Meko 2

Amanyĩw'a Maitheewa nĩ Veva Mũtheu

1 # Ali 23.15-21; Kũt 16.9-11 Yĩla mũthenya wa Vendekosito#2.1 Vendekosito: Nĩ mũthenya ũla Ayuti meethĩawa na mboka ya kũtanĩa ngetha ya nganũ. Weethĩawa mũthenya wa mĩongo ĩtano ĩtina wa Ayuti kũtanĩa Mboka ya Vasaka wavikie, aĩkĩĩi onthe nĩmoombanĩie vandũ vamwe. 2Kwa kĩthũlũmũko, andũ nĩmeewie kĩuumo kyumĩte matunĩ, kĩuumo ta kya kĩseve kĩnene kĩuutanĩte. Kĩuumo kĩu nĩkyausũie nyũmba vala andũ asu mailyĩ. 3Nĩvo ĩndĩ maumĩlĩĩilwe nĩ syĩndũ ivw'ana mũĩ sya mwaki, syeeyĩaany'a na syavũĩla ĩũlũ wa kĩla ũmwe woo. 4Onthe nĩmausũiwe nĩ Veva Mũtheu, na mambĩĩa kũneena na ithyomo syĩ kĩvathũkany'o, o kwĩanana na ũndũ Veva wamatonyethisye kũneena.

5Kũu Yelũsalemu kwaĩ Ayuti, andũ maĩ na kĩkĩo kya Ngai maumĩte kĩla vandũ ĩũlũ wa nthĩ. 6Yĩla andũ asu meewie kĩlonzo kĩu, nĩmookie kwa wingĩ moombanĩa vau, na maseng'a mũno nũndũ kĩla ũmwe woo eew'aa aĩkĩĩi asu maineena kĩthyomo kĩla kyake. 7Maseng'ete na kũsaanĩw'a nĩmakũlanilye atĩĩ, “Mo andũ aa onthe meũneena mayumĩte Kalilii? 8Mbona ĩndĩ kĩla ũmwe waitũ eĩw'a maineena kĩthyomo kya kũla wumĩte? 9Katĩ waitũ ve Avathiani, Ametia na Aelamu; ala angĩ maumĩte Mesovotamia, Yutia, Kavandosia, Vondo, Asia, 10Vilikia, Vambilia, Misili, na isionĩ sya Limbya ila syĩ vakuvĩ na Kũlene. O na angĩ nĩ aeni kuma Loma, 11Ayuti o vamwe na Andũ-ma-mbaĩ-ingĩ ala malikĩte ũthaithinĩ wa Kĩyuti, na o ta ũu ve Akilete na Aalavu. Ĩndĩ ithyonthe twĩĩw'a maineena na ithyomo sitũ maũndũ manene ala Ngai wĩkĩte!” 12Onthe maseng'ete na kũsaanĩw'a nĩmaendeeie na kũkũlany'a, “Ũndũ ũũ wĩonany'a ata?”

13Ĩndĩ amwe moo nĩmavũthĩĩisye na masya atĩĩ, “Andũ aa mekĩte kũmilwa nĩ ndivai!”

Ũtavany'a wa Vetelo Mũthenyanĩ wa Vendekosito

14Nĩvo ĩndĩ Vetelo waũngamie vamwe na atũmwa ala angĩ ĩkũmi na ũmwe, na aneena na ĩkomano yĩu na wasya mũnene asya atĩĩ, “Mbaitũ, andũ ma Yutia nenyu inyw'onthe ala mwĩkalaa Yelũsalemu, mbĩthukĩĩsyei nesa nĩmũtavye ũndũ kũilyĩ. 15Andũ aa mainyw'ĩte ũndũ mũũsũanĩa, nũndũ twĩo saa ĩtatũ sya kwakya. 16Kĩla kĩ vo nĩ kana ũndũ ũũ nĩ ũla waneeniwe nĩ Ngai kwĩsĩla kwa Mwathani Yoeli akasya:

17 # Yoe 2.28-32 ‘Ĩvindanĩ ya mũminũkĩlyo,

ngatulũla Veva wakwa andũnĩ onthe.

