya Ngai. 15Andũ amwe mailyĩ mbeke ila syavalũkile nzĩanĩ. Mamina kwĩw'a ndeto, Satani nĩwũkaa na kũmĩvulya. 16Namo andũ angĩ mailyĩ mbeke ila syavalũkile mavianĩ. Meew'a ndeto, nĩmamyosaa na mĩtũkĩ na ũtanu. 17Ĩndĩ ti ndiku mathayũnĩ moo na ndĩkala ĩvinda ĩasa. Kwoou yĩla thĩna kana ũnyamao wooka nũndũ wa ndeto ĩsu, o mĩtũkĩ nĩmekasya ngoo na kũmĩtia. 18Andũ angĩ namo mailyĩ ta mbeke ila syameie mĩw'anĩ. Asu nĩ ala mew'aa ndeto, 19ĩndĩ kwĩmakĩa kwoo na kwenda ũthwii na ĩtomo ya syĩndũ kũinyita ndeto ĩsu, na mailea kwĩthĩwa na ũsyao. 20Ĩndĩ andũ angĩ mailyĩ mbeke ila syavalũkile mũthanganĩ mũseo. Meew'a ndeto nĩmamyosaa na kwĩthĩwa na ũsyao: Amwe kũndũ mĩongo ĩtatũ, angĩ kũndũ mĩongo thanthatũ na angĩ kũndũ ĩana.”

Taa nĩ wa Kũtũmulĩkĩla

(Lk 8.16-18)

21 # Mat 5.15; Lk 11.33 Yesũ nĩwasyokie amakũlya atĩĩ, “Taa nũkwataw'a na ũikunĩkĩlw'a mbisũ, kana kwiwa ungu wa kĩtanda? Kwa w'o taa wilĩĩlawa vandũ vatũlu nĩ kana ũmulĩkĩle andũ. 22#Mat 10.26; Lk 12.2 Maũndũ onthe ala mavithe makaumĩlw'a ũtheinĩ, o na syĩmbithĩ syonthe ikaumbũanw'a. 23Ũla wĩ kũtũ, nĩew'e!”

24 # Mat 7.2; Lk 6.38 O ĩngĩ Yesũ nĩwameie atĩĩ, “Ĩthukĩĩasyei nesa maũndũ ala mũkwĩw'a: O ũndũ mwĩkaa andũ ala angĩ, now'o o nenyu mwĩĩkwa, ĩĩ o na mũno mbeange. 25#Mat 13.12; 25.29; Lk 19.26 Mũndũ ũla wĩ na kĩndũ, akongeleelwa; nake ũla ũte na kĩndũ, o na kala kanini wĩ nako akavenwa.”

Ngelekany'o ya Kwĩana kwa Mbeũ

26Yesũ nĩwaendeeie kũneena namo amea atĩĩ, “Ũsumbĩ wa Ngai no ũvw'ananw'e na mũndũ ũla ũvuĩaa mbeũ mũthanganĩ. 27Nũkomaa ũtukũ na mũthenya aiamũka na kũendeea na maũndũ make. Ĩvindanĩ yĩu mbeũ isu nimeaa na kwĩana ũndũ we ũtesĩ. 28Mũthanga nĩw'o ũtumaa mbeũ isu imea na kwĩana: Mbee syambaa kumĩlya matũ, kelĩ iyumĩlya iia, na mũthya ũsyao ũyusũa iianĩ. 29#Yoe 3.13 Ũsyao ũsu weew'a na kũma, mwene wa mũũnda nĩwosaa kavyũ nũndũ ĩvinda ya ngetha nĩ ĩviku.”

Ngelekany'o ya Mbeũ ĩla Niini vyũ

(Mat 13.31-32,34; Lk 13.18-19)

30Yesũ nĩwamakũlilye atĩĩ, “Tũtonya kũvw'anany'a ũsumbĩ wa Ngai na kyaũ? Nĩ ngelekany'o myaũ tũtũmĩa kũwũelesya? 31Ũsumbĩ wa Ngai no ũvw'ananw'e na mbeũ ĩla niini vyũ kwĩ ila ingĩ, ĩla mũndũ wosaa na kũmĩvanda mũũndanĩ. 32Nĩvo ĩndĩ ĩtina wa ĩvinda ĩnini, mbeũ ĩsu ĩmeaa na kwĩana ĩkatw'ĩka mũtĩ mũnene kwĩ mĩmea ĩla ĩngĩ yĩ mũũndanĩ. Mũtĩ ũsu nĩwumasya mbonge nene ũkethĩa o na nyũnyi nitonya kwaka ndala vo.”

33Yesũ nĩwatavisye andũ ndeto ya Ngai aitũmĩa ngelekany'o mbingĩ sya mũthemba ũsu. Amatavisye o kwĩanana na ũndũ maĩ matonya kũelewa. 34Vai ũndũ waamatavya ateũtũmĩa ngelekany'o, ĩndĩ atiwa na amanyĩw'a make nĩwamaeleasya ngelekany'o isu kwa ũliku.

Yesũ Aivindĩthya Kĩuutani

(Mat 8.23-27; Lk 8.22-25)

35Mũthenyanĩ o ũsu kũkilĩlye kũtuka, Yesũ nĩweeie amanyĩw'a make atĩĩ, “Tũendei mũingo ũya ũngĩ wa ĩia.” 36Kwoou amanyĩw'a make matia ĩkomano, mathi malika ĩsiwanĩ yĩla Yesũ waĩ, na mambĩĩa kyalo vamwe nake. Masiwa angĩ nĩmaendanisye na yĩu. 37Maendete kĩuutani kĩnene nĩkyookĩlanilye, na itulumo syakũna yĩla ĩsiwa, ikĩyĩlikya kĩw'ũ nginya yambĩĩa kusũa. 38Ĩvindanĩ yĩu Yesũ akomete mũtonĩ naku ĩsiwanĩ ĩtina, na kwoou amanyĩw'a make mamũamũkya na mamwĩa atĩĩ, “Mũmanyĩsya, no ũũmanya kana tũkilĩlye kũkw'a?”

39Yesũ nĩwookĩlile na eeyĩaĩa kĩuutani kĩu ayasya atĩĩ, “Kilya ki!” Nasyo itulumo asyĩa, “Usyai!” Kĩuutani nĩkyavindisye na kwausya. 40Nĩvo ĩndĩ Yesũ wamakũlilye atĩĩ, “Mũtelemetw'e ũu nĩ kyaũ? O nayu inyw'ĩ no mwĩ na mũĩkĩĩo?”

41Ĩndĩ amanyĩw'a maseng'a mũno na makũlany'a atĩĩ, “Mũndũ ũũ we nĩ wa mũthemba mwaũ, ũkwĩw'ĩka o na nĩ iuutani na itulumo?”

Currently Selected:

Mk 4: KAMBA

Highlight

Copy