Meko 3

Vetelo na Yoana Maivosya Mũndũ waĩ na Maũũ Mathũku

1Mũthenya ũmwe Vetelo na Yoana nĩmaendie Ĩkalũnĩ saa sya kũvoya, nasyo nĩ saa kenda sya mũthenya. 2Vau mũomonĩ wa Ĩkalũ, ũla weetawa Mũomo Mwanake, vaĩ mũndũ waĩ na maũũ mathũku kuma kũsyawa kwake. Mũndũ ũsu nĩwaetawe akuĩtwe akekalw'a vau kĩla mũthenya, nĩ kana avoye ũtethyo kuma andũnĩ ala mookaa Ĩkalũnĩ. 3Yĩla mũndũ ũsu woonie Vetelo na Yoana mokĩte kũlika Ĩkalũnĩ, nĩwamakũlilye mamũnenge o kĩndũ. 4Vetelo na Yoana nĩmaketeeie mũndũ ũsu, na Vetelo amwĩa atĩĩ, “Kwa tũsisye!” 5Mũndũ ũsu nĩwamasyaisye eteelete mamũnenge kĩndũ. 6Ĩndĩ Vetelo amwĩa, “Nyie ndi na mbesa o na imwe, ĩndĩ nĩngũũnenga kĩla nĩ nakyo. Ĩsyĩtwanĩ ya Yesũ Klĩsto kuma Nasaleti, ũkĩla ũthi!” 7Nĩwamũkwatie kw'oko kwa aũme amũkĩlya, na vau kwa vau maũũ na malenyũ ma mũndũ ũsu makwata vinya. 8Nĩwathaanyũkie aũngama na ambĩĩa kũthi. Nĩwalikile Ĩkalũnĩ e vamwe namo ekinyĩtye, akĩthaanyũkanga na kũmũkatha Ngai. 9Andũ onthe ala maĩ vau nĩmamwonie ekinyĩtye na aimũkatha Ngai, 10na mamũmanya kana nĩwe ũla ũnekalaa aivoya ũtethyo mũomonĩ wa Ĩkalũ ũla wĩtawa Mũomo Mwanake. Onthe nĩmasaanĩiw'e mũno na maseng'wa nĩ kĩla kyeekĩka kwa mũndũ ũsu.

Ũtavany'a wa Vetelo e Ĩkalũnĩ

11Mũndũ ũsu aendee kwĩkwatany'a na Vetelo na Yoana me valandanĩ ũla wĩtawa Valanda wa Solomoni, andũ onthe nĩmasembie maseng'ete mũno mathi vala maĩ. 12Yĩla Vetelo woonie andũ asu nĩwameie atĩĩ, “Mbaitũ andũ ma Ĩsilaeli, nĩkĩ mũseng'etw'e nĩ ũndũ ũũ? Mũtũkũnũĩe metho ũu nĩkĩ? Ko mũkwona ta ũtonyi witũ kana ũtheu witũ ene watuma mũndũ ũũ ambĩĩa kũthi? 13#Kuma 3.15 Ngai wa Avalaamu, Isaka na Yakovo, Ngai wa aaũmae maitũ, nũmũkumĩtye mũthũkũmi wake Yesũ, ũla inyw'ĩ mwamũnenganie oawe, na mwamũleela mbee wa Vilato, o na yĩla we watw'ĩte kũmũthasya. 14#Mat 27.15-23; Mk 15.6-14; Lk 23.13-23; Yoa 19.12-15 Mwaleile ũla Mũtheu na Mũlũngalu, na mwasya mũthaĩw'e mũndũ waĩ mũaani. 15Nĩmwooaie ũla ũnenganae thayũ, ĩndĩ nake Ngai amũthayũũkya kuma kwa akw'ũ. Ithyĩ twĩ ngũsĩ sya ũndũ ũsu. 16Ũtonyi wa Yesũ na mũĩkĩĩo nthĩnĩ wake, nĩsyo syanenga vinya mũndũ ũũ mũmwene na mũmwĩsĩ. Nĩ kwondũ wa mũĩkĩĩo nthĩnĩ wa Yesũ mũndũ ũũ wavow'a vyũ o tondũ inyw'onthe mwene.

17“Nayu mbaitũ, nĩnĩsĩ kana mweekie Yesũ ũu kwa kũlea kũmanya, o ũndũ atongoi menyu meekie. 18Ĩndĩ kwa nzĩa ĩno Ngai eanĩsya kĩla waneenete tene kwĩsĩla kwa athani onthe, kana Klĩsto wake akathĩnw'a. 19Kwoou ĩlilei kwondũ wa naĩ syenyu na mũimũsyokea Ngai, nĩ kana naĩ syenyu ivetwe, na nĩ kana Mwĩai amũetee ĩvinda ya kweũvw'a kĩ-veva. 20O ta ũu ĩkai ũu nĩ kana atonye kũmũtũmĩa Klĩsto ũla ũnyuvĩtwe kwondũ wenyu, nake nĩ Yesũ. 21Ĩndĩ no nginya Yesũ ekale ĩtunĩ kũvika yĩla wĩtũnga maũndũ onthe methĩwe meũ ĩngĩ, o tondũ Ngai wathanie naku tene kwĩsĩla kwa athani make atheu. 22#Kũt 18.15,18 Mwose nĩwaisye atĩĩ, ‘Mwĩai Ngai wenyu akamũkĩlĩlya mwathani kuma katĩ wenyu o ũndũ wambũkĩlilye. Mwĩmwĩthukĩĩsya maũndũnĩ onthe ala wĩmũtavya. 23#Kũt 18.19 Mũndũ ũla ũtakamwĩthukĩĩsya mwathani ũsu akavetwa vyũ kuma andũnĩ ma Ngai.’ 24Kwa w'o athani onthe ala maathana kwambĩĩa na Samũeli, na ala angĩ mookie ĩtina wake, o namo nĩmathanie ĩũlũ wa ĩvinda yĩĩ. 25#Mwa 22.18 Mawatho ala Ngai wathanie kwĩsĩla kwa athani nĩ kwondũ wenyu, na ũtianĩo ũla Ngai watianĩie na aaũmae menyu nĩ kwondũ wenyu, o tondũ wamwĩie Avalaamu atĩĩ, ‘Kwĩsĩla nzyawanĩ syaku ngaathima mbaĩ syonthe ĩũlũ wa nthĩ.’ 26Kwoou yĩla Ngai wookĩlilye mũthũkũmi wake, amũtũmie kwenyu mbee nĩ kana amũathime inyw'ĩ kwa kũtuma kĩla ũmwe wenyu atia mũendele wake mũthũku.”

Currently Selected:

Meko 3: KAMBA

Highlight

Copy