Ana menyu na eĩtu menyu makathana,

anake menyu makoona mawoni,

namo atumĩa menyu makaota ndoto.

18Ĩĩ, o na athũkũmi makwa ma aũme na ma aka,

ngamatulũĩla Veva wakwa ĩvindanĩ yĩu,

namo makathana.

19Nyie nakwa ngoonany'a maũndũ ma kũseng'ya ĩũlũ matunĩ,

na ngeeka syama ĩtheo ĩũlũ wa nthĩ,

sya nthakame, sya mwaki, na sya syũki yingĩ.

20Syũa yĩkaalyũlwa yĩthĩwe kĩvindu,

naw'o mwei ũitunĩva ta nthakame,

mbee wa mũthenya mũnene na wa ũkumyo wa Mwĩai ũtanavika.

21Nĩvo ĩndĩ mũndũ o na wĩva ũla wĩĩkaĩla ĩsyĩtwa ya Mwĩai wĩtangĩĩwa.’

22“Mbaitũ andũ ma Ĩsilaeli, ĩthukĩĩsyei nesa ndeto ii: Yesũ kuma Nasaleti aĩ mũndũ ũla woonaniw'e kwenyu kwĩthĩwa atũmĩtwe nĩ Ngai, kwa nzĩa ya maũndũ ma kũseng'ya na mawonany'o, na syama ila Ngai weekie kwĩsĩla kwake o tondũ inyw'ĩ mwĩsĩ. 23#Mat 27.35; Mk 15.24; Lk 23.33; Yoa 19.18 Mũndũ ũsu nĩwanenganiwe kwenyu o tondũ Ngai watw'ĩte na wavangĩte kuma tene, nenyu mwamũaa kwa kũmwamba ngelany'onĩ mũkĩtũmĩa andũ athũku. 24#Mat 28.5-6; Mk 16.6; Lk 24.5 Ĩndĩ nake Ngai amũthayũũkya kuma kwa akw'ũ, amũvonokya kuma vinyanĩ wa kĩkw'ũ, nũndũ kũyaĩ kũtonyeka kĩkw'ũ kĩmũlũmye. 25#Sav 16.8-11 Ndeviti nĩwaneenie ĩũlũ wake asya:

‘Nĩnoonie Mwĩai e mbee wakwa mavinda onthe,

na nũndũ e vakuvĩ nakwa vai kĩndũ kĩkanthingithya.

26Kwoou nĩngũtana na kwĩw'a mũyo ngoonĩ,

mwĩĩ wakwa naw'o ũkekalaa wĩna wĩkwatyo,

27nũndũ ndũkaeka thayũ wakwa vala maveva ma ala akw'ũ mekalaa,

o na ndũketĩkĩla mwĩĩ wa Mũtheu waku woe.

28We nũmbonetye nzĩa ila ietae thayũ,

na nũtumaa nĩtana mũno kwa kwĩthĩwa wĩ vamwe nakwa.’

29“Mbaitũ, ekai nĩmũtavye nesa ũvoo wa ũmae waitũ Ndeviti. We nĩwakwie na athikwa, na mbũa yake yĩ o vo o na kũvika ũmũnthĩ. 30#Sav 132.11; 2Sam 7.12-13 Nĩkwĩthĩwa Ndeviti mwene aĩ mwathani, nĩweesĩ kana Ngai nĩwamwathĩte kwa kwĩvĩta, kana akookĩlya mũndũ ũmwe kuma nzyawanĩ syake asumbĩke vandũ vake. 31Kwoou Ndeviti ayona maũndũ asu makeekĩka nĩwaneenie ĩũlũ wa ũthayũũkyo wa Klĩsto#2.31 Klĩsto: Nĩ ĩsyĩtwa ya ũla wanyuvĩtwe nĩ Ngai ethĩwe mũtangĩĩi wa andũ. Kwa Kĩevelania nĩ Masia asya,

‘Ndaaekanwa nake vala maveva ma ala akw'ũ mekalaa,

kana mwĩĩ wake ũkoa.’

