Lk 15

Ngelekany'o ya Ĩlondu yau

(Mat 18.12-14)

1 # Lk 5.29-30 Ĩvinda yĩmwe aumĩthya aingĩ ma koti na andũ angĩ avĩtany'a nĩmookie kũmwĩthukĩĩsya Yesũ. 2Avalisi na amanyĩsya ma Mĩao nĩmambĩĩie kũnyungunyĩsya mayasya atĩĩ, “Mũndũ ũũ athokasya avĩtany'a o na kũĩsanĩa namo!” 3Kwoou Yesũ amatavya ngelekany'o ĩno:

4“Kwa sũanĩai, ũmwe wenyu e na malondu ĩana, na yĩmwe yĩyaa, ekaa ata? Nũtiaa ala mĩongo kenda na kenda o maendee kũya, na aithi kũmantha yĩu yau nginya ayone. 5Ayona, nũyilĩĩlaa kĩtuo akayĩkua e na ũtanu. 6Amina kũvika mũsyĩ, nĩwũmbanasya anyanyae na atũi akamea atĩĩ, ‘Tanai vamwe nakwa nũndũ nĩnonie ĩlondu yakwa yĩla yĩĩ yau.’ 7O ta ũu ekai nĩmũtavye, kũkeethĩwa ũtanu mwingangĩ kũya ĩtunĩ, ĩũlũ wa mũvĩtany'a ũmwe eelila kwondũ wa naĩ syake, kũte ĩũlũ wa andũ mĩongo kenda na kenda aĩlu matena vata wa kwĩlila kwondũ wa naĩ syoo.

Ngelekany'o ya Silingi Mbau

8“O na sũanĩai, mũndũ mũka e na silingi ĩkũmi na ayasya ĩmwe, ekaa ata? Nũkwatasya taa na aituta nyũmba amanthĩte silingi ĩsu nginya amyone. 9Amina kũmyona, nĩwũmbanasya anyanyae make na atũi akamea atĩĩ, ‘Tanai vamwe nakwa nũndũ nĩnonie silingi yakwa ĩla yĩĩ mbau!’ 10O ta ũu ekai nĩmũtavye, alaĩka ma Ngai nĩmatanaa nũndũ wa mũvĩtany'a ũmwe eelila kwondũ wa naĩ syake.”

Ngelekany'o ya Mwana Mwau

11Yesũ nĩwaendeeie na kũtavya andũ amea atĩĩ, “Kwaĩ mũndũ ũmwe waĩ na ana elĩ. 12Ĩlumaita nĩyeeie ĩthe atĩĩ, ‘Nau, nenge ũtiĩwa ũla wakwa.’ Kwoou amaaany'a ũthwii wake. 13Ĩtina wa matukũ mavũthũ, ĩlumaita yĩu nĩyathooisye syĩndũ syayo syonthe, na yauma mũsyĩ yathi nthĩ ĩngĩ yĩ kũasa. Nĩyaanangĩe mbesa syayo mĩkalonĩ ĩte myaĩlu. 14Yamina kũtũmĩa mbesa syayo syonthe, nthĩ ĩsu nĩyeethĩiwe na yũa ĩnene, na ĩlumaita yĩu yambĩĩa kũthĩna. 15Nĩvo ĩndĩ yaendie kũthũkũma kwa mũndũ ũmwe wa nthĩ ĩsu, nake ayĩtwaa kyengonĩ yĩkaĩthasye ngũlũe syake. 16Nĩyendaa mũno kũya lĩu ũla ngũlũe syaĩsaa, ĩndĩ vai mũndũ waayĩnenga kĩndũ. 17Mũthya nĩyesie kũsũanĩa yasya, ‘Mbona ĩthe wakwa e athũkũmi aingĩ na onthe nĩmaĩsaa lĩu na makatialya, nakwa ninyie ũũ ngũkw'ĩĩa kũũ nĩ nzaa! 18Nĩngũkĩla nĩsyoke kwa ĩthe wakwa na ngĩmwĩa: Nau, nyie nĩnĩvĩtĩtye kwa Ngai na ngaũvĩtĩsya. 19O na ndyaĩlĩtwe nĩ kwĩtwa mwana waku ĩngĩ; mbose o ta ũmwe wa athũkũmi maku.’ 20Kwoou nĩyookĩlile na yambĩĩa kyalo kya kũsyoka kwa ĩthe.

“Yĩtanamba kũvika mũsyĩ yĩ o kũasa, ĩthe wayo nĩwayonie, na ausũĩtwe nĩ tei asemba athi ayĩkumbatĩlya na ayĩkethya na ngethi ya wendo. 21Ĩlumaita yĩu nĩyamwĩie ĩthe atĩĩ, ‘Nyie nĩnĩvĩtĩtye kwa Ngai na ngaũvĩtĩsya; ndyaĩlĩtwe nĩ kwĩtwa mwana waku ĩngĩ!’#15.21 Maandĩko amwe ma tene ma Ndeto ya Ngai nĩmongelete Mbose o ta ũmwe wa athũkũmi maku 22Ĩndĩ ĩthe eeta athũkũmi make amea atĩĩ, ‘Sembai mũete ngũa ĩla nzeo vyũ mũmwĩkĩe. O ta ũu mwĩkĩei mbete kyaa, na mũimwĩkĩa iatũ. 23Mwamina ũu, endai mwose kasalũ kala kanou mũae, na mũiseũvya mboka tũtane. 24Nĩkwĩthĩwa mwana ũũ wakwa anaĩ mũkw'ũ na nĩwasyũka, anaĩ mwau ĩndĩ nĩwooneka.’ Na kwoou mboka yambĩĩa.

25“Ĩvindanĩ yĩu mwana ũla mũkũũ aĩ naku mũũndanĩ. Asyokete e vakuvĩ na mũsyĩ, nĩweewie andũ mayina na kũsũnga. 26Nĩvo ĩndĩ weetie mũthũkũmi ũmwe amũkũlya atĩĩ, ‘Nĩ kyaũ kĩendee kũu mũsyĩ?’ 27Nake amũsũngĩa, ‘Mũinau nĩwũkie, na ĩthe waku amũaĩa kala kasalũ kanou, nũndũ nĩwamwona e mũima.’

28“Mwana ũsu mũkũũ nĩwathatie mũno na alea kũlika mũsyĩ. Ĩthe wake nĩwookie amwĩsũva mathi mũsyĩ. 29Ĩndĩ amũsũngĩa amwĩa atĩĩ, ‘Kwa sisya, myaka ĩno yonthe ndwĩe ngũthũkũmaa ta nĩ ngombo, na vai ũndũ o na ũmwe waku naalea kwĩka, ĩndĩ ndwaambũaĩa o na katena ka mbũi, ngatana vamwe na anyanyawa! 30Ĩndĩ yĩla mwana ũũ waku wũkie, ũla waanangie mbesa syaku na malwaya, we ũmũaĩie kasalũ kala kanou!’ 31Nĩvo ĩndĩ nake ĩthe wamũsũngĩie amwĩa atĩĩ, ‘Mwana wakwa wĩthĩawa nakwa kĩla ĩvinda, na syĩndũ ii nĩ nasyo syonthe no syaku. 32Ĩndĩ tũyĩĩ tũlea kũtana nũndũ mũinau anaĩ mũkw'ũ na nĩwasyũka, anaĩ mwau na nĩwooneka.’ ”

Currently Selected:

Lk 15: KAMBA

Highlight

Copy