Mat 12
12
Ĩkũlyo ĩũlũ wa Savato
(Mk 2.23-28; Lk 6.1-5)
1 #
Kũt 23.25
Ĩvindanĩ o yĩu Yesũ nĩwesĩlile mĩũndanĩ ya nganũ mũthenyanĩ wa Savato. Amanyĩw'a make nĩmew'aa nzaa, na kwoou mambĩĩa kũtw'a iia imwe na kũikiitha maiya. 2Yĩla Avalisi moonie mayĩka ũu mamwĩa Yesũ atĩĩ, “Kwa sisya, amanyĩw'a maku meĩka ũla ũtaĩlĩte kwĩkwa mũthenyanĩ wa Savato!”
3 #
1Sam 21.1-7
Yesũ nĩwamakũlilye atĩĩ, “Nũndũ inyw'ĩ mũtaasoma ũndũ Ndeviti weekie, ĩvindanĩ yĩla we na ala waĩ namo maĩ na nzaa? 4#Ali 24.9 Nĩwalikile nyũmbanĩ ya Ngai, na aya e na andũ asu waĩ namo mĩkate ĩla yathembeetwe Ngai, o na kau mĩao ndyametĩkĩlĩtye kũmĩya. No athembi me oka meetĩkĩlĩtw'e kũya mĩkate ĩsu. 5#Mot 28.9-10 O na nũndũ mũtaasoma Mĩaonĩ ya Mwose kana kĩla mũthenyanĩ wa Savato, athembi mathũkũma Ĩkalũnĩ nĩmatũlaa mwĩao wa Savato na mayosawa ta meũvĩtya? 6Ĩndĩ ekai nĩmũtavye, vaa ve kĩndũ kĩnene kwĩ Ĩkalũ. 7#Mat 9.13; Osea 6.6 Ĩndĩ kethĩwa nĩmwamanyie kĩla kĩwetetwe nĩ Maandĩko Matheu ala maĩtye, ‘Kĩla ngwenda nĩ andũ mew'anĩae tei ĩndĩ ti kumya nthembo,’ mũitũla mũtĩ andũ mate na ĩvĩtyo. 8Nũndũ Mwana wa Mũndũ e na ũkũmũ ĩũlũ wa Savato.”
Yesũ Aivosya Mũndũ waĩ Mwonzu Kw'oko
(Mk 3.1-6; Lk 6.6-11)
9Yesũ nĩwaumie vau athi alika nyũmbanĩ ya Ayuti ya kũthaithĩa na kũmbanĩa, 10na vau vaĩ mũndũ waĩ na kw'oko kwonzu. Andũ amwe maĩ vau nĩmamanthaa ũndũ mamũsikata Yesũ naw'o, na kwoou mamũkũlya atĩĩ, “Nĩ waĩlu kũvosya mũndũ mũthenya wa Savato?”
11 #
Lk 14.5
Nake amasũngĩa atĩĩ, “Nũũ katĩ wenyu ethĩwa ĩlondu yake nĩyalika ĩimanĩ mũthenyanĩ wa Savato, ũtayĩkusya akayumya? 12Mũndũ e vata mũno kwĩ ĩlondu, na kwoou mĩao nĩyĩtĩkĩlĩtye kũtethya mũndũ mũthenyanĩ wa Savato!” 13Nĩvo ĩndĩ Yesũ wamwĩie ũla mũndũ waĩ na kw'oko kwonzu atĩĩ, “Tambũũkya kw'oko kwaku.” Nĩwakũtambũũkisye na kwavoa, kweethĩwa na vinya ĩngĩ ta kũla kũngĩ.
14Nĩvo ĩndĩ Avalisi maumaalile na masama ũndũ matonya kũmũaa Yesũ.
Mũthũkũmi Mũnyuve wa Ngai
15Yesũ nĩwamanyie mũvango wa Avalisi na kwoou auma vau. Andũ aingĩ nĩmamũatĩĩie, na ala maĩ awau amavosya onthe, 16na amakany'a maikatavye andũ nĩwe ũũ. 17Yesũ eekie ũu nĩ kana eanĩsye kĩla kyaneenetwe nĩ Ngai kwĩsĩla kwa mwathani Ĩsaia akasya atĩĩ,
18 #
Ĩsa 42.1-3
“Sisyai ũũ nĩwe mũthũkũmi wakwa ũla nĩnyuvĩte,
ũla nendete na nendeeaw'a nĩwe.
Ngamũnenga Veva wakwa,
nake akatavany'a kwenda kwakwa kwa andũ ma mbaĩ syonthe.
