MALIKO 10
10
Ũkũlyo ũndũ wa kũleana
(MATHAYO 19.1–12; Luka 16.18)
1 #
Mko 9.33. Na ookĩla auma vo, athi mĩvakanĩ ya Yutia, na mũingo wa Yolotani: na makomano mamũkomanĩa ĩngĩ; na amamanyĩsya ĩngĩ, o ũndũ wakothaa kwĩka. 2Na Avalisi mooka vala ũĩ, mamũkũlya, makĩmũtata, Nĩkwosana na ĩla mĩao mũndũ kũmũeka mũka wake? 3Nake asũngĩa, na amea, Mose amwĩaĩe ata? 4#Kũt 24.1; Mt 5.31,32.Masya, Mose nĩwetĩkĩlile valũa wa kũtaanĩsya ũandĩkwe, na kũmũeka. 5Ĩndĩ Yesũ amea, Nĩ kwondũ wa wũmũ wa ngoo syenyu wamũandĩkĩe mwĩao ũsu. 6#Mwa 1.27.Ĩndĩ kuma mwambĩlĩlyonĩ wa syĩndũ kũmbwa, Ngai oombie mũũme na mũka. 7#Mwa 2.24.Kwondũ wa ũu mũndũ akatia ĩthe na nyinyia, na akalũman’ya na mũka wake; 8namo elĩ makeethĩwa mwĩĩ ũmwe: o na maikethĩwa me elĩ ĩngĩ, ĩndĩ nĩ mwĩĩ ũmwe. 9Ĩndĩ ala Ngai ũlũmanĩtye, mũndũ ndakamataan’ye. 10Na me nyũmbanĩ amanyĩw’a mamũkũlya ĩngĩ ũvoo ũsu. 11#Lk 16.18.Na amea, O ũla ũkamũeka mũka wake, na aitwaa ũngĩ, nĩwamũvĩtanĩsya mũka kwa kwĩka ũlaalai: 12na ethĩwa mũka ewe akamũeka mũũme, na aitwawa nĩ ũngĩ, nũnũũlaalaa.
Yesũ aiathima syana nini
(MATHAYO 19.13–15; Luka 18.15–17)
13Na mamũteee syana nini nĩ kana aikiite; na amanyĩw’a mamakan’ya. 14Ĩndĩ Yesũ oona ũu, athatw’a, na amea, Iekeĩ syana nini syũke kwakwa; mũikaivate: nũndũ ũsumbi wa Ngai nĩ wa ala mailyĩ ta isu. 15#Mt 18.3.Nĩ w’o nĩngũmwĩa, O ũla ũtosaa ũsumbĩ wa Ngai ta kana kanini, ndakalika vo nongi. 16#Mko 9.36.Na aivĩtĩĩsya moko make, na aiathima, akĩsilĩĩla moko ĩũlũ wasyo.
Mwanake mũthwii aimantha thayũ ũtathela
(MATHAYO 19.16–22; Luka 18.18–23)
17Na akĩthi na nzĩa, mũndũ ũmwe ooka vala ũĩ asembete, na amũtulĩlya ndu, amũkũlya, Mũmanyĩsya mũseo, nĩke ũndũ wĩva nĩ kana nĩtiĩwe thayũ ũtathela? 18Na Yesũ amũkũlya, Nĩkĩ ũũmbĩta mũseo? Kũi mũseo ate o ũmwe, nake nĩ Ngai. 19#Kuma 20.12–17; Kũt 5.16–20; 24.14.Nũmĩsĩ ĩla mĩao, Ndũkoae, Ndũkalaalae, Ndũkoye, Ndũkaneene ũkũsĩ wa ũvũngũ, Ndũkavutane, Taĩa au na mwenyu. 20Nake amwĩa, Mũmanyĩsya, maũndũ asu onthe nĩnamakwatie kuma nĩ mũnini. 21#Mko 8.34; Mt 10.38.Na Yesũ aimũsisya amwenda, na amwĩa, Ve ũndũ ũmwe ũtiele: thi, ũkathoosye o ila wĩ nasyo, ũnenge ngya, na ũkethĩwa na ũthwii ĩtunĩ: na ĩndĩ ũkyũka, ũngatĩĩe. 22Ĩndĩ ũthyũ wake waalyũka eew’a ndeto ĩsu, nake athi na woo: nĩkwĩthĩwa aĩ na ũthwii mwingĩ.
