MALIKO 15
15
Yesũ e mbee wa Vilato, ngavana wa Lomi
(MATHAYO 27.1–2,11–26; Luka 23.1–5,13–25; YOANA 18.28—19.16)
1 #
Mt 27.1–2; Lk 22.66; 23.1; Yoa 18.28. Na oyu kĩoko athembi anene vamwe na atumĩa na aandĩki, na nzama yonthe, masũanĩa ene kwa ene, na mamwova Yesũ, na mamũtwaa, na mamũnengane kwa Vilato. 2Na Vilato amũkũlya, We nue Mũsumbĩ wa Ayuti? Na asũngĩa, amwĩa, We nĩwaneena. 3Na athembi anene mamũvinganĩsya na maũndũ maingĩ. 4Na Vilato amũkũlya ĩngĩ, akyasya, Ndũsũngĩa ũndũ? Sisya maũndũ ũndũ meana ala meũkũvinganĩsya namo. 5#Mko 14.61; Isa 53.7.Ĩndĩ Yesũ ndaasũngĩa ũndũ ĩngĩ; na Vilato aseng’a.
6Na ĩndĩ ĩvinda ya mboka akothaa kũmathaĩsya mwovwa ũmwe, o ũla mamwĩtasya. 7Na vaĩ mũndũ ũmwe wetawa Valava wovetwe vamwe na ala mang’endie, andũ ala mooaie angĩ ũng’endũnĩ ũsu. 8Na yĩla ĩkomano yambata yambĩlĩlya kũmũvoya eke o tondũ wakothaa kũyĩka. 9Na Vilato amasũngĩa, akyasya, Mwĩenda nĩmũthaĩsya Mũsumbĩ wa Ayuti? 10#Yoa 11.48; 12.19; Mt 12.38.Nũndũ amanyie kana athembi anene manamũnenganie nũndũ wa kĩwĩu. 11Ĩndĩ athembi anene mathing’ĩĩsya ĩkomano yĩneene atĩ nĩ kavaa amathaĩsye Valava. 12Na Vilato asũngĩa ĩngĩ amea, Nĩmwĩke ata ĩndĩ ũũ mũũmwĩta Mũsumbĩ wa Ayuti? 13Nao maneena ĩngĩ na mawasya manene, Mwambe. 14Na Vilato amakũlya, Nĩkĩ, nĩ ũthũku mwaũ wĩkĩte? Ĩndĩ maneena na mawasya manene mũno, Mwambe. 15Na Vilato akyenda kũyendeesya ĩkomano, ayĩthaĩsya Valava, na amũkũna Yesũ na kĩvoko kyatũange, amũnengane ambwe.
Asikalĩ makĩmũthekeea Yesũ na kĩvũthya
(MATHAYO 27.27–31; YOANA 19.2–3)
16Na asikalĩ mamũtwaa Yesũ nthĩnĩ wa nza, na vo nĩ kĩsilĩlonĩ, na moomban’ya nguthu yonthe ya asikalĩ. 17Na mamwĩkĩa ngũa ĩilyĩ ta ndune, na mavĩlangan’ya ngovia ya mĩw’a, mamwĩkĩa mũtwe wake; 18na mambĩlĩlya kũmũkethya, Nũvoo, Mũsumbĩ wa Ayuti! 19Na mamũkũna mũtwe na mũangi, na mamũtw’ĩla mata, na matulya ndu mamũthaitha. 20Na mamina ũmũthekeea na kĩvũthya, mamumya ĩla ngũa ĩilyĩ ta ndune, mamwĩkĩa ngũa syake. Na mamumaalya mamwambe.
Kwambwa kwa Yesũ
(MATHAYO 27.32–44; Luka 23.26–43; YOANA 19.17–27)
21 #
Alo 16.13. Na mamũkwata mũndũ avĩtĩte, aumĩte ũtee wa ndũa, wetawa Simoni Mũkulene, ĩthe wa Alesanda na Luvusi, athi nao, nĩ kana amũkuĩe ngelan’yo yake.
