OMOBARO 4
4
Emeremo y’Abakohati
1Omonene agakwana na Musa na Haroni, akabatebia, 2“Kora omobaro bw’Abalawi baria bare be chiamate chia Kohati, eamate ase eamate, na enyomba ase enyomba, 3abwo bare egati y’emiaka emerongo etato na emerongo etano, abwo bonsi baranyare gokora emeremo ase Eema y’Omosangererekano. 4Emeremo Abakohati barakore agwo ase Eema eria nokorenda ebinto bire ebichenu mono.
5“Ekero abanto barabe bakomanora na koimoka korwa ase ebitwori, Haroni amo nabamura baye babe bagosoa ase Eema ime, basungore egetambaa keria gekengete Esanduku eria ere ne chibao chirikire oborori, na gotuba Esanduku eria negetambaa ekio. 6Naende batube egetambaa ekio ne risankwa ri’eng’iti ya rooche, na igoro ase risankwa erio baare egetambaa kere buru kegima. Erio basoyie emiaro y’okobogoreria Esanduku eria.
7“Igoro ase emesa y’emegati ekoruegwa ase Omonene baare egetambaa kere buru kegima, naende babekeo chinteru, ne chisani ase ubani, amo nebitaabo na ebitoono, ase ebio bagochia koumora okoruegwa kw’ebinyugwa. Emegati ekoruegwa botambe ase Omonene ebekweo boigo. 8Baare egetambaa ekebariri igoro ase ebinto ebio, bagetube ne risankwa ri’eng’iti ya rooche, na basoyie emiaro y’okobogoreria emesa eria.
9“Erio baimokie egetambaa kere buru kegima, batube ekebekerero gie chitaya amo ne chitaya chiaye, na ebinachi, ne chindogio chiaye, ne chichuba chire namaguta ’amazeituni, ebinto bigokorerwa ase emeremo y’obokuani. 10Nababeke ekebekerero ekio amo nebikorero biaye ase omobuko bwe risankwa ri’eng’iti ya rooche, na kobibeka ase ekebogorerio.
11“Naende baare egetambaa kere buru kegima igoro ase egesasimero keroisirie korwa ase etahabu, na bagetube ne risankwa ri’eng’iti ya rooche; erio basoyie emiaro y’okobogoreria egesasimero keria. 12Nabaimokie ebinto bionsi bigokorerwa ase emeremo agwo ase Obomenyo Obochenu. Babibeke ime ase egetambaa kere buru kegima; erio babitube ne risankwa ri’eng’iti ya rooche na kobibeka ase ekebogorerio. 13Barabwo babuuche ribu, naende batube egesasimero negetambaa kere monyinga. 14Igoro ase egesasimero ekio babeke ebikorero bionsi ebio bigokorerwa ase ogosasima: chindogio chi’okorenta omorero, ne chigami, na ebichiko, ne chisani, naende baare risankwa ri’eng’iti ya rooche igoro ase ebio bionsi, babitube. Erio basoyie emiaro y’okobogoreria egesasimero keria. 15Ekero engaki eraike, abanto barabe bakomanora na koimoka korwa ase ebitwori, na ekero Haroni na abamura baye bakoorire gotuba Eema y’Omosangererekano, amo nebinto bionsi bireo, Abakohati bachiche babogorie ebinto ebi ebichenu, korende tibabikuna. Baise kobikuna, nigo barakwe.
“Emeremo y’okobogoria ebinto ebio bi’Eema y’Omosangererekano nigo erabe ey’Abakohati.
16“Eleazari, omomura o Haroni, nere oratenenere amaguta e chitaya, na ubani egotioka buya, na okoruegwa kw’endagera gwa kera rituko, na amaguta akweakwa. Ase igo emeremo yaye ebe ey’okorenda Obomenyo Obochenu, na ebinto bionsi ebichenu, na ebinto bionsi ebichenu ebire imeo.”
17Omonene agatebia Musa na Haroni, 18“Timotiga abanto be chiamate chia Kohati basirigwe korwa ase Abalawi. 19Ase ayio, ekero barabe bagoika ang’e nebinto biria ebichenu mono, Haroni na abamura baye basoe aroro, bae kera oyomo obo emeremo, na komotebia eki arabe ogokora na kobogoria. Erio nario barabe moyo, tibakwa. 20Korende Abakohati baise gosoa na korora ebinto biria ebichenu, nonya netagika ensinini, nigo barakwe.”
