Mat 11
11
Atũmwa Matũmĩtwe nĩ Yoana Mũvatisi
(Lk 7.18-35)
1Yesũ amina kwĩaĩa amanyĩw'a make ĩkũmi na elĩ, nĩwaumie vau athi akatavany'e na kũmanyĩsya Ũvoo Mũseo ndũanĩ ila syaĩ vau vakuvĩ.
2Yĩla Yoana e yela weewie maũndũ ala Klĩsto ũkwĩka, nĩwatũmie amwe ma amanyĩw'a make vala ũĩ. 3Mamwona nĩmamũkũlilye atĩĩ, “We nue ũla waĩ oke kana twĩeteela ũngĩ?”
4Yesũ amasũngĩa atĩĩ, “Syokai mũkatavye Yoana maũndũ ala mwĩw'ĩte na mwonete: 5#Ĩsa 35.5-6; 61.1 Andũ meĩ ilalinda, yu nĩmekwona nthĩ; ala meĩ athũku maũũ, nĩmekũthi nesa; andũ meĩ awau mangũ, nĩmavoetw'e makathea. O ta ũu, andũ meĩ au matũ, yu nĩmekwĩw'a nthĩ; andũ meĩ akw'ũ, nĩmasyũkĩtw'e, na ngya nitavĩtw'e Ũvoo Mũseo. 6Nĩ mũathime mũndũ ũla ũtethĩawa na nzika ĩũlũ wakwa!”
7Amanyĩw'a asu mamina kũthi, Yesũ nĩwambĩĩie kũtavya ĩkomano ya andũ ĩũlũ wa Yoana aiyĩa atĩĩ, “Yĩla mwaendaa kũla kwĩ Yoana weũnĩ mweekwatasya mwĩthi kwona kyaũ? Mweekwatasya kwona o kaũseki keũthingithangw'a nĩ kĩseve? 8Nĩ kyaũ ĩndĩ mwaendaa kwona? Nĩ mũndũ wĩkĩĩte ngũa sya thooa mũnene? Aiee, andũ ala mekĩaa ngũa sya mũthemba ũsu mekalaa nyũmbanĩ sya asumbĩ. 9Kwoou mwaendaa kwona kyaũ? Kwona mwathani? Ĩĩ, nĩw'o; ĩndĩ ekai nĩmũtavye, mwoonie mũndũ mũnene mũno kwĩ mwathani. 10#Mal 3.1 Yoana nĩwe ũla Ngai ũneenete ĩũlũ wake Maandĩkonĩ Matheu akasya atĩĩ, ‘Nĩngũtũma mũtũmwa wakwa athi mbee waku akaũseũvĩsye nzĩa!’ 11Nĩmũtavya w'o, katĩ wa andũ ala maasyawa, vai ũmwe waaĩthĩwa e mũnene kwĩ Yoana Mũvatisi. Ĩndĩ ũla wosawa ta we mũnini ũsumbĩnĩ wa ĩtu, nĩ mũnene kũte Yoana. 12#Lk 16.16 Kuma ĩvinda yĩla Yoana Mũvatisi watavanasya kũvika o na yu, ũsumbĩ wa ĩtu nũtatĩte kũkitwa ndũkaendee, na andũ me na vinya mendaa kũwosa na kĩthũi. 13Mbee wa ũtavany'a wa Yoana, momanyĩsyo ma athani na Mĩao ya Mwose, syĩthĩĩtwe iiweta ĩũlũ wa kũka kwa ũsumbĩ wa ĩtu. 14#Mal 4.5; Mat 17.10-13; Mk 9.11-13 Ethĩwa nĩmwĩyũmbanĩtye kũiĩkĩĩa, Yoana nĩwe mwathani Eliya ũla wawetiwe kana akooka. 15Ũla wĩ kũtũ nĩew'e.
