Mat 14
14
Kĩkw'ũ kya Yoana Mũvatisi
(Mk 6.14-29; Lk 9.7-9)
1Ĩvindanĩ o yĩu, Elote ngavana wa Kalilii, nĩweewie nguma ya ũthũkũmi wa Yesũ, 2na amea athũkũmi make atĩĩ, “Mũndũ ũsu kwa w'o nĩ Yoana Mũvatisi ũsyũkĩte kuma kwa akw'ũ, na nĩkyo kĩtumi wĩ na ũtonyi ũũ wa kwĩka syama.”
3 #
Lk 3.19-20
Elote nĩwe waĩtye Yoana nĩakwatwe, ovanw'e na ayĩkw'a yela. Eekie ũu nũndũ wa Elotiasi ũla waĩ mũka wa Vilivũ mwana-a-inyia wa Elote, nũndũ 4#Ali 18.16; 20.21 navu ĩtina, Yoana nĩwatindĩaa kũkany'a Elote aimwĩa atĩĩ, “Ti waĩlu kwaku kwĩthĩwa ũmũtwaĩte Elotiasi.” 5Elote nĩwendaa kũaa Yoana, ĩndĩ nĩwakĩaa Ayuti nũndũ mamwosaa Yoana kwĩthĩwa nĩ mwathani.
6Yĩla ĩvinda ya Elote ya kũtanĩa mũthenya wa kũsyawa kwake yavikie, mwĩĩtu wa Elotiasi nĩwookie na atanĩthya andũ ala maĩ vo kwa kũsũnga. Elote nĩweewie mũyo mũno, 7na amwatha akĩmwĩa atĩĩ, “Nĩngwĩvĩta kana nĩngũũnenga kĩndũ o na kĩva kĩla ũkũmbĩtya!”
8Nake mwĩĩtu aatĩĩe woni wa nyinyia amwĩa atĩĩ, “Nĩenda ũnenge oyu mũtwe wa Yoana Mũvatisi wĩ ĩsaaninĩ!”
9Ũndũ ũsu nĩweew'ĩthisye mũsumbĩ woo mũno, ĩndĩ nũndũ nĩweevĩtĩte e mbee wa aeni make, eeyĩaa mwĩĩtu ũsu eanĩĩw'e kwenda kwake. 10Kwoou atũma mũndũ athi yela akatile Yoana mũtwe. 11Mũtwe ũsu nĩwaetiwe wĩ ĩsaaninĩ na wanengwa ũla mwĩĩtu, nake atwaĩa nyinyia. 12Amanyĩw'a ma Yoana nĩmaendie moosa mwĩĩ wake na maũthika. Ĩtina wa ũu, nĩmaendie vala ve Yesũ na mamũtavya ũndũ kweekĩka.
Yesũ Aivũnĩthya Ĩkomano ĩnene ya Andũ
(Mk 6.30-44; Lk 9.10-17; Yoa 6.1-14)
13Yĩla Yesũ wakwatie ũvoo ũsu wa kana Yoana nĩwũaiwe, nĩwalikile ĩsiwanĩ e na amanyĩw'a make, mathi vandũ vate andũ nĩ kana Yesũ atonye kwĩthĩwa vandũ e weka. Yĩla andũ meewie kana Yesũ nĩwathi, nĩmaumie ndũanĩ syoo mamũatĩĩa mesĩlĩte ũtumonĩ. 14Yesũ ayuma ĩsiwanĩ nĩwoonie ĩkomano ĩnene ya andũ na amew'ĩa ĩnee. Nĩwavoisye andũ ala maetetwe vau me awau.
15Kũkilĩlye kũtuka, amanyĩw'a nĩmaendie vala ve Yesũ na mamwĩa atĩĩ, “Ũkw'a vandũ vaa tũĩ vaitwĩe andũ na nĩkwambĩĩa kũtuka; ekana na andũ aa mathi motũinĩ makethooee lĩu maye.”
16Yesũ amasũngĩa amea atĩĩ, “Vai vata wa kũmea nĩ mathi. Inyw'ĩ ene manengei kĩndũ maye!”
17Namo mamwĩa atĩĩ, “Twĩ na mĩkate o ĩtano na makũyũ elĩ vaa!”