Emeremo y’Abagerisoni
21Omonene agatebia Musa, 22“Kora omobaro bw’Abalawi baria bare b’ororeria rwa Gerisoni, eamate ase eamate, na enyomba ase enyomba. 23Orike abasacha bonsi abare egati y’emiaka emerongo etato na emerongo etano, abwo bonsi baranyare gokora emeremo ase Eema y’Omosangererekano. 24Eye nero emeremo abanto be chiamate chia Gerisoni barakore naende buna barabe bakobogoria ebinto ebi: 25Barabwo mbabogorie ebitambaa bi’Obomenyo Obochenu amo nebitubo bi’Eema eria, ne risankwa ri’eng’iti ya rooche rikobituba, na egetambaa ki’egesoero ki’Eema eria, 26na ebitambaa bi’eraaro eetanaine Obomenyo boria na egesasimero, na ebitambaa bi’egesoero ki’eraaro, ne chingori chionsi chireo amo nebikorero bigokorerwao. Barabwo bakore emeremo ende yonsi eganeirie gokorwa ase ebinto ebio. 27Haroni na abamura baye nabwo barachike Abagerisoni ebinto bionsi barabe bakobogoria, na onsi aya barakore; inwe mobatige batenenere ebinto bionsi barabe bakobogoria. 28Itamari, omomura o Haroni omokuani, nere oratenenere emeremo abanto be chiamate chi’Abagerisoni barabe bagokora agwo ase Eema y’Omosangererekano.”
Emeremo y’Abamerari
29Omonene agatebia Musa, “Kora omobaro bw’Abalawi baria bare ab’ororeria rwa Merari, eamate ase eamate na enyomba ase enyomba. 30Orike abasacha bonsi abare egati y’emiaka emerongo etato na emerongo etano, abwo bonsi baranyare gokora emeremo ase Eema y’Omosangererekano. 31Emeremo yabo ase Eema eria ebe ey’okobogoria ebinto ebi: Chibao chi’Obomenyo Obochenu, na emeriibo, ne chisiiro amo ne chinterekerero chiabo, 32ne chisiiro chi’eraaro amo ne chinterekerero chiabo, na ebirochi, ne chingori, amo nebikorero bionsi bigokorerwao. Ewatore ebinto bionsi barabwo barache kobogoria. 33Eye nero emeremo y’abanto be chiamate chia Merari barabe bagokora agwo ase Eema y’Omosangererekano, inse y’oboteneneri bwa Itamari, omomura o Haroni omokuani.”
Omobaro bw’Abalawi
34Musa, na Haroni, na abaraai b’omoganda bagakora omobaro bw’ororeria rwa Kohati, eamate ase eamate, na enyomba ase enyomba. 35Bakarika abasacha bonsi abaare egati y’emiaka emerongo etato na emerongo etano, abwo baare konyara gokora emeremo ase Eema y’Omosangererekano. 36Abanto abwo barigetwe ase chiamate chiabo nigo barenge chilifu ibere, na amagana atano na abere, na emerongo etano (2,750). 37Oyio noro omobaro bwe chiamate chi’Abakohati abwo baare konyara gokora emeremo agwo ase Eema y’Omosangererekano, abwo Musa na Haroni babarete, buna Omonene achigete Musa.
38Oyo noro omobaro bw’ororeria rwa Gerisoni, eamate ase eamate, na enyomba ase enyomba. 39Abanto abwo baare egati y’emiaka emerongo etato na emerongo etano, naende barenge konyara gokora emeremo ase Eema y’Omosangererekano, bakarikwa. 40Abwo nigo barenge abanto chilifu ibere, na amagana atano na rimo, na emerongo etato (2,630). 41Oyo noro omobaro bwe chiamate chi’Abagerisoni, abarigetwe, abwo baare konyara gokora emeremo ase Eema y’Omosangererekano, abwo Musa na Haroni babarete, buna Omonene achigete.
42Oyo noro omobaro bw’ororeria rwa Merari, eamate ase eamate, na enyomba ase enyomba. 43Abasacha abwo baare egati y’emiaka emerongo etato na emerongo etano, naende barenge konyara gokora emeremo ase Eema y’Omosangererekano, bakarikwa. 44Abwo nigo barenge abanto chilifu isato, na amagana abere (3,200). 45Oyo noro omobaro bwe chiamate chi’Abamerari, abwo Musa na Haroni babarete, buna Omonene achigete Musa.
46Musa, na Haroni, na abaraai b’Abaisraeli nigo babarete Abalawi bonsi eamate ase eamate, na enyomba ase enyomba. 47Abwo abaare egati y’emiaka emerongo etato na emerongo etano, naende barenge konyara gokora emeremo ase Eema y’Omosangererekano, 48nigo barenge abanto chilifu isano na isato, na amagana atano, na emerongo etano na etato (8,580).
49Abwo bonsi nigo babaretwe buna Omonene achigete goetera ase Musa. Kera omonto agatebigwa emeremo arakore na ebinto arabogorie buna Omonene achigete Musa.
Currently Selected:
OMOBARO 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
