Meko 1

1 # Lk 1.1-4 Kwa Theovilo:

Ĩvukunĩ yakwa ya mbee naandĩkie maũndũ onthe ala Yesũ weekie na wamanyĩisye andũ, kuma ĩvinda yĩla wambĩĩie ũthũkũmi wake 2kũvika mũthenya ũla wambatie ĩtunĩ, ĩtina wa kumĩsya atũmwa ala wanyuvĩte mĩao kwa vinya wa Veva Mũtheu. 3Ĩtina wa kĩkw'ũ kyake nĩweeyonanisye kũla maĩ mavinda maingĩ, kwa nzĩa ikwonany'a kana kwa w'o nĩmũthayũũku. Nĩwamaumĩlĩĩle vandũ va matukũ mĩongo ĩna, na aneena namo maũndũ ma ũsumbĩ wa Ngai. 4#Lk 24.49 Ĩvindanĩ yĩmwe o aendee na kwĩkalany'a namo, nĩwameaĩie atĩĩ, “Mũikaume Yelũsalemu, ĩndĩ eteelai mũthĩnzĩo ũla Asa wakwa wathanie, naw'o nĩ ũla mweewie ndineena ĩũlũ wa w'o. 5#Mat 3.11; Mk 1.8; Lk 3.16; Yoa 1.33 Yoana avatisie andũ na kĩw'ũ, ĩndĩ ĩtina wa mĩthenya mĩvũthũ yũkĩte, inyw'ĩ mũkavatiswa na Veva Mũtheu.”

Yesũ Ayambata Ĩtunĩ

(Mk 16.19-20; Lk 24.50-53)

6Yĩla atũmwa makomanie vamwe na Yesũ nĩmamũkũlilye atĩĩ, “Mwĩai, ĩvindanĩ yĩĩ nĩyo ũũtũngĩa Ĩsilaeli ũsumbĩ woo?”

7Yesũ amea atĩĩ, “Ũsu ti ũndũ wenyu wa kũmanyaa syathĩ kana mavinda ala Asa ũvangĩte kwa ũkũmũ wake mwene. 8#Mat 28.19; Mk 16.15; Lk 24.47-48 Ĩndĩ mũkakwata vinya yĩla Veva Mũtheu wĩũka ĩũlũ wenyu, na mũkeethĩwa mwĩ ngũsĩ syakwa nthĩnĩ wa mũsyĩ wa Yelũsalemu, nthĩ ya Yutia yonthe, Samalia na kĩla vandũ ĩũlũ wa nthĩ.” 9#Mk 16.19; Lk 24.50-51 Yesũ amina kũneena ndeto isu, nĩwambatie ĩtunĩ atũmwa make masyaĩĩsye, na matu mamũvw'ĩka maeka kũmwona.

10Atũmwa asu o maendee na kũng'elela matunĩ Yesũ ambatĩte, aũme elĩ nĩmaũngamie kwa kĩthũlũmũko vakuvĩ namo mekĩĩte ngũa nzaũ, 11na masya atĩĩ, “Inyw'ĩ andũ ma Kalilii, mũũngamĩtye kĩ vaa mũng'elele matunĩ? Yesũ ũsu wambata ĩtunĩ kuma vala mũĩ, akasyoka oou mwamwona ambatĩte ĩtunĩ.”

Kũnyuvwa kwa Mathiasi ose Mwanya wa Yutasi

(Mat 27.3-10)

12Nĩvo ĩndĩ atũmwa asu masyokie Yelũsalemu kuma Kĩĩmanĩ kya Mĩthata, nakyo kyaĩ ta kĩlomita kĩmwe kuma mũsyĩnĩ ũsu. 13#Mat 10.2-4; Mk 3.16-19; Lk 6.14-16 Mavika nĩmambatie ngolovanĩ vala mekalaa. Atũmwa asu nĩ: Vetelo, Yoana, Yakovo na Endelea; Vilivũ na Tomasi; Mbatholomiũ na Mathayo; Yakovo mwana wa Aveasi na Simioni ũla weetawa Nzelote,#1.13 Nzelote: Ũũ nĩ mũndũ wendete nthĩ yake, na wateteaa na kwĩanĩsya mĩao ya Ayuti na Yutasi mwana wa Yakovo. 14Atũmwa asu nĩmoombanie onthe me na ngoo ĩmwe mavoye, me na aka aingĩ maĩ vau, o vamwe na Meli inyia wa Yesũ na ana-a-inyia ma Yesũ.

