MALIKO 9
9
1Na amea, Nĩ w’o nĩngũmwĩa, Ve andũ amwe ma aa maũngeme vaa, ala matakasama kĩkw’ũ nongi, matanamba kwona ũsumbĩ wa Ngai wũkĩte na vinya.
Kũalyũka kwa mũvw’ano wake
(MATHAYO 17.1–13; Luka 9.28–36)
2Na matukũ thanthatũ mathela Yesũ oosa Vetelo, na Yakovo, na Yoana, ambata nao kĩĩmanĩ kĩtũlu me oka: na mũvw’ano wake waalyũka mene; 3na ngũa syake syakaka, syeeũva kw’ũ, ũndũ mũthambya o na wĩva kũũ nthĩ ũtatonya kweũvya. 4Na Eliya vamwe na Mose mamaumĩlĩa: nao nĩmaneenanasya na Yesũ. 5Na Vetelo asũngĩa na amwĩa Yesũ, Lavai, nĩ ũseo kwitũ kwĩthĩwa vaa: na twake malwanda atatũ; yĩmwe yĩthĩwe yaku, na yĩmwe ya Mose, na yĩmwe ya Eliya. 6Nũndũ ndaamanya ũndũ wa kũneena; nĩkwĩthĩwa nĩmalikilwe nĩ w’ĩa mũnene. 7#Mko 1.11; 2 Vet 1.17; Kũt 18.15; Meko 3.22.Na kwooka ĩthweo yamekĩa muunyĩ: na wasya wauma ĩthweonĩ, ũkyasya, Ũũ nĩwe Mwana wakwa mwendwa: mwĩw’ei we. 8Na mĩtũkĩ masisya kũũ na kũũ, na matyaona mũndũ ĩngĩ, ate o Yesũ weka vamwe nao.
9 #
Mko 8.30. Na makĩtheea kuma kĩĩmanĩ, ameaĩa maikatavye mũndũ maũndũ ala monie, mũvaka o yĩla Mwana wa mũndũ ũkathayũũka kuma kwa akw’ũ. 10Na masũvĩa ĩla ndeto, maikũlan’ya ene kwa ene ũndũ kũthayũũka kuma kwa akw’ũ kũilyĩ. 11Na mamũkũlya, makyasya, Nĩkĩ ĩndĩ aandĩki mekwasya mũvaka Eliya ambe kũka? 12#Mal 4.5; Isa 53.3.Na amea, Nĩ w’o Eliya nĩwũkĩte mbee, na kũtũnga maũndũ onthe kwĩthĩwa meũ: ĩndĩ kũandĩkĩtwe ata ũndũ wa Mwana wa mũndũ, kana akathĩnw’a na mathĩna maingĩ na kũlewa? 13#Mt 11.14; 1 Asu 19.2,10.Ĩndĩ nĩngũmwĩa kana Eliya nĩwokie, nao mamwĩkie o ũndũ mendie, o ũndũ waandĩkĩwe.
Kũvow’a kwa mwana waĩ ndaimoni
(MATHAYO 17.14–21; Luka 9.37–43)
14Na mavika vala ve amanyĩw’a, moona ĩkomano ĩnene yĩmathyũlũlũkĩte, na aandĩki maikũlangan’ya nao. 15Na oyu ĩkomano yonthe yamwona, yaseng’a mũno, na yasemba vala ũĩ yamũkethya. 16Na amakũlya ala aandĩki, Mwĩkũlan’ya nao ata? 17Na ũmwe wa ĩkomano amũsũngĩa, Mũmanyĩsya, nĩnakũetee mwana wakwa wĩ na veva ũtaneenaa; 18na o vala ũmũtwaaa nũũmũlumangan’ya na nthĩ: na ĩvũyũ nĩyĩũmuma, na nũnũkũvevetan’ya maeo, na nũnũkũsonzoma: na namatavya amanyĩw’a maku mawumye; na maemwa. 19Na amasũngĩa asya, Ũsyao ũũ ũte na mũĩkĩĩo, ngeethĩwa nenyu ĩvinda yĩana ata? Nĩmũmĩĩsya ĩvinda yĩana ata? Mũetei vaa nĩĩ. 20Na mamũete vala ũĩ: na amwona, oyu ũla veva wamũthingithangya mũno; na avalũka nthĩ, na eeyalalya akyumwa nĩ ĩvũyũ. 21Na akũlya ĩthe, Nĩ kuma ĩvinda yĩva akwatwa nĩ ũndũ ũũ? Na amwĩa, Kuma e mũnini. 22Na mavinda maingĩ nũmwĩkasya mwakinĩ, o na manzĩnĩ, ũmwanange: ĩndĩ ethĩwa nũtonya ũndũ, utwĩw’ĩe tei, noitũtethya. 23#Mko 11.23.Na Yesũ amwĩa, Ethĩwa we nũtonya! Maũndũ onthe nĩmatonyeka kwa ũla ũnũkũĩkĩĩa. 24#Lk 17.5.Na oyu ĩthe wa ũla mwana aneena na wasya mũnene, asya, Nĩngũĩkĩĩa; ndethya vala ndekũĩkĩĩa. 25Na yĩla Yesũ wonie kana ĩkomano yooka yĩsembete vamwe, akan’ya ũla veva mũvuku akĩwĩa, We veva ũtaneenaa na ũtew’aa, nĩngũkwĩaĩa, mume, na ndũkaamũlike ĩngĩ. 26#Mko 1.26.Na wakaya, na wamũthingithangya mũno, wamuma: na ũla mwana eethĩwa ta wak’wa; mũvaka ala aingĩ masya, Nĩwakw’a. 27Ĩndĩ Yesũ amũkwata kw’oko amũkĩlya; nake aũngama. 28Na Yesũ avota nyũmba, amanyĩw’a make mamũkũlya me nzama, Nĩkĩ ithyĩ tũinatonya kũwumya? 29Na amea, Mũthemba ũũ ndumĩka kwa ũndũ o na wĩva, ate o kwa kũvoya na kũtĩĩa ũya.
