Lk 16

Mũũngamĩi wa Syĩndũ Watũmĩie Mawũĩ

1Yesũ nĩwatavisye amanyĩw'a make amea atĩĩ, “Kwaĩ mũndũ ũmwe mũthwii waĩ na mũthũkũmi wa kũũngamĩa syĩndũ syake. Mũthwii ũsu nĩwataviw'e kana mũũngamĩi wa syĩndũ syake aendee na kũsyananga. 2Nĩwamwĩtie mũũngamĩi ũsu amũkũlya atĩĩ, ‘Nĩ maũndũ maũ aa ngwĩw'a ĩũlũ waku? Enda ũndetee ũtalo wa syĩndũ syakwa, nũndũ kuma yu ndũtonya kũendeea kwĩthĩwa mũũngamĩi wa syĩndũ syakwa.’ 3Mũthũkũmi ũsu nĩwambĩĩie kwĩkũlya, ‘Nĩĩka ata na mũnene wakwa nũkũmbumya wĩanĩ? Ndi na vinya wa kũsimba, na nditonya kũthi ngĩvoya andũ syĩndũ. 4Aa, nĩnamanya ũndũ ngwĩka nĩ kana navutwa vaa andũ methĩawe matonya kũnthokya kwoo.’

5“Nĩvo ĩndĩ woombanisye andũ onthe ala maĩ na thiĩ na mũnene wake. Nĩweetie wa mbee amũkũlya atĩĩ, ‘We ũtaĩtwe kyaũ nĩ mũnene wakwa?’ 6Nake amwĩa, ‘Mĩtũngi ĩana ya mauta.’ Mũũngamĩi amwĩa, ‘Osa valũa wa thiĩ waku, na ũyĩkala nthĩ mĩtũkĩ ũandĩke mĩtũngi mĩongo ĩtano.’ 7Nĩwasyokie akũlya ũngĩ, ‘Naku ũtaĩtwe kyaũ?’ Ũsu amũsũngĩa amwĩa, ‘Makunia ĩana ma nganũ.’ Nake amwĩa, ‘Osa valũa wa thiĩ waku, ũandĩke makunia mĩongo nyanya.’ ”

8“Mũnene wa mũthũkũmi ũsu ũtaĩkĩĩwa nĩwamũkathie mũno kwondũ wa kũtũmĩa mawũĩ, nũndũ andũ ma nthĩ ĩno matũmĩaa mawũĩ maingĩ yĩla mekwĩka maũndũ moo kũte andũ ma kyeni.”

9Yesũ nĩwaendeeie na kũmea atĩĩ, “Kwoou ekai nĩmũtavye, tumai ndũũ na andũ kwa kũtũmĩa ũthwii wa nthĩ ĩno, nĩ kana yĩla wĩthela mwĩthokw'a mũsyĩnĩ wa tene na tene. 10Mũndũ ũla ũĩkĩĩkaa maũndũnĩ manini nĩ ũĩkĩĩkaa maũndũnĩ manene o namo; ĩndĩ ũla ũtaĩkĩĩka maũndũnĩ manini, o na maũndũnĩ manene ndaĩkĩĩka. 11Ethĩwa ĩndĩ mũtwĩe mũtaĩkĩĩka na ũthwii wa kũũ nthĩ, nũũ ũla wĩmũĩkĩĩa maũndũnĩ ma ũthwii ũla wa w'o? 12Na ethĩwa mwĩthĩĩtwe mũtaĩkĩĩka syĩndũnĩ syeene, nũũ ũla wĩmũnenga syenyu?

13 # Mat 6.24 “Vai mũndũ ũtonya kwĩthĩwa e mũthũkũmi wa anene elĩ, nũndũ akamwenda ũmwe na aimena ũla ũngĩ, kana amwĩw'e ũmwe na aivũthya ũla ũngĩ. Kwoou mũitonya kũthũkũma Ngai mũkwatanĩsye na ũthwii.”

Momanyĩsyo Angĩ ma Yesũ

(Mat 11.12-13; 5.31-32; Mk 10.11-12)

14Yĩla Avalisi meewie maũndũ asu, nĩmamũvũthisye Yesũ, nũndũ mo mendete mbesa mũno. 15Ĩndĩ Yesũ amea atĩĩ, “Ninyw'ĩ andũ ala meseũvasya methonĩ ma andũ, ĩndĩ Ngai nĩwĩsĩ kĩla kĩ ngoonĩ syenyu, nũndũ syĩndũ ila andũ monaa syĩ nzeo mũno, kwa Ngai nĩsyo sya mana vyũ.

