OMOBARO 5
5
Abanto batachenegeti
1Omonene agakwana na Musa, akamotebia, 2“Bachike Abaisraeli barusie korwa ase ebitwori biabo kera omonto obwate oborwaire bwa ukoma, na omonto okorua amache anga buna chimengere, na omonto onde bwensi bwesoyirie ase ogotacheneka ase ogokuna egetondo. 3Goika morusie korwa ase ebitwori abasacha na abakungu abwo babeire abatachenegeti babeere isiko, erinde tibabaisa gokora ebitwori biabo bibe bitachenegeti, agwo ase inche imenyete ase egati y’abanto baane.” 4Abaisraeli bagakora buna Omonene atebetie Musa. Bakarusia korwa ase ebitwori abanto abwo.
Okorongeyia ogokora okobe
5Naende Omonene agakwana na Musa, akamotebia, 6“Tebia Abaisraeli ng’a, ekero omonto omosacha, gose omokungu, arakore ebibe binde bionsi abanto bagokora ase ogotaba abegenwa ase Omonene, na omonto oria orabe omomochi, 7omonto oyio goika aorokie ebibe biria. Boigo airanie ase omonto oria aurete rigori ri’enibo eyio amourete, naende amente eyemo ya isano ye rigori ri’egento ekio. 8Korende onye omonto oria okure, naende omoamate oye tari okoiranerigwa egento ekio kiairetwe, rirorio kerentwe ase Omonene kebe eki’omokuani. Amo nayio omonto oyio amente emingichi erakorerwe okobwatanigwa asare. 9Kera okoruegwa kw’ebinto ebichenu Abaisraeli bararente ase omokuani, ebinto ebio nabibe ebiaye. 10Ebinto bionsi omonto araatanane koba ebichenu nigo birabe ebi’omokuani oyio okobiegwa.”
Abakungu bagokagerwa nabasacha babo ng’a tibari abegenwa
11Naende Omonene agakwana na Musa, akamotebia, 12“Tebia Abaisraeli: Ebaise koba ng’a omokungu bw’omonto obeire otari omwegenwa’ asare. 13Omonto omoao kararare nere ase obotomani, nonya ayio karabe abisekanete ase omosacha bw’omokungu oyio, omokungu oyio bwekorire omosaria, nonya kirori onde tari okomoteba ekiagera tabwatetwe okobokora. 14Omosacha oye karabe nomoika bwe risemi akagere mokaye ng’a bwekorire omosaria, nere abe okorete ayio, gose tayakorete, 15omosacha oye amoire ase omokuani. Boigo arue obosie bw’esairi ebimunu bibere, ase engencho y’omokungu oria. Taumora amaguta igoro y’okoruegwa okwo, gose ubani, ekiagera nokoruegwa ase engencho ye risemi riaye. Okwo nokoruegwa koragere okomocha koinyorwe.
16“Omokuani arente omokungu oria amobeke ase obosio bw’Omonene, 17aumore amache amachenu ase egetaabo ki’amaroba, naende aimokie amaroba korwa inse agwo ase Obomenyo Obochenu, ayabeke ime ase amache aria. 18Omokuani abeke omokungu oria ase obosio bw’Omonene, asansore etukia y’omotwe bw’omokungu oria, naende abeke okoruegwa koria gw’ekeinyorio ase amaboko ’omokungu oria. Omokuani omonyene abwate ase okoboko kwaye egetaabo kere namache amaroro, ayio akorenta okoragereria. 19Erio omokuani abeke omokungu oyio inse y’okoragererigwa, amotebie: Onye omonto omoao tararete naye, na igo tigwakorete obotomani ase ogotaba omwegenwa ase omosacha oo, rirorio amache aya amaroro akorenta okoragererigwa takonyara kogokorera bobe bonde. 20Korende onye gwatomanire nomonto omoao ase ogotaba omwegenwa ase omosacha oo, na gwekorire omosaria, 21(agwo omokuani abeke omokungu oyio inse y’okoragererigwa gw’okomotiania) rirorio Omonene nagere abanto bao bakoragererie na kogochaya, karakore enda yao egombae na kobimba. 22Tiga amache aya akorenta okoragereria kagosoa enda yao, ayekore ebimbe na kogombaa.”
Omokungu oria airanerie: Ee, ekeene, amina.
23“Erio omokuani arike amang’ana ayio ay’okoragereria okwo ime ase ebuku, naende ayasibie namache aria amaroro. 24Erio ae omokungu oria amache ayio anywe, na ekero amache aya amaroro asoire ase enda yaye arente okoragererigwa na obororo. 25Omokuani arusie korwa ase okoboko kw’omokungu oria okoruegwa kwe risemi, na kogosungusia ase obosio bw’Omonene. Nyuma y’ayio akorente ase egesasimero. 26Naende korwa ase okoruegwa okwo aimokie goke, goichire roe, kobe ekeinyorio ng’a okoruegwa okwo nokw’Omonene, na kogosambera ase egesasimero, na nyuma y’ayio ae omokungu oria amache aria anywe. 27Onye omokungu oria tabete omwegenwa ase omosacha oye, korende bwekorire omosaria, amache aya amaroro akorenta okoragererigwa akore enda yaye ebimbe, naende egombae. Ase enchera eyio omokungu oyio abe ekiorokererio gi’okoragererigwa kegwatorwa ase egati y’abanto baye. 28Onye omokungu oria takorete obotomani korende nigo are omoikeranu, rirorio tagokorerwa bobe, otatiga aibore abana.
29“Oko nogochika ase amang’ana e risemi, ekero omokungu atari omwegenwa ase omosacha oye, korende akore obotomani na gwekora omosaria. 30Naboigo ekero omosacha arabe nomoika bwe risemi na gokagera mokaye ng’a nomotomani, omosacha oria amorente ase obosio bw’Omonene, na omokuani akore onsi aya achikire. 31Omosacha oria takoba nokomocha, korende onye mokaye okorire ogosaria okwo, goika aegwe egesusuro.”
Currently Selected:
OMOBARO 5: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
