Lk 18
18
Ngelekany'o ya Kĩveti Ndiwa na Mũsili wa Makoani
1Nĩvo ĩndĩ Yesũ watavisye amanyĩw'a make ngelekany'o ayenda kũmamanyĩsya kana nĩmaĩlĩte kũvoyaa kĩla ĩvinda mate kũkw'a ngoo. 2Nĩwameie atĩĩ, “Ndũanĩ ĩmwe vaĩ mũsili wa makoani wekalaa vo, ũtamũkĩaa Ngai kana akanenga mũndũ o na wĩva ndaĩa. 3O ta ũu, ndũanĩ ĩsu vaĩ kĩveti ndiwa kyatindĩaa kũthi kwa mũsili ũsu wa makoani, na kũmwĩsũva akĩtetee kĩikavalũkw'e nĩ ũla masikatanĩte. 4Mũsili ũsu nĩwatatie kũlea vandũ va ĩvinda ĩasa, ĩndĩ mũthya esa kũsũanĩa e weka asya, ‘O na kau ndimũkĩaa Ngai kana kũnenga mũndũ o na wĩva ndaĩa, 5ĩndĩ nũndũ nĩtindĩa kũthĩnw'a nĩ kĩveti kĩĩ, nĩngũkĩtetea, nũndũ nalea, kĩendeea kũkaa na kũndya mũtwe!’ ”
6Nĩvo ĩndĩ Mwĩai wameie atĩĩ, “Kwa ĩw'ai ũndũ mũndũ ũsu ũte mũlũngalu waneena. 7Nĩkũlya, o nake Ngai ndakatetea andũ make ala mamũĩĩaa ũtukũ na mũthenya? Akatindanga ateũmethukĩĩsya? 8Ekai nĩmũtavye, akamatetea mĩtũkĩ mũno. Ĩndĩ ũu wĩ o vo, nĩkũlya, Mwana wa Mũndũ akeethĩa mũndũ wĩ na mũĩkĩĩo yĩla wĩũka kũũ nthĩ?”
Ngelekany'o ya Mũvalisi na Mumĩthya wa Koti
9Yesũ nĩwasyokie atavya andũ ala monaa me alũngalu kwĩ andũ ala angĩ ngelekany'o ĩno: 10“Andũ elĩ nĩmaendie Ĩkalũnĩ kũvoya; ũmwe aĩ Mũvalisi na ũla ũngĩ aĩ mumĩthya wa koti.
11“Mũvalisi nĩwaũngamie vandũ vake e weka na avoya ayasya, ‘Ngai, nĩngũũtũngĩa mũvea nĩkwĩthĩwa nyie ndi mũvenani, ndi mũkengani, na ndi kĩlaalai ta andũ ala angĩ, o na ndiilyĩ ta mumĩthya ũũ wa koti. 12Nĩndĩĩaa kũya kelĩ kwa kyumwa, na nĩnumasya kĩlungu kya ĩkũmi kya syĩndũ syonthe ila ngwataa.’
13“Mumĩthya wa koti nake nĩwaũngamie kũasa, na o na ndaang'elela ĩtunĩ, ĩndĩ eekwata kĩthũi na asya, ‘Ame Ngai, mbĩw'ĩe tei, nyie nĩ mũvĩtany'a!’ 14#Mat 23.12; Lk 14.11 Ekai nĩmũtavye, mumĩthya ũsu wa koti nĩwe wenũkie atalĩlwe kwĩthĩwa mũlũngalu, na ti Mũvalisi ũsu, nũndũ mũndũ ũla wĩnenevasya akanyivw'a, nake ũla wĩnyivasya akanenevw'a.”
Yesũ Aiathima Syana Nini
(Mat 19.13-15; Mk 10.13-16)
15Andũ amwe nĩmaeteie Yesũ syana nini aiathime kwa kũsilĩĩla moko, ĩndĩ yĩla amanyĩw'a mamonie mamasiĩĩa kwĩka ũu. 16Ĩndĩ Yesũ asyĩta ithi vala ũĩ ayasya atĩĩ, “Ekanai na syana nini syũke vala nĩĩ, mũikaisiĩĩe, nũndũ Ũsumbĩ wa Ngai nĩ wa ala mailyĩ tasyo. 17Nĩmũtavya w'o, mũndũ o na wĩva ũla ũtosaa ũsumbĩ wa Ngai o tondũ kana kanini katonya kũwosa, ndakalika vo.”
Mũndũ Mũthwii Ayenda Thayũ Ũtathela
(Mat 19.16-30; Mk 10.17-31)
18Mũtongoi ũmwe wa Ayuti nĩwamũkũlilye Yesũ atĩĩ, “Mũmanyĩsya mũseo, naĩlĩte kwĩka ata nĩ kana nĩkwate thayũ ũtathela?”
19Yesũ amwĩa atĩĩ, “Wĩmbĩta mũseo nĩkĩ? Vai mũndũ mũseo; no Ngai mũseo e weka. 20#Kuma 20.12-16; Kũt 5.16-20 We nĩwĩsĩ ũndũ mĩao ĩkwasya: ‘Ndũkalaalae; ndũkoae mũndũ; ndũkoye; ndũkanengane ũkũsĩ wa ũvũngũ ĩũlũ wa mũndũ ũngĩ; nenga ĩthe waku na inyia waku ndaĩa.’ ”
21Mũndũ ũsu amwĩa atĩĩ, “Nyie nambĩĩie kũkwata mĩao ĩsu yonthe kuma nĩ mũnini.”