32Yesũ ũsu Ngai nĩwamũthayũũkisye, na ithyĩ ithyonthe twĩ ngũsĩ ũndũnĩ ũsu. 33Nayu nũndũ nĩwaneneviw'e ekalw'a ngalĩko ya kw'oko kwa aũme kwa Ngai, nũkwatĩte kuma kwa Asa Veva Mũtheu ũla wathaniwe, na nũtũnengie Veva ũsu. Kĩu nĩkyo yu mũkwona na mũkwĩw'a. 34#Sav 110.1 Ndeviti mwene ndaambata ĩtunĩ, ĩndĩ we nĩwaisye:

‘Ngai nĩwamwĩie Mwĩai wakwa;

ĩkala nthĩ ngalĩko ya kw'oko kwakwa kwa aũme,

35kũvika yĩla nĩmaia amaitha maku ungu wa ũtonyi waku.’

36“Kwoou yu andũ onthe ma Ĩsilaeli nĩmamanye nesa ki, kana Yesũ ũla inyw'ĩ mwamwambie ngelany'onĩ, Ngai nũmũtw'ĩte Mwĩai na Klĩsto!”

37Yĩla andũ asu meewie ndeto isu, nĩmakiitiwe mũno ngoonĩ na mamũkũlya Vetelo vamwe na atũmwa ala angĩ atĩĩ, “Nayu twĩĩka ata ana-a-asa?”

38Vetelo amea, “Ĩlilei kwondũ wa naĩ syenyu, na kĩla ũmwe wenyu akĩvatiswa ĩsyĩtwanĩ ya Yesũ Klĩsto, nĩ kana mũekewe naĩ syenyu, na nĩmũũnengwa Veva Mũtheu, nake nĩ mũthĩnzĩo kuma kwa Ngai. 39Watho ũsu Ngai aũnenganie kwondũ wenyu na kwondũ wa syana syenyu, na kwondũ wa onthe ala me kũasa mũno, o ala maketwa nĩ Mwĩai Ngai waitũ moke kwake.”

40Kwa ndeto ingĩ mbingĩ, Vetelo nĩwatatie kũthuthya andũ asu na kũmataa aimea atĩĩ, “Inyw'ĩ ĩtangĩĩei kwa kwĩvetana na ũsyao mũthũku ũla wĩ kw'o ĩvindanĩ yĩĩ.” 41Andũ aingĩ nĩmeetĩkĩlile ndeto syake na onthe mavatiswa, na ũtalo wa aĩkĩĩi wongeleka andũ vakuvĩ ngili itatũ mũthenya ũsu. 42Andũ asu onthe nĩmaendeeie na kwĩnengane momanyĩsyonĩ ma atũmwa, na kwĩkalaa me mũamba o vamwe na kũtilaa mũkate#2.42 kũtilaa mũkate: Nĩ kũĩsanĩa na kũtanĩa mboka ya Mwĩai na kũvoya.

Mwĩkalĩle wa Aĩkĩĩi Ĩkanisanĩ ya Mbee

43Kĩla mũndũ nĩwalikilwe nĩ w'ĩa nũndũ wa syama mbingĩ na maũndũ ma kũseng'ya ala atũmwa meekaa. 44#Meko 4.32-35 Aĩkĩĩi onthe mekalaa me kĩndũ kĩmwe, na nĩmaanaa syĩndũ syoo. 45Nĩmathooasya syĩndũ syoo ila maĩ nasyo, na onthe mayĩaana mbesa isu kwĩanana na vata wa kĩla ũmwe woo. 46Kĩla mũthenya nĩmakomanaa Ĩkalũnĩ. Nĩmatilaa mũkate me mĩsyĩnĩ kwoo, na kũĩsanĩa lĩu me na ũtanu na ngoo syĩ na ũlau, 47makĩmũkumya Ngai na kwendeesya kũla kwĩ andũ onthe. Mwĩai nake nĩwaendeeie kwongeleela kĩla mũthenya nguthunĩ yoo andũ ala matangĩĩawa.

Currently Selected:

Meko 2: KAMBA

Highlight

Copy