19Ndakakananĩa na mũndũ kana kũneena na wasya mũnene,
o na vai mũndũ ũkew'a wasya wake kũũ malelũnĩ.
20Ndakatũla kaũseki,
kana kũvosya kataa kakilĩlyĩ kũvoa.
Akaendeea kwĩka ũu kũvika ũsili wa katĩ ũatĩĩawe.
21Andũ-ma-mbaĩ-ingĩ makamwĩkwatya.”
Yesũ Ayĩwa Anengetwe Vinya nĩ Mũnene wa Maimũ
(Mk 3.20-30; Lk 11.14-23)
22Andũ nĩmamũeteie Yesũ mũndũ ũtoonaa nthĩ na ũtaneenaa, nĩkwĩthĩwa nĩwalikĩtwe nĩ ĩimũ. Yesũ nĩwamũvoisye na mũndũ ũsu ambĩĩa ĩngĩ kũneena na kwona nthĩ. 23Andũ onthe ala maĩ vo nĩmaseng'iw'e mũno nĩ ũndũ ũsu na makũlany'a atĩĩ, “We ũũ no kwĩthĩwa ne ũla Mwana wa Ndeviti?”
24 #
Mat 9.34; 10.25 Yĩla Avalisi meewie kĩu andũ meũkũlany'a mamasũngĩa atĩĩ, “Mũndũ ũũ elũngya maimũ na vinya wa Mbeelisevuli, mũnene wa maimũ.”
25Yesũ nĩwamanyie ũndũ meũsũanĩa na kwoou amea atĩĩ, “Ũsumbĩ ũla wĩyĩaanĩtye ikundi ikũkitana nĩwanangĩkaa. O ta ũu, ndũa kana mũsyĩ ũla wĩyĩaanĩtye ikundi ikũkitana ndũtonya kũũngama. 26Ethĩwa Satani nũkwĩlũngya kuma mũndũnĩ, eonany'a kana nĩ mũaanĩku. Kwoou ĩndĩ, ũsumbĩ wake ũkaũngama ata? 27Nĩmũkũlya, ũndũ mũkwasya kana nĩlũngya maimũ na vinya wa Mbeelisevuli, namo aatĩĩi menyu memalũngya na vinya waũ? Kwondũ wa ũu, kĩla aatĩĩi menyu mekwĩka nĩkĩũmwony'a kana ndeto syenyu ti sya w'o! 28Ĩndĩ ethĩwa nĩlũngya maimũ na vinya wa Veva wa Ngai, manyai kana ũsumbĩ wa Ngai nĩ mũviku katĩ wenyu.
29“Vai mũndũ ũtonya kũtũla nyũmba ya mũndũ wĩ vinya akakua mĩio yake. No nginya ambe kwova mũndũ ũsu amũlũmye ki, na ĩndĩ aikua mĩio ĩla yĩ nyũmbanĩ ĩsu.
30 #
Mk 9.40
“Mũndũ ũla ũte vamwe nakwa ethĩawa aileana nakwa, na ũla ũtombanasya vamwe nakwa ekaa kũnyaĩĩkya. 31Kwoou ekai nĩmũtavye, andũ makaekewa naĩ syoo na numano syoo syonthe ila mamũumaa Ngai, ĩndĩ ũla ũmũumaa Veva Mũtheu, ndakaekewa o na ĩndĩĩ. 32#Lk 12.10 O ta ũu, mũndũ ũla ũneeneaa Mwana wa Mũndũ naĩ, akaekewa; ĩndĩ mũndũ o na wĩva ũla ũneeneaa Veva Mũtheu naĩ, ndakaekewa e kũũ ĩũlũ wa nthĩ, o na esa kuma ĩũlũ wa nthĩ.
Mũtĩ Ũmanyĩkaa nĩ Ũsyao wa W'o
(Lk 6.43-45)
33 #
Mat 7.20; Lk 6.44 “Wasũvĩa mũtĩ nesa, mũtĩ ũsu ũkasyaa ũsyao mũseo, ĩndĩ waema kũũsũvĩa, ũkasyaa ũsyao mũthũku. Kĩla mũtĩ ũmanyĩkaa ũndũ ũilyĩ kwĩsĩla ũsyaonĩ wa w'o. 34#Mat 3.7; 23.33; 15.18; Lk 3.7; 6.45 Inyw'ĩ andũ athũku ta nzoka! Mũtonya ata kũneena maũndũ maseo mũthũkĩte ũu mũthũkĩte? Mũndũ aneenaa kĩla kĩ ngoonĩ yake. 35Mũndũ mũseo aumasya maũndũ maseo ngoonĩ yake nzeo, nake mũndũ mũthũku ayumya maũndũ mathũku ngoonĩ yake nthũku. 36Ekai nĩmũtavye, Mũthenyanĩ wa Ũsilĩlo kĩla mũndũ nũkanengane kĩtumi kya kĩla ndeto ĩte mbaĩlu waaneena. 37Nũndũ ndeto syenyu nosyo ikatũmĩwa kũmũtw'ĩĩa kana mwĩ na mavĩtyo kana mũi na mavĩtyo.”
