OMOBARO 3
3
Abamura ba Haroni
1Aba nabwo abanto b’ororeria rwa Haroni, na orwa Musa, ase engaki eria Omonene akwanete na Musa, agwo ase egetunwa gia Sinai.
2Aya naro amarieta ’abamura ba Haroni: Nadabu, omomura oye omotangi, na Abihu, na Eleazari, na Itamari. 3Abamura aba ba Haroni nabwo baagetwe amaguta na gwatananwa ase emeremo y’obokuani. 4Korende Nadabu na Abihu, barabwo bagakwera ase obosio bw’Omonene, ekero bamoruerete omorero bw’engencho eng’ao etachikiri, agwo ase erooro ya Sinai. Barabwo tibabwate abana. Ase ayio Eleazari na Itamari bakagenderera gokora emeremo y’obokuani ase amatuko onsi Haroni ise arenge moyo.
Emeremo y’Abalawi
5Omonene agakwana na Musa, akamotebia, 6“Renta abanto b’egesaku kia Lawi, erinde obabeke bamokorere Haroni, omokuani. 7Abalawi abwo mbakorere Haroni emeremo, boigo bakorere omoganda bwonsi agwo ase Eema y’Omosangererekano, ekero bagokora emeremo ase Obomenyo Obochenu. 8Barabwo mbatenenere ebinto bionsi bire ase Eema y’Omosangererekano. Ase ogokora emeremo yonsi ase Obomenyo Obochenu nigo barabe bagokorera Abaisraeli bonsi. 9Haroni amo nabamura baye baegwe Abalawi buna ekeegwa korwa ase Abaisraeli. 10Obeke Haroni amo nabamura baye bakore emeremo y’obokuani, korende monto onde bwensi omoao aise gwesoyia ase emeremo eyio nigo araitwe akwe.”
11Naende Omonene agatebia Musa, 12“Rora, inche omonyene neatananerete Abalawi korwa ase Abaisraeli ribaga ri’abana abatangi. Abalawi mbabe abaane, 13ekiagera abana abatangi bonsi nabaane. Ase rituko riria naitete abana abatangi, ne ching’iti chintangi, agwo Misiri, nigo neatananerete abana abatangi bonsi b’Abaisraeli babe abaane, ne ching’iti chintangi boigo. Inche ninche Omonene.”
Omobaro bw’Abaiawi
14Ekero Musa arenge agwo ase erooro ya Sinai, Omonene agakwana nere, akamotebia, 15“Bara Abalawi enyomba ase enyomba, na eamate ase eamate. Orike kera omonto omosacha okoorire omotienyi oyomo na goetania.” 16Erio Musa akababara, buna Omonene amochigete. 17Lawi nigo abwate abamura batato: Gerisoni, na Kohati, na Merari. 18Abamura ba Gerisoni nabwo Libini na Simei. 19Abana ba Kohati nabwo aba: Amuramu, na Isari, na Heburoni, na Usieli. 20Abana ba Merari nabwo Mali na Musi. Abanto abwo nigo barenge chisokoro chie chiamate chi’Abalawi, kera oyomo ase eamate yaye.
21Abanto b’eamate ya Libini na eya Simei, abwo nabwo barenge ab’ororeria rwa Gerisoni. 22Abanto abasacha, aba konya bakoorire omotiengi oyomo na goetania, nigo barenge chilifu isano na ibere, na amagana atano (7,500). 23Abanto be chiamate chi’Abagerisoni nigo barabe bagotoora ensemo ya bosongo nyuma y’Obomenyo Obochenu. 24Eliasafu, mosinto o Laeli, nere orabe omotang’ani bwe chiamate chi’Abagerisoni. 25Ase Eema y’Omosangererekano Abagerisoni nabwo barabe bakorenda Obomenyo obonyene, na ebimumeko biaye, na ebitambaa bi’egesoero ki’Eema eria. 26Naende babe bakorenda ebitambaa bigosungwa ase ogokenga eraaro, na ebitambaa bi’egesoero ki’eraaro eetanaine Obomenyo Obochenu, na egesasimero, ne chingori chiabo. Bakore emeremo ende yonsi eganeirie gokorwa ase ebinto ebio.
27Abanto b’eamate y’Amuramu, na eya Isari, na eya Heburoni, na eya Usieli; abwo nabwo barenge abanto b’ororeria rwa Kohati. 28Abanto abasacha, aba konya bakoorire omotienyi oyomo na goetania, nigo barenge chilifu isano na isato, na amagana atano na rimo (8,600). Abanto aba nabwo barabe bakorenda ebinto bire ase Obomenyo Obochenu. 29Barabwo nigo barabe bagotoora ensemo ya irianyi y’Obomenyo boria. 30Elisafani, mosinto bwa Usieli, nere orabe omotang’ani bw’egesaku ki’Abakohati. 31Barabwo nabwo barabe bakorenda ebinto ebi: Esanduku eria ere ne chibao chirikire okobwatana, na emesa, na ekebekerero gie chitaya, na ebisasimero, na ebikorero bionsi bi’Obomenyo boria, biria abakuani bagokorera emeremo, amo negetambaa gekengete Aase Aachenu Mono. Bakore emeremo ende yonsi eganeirie gokorwa ase ebinto ebio.