16“Ĩndĩ ndonya kũelekany'a andũ ma ĩvinda yĩĩ na kyaũ? Mavw'ana ta syana iilyĩ nthĩ ndũnyũ, imwe iyĩta ila ingĩ ikĩsyĩa atĩĩ, 17‘Twamwinĩa wathi wa ũtanu, na mwalea kũsũnga! Twamwinĩa wathi wa kĩmako, na mwalea kũĩa!’ 18Yĩla Yoana wookie, ndaĩsaa lĩu na ndanyusaa ndivai, na andũ mambĩĩa kwasya atĩĩ, ‘Alikĩtwe nĩ ĩimũ.’ 19Yĩla Mwana wa Mũndũ nake wũkie aiya lĩu na kũnyw'a ndivai, mwambĩĩa kwasya atĩĩ, ‘Kwa sisyai mũndũ ũũ! Nĩ mwendi wa kũya na nĩ mũnywi, o na atindanasya na aumĩthya ma koti na eki ma naĩ!’ Ĩndĩ ũĩ wa Ngai wonanaw'a kwĩthĩwa wa w'o kwĩsĩla mekonĩ ma w'o.”
Ndũa ila Itaaĩtĩkĩla Ũvoo wa Yesũ Iyĩumanĩwa
(Lk 10.13-15)
20Andũ ma ndũa ila Yesũ weekie syama ila mbingĩ mayaaĩlila kwondũ wa naĩ syoo, na kwoou Yesũ ambĩĩa kũumanĩa ndũa isu ayasya: 21#Ĩsa 23.1-18; Esek 26.1—28.26; Yoe 3.4-8; Amo 1.9-10; Nzek 9.2-4 “Kyeva nĩ kwenyu inyw'ĩ andũ ma Kolasinĩ, na kyeva nĩ kwenyu inyw'ĩ andũ ma Mbethisaita! Kethĩwa syama ila syeekiwe kwenyu syeekiwe Tile na Sitoni, andũ ma ndũa isu methĩwa meekĩie ngũa ngaamu sya makunia tene, na kwĩyũmbanga mũu monany'e kana nĩmeelila kwondũ wa naĩ syoo. 22Kwoou ekai nĩmũtavye, Mũthenyanĩ wa Ũsilĩlo andũ ma Tile na ma Sitoni makakwata ũsilĩlo mũninangi kwĩ inyw'ĩ. 23#Ĩsa 14.13-15; Mwa 19.24-28 Nenyu andũ ma Kavelinaũmu, ko mũkwona ta mũkanengwa ndaĩa ĩla nene kũya ĩtunĩ? Aiee! Mũkatheew'a vala maveva ma ala akw'ũ mekalaa. Nũndũ kethĩwa syama ila syeekiwe ndũanĩ ĩno yenyu syeekiwe Sondomu, ndũa ĩsu yĩthĩwa yĩ o vo o na yu. 24#Mat 10.15; Lk 10.12 Kwoou ekai nĩmũtavye, Mũthenyanĩ wa Ũsilĩlo, andũ ma Sondomu makanengwa ũsilĩlo mũninangi kwĩ inyw'ĩ.”
Yesũ Aithokya Andũ Mathi vala Ũĩ
(Lk 10.21-22)
25Ĩvindanĩ yĩu Yesũ nĩwaisye atĩĩ, “Asa, Mwĩai wa ĩtu na nthĩ, nĩngũũtũngĩa mũvea nĩkwĩthĩwa nĩwavuanĩisye andũ mate asomu maũndũ ũtaavuanĩsya andũ oĩ na asomu. 26Ĩĩ, Asa, ũu nĩw'o wendie maũndũ methĩwe mailyĩ.
27 #
Yoa 3.35; 1.18; 10.15 “Nĩnĩnengetwe maũndũ onthe nĩ Asa wakwa, na no we e weka ũmwĩkuũĩte Mwana. O ta ũu, vai mũndũ ũmwĩkuũĩte Asa ate o Mwana, na ĩndĩ ala Mwana wanyuva amony'e ũndũ Asa ũilyĩ.
28“Ũkai kwakwa inyw'onthe ala mũnoetw'e nĩ kũkua mĩio mĩito, nakwa nĩngũmũthũmũsya. 29#Yel 6.16 Ĩyovei ĩsoki yakwa na mũyĩmanyĩsya kuma vala nĩĩ, nũndũ nyie nĩ mũuu na nĩ na wĩnyivyo ngoonĩ, nenyu mũkoonea mathayũ menyu ũthũmũo. 30Nũndũ ĩsoki yakwa yĩ laisi kũkua, naw'o mũio wakwa nĩ mũvũthũ.”
Currently Selected:
Mat 11: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