22Na mamũtwaa vandũ vetwa Kolokotha, ũalyũlo wayo nĩ, Vandũ va kĩng’ala. 23#Sav 69.21.Na mamũnenga mbinyu ĩvũlanĩtw’e na manemane: ĩndĩ ndaaosa. 24#Sav 22.18.Na mamwamba, na maaan’ya ngũa syake, makĩlimana, ũndũ kĩla mũndũ wĩosa. 25Na kwaĩ saa itatũ, na mamwamba. 26Na ũandĩko wa kũvinganĩw’a kwake nĩwaandĩkiwe ĩũlũ, MŨSUMBĨ WA AYUTI. 27Na mamwamba vamwe na avutani elĩ; ũmwe ngalĩ ya kw’oko kwake kwa aũme, na ũmwe ngalĩ ya kw’oko kwake kwa aka. 28Na ũandĩko weanĩw’a ũla waĩtye, Akatalwa vamwe na avĩtan’ya. 29#Sav 22.7; 109.25; Mko 14.58.Na ala mavĩtaa nzĩanĩ mamũuma, makĩthingithya mĩtwe yoo, makyasya, A! We ũla wanangaa ĩkalũ, noiyaka na mĩthenya ĩtatũ, 30ĩtangĩĩe mwene, noitheea wume ngelan’yonĩ. 31No ta ũu ala athembi anene makĩmũthekeea na kĩvũthya ene kwa ene, vamwe na aandĩki, masya, Nĩwatangĩĩe angĩ; ndatonya kwĩtangĩĩa mwene. 32#Mt 16.1,4.Klĩsto, Mũsumbĩ wa Isilaeli, natheee yu aume ngelan’yonĩ, nĩ kana twone na kwĩtĩkĩla. Na ala mambiwe vamwe nake mamũvũthya.
Kĩkw’ũ kya Yesũ
(MATHAYO 27.45–56; Luka 23.44–49; YOANA 19.28–30)
33 #
Amo 8.9. Na syũa yaũngama, kwatulya kĩvindu nthĩ yonthe kũvika saa kenda. 34#Sav 22.1.Na saa kenda Yesũ aneena na wasya mũnene, Eloi, Eloi, lama savakathani? Ũalyũlo wayo nĩ, Ngai wakwa, Ngai wakwa, ũndekee kĩ? 35Na amwe ma ala maũngeme vakuvĩ, meew’a ũu, masya, Sisyai, emwĩta Eliya. 36#Sav 69.21.Na ũmwe asemba, na anyw’ĩthya sivanzi siki yakola, na amĩkĩa mũanginĩ, na amũnenga avivite, akyasya, Ekai; tũsisye kana Eliya nũnũkũka kũmumya. 37Na Yesũ aneena na wasya mũnene, na aumya veva. 38Na ngũa ya tũtũ ya ĩkalũ yatembũka ilungu ilĩ kuma ĩũlũ kũvika nthĩ. 39Na ũla mũnene wa asikalĩ ĩana, ũla waũngeme amwelekele, oona kana nĩwaumya veva ta ũũ, asya, Nĩ w’o mũndũ ũũ eĩ Mwana wa Ngai. 40#Lk 8.2,3.Na vaĩ aka nao makĩsisya me kũasa: na amwe moo maĩ Meli Makatalene, na Meli, inyĩa wa Yakovo ũla mũnini na wa Yose, na Salome; 41asu mamũatĩĩaa yĩla waĩ Kalilii na kũmũthũkũmaa; na aka angĩ aingĩ ala mambatie vamwe nake kũvika Yelusaleme.
Kũthikwa kwa Yesũ
(MATHAYO 27.57–61; Luka 23.50–56; YOANA 19.38–42)
42Na kwavika wĩoo, nĩkwĩthĩwa nĩ Ũseũvyo, nĩw’o mũthenya ũla ũatĩĩwe nĩ savato, 43kwathi Yosevu wa Alimathia, mũndũ wa nzama wĩ ndaĩa, nake mwene nĩweteele ũsumbĩ wa Ngai; na athi na ũnyiaukwa Vilato, amwĩtya mwĩĩ wa Yesũ. 44Na Vilato aseng’a ethĩwa nũminie kũkw’a: na amwĩta ũla mũnene wa asikalĩ ĩana, amũkũlya kana nũkwie tene. 45Na amanyĩthw’a nĩ ũla mũnene wa asikalĩ ĩana, amũnenga Yosevu ũla mwĩĩ. 46Na athooa ngũa ya katane, na amumya nthĩ, na amũlingĩla ĩla ngũa ya katane, na amwia mbũanĩ ĩla yasĩtwe ĩvianĩ ĩnene; na avingilitya ĩvia mũomonĩ wa mbũa. 47Na Meli Makatalene na Meli inyia wa Yose moona vala waiiwe.
Currently Selected:
MALIKO 15: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
