Lk 17

Kũlika Naĩnĩ Nũndũ wa Matatwa

(Mat 18.6-7,21-22; Mk 9.42)

1Yesũ nĩwasyokie atavya amanyĩw'a make amea atĩĩ, “Matatwa mailea kũka mũndũnĩ, ĩndĩ kyeva nĩ kwa mũndũ ũla ũtumaa moka. 2Nĩ kavaa mũndũ ũsu akoveewa ĩvia ĩnene ngingo na kwĩkw'a ũkanganĩ, kwĩ kũtuma ũmwe wa aa anini eka naĩ! 3#Mat 18.15 Kwoou ĩsũvĩei mũno maũndũnĩ ala mũkwĩka!

“Ethĩwa mwana-a-au nĩwakũvĩtĩsya mũkany'e, na akwĩtya ũekeo mũekee. 4O na ethĩwa akũvĩtĩsya mavinda mũonza kwa mũthenya na kĩla ĩvinda ayũka aikw'ĩa, ‘Nĩngũvĩtĩsye, ndekee,’ no nginya ũmũekee.”

Ũtonyi wa Mũĩkĩĩo

5Atũmwa nĩmeeie Mwĩai atĩĩ, “Twongeleele mũĩkĩĩo!”

6Nake Mwĩai amea atĩĩ, “Kethĩwa mwĩ na mũĩkĩĩo wĩana o mbeke ĩla nini ya mũtĩ nĩkwĩa mũkũyũ ũũ, ‘Kũka vau ũkevande ũkanganĩ,’ na ũyĩka ũu mwasya.

Wĩa wa Mũthũkũmi

7“Nũũ katĩ wenyu mũthũkũmi wake ekũĩmaa kana ekũĩthasya malondu asyoka mũsyĩ aumĩte wĩanĩ ũmwĩa, ‘Ĩkalaate wĩkale nthĩ ũathĩw'e?’ 8Vandũ va ũu amwĩaa atĩĩ, ‘Enda ũnzeũvĩsye lĩu wa wĩoo, na ũyĩyova kĩkoi wũke ũnthũkũme nambe kũathĩw'a. We nũkwĩsa kũya ĩtina.’ 9Mũthũkũmi ũsu ndatũngĩawa mũvea nũndũ wa kwĩanĩsya ũndũ weewa eke. 10Kwoou o nenyu, yĩla mweanĩsya kĩla mwĩĩtwe mwĩke aasyai, ‘Ithyĩ twĩ o athũkũmi, na tweeka kũtethya o wĩa ũla witũ.’ ”

Yesũ Aivosya Aũme Ĩkũmi Mawaĩte Mangũ

11Yesũ o aendete Yelũsalemu, nĩwesĩlile mũvakanĩ wa Samalia na Kalilii. 12Aendete akalike ndũanĩ ĩmwe, nĩwakomanie na aũme ĩkũmi mawaĩte mangũ. Nĩmaũngamie vaasa, 13na meetana na wasya mũnene mayasya atĩĩ, “Yesũ! Mũmanyĩsya, twĩw'ĩe tei!”

14 # Ali 14.1-32 Yĩla Yesũ wamonie nĩwameie atĩĩ, “Endai mũkeyonany'e kwa athembi maĩkĩĩthye kana mwĩ avou.” Me nzĩanĩ maendete nĩmavoiw'e.

15Yĩla ũmwe woo woonie kana nĩwavow'a, nĩwasyokie aimũkatha Ngai na wasya mũnene. 16Nĩwakomie nthĩ na ĩvu vakuvĩ na Yesũ na amũtũngĩa mũvea; mũndũ ũsu aĩ Mũsamalia. 17Yesũ nĩwakũlilye atĩĩ, “Andũ ala mavow'a ti ĩkũmi? Ala angĩ kenda maĩva? 18Mbona mũeni ũũ e weka nowe wasyoka amũtũngĩe Ngai mũvea?” 19Yesũ amwĩa atĩĩ, “Ũkĩla ũthi, nĩwavow'a nũndũ wa mũĩkĩĩo waku.”