Mĩisyo ya ũthwii
(MATHAYO 19.23–30; Luka 18.24–30)
23Na Yesũ asisya ngalĩ syonthe, na amea amanyĩw’a make, Ko nĩ vinya ala athwii kũlika ũsumbĩnĩ wa Ngai! 24#Sav 62.10; 1 Tim 6.17.Na amanyĩw’a make maseng’a nũndũ wa ndeto syake. Indĩ Yesũ asũngĩa ĩngĩ, amea, Syana, ko nĩ ũndũ wĩ vinya ala mekũĩkĩĩa ũthwii makĩlika ũsumbĩnĩ wa Ngai! 25Nĩ ũvũthũ ngamĩle kũvotela kalimanĩ ka singano, kwĩ mũndũ mũthwii kũvota ũsumbĩnĩ wa Ngai. 26Na maseng’a mũno mũnene, makĩmwĩa, Nũũ ĩndĩ ũtonya kũtangĩĩwa? 27#Mwa 18.14; Yovu 42.2.Na Yesũ amasisya, amea, Kwa andũ ndũtonyeka, ĩndĩ kwa Ngai ti ũu: nũndũ maũndũ onthe nĩmatonyeka kwa Ngai. 28Vetelo ambĩlĩlya kũmwĩa, Sisya, ithyĩ nĩtũtiĩte syonthe na twakũatĩĩa. 29Yesũ asya, Nĩ w’o nĩngũmwĩa, Kũi mũndũ waatia nyũmba, kana ana‐a‐inyia, kana eĩtu‐a‐inyia, kana nyinyia, kana ĩthe, kana syana, kana mĩũnda, kwondũ wakwa, na kwondũ wa ũvoo mũseo, 30ũtakosa yu ĩvinda yĩĩ vandũ va kĩmwe ĩana, nyũmba, na ana‐a‐inyia, na eĩtu‐a‐inyia, na aanyinyia, na syana, na mĩũnda, vamwe na mathĩna; na ĩvinda yĩla yũkĩte thayũ ũtathela. 31Ĩndĩ aingĩ me mbee makethĩwa me ĩtina; na ala me ĩtina makethĩwa me mbee.
Yesũ akyathana kĩkw’u kyake ya katatũ
(MATHAYO 20.17–19; Luka 18.31–34)
32 #
Yoa 11.16,55; Mko 9.31. Na me nzĩanĩ, mambatĩte Yelũsaleme, Yesũ eethĩwa amatongoesye: na maseng’a; na mamũatĩĩa me na w’ĩa. Na oosa ĩngĩ ala ĩkũmi na elĩ, n ambĩlĩlya kũmatavya maũndũ ala makamũkĩtĩkĩa, 33akyasya, Sisyai, nĩtũkwambata Yelusaleme; na Mwana wa mũndũ akanenganwe mokonĩ ma athembi anene na aandĩki; nao makamũsilĩla oawe, na makamũnengane mokonĩ ma Andũ‐ma‐mbaĩ‐ingĩ; 34na makamũthekeea na kĩvũthya, na kũmũtw’ĩlanga mata, na kũmũvũa, na kũmũaa; na ĩtina wa matukũ atatũ akathayũũka.
