MALIKO 16
16
Kũthayũũka kwa Yesũ
(MATHAYO 28.1–10; Luka 24.1–12; YOANA 20.1–10)
1Na mũthenya wa savato wathela, Meli Makatalene, na Meli inyia wa Yakovo, na Salome, mathooa mĩtĩ yĩ mũuke mũseo, nĩ kana maende mamũvake. 2Na kĩoko tene, mũthenya wa mbee wa kyumwa, mathi mavika mbũanĩ syũa yĩkyuma. 3Na maneenan’ya ene kwa ene, Nũũ ũla ũnũũtũvingilitĩlya ĩvia yume mũomonĩ wa mbũa? 4Na mookĩlya metho, moona kana ĩvia nĩyĩvingilitilw’e: nũndũ yaĩ ĩnene mũno. 5Na makĩlika mbũanĩ, moona mwanake ailyĩ ngalĩ ya kw’oko kwa aũme, ekĩĩte ngũa nzaũ ndasa; na maseng’a. 6Na amea, Mũikaseng’e; mwĩmantha Yesũ Mũnasaleti, ũla ũnambiwe; nũthayũũkĩte; nde vaa: sisyai, vandũ vala manamwiĩte! 7#Mko 14.28.Ĩndĩ endai, mũkamatavye amanyĩw’a make na Vetelo, atĩĩ, Etongosya mbee wenyu kũthi Kalilii: nĩkw’o mũkamwona, o tondũ wamũtavisye. 8Na maumaala mbũanĩ, masemba; nũndũ makwatiwe nĩ kũtetema na kũseng’a: o na matyaatavya mũndũ ũndũ; nũndũ nĩmakĩaa.
Maumĩla angĩ ma Yesũ
(MATHAYO 28.16–20; Luka 24.13–39; YOANA 20.11–23)
9 #
Lk 8.2; Yoa 20.11–18. Na Yesũ athayũũka kĩoko tene, mũthenya wa mbee wa kyumwa, amba ũmumĩlĩla Meli Makatalene, ũla waumiw’e nĩwe ndaimoni mũonza. 10Nake athi amatavya ala maĩ vamwe nake ũvoo, me na kĩmeto na kĩĩo. 11Nao meew’a kana e thayũ, na nĩwoniwe nĩwe, malea kwĩtĩkĩla.
12 #
Lk 24.13–35. Na ĩtina wa maũndũ asu amaumĩlĩla andũ elĩ moo, e na mũvw’ano ũngĩ, maendete na nzĩa makĩthi na ku ndee. 13Nao mathi na matavya ala angĩ: o na asu mainametĩkĩla.
14 #
1 Ako 15.5. Na ĩtina amaumĩlĩla ala ĩkũmi na ũmwe mailyĩ makĩya; na amakan’ya nũndũ wa kũlea kwĩtĩkĩla kwoo na nũndũ wa wũmũ wa ngoo syoo, nũndũ mainametĩkĩla ala mamwonie ĩtina wa kũthayũũka kwake. 15#Mt 28.18–20.Na amea, Endai inyw’ĩ nthĩ yonthe, mũkaitavye syũmbe syonthe ũvoo mũseo. 16#Meko 2.38.Ũla ũnũkwĩtĩkĩla na kũvatiswa akatangĩĩwa; ĩndĩ ũla ũtekwĩtĩkĩla akasilĩlwa. 17#Meko 16.18; 2.4,11; 10.46.Na syama ii ikamaatĩĩa ala meĩtĩkĩla: syĩtwanĩ yakwa makaumya ndaimoni; makaneena na ithyomo nzaũ; 18#Lk 10.19; Meko 28.3–6; Yak 5.14,15.makakwata nzoka, na ethĩwa makanyw’a kĩndũ kyũaa, kĩĩkamathũkya nongi; makamailĩĩla moko ala awau, na makavoa.
Kwambata Kwa Yesũ ĩtunĩ
(Luka 24.50–53; MALIKO 1.9–11)
19 #
Lk 24.50–53; Meko 1.4–11; 1 Tim 3.16; Sav 110.1; Meko 7.55; 2 Asu 2.11. Na ĩndĩ Mwĩaĩi Yesũ amina kũneena nao, atwawa ĩũlũ ĩtunĩ, na ekala nthĩ ngalĩ ya kw’oko kwa aũme kwa Ngai. 20#Aevl 2.4.Nao mathi, matavan’ya ũvoo mũseo kũndũ kw’onthe, Mwĩaĩi akĩtethya wĩa vamwe nao, na akĩlũlũmĩlya ĩla ndeto na syama ila syaendanasya nayo. Ameni.
Currently Selected:
MALIKO 16: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