32Eleazari, omomura o Haroni omokuani, nere orabe omonene igoro ase abaraai b’Abalawi, naende omoteneneri bw’abanto barabe bagokora emeremo ase Obomenyo Obochenu.
33Abanto b’eamate ya Mali, na eya Musi abwo nabwo barenge abanto b’ororeria rwa Merari. 34Abanto abasacha, aba konya bakoorire omotienyi oyomo na goetania, nigo barenge chilifu isano nemo, na amagana abere (6,200). 35Barabwo nigo barabe bagotoora ensemo ya sugusu y’Obomenyo boria. Surieli, mosinto bw’Abihaili, nere orabe omotang’ani bw’abanto b’egesaku kia Merari. 36Abamerari nabwo barabe bakorenda ebinto ebi: chibao chi’Obomenyo Obochenu, na emeriibo, ne chisiiro, ne chinterekerero, amo nebikorero biabo bionsi. Bakore emeremo ende yonsi eganeirie gokorwa ase ebinto ebio. 37Nabwo naende babegetwe korenda chisiiro chi’eraaro amo ne chinterekerero chiabo na ebirochi, ne chingori chiabo.
38Musa na Haroni amo nabamura baye mbabe bagotoora kororia Obomenyo Obochenu ensemo ya moocha, bosio bw’Eema y’Omosangererekano. Barabwo nigo barabe bagokora emeremo eganeirie gokorwa ime y’Aase Aachenu, na gotenenera emeremo ende yonsi erakorerwe Abaisraeli. Omonto onde bwensi otaatananiri gokora emeremo eyio, korende aike ang’e ase Obomenyo Obochenu, nigo araitwe akwe. 39Abanto abasacha b’Abalawi, aba konya bakoorire omotienyi oyomo na goetania, abwo Musa na Haroni barigete, eamate ase eamate, buna Omonene abachigete, nigo barenge chilifu emerongo ebere na ibere (22,000).
Abalawi bakobekwa ribaga ri’abamura abatangi b’Abaisraeli
40Omonene agakwana na Musa, akamotebia, “Bara abanto abasacha abatangi, abakoorire omotienyi oyomo na goetania, obarike. 41Inche ninche Omonene. Ase ayio Abalawi babe abaane. Obanyatananere ribaga ri’abatangi bonsi b’Abaisraeli. Naboigo ne ribaga rie ching’iti chintangi chi’Abaisraeli onyatananere ching’iti chi’Abalawi.” 42Musa akabara na korika abatangi bonsi b’Abaisraeli, ne ching’iti chintangi, buna Omonene amochigete. 43Abanto bonsi abasacha abatangi aba konya bakoorire omotienyi oyomo na goetania nigo barenge chilifu emerongo ebere na ibere, na amagana abere, na emerongo etano na ebere, na batato (22,273).
44Naende Omonene agatebia Musa, 45“Ira Abalawi babe abaane ribaga ri’abanto abasacha abatangi b’Abaisraeli, naende oire ching’iti chi’Abalawi chibe echiane ribaga rie chingiti chintangi chi’Abaisraeli. Inche ninche Omonene. 46-47Abanto abasacha abatangi b’Abaisraeli nabange bare, mbaetanetie Abalawi ase amagana abere, na emerongo etano na ebere, na batato (273). Ase ayio oboorie kera oyomo obo ne chibesa chie chisekeli isano, koreng’ana ne chisekeli chigokorerwa ase Obomenyo Obochenu. (Esekeli eyemo nechigera emerongo ebere). 48Omoe Haroni amo nabamura baye chibesa echio chi’okobooria abatangi abwo baetanetie Abalawi.”
49Ase ayio Musa agasangereria chibesa chiria chiabooretie abanto baria barenge abange goetania baria babooretigwe ekiagera Abalawi babete ribaga riabo. 50Ase engencho y’abanto baria abatangi b’Abaisraeli, akanyora chibesa chie chisekeli elifu eyemo, na amagana atato, na emerongo etano nomo, na isano (1,365), koreng’ana ne chisekeli chigokorerwa ase Obomenyo Obochenu. 51Musa akaa Haroni amo nabamura baye chibesa chiria chi’okobooria, buna Omonene amochigete.
Currently Selected:
OMOBARO 3: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