Kũka kwa Ũsumbĩ wa Ngai

(Mat 24.23-28,37-41)

20Avalisi amwe nĩmamũkũlilye Yesũ yĩla ũsumbĩ wa Ngai ũkoka. Nake amasũngĩa amea atĩĩ, “Ũsumbĩ wa Ngai ti kĩndũ kya kwoneka kyũkĩte. 21Vai mũndũ ũkethĩwa atonya kwasya, ‘Kwa sisyai nĩ ũũ vaa,’ kana, ‘Nĩ ũya vaya,’ nũndũ ũsumbĩ wa Ngai wĩ katĩ wenyu.”#17.21 wĩ katĩ wenyu: kana wĩ nthĩnĩ wenyu

22Nĩvo ĩndĩ weeie amanyĩw'a make atĩĩ, “Ĩvinda nĩyũkĩte yĩla mũkenda kwona ũmwe wa mĩthenya ya Mwana wa Mũndũ, ĩndĩ mũikawona. 23Ve andũ makokĩla mamwĩe, ‘Sisyai e vaya,’ kana ‘Sisyai e vaa!’ Mũikaamaatĩĩe. 24Mwana wa Mũndũ akaumĩla ta ũtisi, ũla ũtisaa ũkathesya ĩtu yonthe. 25Ĩndĩ mbee wa ũu, akamba kũthĩnw'a mũno na kũlewa nĩ andũ ma ĩvinda yĩĩ. 26#Mwa 6.5-8 O ũndũ kwailyĩ ĩvindanĩ ya Noa, now'o kwĩĩthĩwa kũilyĩ ĩvindanĩ ya Mwana wa Mũndũ. 27#Mwa 7.6-24 Ĩvindanĩ yĩu, andũ nĩmaĩsaa na kũnyw'a, na nĩmatwaanaa na kũtwawa, kũvika mũthenya ũla Noa walikile ngalawanĩ, na kwooka kĩla kĩw'ũ kingĩ kyamoaa. 28#Mwa 18.20—19.25 Yĩkeethĩwa yĩilyĩ ũndũ kwailyĩ ĩvindanĩ ya Loto. Andũ nĩmaĩsaa na kũnyw'a, na nĩmathooaa syĩndũ na kũthoosya, na nĩmavandaa na kwaka myako. 29Ĩndĩ mũthenya ũla Loto waumie Sondomu, mwaki wa lavuti nĩwatheeie kuma ĩtunĩ wamavĩvya andũ onthe makw'a. 30Ũu now'o kwĩĩthĩwa kũilyĩ mũthenya ũla Mwana wa Mũndũ wĩumĩla.

31 # Mat 24.17-18; Mk 13.15-16 “Mũthenyanĩ ũsu, mũndũ ũla ũkethĩwa nyũmbanĩ yake ĩũlũ, ndakaatinde aitheea ose mĩio kuma nyũmbanĩ yake, na o ta ũu, ũla ũkethĩwa mũũndanĩ ndakaatinde aisyoka mũsyĩ. 32#Mwa 19.26 Lilikanai kĩla kyeekĩkie kwa mũka wa Loto! 33#Mat 10.39; 16.25; Mk 8.35; Lk 9.24; Yoa 12.25 Mũndũ ũla wendaa kũsũvĩa thayũ wake akawasya; ĩndĩ ũla waasya thayũ wake akawona ĩngĩ. 34Ekai nĩmũtavye, ũtukũ ũsu andũ elĩ nĩmakethĩwa makomete kĩtandanĩ kĩmwe; ũmwe nũkoswa, na ũla ũngĩ aitiwa. 35Aka elĩ nĩmakethĩwa maithiĩa ĩvianĩ yĩmwe; ũmwe nũkoswa na ũla ũngĩ aitiwa.”

[ 36O ta ũu, aũme elĩ makeethĩwa mũũndanĩ; ũmwe nũkoswa na ũla ũngĩ aitiwa.]#17.36 Maandĩko amwe ma tene ma Ndeto ya Ngai nĩmatiĩte mũsoa ũũ

37Amanyĩw'a ma Yesũ nĩmamũkũlilye atĩĩ, “Mwĩai ũndũ ũũ ũkeethĩwa va?”

Nake Yesũ amasũngĩa, “Vandũ vala ve kimba nĩvo ndei syũmbanĩlĩĩlaa.”

Currently Selected:

Lk 17: KAMBA

Highlight

Copy