MALIKO 11
11
Kũlika kwa ndaĩa kwa Yesũ Yelusaleme
(MATHAYO 21.1–11; Luka 19.28–40; YOANA 12.12–19)
1Na yĩla mathengeeie Yelusaleme, kũvika Vethivake na Vethania, kĩĩmanĩ kya Mĩthata, atũma elĩ ma amanyĩw’a make, 2na amea, Endai mũsyĩ ũla ũmwelekele: na oyu mwavota nthĩnĩ waw’o, mũkoona ndena ya ĩng’oi yovetwe, ĩtaamba ũkũa mũndũ; mĩthasyei, mũmĩete. 3#Mko 14.14.Na ethĩwa mũndũ o na wĩva akamũkũlya, Mwĩĩka ũu nĩkĩ? Asyai, Mwĩaĩi e vata nayo; na akamĩtũnga mĩtũkĩ. 4Na mathi, moona ndena ya ĩng’oi yovetwe mũomonĩ nza, nzĩanĩ nene; na mamĩthasya. 5Na amwe ma ala maũngeme vo mamakũlya, Mwĩĩka ata, mũkĩthasya ndena ya ĩng’oi? 6Na mamea o tondũ Yesũ waisye: na mamaeka mathi. 7Na mamũetee Yesũ ĩla ndena, na mamilĩĩla ngũa syoo; nake amĩtũla. 8Na aingĩ malan’ya ngũa syoo nzĩanĩ; na angĩ malan’ya tũũvonge twa mĩtĩ, tũla matemete mĩũndanĩ. 9#Sav 118.25,26.Na ala maendie mbee, na ala maĩ ĩtina, mookĩlya wasya mũnene, makyasya, Hosana; nĩ mũathime ũla wũkĩte syĩtwanĩ ya Mwĩaĩi: 10Nĩ mũathime ũsumbĩ ũla wũkĩte, ũsumbĩ wa asa waitũ Ndaviti: Hosana, ku ĩũlũ mũno.
11Na avota Yelusaleme na alika ĩkalũnĩ; na asyaangya syĩndũ syonthe ngalĩ syonthe, nũndũ kwaĩ ĩvinda ya wĩoo, aumaala athi Vethania vamwe na ala ikũmi na elĩ.
Mũkũyũ nthata
(MATHAYO 21.18–19)
12Na ũnĩ ũsu, mauma Vethania, eew’a nzaa. 13#Lk 3.9; 13.6–9.Na oona mũkũyũ wĩ matũ wĩ kũasa, athi kũsisya kana nĩwĩthĩa wĩ na kĩndũ: na avika vo ndaaona kĩndũ ate o matũ; nũndũ kũtyaĩ ĩvinda ya makũyũ. 14#Mko 11.20.Na asũngĩa, awĩa, Kuma ũmũnthĩ vati mũndũ ũkaya ũsyao waku o na tene na tene. Naamanyĩw’a make meew’a ũu.
Yesũ aithesya ĩkalũ
(MATHAYO 21.12–17; Luka 19.45–48; YOANA 2.13–22)
15 #
Yoa 2.14–16. Na mavika Yelusaleme: nake avota ĩkalũnĩ, na ambĩlĩlya kũmakuthũa ala mathooasya na ala mathooaa ĩkalũnĩ, na ang’uthũlanga mesa sya ala meũvunzya mbesa, na ivĩla sya ala meũthoosya mavũĩ; 16na ndaaĩtĩkĩla mũndũ o na wĩva avĩtĩlye mũio ĩkalũnĩ. 17#Isa 56.7; Yel 7.11.Na amamanyĩsya aimea, Kũiandĩkĩtwe, Nyũmba yakwa ĩkeetwa nyũmba ya ũvoyea nĩ mbaĩ syonthe? Ĩndĩ inyw’ĩ mũmĩtw’ĩte ngunga ya avutani. 18Na athembi anene na aandĩki meew’a ũu, mamantha ũndũ matonya kũmũaa: nũndũ nĩmamũkĩie, nĩkwĩthĩwa ĩkomano yonthe yaseng’iw’e nĩ ũmanyĩsyo wake.
19Na kĩla mũthenya kwavika wĩoo aumaa ndũanĩ.
Ũtonyi wa mũĩkĩĩo
(MATHAYO 21.20–22)
20 #
Mko 11.14. Na kĩoko mavĩtĩte moona ũla mũkũyũ wũmĩte kuma mĩĩnĩ. 21Na Vetelo alilikana, amwĩa, Lavai, sisya, mũkũyũ ũla ũnawĩvĩkie nĩwũmie. 22#Yoa 14.1.Na Yesũ asũngĩa, amea, Ĩthĩwai na mũĩkĩĩo wa Ngai. 23#Mt 17.20; Lk 17.6.Nĩ w’o nĩngũmwĩa. O ũla ũkatavya kĩĩma kĩĩ, Kuwa nokĩkw’a ũkanganĩ; o na ndakethĩwa na nzika ngoonĩ yake, ĩndĩ akĩtĩkĩla kana ũndũ ũnũkwasya nũkwĩkwa; ũsu akeekwa ũu. 24#Mt 7.7; Yoa 14.13; 16.23.Kwondũ wa ũu nĩngũmwĩa, Maũndũ onthe o ala mũkwĩtya mũkĩvoya, ĩtĩkĩlai kana nĩmũũmosa na mũkeethĩwa mwĩ namo. 25#Mt 5.23.Na o yĩla mũkũũngama, mũkĩvoya, mũekeei, ethĩwa mwĩ ũndũ na mũndũ; nĩ kana Ĩthe wenyu ũla wĩ ĩtunĩ amũekee inyw’ĩ mavĩtyo menyu. 26#Mt 6.14,15.(Ĩndĩ mwalea kũekea angĩ mavĩtyo, o na Ĩthe wenyu ũla wiĩtũndakamũekea inywĩ mavĩtyo menyu.)
Yesũ aikũlw’a vala ũkũmũ wake wumaa
(MATHAYO 21.23–27; Luka 20.1–8)
27Na mooka ĩngĩ Yelusaleme: na aitambũka ĩkalũnĩ, athembi anene, na aandĩki, na atumĩa mooka vala ũĩ, 28na mamũkũlya, Wĩkaa maũndũ aa na ũkũmũ wĩva? Kana nũũ ũkũnengete ũkũmũ kwĩka maũndũ aa? 29Na Yesũ amea, Nakwa nĩngũmũkũlya ũkũlyo ũmwe, nenyu nzũngĩai, nakwa nĩngũmũtavya ũkũmũ ũla ũtumaa nĩka maũndũ aa. 30Ũvatisi wa Yoana waumie ĩtunĩ kana waumie andũnĩ? Nzũngĩai. 31Na masũanĩa ene kwa ene, makyasya, Ethĩwa nĩtũkwasya, Waumie ĩtunĩ; nake akasya, Nĩkĩ ĩndĩ mũtaamwĩtĩkĩla? 32Ĩndĩ ethĩwa nĩtũkwasya, Waumie andũnĩ — nĩmakĩaa andũ: nũndũ andũ onthe nĩmeesĩ Yoana nĩ mwathani wa w’o. 33Na mamũsũngĩa Yesũ masya, Tũtyĩsĩ. Na Yesũ amea, O nakwa ndimũtavya ũkũmũ ũla ũtumaa nĩka maũndũ aa.
Currently Selected:
MALIKO 11: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
