Mat 13
13
Ngelekany'o ya Mũĩmi
(Mk 4.1-9; Lk 8.4-8)
1Mũthenya o ũsu, Yesũ nĩwaumie nyũmbanĩ ĩsu athi ekala nthĩ ũtee wa ĩia. 2#Lk 5.1-3 Ĩkomano yĩla yamũthyũlũlũkĩte yaĩ ĩnene mũno na kwoou ookĩla alika ĩsiwanĩ na ekala nthĩ vo, namo andũ onthe maũngama ũtee wa ĩia. 3Nĩwamatavisye maũndũ maingĩ aitũmĩa ngelekany'o. Nĩwameie atĩĩ,
“Mũĩmi ũmwe nĩwaendie kũvuĩa mbeũ. 4Akĩvuĩa, mbeke imwe nĩsyavalũkile nzĩanĩ, na nyũnyi syooka na syaiya. 5Ingĩ nĩsyavalũkile mavianĩ. O mĩtũkĩ nĩsyameie nũndũ iyavw'ĩkĩtwe nĩ mũthanga mwingĩ. 6Yĩla syũa yaaie, nĩsyavovie na syooma, nĩkwĩthĩwa mĩi yasyo ndyaĩ mĩliku. 7Mbeke ingĩ nĩsyavalũkile mĩw'anĩ na syamea, na yĩla mĩw'a yathongooie na yeana, yainyita. 8Ĩndĩ mbeke ingĩ nĩsyavalũkile mũthanganĩ mũseo na syasyaa ũsyao mwingĩ: Imwe mbeke ĩana, ingĩ mĩongo thanthatũ, na ingĩ mĩongo ĩtatũ.”
9Yesũ aiminũkĩlya nĩwameie atĩĩ, “Ũla wĩ kũtũ, nĩew'e.”
Kĩtumi kya Yesũ Kũtũmĩa Ngelekany'o
(Mk 4.10-12; Lk 8.9-10)
10Nĩvo ĩndĩ amanyĩw'a mamũthengeeie Yesũ mamũkũlya atĩĩ, “Nĩkĩ ũtũmĩaa ngelekany'o yĩla ũũneena na andũ?”
11Yesũ amasũngĩa amea atĩĩ, “Inyw'ĩ nĩmũnengetwe kũmanya syĩmbithĩ sya ũsumbĩ wa ĩtu, ĩndĩ mo mainengetwe. 12#Mat 25.29; Mk 4.25; Lk 8.18; 19.26 Nũndũ mũndũ ũla wĩ na kĩndũ, akongeleelwa nĩ kana aingĩvĩwe, ĩndĩ ũla ũte na kĩndũ, o na kala kanini wĩ nako, akavenwa. 13Nĩneena namo na ngelekany'o nũndũ nĩmekũsisya ĩndĩ maikwona, na nĩmekwĩthukĩĩsya ĩndĩ maikwĩw'a kana kũelewa. 14#Ĩsa 6.9-10 Kwoou wathani wa Ĩsaia nĩwĩanĩĩw'e kwoo ũla waasya:
‘Mũkatindĩaa kwĩthukĩĩsya ĩndĩ mũikaelewa,
na mũkatindĩaa kũketeea, ĩndĩ mũikona.
15Nũndũ ilĩko sya andũ aa nĩ ngomu,
na matũ moo mayĩw'a kĩndũ,
na nĩmavingĩte metho moo.
Kethĩwa ti ũu, no mone na metho moo,
na makew'a na matũ moo,
na makaelewa ilĩkonĩ syoo,
na mainzyokea nyie Ngai,
nakwa ngĩmavosya.’
16 #
Lk 10.23-24
“Ngalĩkonĩ ĩla yenyu, inyw'ĩ mwĩ aathime, nũndũ metho menyu nĩmekwona na matũ menyu nĩmekwĩw'a. 17Nĩmũtavya w'o, athani aingĩ na andũ angĩ aingĩ aseo methonĩ ma Ngai, nĩmendaa mũno kwona kĩla inyw'ĩ mwene, ĩndĩ mayaakyona, na nĩmendaa kwĩw'a kĩla inyw'ĩ mũkwĩw'a, ĩndĩ mayaakĩw'a.
Yesũ Aielesya Amanyĩw'a Ngelekany'o ya Mũĩmi
(Mk 4.13-20; Lk 8.11-15)
18“Ĩthukĩĩsyei ĩndĩ ũelesyo wa ngelekany'o ya mũĩmi. 19Andũ ala mew'aa ndeto ĩũlũ wa ũsumbĩ wa Ngai ĩndĩ mailea kũelewa, mavw'ana mbeke ila syavalũkile nzĩanĩ. Ũla Mũthũku nĩwũkaa na kũvulya kĩla kĩvandĩtwe ngoonĩ syoo. 20Nasyo mbeke ila syavalũkile mavianĩ, nĩ andũ ala mew'aa ĩla ndeto na maimyosa o mĩtũkĩ na ũtanu; 21ĩndĩ ti ndiku mathayũnĩ moo na ndĩkalaa ĩvinda ĩasa. Kwoou yĩla thĩna kana ũnyamao wooka nũndũ wa ĩla ndeto, o mĩtũkĩ nĩmekasya ngoo na kũmĩtia. 22Mbeke ila syavalũkile mĩw'anĩ nĩ andũ ala mew'aa ndeto, ĩndĩ kwĩmakĩa kwoo na kwenda ũthwii kũinyita ndeto ĩsu na mailea kwĩthĩwa na ũsyao. 23Nasyo mbeke ila syavalũkile mũthanganĩ mũseo, nĩ andũ ala mew'aa ndeto na kũmĩelewa. Nĩmethĩawa na ũsyao mũseo: Amwe kũndũ ĩana, angĩ kũndũ mĩongo thanthatũ, na angĩ kũndũ mĩongo ĩtatũ.”