Kwĩyĩtĩsya ndaĩa ya nthĩ
(MATHAYO 20.20–28; Luka 22.24–27)
35Na Yakovo na Yoana, ana ma Sevetii, mamũthengeea, makĩmwĩa, Mũmanyĩsya, nĩtũkwenda ũtwĩke o ũla tũũkũvoya. 36Na amakũlya, Mwĩenda nĩmwĩke ata? 37Nao mamwĩa, Tũnenge ithyĩ kwĩkala, ũmwe ngalĩ ya kw’oko kwaku kwa aũme, na ũmwe ngalĩ ya kw’oko kwaku kwa aka, ũtheunĩ waku mũtisu. 38#Mko 14.36; Lk 12.50; Alo 6.3.Ĩndĩ Yesũ amea, Mũtyĩsĩ ũndũ mũũvoya. Nĩmũtonya kũnyw’a kĩkombe kĩla nĩnyw’a nyie, kana kũvatiswa na ũvatiso ũla nĩvatiswa naw’o? 39#Meko 12.2; Ũvu 1.9.Na mamwĩa, Nĩtũtonya. Na Yesũ amea, Kĩkombe kĩla nĩnyw’a mũkanyw’a; na ũvatiso ũla nĩvatiswa naw’o mũkavatiswa naw’o: 40ĩndĩ kwĩkala ngalĩ ya kw’oko kwakwa aũme, kana ngalĩ ya kw’oko kwakwa kwa aka, ti ũndũ wakwa kũnengane; ĩndĩ nĩ kwa ala maseũvĩw’e. 41Na ala ĩkũmi meew’a ũu, mambĩlĩlya kũmathatĩa Yakovo na Yoana. 42#Lk 22.25–27.Na Yesũ ameta moke vala ũĩ, na amea, Nĩmwĩsĩ kana ala matalawa kwĩthĩwa anene ĩũlũ wa Andũ‐ma‐mbaĩ‐ingĩ, nĩmasumbĩkaa ĩũlũ woo; na anene moo nĩmameaĩaa. 43#Mko 9.35.Ĩndĩ ũu tiw’o katĩ wenyu: ĩndĩ o ũla ũkwenda kwĩthĩwa e mũnene katĩ wenyu, akeethĩwa e mũthũkũmi wenyu; 44na o ũla ũkwenda kwĩthĩwa wa mbee katĩ wenyu, akeethĩwa e ngombo ya onthe. 45Nũndũ o na Mwana wa mũndũ nake ndaaũka kũthũkũmwa, ĩndĩ nĩ kũthũkũma, na kũnengane thayũ wake wĩthĩwe wovosyo kwondũ wa aingĩ.
Kũvow’a kwa Valitimeo
(MATHAYO 20.29–34; Luka 18.35–43)
46Na mavika Yeliko: na akyuma Yeliko, vamwe na amanyĩw’a make na ĩkomano inene, Valitimeo, mwana wa Timeo, mũvoyi kĩlilinda, ailyĩ ũtee wa nzĩa. 47Na eew’a kana nĩ Yesũ Mũnasaleti, ambĩlĩlya kũneena na wasya mũnene, na kwasya, Yesũ, mwana wa Ndaviti, mbĩw’ĩa tei. 48Na aingĩ mamũkan’ya, nĩ kana avindye: ĩndĩ ookĩlya wasya mũno mũnene mbee, We mwana wa Ndaviti, mbĩw’ĩa tei. 49Na Yesũ aũngama, na asya, Mwĩtei. Na mamwĩta mũvoyi ũla kĩlilinda, mamũtavya, Ĩthĩwa na ũtanu: ũkĩla, nũnũũkwĩta. 50Nake alekya ngũa yake nthĩ, athaanyũka, na ooka vala ve Yesũ. 51Na Yesũ amũsũngĩa, asya, Wĩenda ngwĩke ata? Na ũsu kĩlilinda amwĩa, Lavai, nĩenda kwona. 52Na Yesũ amwĩa, Enda; mũĩkĩĩo wakũ nĩwakũvosya. Na oyu anengwa kwona, na amũatĩĩa Yesũ nzĩanĩ.
Currently Selected:
MALIKO 10: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
