OMOBARO 2
2
Omoroberio bw’ebisaku ase egetwori
1Omonene agakwana na Musa na Haroni, akabatebia, 2“Ekero Abaisraeli baratoore, kera omonto abe inse y’ebendera y’ekeombe kiaye, na inse y’ekemanyererio ki’eamate yaye; batoore baetanane Eema y’Omosangererekano, ne chiema chi’abanto chirigererie Eema eria.
3“Abanto abaratoore ensemo ya moocha n’Abayuda, inse y’ebendera y’ekeombe kiabo. Nahasoni, mosinto bw’Aminadabu, nere orabe omotang’ani obo, 4na omoganda oye nigo ore nabanto chilifu emerongo etano na ebere na inye, na amagana atano na rimo (74,600). 5Abaratoore ang’e nabarabwo n’Abaisakaru. Netaneli, mosinto o Suari, nere orabe omotang’ani obo, 6na omoganda oye nigo ore nabanto chilifu emerongo etano na inye, na amagana ane (54,400). 7Naende abaratoore ensemo yabo n’Abasabuloni. Eliabu, mosinto o Heloni, nere orabe omotang’ani obo, 8na omoganda oye nigo ore nabanto chilifu emerongo etano na isano na ibere, na amagana ane (57,400). 9Abanto bonsi barikire, abare b’egetwori ki’Abayuda, ase ebiombe biabo, nigo bare chilifu rigana erimo na emerongo etano na etato na isano nemo, na amagana ane (186,400). Aba nabwo barabe bagotang’ana komanora kogenda orogendo.
10“Abanto abaratoore ensemo ya irianyi n’Abareuben, inse y’ebendera y’ekeombe kiabo. Elisuri, mosinto o Sedeuri, nere orabe omotang’ani obo, 11na omoganda oye nigo ore nabanto chilifu emerongo ene na isano nemo, na amagana atano (46,500). 12Abaratoore ang’e nabarabwo n’Abasimeoni. Selumieli, mosinto o Surisadai, nere orabe omotang’ani obo, 13na omoganda oye nigo ore nabanto chilifu emerongo etano na kianda, na amagana atato (59,300). 14Naende abaratoore ensemo yabo n’Abagadi. Eliasafu, mosinto o Reueli, nere orabe omotang’ani obo, 15na omoganda oye nigo ore nabanto chilifu emerongo ene na isano, na amagana atano na rimo, na emerongo etano (45,650). 16Abanto bonsi barikire, abare b’egetwori kia Reuben, ase ebiombe biabo, nigo bare chilifu rigana erimo na emerongo etano na eyemo, na amagana ane, na emerongo etano (151,450). Aba nabwo barabe aba kabere komanora kogenda orogendo.
17“Ekero abanto barabe bakogenda orogendo, Eema y’Omosangererekano nebe ekobogorigwa n’Abalawi, na barabwo babe gati‐gati y’ebiombe binde. Ase omoroberio oyo abanto mbabe bagotoora, naboigo barabe kobakogenda orogendo. Kera omonto abe ensemo yaye inse y’ebendera yaye.
18“Abanto abaratoore ensemo ya bosongo n’Abaefraimu, inse y’ebendera y’ekeombe kiabo. Elisama, mosinto bw’Amihudi, nere orabe omotang’ani obo, 19na omoganda oye nigo ore nabanto chilifu emerongo ene, na amagana atano (40,500). 20Abaratoore ang’e nabarabwo n’Abamanase. Gamalieli, mosinto o Pedasuri, nere orabe omotang’ani obo, 21na omoganda oye nigo ore nabanto chilifu emerongo etato na ibere, na amagana abere (32,200). 22Naende abaratoore ensemo yabo n’Ababenjamin. Abidani, mosinto o Gidioni, nere orabe omotang’ani obo, 23na omoganda oye nigo ore nabanto chilifu emerongo etato na isano, na amagana ane (35,400). 24Abanto bonsi barikire, abare b’egetwori gi’Efraimu, ase ebiombe biabo, nigo bare chilifu rigana erimo na isano na isato, ne rigana erimo (108,100). Aba nabwo barabe aba gatato komanora kogenda orogendo.
25“Abanto abaratoore ensemo ya sugusu n’Abadani, inse y’ebendera y’ekeombe kiabo. Ahieseri, mosinto bw’Amisadai, nere orabe omotang’ani obo, 26na omoganda oye nigo ore nabanto chilifu emerongo etano nomo na ibere, na amagana atano na abere (62,700). 27Abaratoore ang’e nabarabwo n’Abaaseri. Pagieli, mosinto bw’okirani, nere orabe omotang’ani abo, 28na omoganda oye nigo ore nabanto chilifu emerongo ene na eyemo, na amagana atano (41,500). 29Naende abaratoore ensemo yabo n’Abanafutali. Ahira, mosinto bw’Enani, nere orabe omotang’ani obo, 30na omoganda oye nigo ore nabanto chilifu emerongo etano na isato, na amagana ane (53,400). 31Abanto bonsi barikire, abare b’egetwori kia Dani, ase ebiombe biabo, nigo bare chilifu rigana erimo na emerongo etano na isano na ibere, na amagana atano na rimo (157,600). Aba nabwo barabe aba nyuma kegima komanora kogenda orogendo, babe inse y’ebendera y’ekeombe kiabo.”
32Aba nabwo Abaisraeli barigetwe korwa ase kera eamate, ekeombe ase ekeombe. Omobaro obo nigo ore chilifu amagana atano na rimo na isato, na amagana atano, na emerongo etano (603,550). 33Abalawi barabwo tibabaretwe amo n’Abaisraeli bande, ekiagera nabo Omonene konya achikire Musa.
34Abaisraeli bagakora onsi buna Omonene konya achikire Musa. Bagatoora inse ye chibendera chiabo, naende kobakogenda orogendo, bakagenda kera oyomo amo neamate yaye, na enyomba yaye.
Currently Selected:
OMOBARO 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020