Yesũ akyathana kĩkw’ũ kyake ya kelĩ
(MATHAYO 17.22–23; Luka 9.43–45)
30 #
Yoa 7.1. Na mauma vo, mavĩtĩla katĩ wa nthĩ ya Kalilii; nake ndendaa mũndũ o na wĩva amanye ũu. 31#Mko 8.31; 10.32–34.Nũndũ amamanyĩasya amanyĩw’a make, na kũmea, Mwana wa mũndũ nũnũkũnenganwe mokonĩ ma andũ, na makamũaa; na mamũaa, ĩtina wa matukũ atatũ akathayũũka. 32#Lk 9.45; 18.34.Ĩndĩ maiaamanya ndeto ĩsu na makĩa kũmũkũlya.
Ũmanyĩsyo wa wĩnyivyo
(MATHAYO 18.1–5; Luka 9.46–48)
33 #
Mt 17.24. Na mavika Kavelinaumi: na yĩla waĩ nyũmba amakũlya, Mwĩsũanĩaa ata mwĩ nzĩanĩ? 34Ĩndĩ mavindya: nũndũ nĩmakananĩaa ene kwa ene me nzĩanĩ, nũũ ũla mũnene. 35#Mko 10.44.Na ekala nthĩ, na ameta ala ĩkũmi na elĩ; na amea, Ethĩwa mũndũ nũkwenda kwĩthĩwa wa mbee, akeethĩwa e ĩtina kwĩ onthe, na mũthũkũmi wa onthe. 36#Mko 10.16.Na oosa kana kanini, akekalya katĩ woo: na akavĩtĩĩsya moko, amea, 37#Mt 10.40; Yoa 13.20.O ũla ũkosa kamwe ka syana nini iilyĩ kaa syĩtwanĩ yakwa, embosa nyie: na o ũla ũnũũmbosa nyie, ndeũmbosa nyie, ĩndĩ nĩ ũla wandũmie.
Ũmanyĩsyo ũndũ wa kũmĩanĩsya na andũ ala angĩ
(Luka 9.49–50)
38 #
Mot 11.27–28. Yoana amwĩa, Mũmanyĩsya, nĩtũnoonie mũndũ akyumya ndaimoni na syĩtwa yaku; na twamũvata, nĩkwĩthĩwa ndeũtũvikĩla. 39#1 Ako 12.3.Ĩndĩ Yesũ asya, Mũĩkamũvate: nĩkwithĩwa vai mũndũ ũla ũkeka wĩa wĩ vinya na syĩtwa yakwa, na oyu mĩtũkĩ akaneenea naĩ. 40#Mt 12.30.Nũndũ ũla ũte na ũndũ naitũ e ngalĩ ĩ yaitũ. 41#Mt 10.42.Nũndũ o ũla ũkamũnenga kĩkombe kya manzĩ mũnyw’e, nĩkwĩthĩwa mwĩ ma Klĩsto, nĩ w’o nĩngũmwĩa ndakaĩwa nĩ ĩtuvi yake.
Kũsũvĩa kũlulutĩkya angĩ
(MATHAYO 18.6–9; Luka 17.1–2)
42Na o ũla ũkalulutĩkya kamwe ka tũũ tũnini tũla tũmbĩtĩkĩlaa, nĩ kavaa kwake kwoveewa ngingo ĩvia ĩnene ya kũthia, na akĩkw’a ũkanganĩ. 43#Mt 5.30.Na ethĩwa kw’oko kwaku nĩkũũkũlulutĩkya, kũtile: nĩ ũseo kwaku ũlike thayũnĩ na kĩthu kya kw’oko, kwĩ kũthi Ngienanĩ wĩ na moko elĩ, mwakinĩ ũla ũte ĩndĩ ũkavoa; 44(vala kĩinyũ kyoo kĩtakw’a, na vala mwaki ũtavoa). 45Na ethĩwa kũũ kwaku nĩkũũkũlulutĩkya, kũtile: nĩ ũseo kwaku ũlike thayũnĩ na kĩthu kya kũũ, kwĩ ũkĩkw’a Ngienanĩ wĩ maũũ elĩ, mwakinĩ ũte ĩndĩ ũkavoa: 46(vala kĩinyũ kyoo kĩtakw’a, na vala mwaki ũtavoa). 47#Mt 5.29.Na ethĩwa itho yaku nĩyĩũkũlulutĩkya, yumye: nĩ ũseo kwaku ũlike ũsumbĩnĩ wa Ngai wĩ na nthongo, kwĩ ũkĩkw’a Ngienanĩ wĩ na metho elĩ: 48#Isa 66.24.vala kĩinyũ kyoo kĩtakw’a, na vala mwaki ũtavoa.
Ũndũ wa mũnyũ
(MATHAYO 5.13; Luka 14.34–35)
49 #
Ali 2.13. Nũndũ kĩla mũndũ akekĩwa mũnyũ nĩ mwaki, na kĩla nthembo ĩkasamĩthw’a mũnyũ nĩ mũnyũ. 50#Mt 5.13; Lk 14.34; Ako 4.6.Mũnyũ nĩ mũseo: ĩndĩ mũnyũ wathela mũsamo waw’o, mũkasamĩthya na kyaũ? Ĩthĩwai na mũnyũ nthĩnĩ wenyu, na ĩkalai na mũuo inyw’ĩ kwa inyw’ĩ.
Currently Selected:
MALIKO 9: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