15Mĩthenyanĩ o ĩsu Vetelo nĩwaũngamie katĩ wa aĩkĩĩi ala moombanĩte, namo maĩ ta ĩana na mĩongo ĩlĩ na amea atĩĩ, 16“Mbaitũ, Maandĩko Matheu maĩ no nginya meanĩe, ala Veva Mũtheu waneenete ĩvinda ya tene kwĩsĩla kwa Ndeviti, ĩũlũ wa Yutasi ũla watongoeisye andũ ala mamũkwatie Yesũ. 17Yutasi aĩ ũmwe wa nguthu ĩno yaitũ, na nĩwanyuvĩtwe athũkũme vamwe naitũ.”

18 # Mat 27.3-8 (Yutasi nĩwaũie kĩsesi na mbesa ila wanengiwe kumana na ũndũ ũsu mũthũku weekie; nĩwamandanie vau nthĩ aatũka ĩvu, maa metĩka. 19Andũ onthe ala matwĩe Yelũsalemu nĩmeewie ũvoo ũsu, na kwoou kĩwanza kĩu makĩta kwa kĩthyomo kyoo, Akelindama, ĩla ũalyũlo wayo nĩ, “Kĩsesi kya Nthakame.”)

20 # Sav 69.25; 109.8 Vetelo nĩwaendeeie kwasya atĩĩ, “Kwoou nĩkũandĩkĩtwe ĩvukunĩ ya Savulĩ:

‘Ũtũo wake ndũkaatũe mũndũ,

mũndũ o na wĩva ndakaatate kũthi kwĩkala vo.’

O na ĩngĩ nĩkũandĩkĩtwe:

‘Mwanya wake wa ũthũkũmi,

nĩwoswe nĩ mũndũ ũngĩ.’

21“Kwondũ wa ũu, ve na vata wa kũnyuva mũndũ ũmwe katĩ wa aũme ala manatindanasya naitũ, ĩvindanĩ yonthe yĩla Mwĩai Yesũ ũnathyũũkaa kũũ kw'onthe e naitũ, 22#Mat 3.16; Mk 1.9; 16.19; Lk 3.21; 24.51 kuma ĩvindanĩ yĩla Yoana wavatisaa andũ kũka kũvika mũthenya ũla Yesũ wambatie ĩtunĩ. Ũsu akakũsĩĩaa andũnĩ vamwe naitũ kana Yesũ nũthayũũkĩte kuma kwa akw'ũ.”

23Kwoou nĩmaũngamisye aũme elĩ: Yosevu ũla weetawa Valisava na nowe weetawa Yasitasi, na wa kelĩ nĩ Mathiasi. 24Nĩvo ĩndĩ mavoyie mayasya atĩĩ, “Mwĩai, we nĩwĩsĩ kĩla kĩ ngoonĩ ya mũndũ. Twony'e nĩ wĩva katĩ wa aũme aa elĩ ũla we ũnyuvĩte, 25nĩ kana athũkũmae ta mũtũmwa mwanyanĩ wa Yutasi, ũla ũneevetie athi vala vamwaĩlĩte.” 26Nĩmamakũnĩie kula, na kula yamũvalũkĩla Mathiasi; kwoou ongeleelwa kwa ala atũmwa ĩkũmi na ũmwe.

Currently Selected:

Meko 1: KAMBA

Highlight

Copy