Yesũ Ailea Kwĩka Kyama
(Mk 8.11-12; Lk 11.29-32)
38 #
Mat 16.1; Mk 8.11; Lk 11.16 Amwe ma amanyĩsya ma Mĩao na Avalisi nĩmamwĩie Yesũ atĩĩ, “Mũmanyĩsya, twĩenda kwona kyama kuma vala ũĩ.”
39 #
Mat 16.4; Mk 8.12 Nake amasũngĩa amea atĩĩ, “Andũ ma ĩvinda yĩĩ mwĩ athũku na mũi na mũĩkĩĩo. Mwĩngũlya nĩmwĩkĩe kyama, ĩndĩ vai kyama mwĩonw'a ate o kĩla kyeekĩkie kwa mwathani Yona. 40#Yoa 1.17 O tondũ Yona wekalile ĩvunĩ ya ĩkũyũ ĩnene vandũ va matukũ atatũ, o ta ũu o nake Mwana wa Mũndũ nũkekala mbũanĩ vandũ va matukũ atatũ. 41#Yoa 3.5 Mũthenyanĩ wa Ũsilĩlo andũ ma Nineva nĩmakokĩla mamũtũle mũtĩ inyw'ĩ andũ ma ĩvinda yĩĩ, nũndũ mo nĩmeelilile kwondũ wa naĩ syoo yĩla meewie ũtavany'a wa Yona. Nĩmũtavya kwa w'o, vaa ve ũndũ mũnene kwĩ Yona! 42#1Asu 10.1-10; 2Mav 9.1-12 O ta ũu ĩvindanĩ yĩu, mũsumbĩ mũndũ mũka wa nthĩ ya Sieva nũkokĩla amũtũle mũtĩ inyw'ĩ andũ ma ĩvinda yĩĩ, nũndũ nĩwaumie nthĩ yĩ kũndũ kũasa ooka kwĩw'a ũĩ wa Solomoni. Nĩmũtavya kwa w'o, vaa ve ũndũ mũnene kwĩ Solomoni!
Kũsyoka kwa Maimũ Mũndũnĩ
(Lk 11.24-26)
43“Yĩla ĩimũ yalũngw'a kuma mũndũnĩ, nĩyangangaa weũnĩ yĩimantha vandũ yĩtũe. Yaema kũvona, 44nĩyĩsũanĩaa yĩkasya atĩĩ, ‘Nĩngũsyoka nyũmbanĩ yakwa ĩla nĩnaumie.’ Ĩimũ yĩu nĩyĩsyokaa na kwĩthĩa nyũmba ĩsu yĩ nthei, yĩ ndute na ĩkaseũvw'a nesa. 45Nĩvo ĩndĩ yĩendaa yĩkoka na maimũ angĩ mũonza mathũkangu kwĩ yo. Nĩmalikaa na kũtũa vau, na mwĩkalĩle wa mũndũ ũsu ũyĩthĩwa wĩ mũthũku mũno vyũ kwĩ ũndũ wailyĩ navu mbeenĩ.”
Inyia na Ana-a-inyia ma Yesũ
(Mk 3.31-35; Lk 8.19-21)
46Yesũ aendee kũneena na andũ, inyia wake na ana-a-inyia nĩmookie mayenda kũmwona. 47Kwoou mũndũ ũmwe ĩkomanonĩ nĩwaendie vala ũĩ amwĩa atĩĩ, “Inyia waku na ana-a-inyia maku me vaya nza na nĩmekwenda ũkũtumũsya.”#12.47 Maandĩko amwe ma tene ma Ndeto ya Ngai nĩmatiĩte mũsoa ũũ
48Nake akũlya mũndũ ũsu atĩĩ, “Inyia wakwa nũũ, na ana-a-inyia makwa naaũ?” 49Nĩwoolootile amanyĩw'a make na asya atĩĩ, “Sisya, aa nĩmo mwaitũ na ana-a-ia makwa! 50Mũndũ o na wĩva ũla wĩkaa kwenda kwa Ĩthe wakwa ũla wĩ ĩtunĩ, nĩwe mwana-a-ia, na mwĩĩtu-a-ia na mwaitũ.”
Currently Selected:
Mat 12: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
