Mat 10
10
Atũmwa Ĩkũmi na Elĩ ma Yesũ
(Mk 3.13-19; Lk 6.12-16)
1Yesũ nĩwametie amanyĩw'a make ĩkũmi na elĩ moke vala ũĩ, na amanenga ũkũmũ wa kũlũngya maimũ, na kũvosya andũ mowau ma kĩla mũthemba, o vamwe na iema sya mĩthemba yonthe. 2Masyĩtwa ma atũmwa asu ĩkũmi na elĩ nĩmo aa: Wa mbee nĩ Simioni, ũla wĩtawa Vetelo, na Endelea mwana-a-inyia; Yakovo na Yoana mwana-a-inyia ala nĩ ana ma Nzevetii; 3Vilivũ na Mbatholomiũ; Tomasi na Mathayo ũla waĩ mumĩthya wa koti. Yakovo mwana wa Aveasi na Thateũsi; 4Simioni Mũkanaani#10.4 Mũkanaani: Ũalyũlo wa ndeto ĩno nĩ Mũndũ ũla wendete nthĩ yake, na wateteaa na kwĩanĩsya mĩao ya Ayuti na Yutasi Ĩsikalioti ũla wesie kũmũthoosya Yesũ.
Yesũ Aitũma ala Atũmwa Ĩkũmi na Elĩ
(Mk 6.7-13; Lk 9.1-6)
5Yesũ nĩwatũmie atũmwa asu ĩkũmi na elĩ na ameaĩa aimea atĩĩ, “Mũikatate kũthi ndũanĩ sya Andũ-ma-mbaĩ-ingĩ, kana kũlika ndũanĩ sya Asamalia. 6Endai kwa andũ ma Ĩsilaeli ala mailyĩ ta ndĩthya ya malondu mau. 7#Lk 10.4-12 Mũendete matavasyei mũimea atĩĩ, ‘Ũsumbĩ wa ĩtu nĩ mũthengeeu!’ 8Vosyai andũ ala awau, na mũisyũkya ala akw'ũ. O ta ũu vosyai andũ ala mawaĩte mangũ na mũilũngya maimũ. Mwanengwa ũkũmũ ũsu mana, kwoou ĩkai maũndũ asu mũtekũĩvĩthya kĩndũ. 9Mũikakue mbesa sya mũthemba o na wĩva ngusunĩ syenyu; 10#1Ako 9.14; 1Tim 5.18 o na mũikakue mũvuko wa kũthi kyalo kana ngũa ya ũkũany'a, kana iatũ, kana ndata. Mũthũkũmi nĩwaĩlĩte kũnengwa kĩla wĩ na vata nakyo.
11“Mwathi mĩsyĩnĩ kana ndũanĩ o na yĩva, manthaai mũndũ mũseo ũla wĩyũmbanĩtye kũmũthokya, na mũyĩkala kwake kũvika yĩla mwĩuma vau. 12Yĩla mũũlika mũsyĩ, kethasyai ene ma mũsyĩ ũsu ngethi ya mũuo. 13Ethĩwa nĩmeũmũthokya, mũuo wenyu ũkatiawa namo, ĩndĩ malea kũmũthokya, mũuo ũsu ũkamũsyokeaa. 14#Meko 13.51 Ethĩwa ve andũ ma mũsyĩ kana ma ndũa matakamũthokya, mwĩuma vo na mũitia mwatuanga kĩtoo kĩla kĩ maũũnĩ menyu. 15#Mat 11.24; Mwa 19.24-28 Nĩmũtavya w'o, Mũthenyanĩ wa Ũsilĩlo, andũ ma Sondomu na Ngomola makakwata ũsilĩlo mũninangi kũte andũ ma ndũa ĩsu.
Mathĩna Ala Mokĩte
(Mk 13.9-13; Lk 21.12-17)
16 #
Lk 10.3
“Ĩthukĩĩsyei! Nyie nĩmũtũma ta malondu katĩ wa nzũi. Ĩthĩwai mwĩsũvĩĩte ta nzoka, na mwĩ auu ta ĩvũĩ. 17#Mk 13.9-11; Lk 12.11-12; 21.12-15 Ĩsũvĩanei na andũ, nũndũ makamũkwata na kũmũtwaa kotinĩ, na makamũvũĩa na mĩsalisa nyũmbanĩ syoo sya kũthaithĩa na kũmbanĩa. 18O ta ũu, nũndũ wa kwĩthĩwa mwĩ aatĩĩi makwa, mũkatwawa mbee wa makavana na asumbĩ. Nĩvo ĩndĩ mwĩmatavya Ũvoo Mũseo me na Andũ-ma-mbaĩ-ingĩ. 19Yĩla memũtwaa kotinĩ, mũikaatinde mũithĩnĩka nĩ kĩla mwĩthi kũneena na ũndũ mwĩkĩneena. Ĩvinda yĩu yavika, mũkanengwa kĩla mwĩneena. 20Nũndũ ndeto ila mwĩneena iikethĩwa syĩ syenyu; Veva kuma kwa ĩthe wenyu nĩwe ũkethĩwa aineena kwĩsĩla vala mũĩ.
21 #
Mk 13.12; Lk 21.16 “Mũndũ akanengane mwana-a-inyia oawe, ĩthe wa mwana akanengane mwana wake oawe. O ta ũu syana ikookĩla ilee asyai masyo na kũmanengane moawe. 22#Mat 24.9,13; Mk 13.13; Lk 21.17 Nenyu mũkamenwa nĩ kĩla mũndũ nũndũ wakwa, ĩndĩ ũla ũkomĩĩsya kũvika mũminũkĩlyo akatangĩĩwa. 23Yĩla mambĩĩa kũmũthĩnĩsya ndũanĩ ĩmwe, kĩaai mũkathi ĩngĩ. Nĩmũtavya w'o, mũikakomany'a kũtavany'a ndũanĩ syonthe sya Ĩsilaeli Mwana wa Mũndũ atanamba kũka.