16 # Mat 11.12-13 “Mĩao ya Mwose na mawathani nĩsyathelile na ĩvinda ya Yoana Mũvatisi. Kuma ĩvinda yĩu Ũvoo Mũseo ĩũlũ wa ũsumbĩ wa Ngai wĩthĩawa ũitavanw'a, na kĩla mũndũ nĩwĩvinyĩlĩĩlasya alike. 17#Mat 5.18 Ĩndĩ nĩ laisangi kwa ĩtu na nthĩ kũthela, kũte kũvetwa kwa kateto o na kamwe ka Mĩao.

18 # Mat 5.32; 1Ako 7.10-11 “Mũndũ o na wĩva amũlea mũka na kũtwaa mũndũ mũka ũngĩ, ethĩawa akĩlaalaa. O ta ũu mũndũ atwaa mũndũ mũka mũlee nĩ mũũme ethĩawa akĩlaalaa.

Lasalo na Mũndũ Mũthwii

19“Kwaĩ mũndũ ũmwe mũthwii, weekĩaa ngũa sya thooa mũnene mũno na weethĩawa na motanu maingĩ kĩla mũthenya. 20Mũvĩanĩ kwake nĩvakomaw'a mũndũ ngya, weetawa Lasalo, waĩ na itau mwĩĩ w'onthe, 21na wendaa anengawe lĩu ũla wavalũkanga kuma mesanĩ ya mũthwii ũsu. O na ngitĩ nĩsyookaa na kũnyenyanga itau syake.

22“Mũndũ ũsu ngya nĩwesie kũkw'a na ooswa nĩ alaĩka atwawa ekalw'a vakuvĩ na Avalaamu ĩtunĩ. Ũla mũndũ mũthwii o nake nĩwakwie na athikwa. 23E vala maveva ma ala akw'ũ mekalaa, aendee na kũthĩna mũno, nĩwookĩlilye metho oona Avalaamu e naku kũndũ kũasa na Lasalo ailyĩ vakuvĩ nake. 24Nĩweetanie mũno: ‘Nau Avalaamu! Mbĩw'ĩe tei, na ũitũma Lasalo ainde kyaa kĩw'ũnĩ na ayũka anthithye ũĩmĩ, nũndũ nĩngũthĩnĩa mũno vaa mwakinĩ ũũ.’

25“Ĩndĩ Avalaamu amwĩa atĩĩ, ‘Mwana, lilikana kana we yĩla waĩ thayũ nĩwakwatie syĩndũ ila nzeo, nake Lasalo akwata syĩndũ ila nthũku, ĩndĩ yu Lasalo etanĩa kũũ naku ũendee na kũthĩna. 26Ũu wĩ o vo, ve ĩtw'ĩku ĩnene mũno katĩ waitũ nenyu, ũkethĩa andũ ala me kũũ maitonya kũinga makoka kũu, na ala me kũu mayĩinga makoka kũũ.’ 27Mũndũ ũsu amwĩa atĩĩ, ‘Nĩngũkwĩsũva ĩndĩ nau Avalaamu ũtũme Lasalo athi nyũmbanĩ ya nau, 28akakany'e ana-a-ia makwa me atano, nĩ kana o namo maikaaũke kũndũ kũũ kũthĩnĩaa andũ ũu.’

29“Ĩndĩ Avalaamu amwĩa atĩĩ, ‘Ana-a-au me na Maandĩko ma Mwose na ma athani; methukĩĩsye asu.’ 30Mũndũ ũsu amwĩa, ‘Aiee, nau Avalaamu! Mũndũ akathayũũka kuma kwa akw'ũ na aithi kũu maĩ, no melile kwondũ wa naĩ syoo.’ 31Ĩndĩ Avalaamu amwĩa, ‘Makalea kwĩthukĩĩsya Maandĩko ma Mwose na ma athani, mayĩtĩkĩla o na mũndũ akathayũũka kuma kwa akw'ũ.’ ”

Currently Selected:

Lk 16: KAMBA

Highlight

Copy