22Yesũ eew'a ũu amwĩa atĩĩ, “Ve ũndũ ũmwe ũtialĩtye naw'o nĩ ũũ: Enda ũkathoosye syĩndũ syaku syonthe, na ũinenga ngya mbesa ila ũũkwata, naku ũkeethĩwa na ũthwii ĩtunĩ na ĩndĩ ũyũka ũngaatĩĩe.” 23Mũndũ ũsu eew'a ndeto isu, nĩweewie woo mwingĩ nũndũ aĩ mũthwii mũno.
24Yesũ nĩwasyaisye mũndũ ũsu na asya atĩĩ, “Ũkeethĩwa wĩ ũndũ wĩ vinya kwa andũ athwii kũlika ũsumbĩnĩ wa Ngai! 25Ĩĩ, ũkeethĩwa wĩ laisi kwa ngamĩle kũlikĩla kalimanĩ ka singano, kũte mũndũ mũthwii kũlika ũsumbĩnĩ wa Ngai.”
26Andũ ala meewie ũu nĩmakũlilye atĩĩ, “Na yu nũũ ũla ũtonya kũkwata thayũ ũtathela?”
27Ĩndĩ Yesũ amea atĩĩ, “Kĩla kĩtatonyeka kwa andũ, nĩkĩtonyeka kwa Ngai.”
28Vetelo amwĩa atĩĩ, “Ithyĩ nĩtũtiĩte mĩsyĩ yaitũ tũkakũatĩĩa.”
29Yesũ amea atĩĩ, “Nĩmũtavya w'o, mũndũ o na wĩva ũla ũtiĩte mũsyĩ, kana mũka, kana ana-a-inyia, kana asyai, kana syana kwondũ wa ũsumbĩ wa Ngai, 30akakwata syĩndũ mbingĩ mũno ĩvindanĩ yĩĩ, na aikwata thayũ ũtathela ĩvindanĩ yĩla yũkĩte.”
Yesũ Aineena Ĩvinda ya Katatũ ĩũlũ wa Kũkw'a na Kũthayũũka Kwake
(Mat 20.17-19; Mk 10.32-34)
31Yesũ nĩweetie ala amanyĩw'a ĩkũmi na elĩ mathi nzama ũtee na amea atĩĩ, “Ĩthukĩĩsyei, yu tũendete Yelũsalemu, na maũndũ onthe ala maandĩkĩtwe nĩ athani ĩũlũ wa Mwana wa Mũndũ nĩmeũthi kwĩanĩw'a kũu. 32Nũkũthi kũnenganwe kwa Andũ-ma-mbaĩ-ingĩ, namo makamũthekeea na kũmũumanga o vamwe na kũmũtw'ĩlanga mata. 33O ta ũu makamũvũa na kũmũaa, ĩndĩ akathayũũka kuma kwa akw'ũ ĩtina wa mĩthenya ĩtatũ.” 34Kĩla Yesũ wawetaa kyaĩ kĩvithany'e kwoo, na kwoou mayaamanya aneenaa ĩũlũ wa kyaũ.
Yesũ Aivosya Kĩlalinda
(Mat 20.29-34; Mk 10.46-52)
35Yesũ e vakuvĩ kũvika Yeliko, nĩweethĩie mũndũ ũmwe kĩlalinda ailyĩ nthĩ ũtee wa nzĩa akĩvoya andũ syĩndũ. 36Yĩla weewie andũ aingĩ mavĩtĩte, nĩwakũlilye nĩ kyaũ kĩla kĩendee.
37Andũ nĩmamũsũngĩie mamwĩa atĩĩ, “Nĩ Yesũ kuma Nasaleti ũvĩtĩte.”
38Mũndũ ũsu nĩweetanie mũno ayasya atĩĩ, “Yesũ mwana wa Ndeviti, mbĩw'ĩe tei!”
39Andũ ala maĩ mbee nĩmamũkanisye avindye, ĩndĩ eetana na wasya mũnene mbeange, “Mwana wa Ndeviti, mbĩw'ĩe tei!”
40Yesũ nĩwaũngamie na asya mũndũ ũsu nĩaetwe vala ũĩ. Athengeea vakuvĩ, Yesũ nĩwamũkũlilye atĩĩ, 41“Wĩenda ngwĩke ata?”
Nake amwĩa atĩĩ, “Mwĩai, nĩenda ũndonyethye kwona nthĩ.”
42Yesũ amwĩa atĩĩ, “Ambĩĩa kwona; nĩwavow'a nũndũ wa mũĩkĩĩo waku.”
43Vau kwa vau nĩwambĩĩie kwona nthĩ, na auma Yesũ ĩtina aimũkumya Ngai. Yĩla andũ onthe moonie ũu, o namo nĩmamũkathie Ngai.
Currently Selected:
Lk 18: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