24 #
Lk 6.40; Yoa 13.16; 15.20 “Vai mũmanyĩw'a mũnene kwĩ mũmanyĩsya wake, na vai mũthũkũmi wĩthĩwa e mũnene kwĩ mũnene wake. 25#Mat 9.34; 12.24; Mk 3.22; Lk 11.15 Mũmanyĩw'a nĩwaĩlĩte kwĩanĩwa nĩ kwĩkala ta mũmanyĩsya wake, na mũthũkũmi ayĩanĩwa nĩ kwĩkala ta mũnene wake. Kwoou, ethĩwa andũ makeeta mwene wa mũsyĩ Mbeelisevuli, andũ ala angĩ ma mũsyĩ ũsu makeetwa masyĩtwa mathũku mbeange!
Ũla Inyw'ĩ Mwaĩlĩte Kũkĩa
(Lk 12.2-7)
26 #
Mk 4.22; Lk 8.17 “Kwoou mũikakĩe andũ! Vai ũndũ mũvithe ũtakaumbũwa, kana kĩmbithĩ kĩtakamanyĩka. 27Kĩla ngũmũtavya twĩ kĩvindunĩ, tavany'ai kwĩ kyeni, na kĩla ngũmũtavya na kĩwe, tavanĩsyai kĩtaanĩ. 28Mũikakĩe andũ, nũndũ mo matonya o kũmũaa, ĩndĩ maitonya kwananga thayũ. Mwaĩlĩte kũkĩa Ngai e weka nũndũ nĩwe ũtonya kũmũaa na kwanangĩa mathayũ menyu ĩianĩ ya mwaki. 29O na kau tũsũni twĩlĩ tũthooawa tũvesa tũnini, vai kamwe katw'o kakusaa Ĩthe wenyu atekwenda. 30Inyw'ĩ o nenyu, Ngai nĩwĩsĩ ũtalo wa nzw'ĩĩ syenyu. 31Kwoou mũikakĩe; mwĩ vata mũno kwĩ tũsũni o na twingĩvĩte ata!
Kũmũkũsĩĩa na Kũmũkaĩa Klĩsto
(Lk 12.8-9)
32“Mũndũ ũla ũkũsĩĩaa andũnĩ kana nĩ mũatĩĩi wakwa, o nakwa ngamũkũsĩĩa vala ve Ĩthe wakwa ũla wĩ ĩtunĩ nasye kana nĩ mũatĩĩi wakwa. 33#2Tim 2.12 Ĩndĩ ũla wĩkaĩa mbee wa andũ asye ndambĩsĩ, o nakwa ngamũkaĩa mbee wa Ĩthe wakwa ũla wĩ ĩtunĩ nasye ndimwĩsĩ.
Yesũ Aetie Kaũ Katĩ wa Andũ
(Lk 12.51-53; 14.26-27)
34“Mũikasũanĩe ta nũkĩte kũũ ĩũlũ wa nthĩ kũete mũuo. Aiee, ndyũkĩte kũete mũuo katĩ wa andũ, nĩetete kaũ. 35#Mika 7.6 Nũkĩte kũtuma mwana akwatya kaũ na ĩthe, na mwĩĩtu akwatya kaũ na nyinyia, na mũka-a-mwana akwatya kaũ na inyia wa mũũme. 36Amaitha ma mũndũ ala anene makeethĩwa ne o andũ ma mũsyĩ.
37“Mũndũ ũla ũmwendaa ĩthe kana nyinyia kũthonoka ũndũ ũmbendete, ndaĩlĩtwe nĩ kwĩthĩwa mũmanyĩw'a wakwa. Na ũla ũmwendaa mwana wake kana mwĩĩtu wake kũthonoka ũndũ ũmbendete, ndaĩlĩtwe nĩ kwĩthĩwa mũmanyĩw'a wakwa. 38#Mat 16.24; Mk 8.34; Lk 9.23 O ta ũu, ũla ũtakuaa ngelany'o yake na kũngatĩĩa ndaĩlĩtwe nĩ kwĩthĩwa mũmanyĩw'a wakwa. 39#Mat 16.25; Mk 8.35; Lk 9.24; 17.33; Yoa 12.25 Mũndũ ũla wendaa kũsũvĩa thayũ wake, akawasya, ĩndĩ ũla ũkasya thayũ wake kwondũ wakwa, akawona ĩngĩ.
Ĩtuvi ya ala Mathokanasya
(Mk 9.41)
40 #
Mk 9.37; Lk 9.48; 10.16; Yoa 13.20 “Mũndũ ũla ũmũthokasya, ethĩawa anthokya; na ũla ũnthokasya, ethĩawa athokya ũla ũndũmĩte. 41Ũla ũthokasya mwathani nũndũ wa kwĩthĩwa nĩ mwathani, akanengwa ĩtuvi yĩana o ya mwathani. Nake ũla ũthokasya mũndũ mũlũngalu nũndũ wa kwĩthĩwa nĩ mũndũ mũlũngalu, akakwata ĩtuvi ya mũndũ mũlũngalu. 42Nĩmũtavya w'o, mũndũ o na wĩva ũla ũkanenga ũmwe wa amanyĩw'a aa makwa kĩndũ, o na ethĩwa no kĩw'ũ kya ũnyw'a nũndũ wa kwĩthĩwa nĩ mũmanyĩw'a wakwa, ũsu Ngai akamũnenga ĩtuvi.”
Currently Selected:
Mat 10: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