Ngelekany'o ya Ĩthaa yĩ Nganũnĩ
24Yesũ nĩwatavisye andũ ngelekany'o ĩngĩ amea atĩĩ, “Ũsumbĩ wa ĩtu no ũvw'ananw'e na mũndũ ũmwe ũla wavũĩie mbeũ nzeo ya nganũ mũũndanĩ wake. 25Ĩndĩ andũ onthe makomete, mũmaitha wake nĩwookie na avuĩa ĩthaa#13.25 ĩthaa: Yĩĩ nĩ ĩia yĩvw'anene na nganũ ĩla nganũnĩ na athi. 26Yĩla nganũ yameie na yaumya iia, nĩvo ĩndĩ nayo ĩthaa yamanyĩkie. 27Athũkũmi ma mwene mũũnda nĩmaendie vala ũĩ mamwĩa atĩĩ, ‘Mũnene, mbona wavuĩie mbeũ nzeo mũũndanĩ waku, ĩthaa yĩnaumie va?’ 28Nake amasũngĩa amea atĩĩ, ‘Yavuĩiwe nĩ mũmaitha.’ Namo mamũkũlya, ‘Na nũkwenda tũthi tũkayĩkũange?’ 29Amea, ‘Aiee, mũikayĩkũange mũikese kũyĩkũanĩsya na nganũ. 30Ekai syelĩ syĩane vamwe nginya ĩvinda ya ngetha. Ĩvindanĩ yĩu, ngatavya akethi nĩmambe ũkũa ĩthaa, mayũmbe mavumbu na maiyĩvĩvya, na ĩndĩ mayũmbany'a nganũ mamĩkĩe ĩkũmbĩnĩ yakwa.’ ”
Ngelekany'o ya Mbeũ ĩla Niini Vyũ
(Mk 4.30-32; Lk 13.18-19)
31Yesũ nĩwatavisye andũ ngelekany'o ĩngĩ amea atĩĩ, “Ũsumbĩ wa ĩtu no ũvw'ananw'e na mũndũ ũmwe ũla woosie mbeũ ĩla niini vyũ amĩvanda mũũndanĩ wake. 32O na kau mbeũ ĩsu nĩyo niini vyũ kwĩ mbeũ ila ingĩ, yamea nĩnenevaa ĩkatw'ĩka mũtĩ mũnene kwĩ mĩmea ĩla ĩngĩ yĩ mũũndanĩ, o na nyũnyi ikokaa kwaka ndala mbongenĩ syaw'o.”
Ngelekany'o ya Mbota yĩ Mũtunĩ
(Lk 13.20-21)
33O ĩngĩ nĩwamatavisye ngelekany'o ĩngĩ amea atĩĩ, “Ũsumbĩ wa ĩtu no ũvw'ananw'e na mũndũ mũka ũmwe ũla woosie mũtu wa maleve elĩ na nyusu awũindanĩsya na mbota#13.33 mbota: Ĩno nĩ ndawa ya kũkaatya na ya kwimbya mũtu wa mĩkate na w'onthe waimba.”
Kĩtumi Kya Yesũ Kũtũmĩa Ngelekany'o
(Mk 4.33-34)
34Yesũ atavisye andũ maũndũ asu onthe aitũmĩa ngelekany'o. Kwa w'o vai ũndũ waamatavya ateũtũmĩa ngelekany'o. 35#Sav 78.2 Eekie ũu nĩ kana eanĩsye kĩla Ngai waneenete kwĩsĩla kwa mwathani akasya:
“Nganeena namo na ngelekany'o;
ngamavuanĩsya maũndũ mataamanyĩka kuma nthĩ yoombwa.”