18Yesũ amea atĩĩ, “Kwa sietei vaa.” 19Nĩweeaĩie andũ mekale nthĩ nyekinĩ, na ĩndĩ oosa ĩla mĩkate ĩtano na ala makũyũ elĩ. Asyaĩtye ĩũlũ ĩtunĩ, nĩwatũngĩie Ngai mũvea nũndũ wa lĩu ũsu, na atilanga mĩkate ĩsu na anenga amanyĩw'a make maaĩe andũ. 20Andũ onthe nĩmaĩe mavũna ki, na amanyĩw'a moombany'a ilungu ila syatialile sya lĩu ũsu syausũa ikavũ ĩkũmi na ilĩ. 21Ũtalo wa aũme ala maĩe waĩ ta ngili itano, ũtalo wa aka na syana ũte vo.
Yesũ Akinyĩlĩte Ĩianĩ ĩũlũ
(Mk 6.45-52; Yoa 6.15-21)
22Nĩvo ĩndĩ Yesũ wathing'ĩĩisye amanyĩw'a make malike ĩsiwanĩ maendae mũingo ũla ũngĩ wa ĩia, nake ayamba kũtiwa ombũũkye andũ menũke. 23Amina kũtaanĩsya na andũ, nĩwambatie kĩĩmanĩ e weka akavoye, na kwatuka e o vau e weka. 24Ĩvindanĩ yĩu, ĩsiwa yaĩ kũasa kuma ũtee wa ĩia, na nĩyookĩlangaw'a nĩ itulumo, nĩkwĩthĩwa kĩseve nĩkyauutanaa kyumĩte ngalĩko ĩla meelekele.
25Kũkilĩlye kũkya, kũtanamba kũtheatheana, Yesũ nĩwookie vala ve amanyĩw'a akinyĩlĩte ĩianĩ ĩũlũ. 26Yĩla amanyĩw'a mamwonie akinyĩlĩte ĩianĩ ĩũlũ, nĩmatelemile mũno na makayany'a nĩ w'ĩa mayasya atĩĩ, “Ĩimũ! Ĩimũ!”
27Ĩndĩ Yesũ aneena o kwa mĩtũkĩ amea atĩĩ, “Ĩthĩwai na ũkũmbaũ, ninyie. Ekai kũkĩa!”
28Vetelo amwĩa atĩĩ, “Mwĩai, ethĩwa kwa w'o nue, mbĩe nũke vau ũĩ nĩkinyĩle ĩianĩ ĩũlũ.”
29Yesũ amwĩa atĩĩ, “Na ndũke!” Kwoou Vetelo auma ĩsiwanĩ na akinyĩla ĩianĩ ĩũlũ aendete vala ve Yesũ. 30Ĩndĩ yĩla woonie itulumo syũkĩlanĩtye, akwatwa nĩ w'ĩa na ambĩĩa kũlika kĩw'ũnĩ nthĩnĩ. Nĩwakayie asya atĩĩ, “Mwĩai, ndangĩĩe!”
31Yesũ nĩwatambũũkisye kw'oko kwake mĩtũkĩ amũkwata na amwĩa atĩĩ, “Aaa! We mũndũ wa mũĩkĩĩo mũnini, wakwatwa nĩ nzika nĩkĩ?”
32Me elĩ nĩmalikile ĩsiwanĩ, na o vau kwa vau kĩuutani kyausya. 33Nĩvo ĩndĩ onthe ala maĩ ĩsiwanĩ mamũthaithie Yesũ mayasya atĩĩ, “O w'o ki, we wĩ Mwana wa Ngai!”
Yesũ Aivosya Awau Ngenesaleti
(Mk 6.53-56)
34Yesũ na amanyĩw'a make mamina kũinga ĩia nĩmavikie vandũ vetawa Ngenesaleti. 35Yĩla andũ ma kũu mamanyie kana nĩ Yesũ, nĩmatũmanĩĩisye kĩla vandũ kĩsionĩ kĩu, na andũ onthe ala maĩ awau maetwe vala ve Yesũ. 36Andũ nĩmamwĩsũvie Yesũ aeke awau asu makwate o na ethĩwa no mũthya wa ngũa yake, na onthe ala mamĩkwatie mavow'a.
Currently Selected:
Mat 14: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
