Meko Ũelesyo wa Ĩvuku Yĩĩ
Ũelesyo wa Ĩvuku Yĩĩ
Ĩvuku yĩĩ ya Meko ma Atũmwa yĩendeesye maũndũ ala me ĩvukunĩ ya Ũvoo Mũseo o tondũ ũandĩkĩtwe nĩ Lũka. Kĩeleelo kyayo kĩla kĩnene nĩ kũelesya ũndũ aatĩĩi ma mbee ma Yesũ, matongoew'e nĩ Veva Mũtheu, manyaĩĩkisye Ũvoo Mũseo wa Yesũ, “Nthĩnĩ wa mũsyĩ wa Yelũsalemu, nthĩ ya Yutia yonthe, Samalia na kĩla vandũ ĩũlũ wa nthĩ.” (1.8) Ĩvuku yĩĩ nĩ ũvoo ĩũlũ wa ũndũ wĩtĩkĩlo wa Kĩ-klĩsto wambĩĩie katĩ wa Ayuti, na waendeea watw'ĩka wĩtĩkĩlo wa mbaĩ syonthe sya nthĩ. Mũandĩki wa ĩvuku yĩĩ o ta ũu eenda kũĩkĩĩthya andũ ala meũyĩsoma kana Aklĩsto mayaĩ nguthu ya kũvĩndũa ũsumbĩ wa Loma, na kana Ũklĩsto waĩ wĩanĩĩsyo wa wĩtĩkĩlo wa Kĩyuti.
Ĩvuku ya Meko ma Atũmwa nĩyĩtonya kũaanw'a ilungu itatũ nene, ila ikwonany'a Ũvoo Mũseo wa Yesũ ũinyaĩĩkw'a isionĩ mbingĩ, na kwambĩlĩĩlw'a kwa Ĩkanisa: (1) Wambĩlĩĩlyo wa Ũklĩsto nthĩnĩ wa Yelũsalemu ĩtina wa Yesũ ambata ĩtunĩ. (2) Kũnyaĩĩka kwa Ũvoo Mũseo isionĩ ila ingĩ nthĩ ĩsu ya Valesitina. (3) Kũnyaĩĩka kwa Ũvoo Mũseo nthĩnĩ wa nthĩ ila ithyũlũlũkĩte ũkanga ũla wĩtawa Menditelenia o na kũthi kũvika Loma.
Ũmanyĩsyo ũmwe wa vata mũno ĩvukunĩ yĩĩ ya Meko ma Atũmwa nĩ wĩa wa Veva Mũtheu, ũla wookie e na ũtonyi kwa aĩkĩĩi me Yelũsalemu mũthenyanĩ wa Vendekosito, na waendeeie kũtongoesya na kũlũlũmĩĩlya ĩkanisa, vamwe na atongoi mayo maũndũnĩ onthe ala mawetetwe ĩvukunĩ yĩĩ. Momanyĩsyo ma mbee vyũ ma Ũklĩsto nĩmatũngĩanĩĩtwe motavany'anĩ meana ũndũ mũna. Maũndũ ala maandĩkĩtwe ĩvukunĩ yĩĩ ya Meko ma Atũmwa, nĩmekwonany'a ũtonyi wa momanyĩsyo asu nthĩnĩ wa mĩkalo ya aĩkĩĩi na nthĩnĩ wa mũamba wa ĩkanisa.
Maũndũ ala me Ĩvukunĩ Yĩĩ
Kwĩyũmbany'a kwondũ wa ũthũkũmi 1.1-26
a. Mwĩao wa Yesũ wa mũthya na watho wake 1.1-14
b. Ũla woosie mwanya wa Yutasi 1.15-26
Ũtavany'a wa Ũvoo Mũseo mũsyĩnĩ wa Yelũsalemu 2.1—8.3
Ũtavany'a wa Ũvoo Mũseo nthĩ ya Yutia na ya Samalia 8.4—12.25
Ũthũkũmi wa mũtũmwa Vaũlo 13.1—28.31
a. Kyalo kya Mbee kya kũnyaĩĩkya Ũvoo Mũseo 13.1—14.28
b. Nzama ya Yelũsalemu 15.1-35
c. Kyalo kya kelĩ kya kũnyaĩĩkya Ũvoo Mũseo 15.36—18.22
d. Kyalo kya katatũ kya kũnyaĩĩkya Ũvoo Mũseo 18.23—21.16
e. Vaũlo e yela Yelũsalemu, Kaisalea na Loma 21.17—28.31
Currently Selected:
Meko Ũelesyo wa Ĩvuku Yĩĩ: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011