Yesũ Aielesya Ngelekany'o ya Ĩthaa yĩ Nganũnĩ
36Yesũ nĩwataanĩisye na ĩkomano na asyoka nyũmba e na amanyĩw'a make. Me vau nyũmba, amanyĩw'a make nĩmamũthengeeie mamwĩa atĩĩ, “Tũelesye ĩla ngelekany'o ya ĩthaa yavuĩiwe nganũnĩ.” 37Nake amasũngĩa amea atĩĩ, “Mũndũ ũsu wavuĩie mbeũ nzeo nĩ Mwana wa Mũndũ. 38Mũũnda ũsu nĩ kũũ nthĩ. Mbeũ ĩla nzeo, nĩ andũ ala metĩkĩlĩte Ũvoo wa ũsumbĩ. Ĩthaa nayo nĩ andũ ala masumbĩkĩtwe nĩ Ũla Mũthũku, 39nake nĩwe ũla mũmaitha wa kĩima wavuĩie ĩthaa. Ĩvinda ya ngetha nĩ mũthenya wa mũminũkĩlyo, na akethi nĩ alaĩka. 40O tondũ ĩthaa yũmbanaw'a na kũvĩvw'a, now'o kũkethĩwa mũthenya wa mũminũkĩlyo. 41Mwana wa Mũndũ nũkatũma alaĩka make makombany'e kuma ũsumbĩnĩ wake, andũ onthe ala mekaa naĩ kana kũtuma andũ angĩ meka naĩ. 42Makamekya ĩianĩ ya mwaki vala vakethĩwa kũĩa na kũvevetany'a maeo. 43Nĩvo ĩndĩ namo andũ ala alũngalu makatisa ta syũa me ũsumbĩnĩ wa Ĩthe woo. Ũla wĩ kũtũ nĩew'e.
Ngelekany'o ya Ũthwii Mũvithe
44“Ũsumbĩ wa ĩtu no ũvw'ananw'e na mũndũ ũmwe ũla woonie kĩndũ kya thooa mũnene kĩvithĩtwe vandũ kĩthekanĩ. Nĩwakĩvithĩĩie, na e na ũtanu mũnene, athi athoosya syĩndũ syonthe ila waĩ nasyo, na athooa kĩtheka kĩu.
Ngelekany'o ya Mũmanthi Woonie Thaavu
45“O ĩngĩ, ũsumbĩ wa ĩtu no ũvw'ananw'e na mũmanthi ũmwe mũnene ũla waendie kũmantha mavia ma thooa mũnene. 46Yĩla woonie yĩmwe ĩseo mũno, nĩwaendie na athoosya syĩndũ syonthe ila waĩ nasyo na ayĩthooa.
Ngelekany'o ya Kĩtei kya Makũyũ
47“O ĩngĩ, ũsumbĩ wa ĩtu no ũvw'ananw'e na atei amwe ma makũyũ, ala malikilye kĩtei kyoo ĩianĩ na kyakwatya makũyũ ma kĩla mũthemba. 48Kyamina kusũa, nĩmakĩkusisye makyumya ũtee, na mekala nthĩ mambĩĩa kũnyuvany'a ala maseo mekĩĩte ikavũnĩ, na ala mathũku mekĩtye ĩtheka. 49Ũu nĩw'o kũkethĩwa kũilyĩ ĩvindanĩ ya mũminũkĩlyo. Alaĩka ma Ngai nĩmakoka mavathany'e andũ ala athũku na ala aseo methonĩ ma Ngai. 50Alaĩka makekya ala athũku ĩianĩ ya mwaki vala vakethĩwa kũĩa na kũvevetany'a maeo.”
Momanyĩsyo Meũ na Momanyĩsyo Makũũ
51Nĩvo ĩndĩ Yesũ wakũlilye amanyĩw'a make atĩĩ, “Nĩmwaelewa nĩ maũndũ asu onthe?”
Namo mamwĩa atĩĩ, “Ĩĩ, nĩtwaelewa.”
52Yesũ nĩwameie atĩĩ, “Kĩla mũmanyĩsya wa Mĩao ũla watw'ĩka mũmanyĩw'a nthĩnĩ wa ũsumbĩ wa ĩtu, ailyĩ mwene wa mũsyĩ ũla wumaalasya mĩio yake ĩla mĩkũũ na ĩla myeũ kuma vala wiaa mĩio yake.”
Yesũ Ailewa nĩ Andũ ma Nasaleti
(Mk 6.1-6; Lk 4.16-30)
53Yesũ amina kũneena na ngelekany'o isu, nĩwaumie vau athi 54ndũanĩ yake ya mũsyĩ. Nĩwamanyĩisye kũu nyũmbanĩ ya Ayuti ya kũthaithĩa na kũmbanĩa, na onthe ala mamwĩthukĩĩisye maseng'a mũno na makũlany'a atĩĩ, “Mũndũ ũũ aumĩtye ũĩ ũũ na ũtonyi wa kwĩka syama ii va? 55Ũũ we tyo mwana wa ũla vundi wa mbwaũ, na inyia wake tyo Meli, na ana-a-inyia make tyo tũmesĩ, na no Yakovo na Yosevu, Simioni na Yutasi? 56O na eĩtu-a-inyia make tũyĩkalaa o namo kũũ? Aumĩtye va ĩndĩ maũndũ aa onthe? 57#Yoa 4.44 Kwondũ wa ũu nĩmamũleile Yesũ.”
Ĩndĩ Yesũ amea atĩĩ, “Mwathani nũnengawe ndaĩa kĩla vandũ, ate o ndũanĩ yake na andũnĩ ma nyũmba yake.” 58Ndaaĩka syama mbingĩ kũu nũndũ andũ asu mayaamũĩkĩĩa.
Currently Selected:
Mat 13: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
